လံာ်တၢ်ကဲထီၣ်အခီၣ်ထံး 15:14 - Sgaw Karen Common Bible

¹⁴ ဘၣ်ဆၣ်ဒီး, ယကစံၣ်ညီၣ်ပှၤတကလုာ်လၢအမၢကဲကုၢ်အဝဲသ့ၣ်, ဒီးတုၤအဝဲသ့ၣ်ဟးထီၣ်ကွံာ်လၢပှၤထံပှၤကီၢ်န့ၣ်အဝဲသ့ၣ်ကစိာ် ဃုာ်တၢ်ထူးတၢ်တီၤအါအါဂီၢ်ဂီၢ်န့ၣ်လီၤ.

လံာ်တၢ်ကဲထီၣ်အခီၣ်ထံး 15:14 Iomraidhean Croise

လံာ်တၢ်ကဲထီၣ်အခီၣ်ထံး 48:21

အန့ၣ်ဒီး, စီၤယၤကိာ်စံးဘၣ်စီၤယိၤသး, “ဒ်နထံၣ်အသိး, ယကသံဘူးထီၣ်လံ. ဘၣ်ဆၣ်ဒီး, ကစၢ်ယွၤကအိၣ်ဒီးနၤ, ဒီးကဆှၢကဒါက့ၤနၤဆူနမိၢ်ပၢ်ဖံဖုလၢပျၢၤတဖၣ်အကီၢ်န့ၣ် လီၤ.

လံာ်တၢ်ကဲထီၣ်အခီၣ်ထံး 50:24

အဝဲစံးဘၣ်အဒီပုၢ်ဝဲၢ်ခွါတဖၣ်, “ယကသံဘူးထီၣ်လံ. ဘၣ်ဆၣ်ကစၢ်ယွၤကအံးထွဲကကွၢ်ထွဲသုသပှၢ်ကတၢၢ်, ဒီးဆှၢထီၣ်သုလၢကီၢ်အံၤဆူကီၢ်တဘ့ၣ်လၢအဝဲဆိၣ်တ့ၢ်တၢ်သညူး သပှၢ်ဒီးစီၤအၤဘြၤဟၣ်, စီၤအံၤစဲးဒီးစီၤယၤကိာ်, အပူၤန့ၣ်လီၤ.”

စံးထီၣ်ပတြၢၤ 105:42

အဂ့ၢ်ဒ်အံၤ, အဝဲသ့ၣ်နီၣ်ထီၣ်က့ၤအတၢ်အၢၣ်လီၤအီလီၤစီဆှံ ဆူအခ့အပှၤစီၤအၤဘြၤဟၣ်န့ၣ်လီၤ.

စံးထီၣ်ပတြၢၤ 135:14

အဂ့ၢ်ဒ်အံၤ, ယွၤကစံၣ်ညီၣ်အိၣ်ပှိၤ အပှၤဂီၢ်မုၢ်လၢအတၢ်ကမၣ်တအိၣ်, ဒီးအိၣ်ဒီးတၢ်သးကညီၤအခ့အပှၤတဖၣ်န့ၣ်လီၤ.

စံးထီၣ်ပတြၢၤ 135:9

ဖဲန့ၣ်, အဝဲဒၣ်မၤတၢ်တၢ်ပနီၣ်လီၤလးတဖၣ်ဒီးတၢ်လီၤလိၢ် လီၤလးတဖၣ် လၢကစံၣ်ညီၣ်စီၤပၤဒီး အပဒိၣ်ပပှၢ်တဖၣ်အဂီၢ်လီၤ.

စံးထီၣ်ပတြၢၤ 51:4

ယမၤကမၣ်ဘၣ်တ့ၢ်လံနၤ, ထဲနၤတဂၤဧိၤ, ဒီးမၤတၢ်အၢလၢနမဲာ်ညါလံ. မၤသးဒ်န့ၣ်ဒီး, နမၤတၢ်တီတၢ်လိၤလၢ နတၢ်စံၣ်ညီၣ်ယၤအပူၤ ဒီးတၢ်ပာ်တၢ်ကမၣ်အလီၢ်တအိၣ်လၢ နတၢ်စံၣ်ညီၣ်အပူၤဘၣ်န့ၣ်လီၤ.

လံာ်တၢ်ဟးထီၣ်ကွံာ် 12:29

လၢဖးဖီမုၢ်န့ၣ်ယွၤမၤသံကွံာ်ကယဲၢ်ဖိခွါဝဲၢ်ကိတဖၣ်လၢ ကီၢ်အဲၤကူပတူးအပူၤ, စးထီၣ်လၢစီၤပၤအဖိခွါလၢအကထီၣ်က့ၤနီ, တုၤလၢပှၤဘၣ်တၢ်စၢဃာ်လၢဃိာ်ပူၤတဖၣ်အဖိဝဲၢ်ကိန့ၣ်လီၤ. ကယဲၢ်ဆၣ်ဖိကီၢ်ဖိအဖိဝဲၢ်ကိတဖၣ်စ့ၢ်ကီးဘၣ်တၢ်မၤသံ အီၤန့ၣ်လီၤ.

လံာ်တၢ်ဟးထီၣ်ကွံာ် 3:10

ဒီး, ခဲကနံၣ်အံၤ, ယဆှၢလီၤနၤဆူကီၢ်အဲၤကူပတူးအစီၤပၤဖၤ ရိၤအအိၣ်ဒ်သိးနကထုးထီၣ်ကွံာ်ယပှၤဂီၢ်မုၢ်ပှၤအံၣ်စရ့လးဖိ လၢကီၢ်အဲၤကူပတူးပူၤန့ၣ်လီၤ.”

မၤတၢ် 7:7

ဘၣ်ဆၣ်ဒီး, ယကစံၣ်ညီၣ်ပှၤလၢအမၢကဲကုၢ်အဝဲသ့ၣ်, ဒီးအဝဲန့ၣ်ဝံၤအလီၢ်ခံ, အဝဲသ့ၣ်ကဟးထီၣ်ကွံာ်လၢကီၢ်န့ၣ်အပူၤဒီးကဘူၣ်ထီၣ်ဘါ ထီၣ်ယၤဖဲတၢ်လီၢ်အံၤန့ၣ်လီၤ.’

လံာ်သိၣ်လီၤသီလီၤတၢ် 4:20

မ့မ့ၢ်, သုမ့ၢ်ပှၤဂီၢ်မုၢ်လၢအဝဲအုၣ်က့ၤခီၣ်က့ၤဝဲလၢကီၢ် အဲၤကူပတူးတခီ, လၢဖၣ်ကပူၤလၢအကဲၤကပျီၤအပူၤန့ၣ်လီၤ. အဝဲထုးထီၣ်ကွံာ်သုဒ်သိးကဒုးကဲထီၣ်သုလၢအပှၤဂီၢ်မုၢ်ဒ်သု မ့ၢ်တၢ်တနံၤအံၤအသိးန့ၣ်လီၤ.

လံာ်သိၣ်လီၤသီလီၤတၢ် 6:22

လၢပမဲာ်ချံဒၣ်ဝဲန့ၣ်ပထံၣ်ဘၣ်အဝဲမၤတၢ်လီၤလးတဖၣ်ဒီးမၤ ပျံၤမၤဖုးပှၤအဲၤကူပတူးဖိတဖၣ်, ဒီးအဝဲသ့ၣ်အစီၤပၤဒီးကယဲၢ်အပဒိၣ်ပပှၢ်တဖၣ်န့ၣ်လီၤ.

လံာ်စီၤယိၤၡူ 24:17

ယွၤပကစၢ်ယွၤမ့ၢ်ပှၤလၢအဒုးဟဲထီၣ်ပှၤလၢတၢ်ကဲကုၢ်လၢကီၢ်အဲၤကူပတူးအပူၤ, ဒီးပထံၣ်ဘၣ်တၢ်လီၤလးတဖၣ်လၢအမၤဝဲန့ၣ်လီၤ. အဝဲကဟုဘံၣ်ကယာ်ဘၢပှၤဖဲပလဲၤခီဖျိတၢ်လၢပှၤကလုာ်ခဲ လၢာ်အကျါန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 12:8

ဖဲစီၤယၤကိာ်ဒီးအဟံၣ်ဖိဃီဖိလဲၤတ့ၢ်ဆူကီၢ်အဲၤကူပတူး ဒီးပှၤအဲၤကူပတူးဖိတဖၣ်မၤနးမၤဖှိၣ်အဝဲသ့ၣ်န့ၣ်, သုမိၢ်ပၢ်ဖံဖုလၢပျၢၤတဖၣ်ကိးထီၣ်ဆူယွၤအအိၣ်ဒီးအဝဲဆှၢ လီၤစီၤမိၤၡ့ဒီးစီၤအၤဟရိၣ်လၢအထုးထီၣ်ကွံာ်အဝဲသ့ၣ်လၢ ကီၢ်အဲၤကူပတူးအပူၤဒီးပာ်လီၤန့ၢ်အလီၢ်အိၣ်လီၢ်ဆိးဖဲကီၢ် အံၤအပူၤလီၤ.