ကလၤတံ 5:21 - Sgaw Karen Common Bible

²¹ တၢ်သူၣ်က့ၣ်သးကါ, တၢ်မၤသံပှၤကညီ, တၢ်အီမူၤသံး, တၢ်မၤမူးဧိၤပွဲဧိၤ, ဒီးတၢ်မၤတၢ်အဂၤဒ်သိးအံၤတဖၣ်လီၤ. ဒ်လၢအပူၤကွံာ်အသိးန့ၣ်ယဟ့ၣ်ပလီၢ်ကဒီးသုခဲအံၤလီၤ. ပှၤလၢအမၤတၢ်ဒ်အံၤတဖၣ်န့ၣ်, တန့ၢ်ဘၣ်သါကစၢ်ယွၤအဘီ အမုၢ်ဘၣ်.

ကလၤတံ 5:21 Iomraidhean Croise

လံာ်ယၡါယၤ 3:11

ဘၣ်ဆၣ်, ပှၤအၢပှၤသီတဖၣ်ဘၣ်တၢ်စံၣ်ညီၣ်ဃါမနၤလီၤ. တၢ်လၢအဝဲသ့ၣ်မၤဘၣ်တ့ၢ်ပှၤတဖၣ်န့ၣ်ခဲအံၤတၢ်ကမၤဘၣ်က့ၤ အဝဲသ့ၣ်လီၤ.

လံာ်မးသဲ 25:34

တုၤနုၤတစု, စီၤပၤကစံးဘၣ်ပှၤအိၣ်လၢအစုထွဲတဖၣ်ဒ်အံၤ, ‘ဟဲ, သုလၢအဘၣ်ဆိၣ်ဂ့ၤလၢယပၢ်သ့ၣ်ဧၢ, ဟဲဒီးန့ၢ်သါဘၣ်ဘီမုၢ်လၢအဘၣ်တၢ်ကတဲာ်ကတီၤပာ်န့ၢ်လၢသု ဂီၢ်, စးထီၣ်လၢဟီၣ်ခိၣ်ဘၣ်တၢ်တ့လီၤအီၤလံၤလံၤန့ၣ်တက့ၢ်.

လံာ်လူၤကၣ် 21:34

အိၣ်ပလီၢ်သူၣ်ပလီၢ်သးတက့ၢ်. တဘၣ်ပျဲသုဆၢကတီၢ်လၢာ်ကွံာ်လၢ တၢ်အီၣ်လုၣ်ကိအီလုၣ်ကပာ်တၢ်ဒီးအအံၤတဃၣ်အတၢ်ကိၢ်တၢ်ဂီၤ တဖၣ်အဂီၢ်န့ၣ်တဂ့ၤ. မ့တမ့ၢ်ဘၣ်ဒီး, မုၢ်နံၤမုၢ်သီတနံၤန့ၣ်ကဟဲတုၤအိၣ်သုသတူၢ်ကလာ်လီၤ.

ရိမ့ၤ 13:13

မ်ပကအိၣ်မူဂ့ၤဂ့ၤဘၣ်ဘၣ်ဒ်ပှၤတဖၣ်လၢအလဲၤတၢ်လၢ မုၢ်ဆါအတၢ်ကပီၤအပူၤအသိးန့ၣ်တက့ၢ်. မ်ပကဟးဆှဲးတၢ်မၤပွဲဧိၤလီဧိၤလၢအအိၣ်ဒီးတၢ်အီမူၤ အီဘှီး, တၢ်အိၣ်မူလီၤရၢၢ်လီၤစၢၢ်, တၢ်ကလုာ်ကလိၤ, တၢ်အ့ၣ်လိာ်ဆိးက့လိာ်ဒီးတၢ်သူၣ်က့ၣ်သးကါတဖၣ် န့ၣ်တက့ၢ်.

ရိမ့ၤ 8:13

အဂ့ၢ်ဒ်အံၤ, သုမ့ၢ်အိၣ်မူဒ်ဟီၣ်ခိၣ်ဖိအန့ဆၢၣ်မၢသု အသိးဒီးသုကသံလီၤ. ဘၣ်ဆၣ်ဒီးခီဖျိလၢယွၤအသးန့ၣ် သုမ့ၢ်မၤသံကွံာ်သုတၢ်ဒဲးဘးအတၢ်ဖံးတၢ်မၤတဖၣ်န့ၣ် ဒီးသုကမူလီၤ.

1 ကရံၣ်သူး 15:50

တၢ်လၢယအဲၣ်ဒိးစံးယဲန့ၣ်ယဒီပုၢ်ဝဲၢ်သ့ၣ်ဧၢ, တၢ်လၢအဘၣ်တၢ်တ့အီၤလၢတၢ်ညၣ်ဒီးတၢ်သွံၣ်တၢ်ထံန့ၣ်, ဒိးန့ၢ်ဃုာ်ယွၤအဘီအမုၢ်တသ့ဘၣ်. ဒီးတၢ်လၢအသံသ့န့ၣ်, န့ၢ်ဘၣ်တၢ်သံတသ့န့ၣ် တသ့ဘၣ်.

1 ကရံၣ်သူး 5:11

တၢ်လၢယသးအိၣ်စံးန့ၣ်မ့ၢ်, သုသုတရ့လိာ်မၤထွဲသုသးဒီး ပှၤတဂၤလၢအကိးလီၤအသးလၢဒီပုၢ်ဝဲၢ်, ဘၣ်ဆၣ်ဒီးအၢဝဲသီဝဲ မ့တမ့ၢ်အိၣ်ဒီးတၢ်သးကွံတလၢတၢ်, မ့တမ့ၢ်ဘါထီၣ်တၢ်ဂီၤတၢ်ဖီၣ်, မ့တမ့ၢ်မ့ၢ်ဝဲပှၤကတိၤသီၣ်ဝံသဲကလၤတၢ်, မ့တမ့ၢ်ပှၤအီသံးဖိ, မ့တမ့ၢ်ဟုၣ်တၢ်ဘျၣ်တၢ်န့ၣ်လီၤ. တဘၣ်ဆ့ၣ်နီၤအီၣ်ဃုာ်ဒၣ်လဲာ်တၢ်ဒီးပှၤဒ်န့ၣ်အသိးတဂၤ န့ၣ်တဂ့ၤ.

အ့းဖ့းစူး 5:18

တဘၣ်အီမူၤသုသးလၢစပံးထံတဂ့ၤ. တၢ်န့ၣ်မ့ၢ်ဒၣ်တၢ်လၢအကမၤဟးဂီၤသုလီၤ. မ့မ့ၢ်အိၣ်လၢပှဲၤဒီးယွၤအသးန့ၣ်တက့ၢ်.

လံာ်သိၣ်လီၤသီလီၤတၢ် 21:20

မိၢ်ပၢ်တဖၣ်ကဘၣ်စံးဘၣ်ဝ့ၢ်အခိၣ်အနၢ်တဖၣ်ဒ်အံၤ, ပဖိခွါအံၤအခိၣ်ကိၤဒီးပူထီၣ်လီထီၣ်တၢ်ဒီးဂ့ၢ်လိာ်လၢ ကစူၢ်ပှၤအဂီၢ်လီၤ. အဝဲမၤလၢာ်ဂီၤကျိၣ်စ့ဒီးမ့ၢ်ပှၤအီမူၤသံးတဂၤလီၤ.

ကလီးစဲ 3:6

မ့ၢ်လၢတၢ်အၢတၢ်သီဒ်သိးအံၤတဖၣ်အဃိ, ကစၢ်ယွၤအတၢ်သးဒိၣ်ကဟဲဝဲဒီးကလီၤဘၣ်လၢပှၤလၢအတဒိ ကနၣ်ယွၤအကလုၢ်တဖၣ်အလိၤန့ၣ်လီၤ.

၁ သ့းစၤလနံ 5:7

ဖဲမုၢ်နၤအကတီၢ်န့ၣ်ပှၤကညီမံဝဲ, ဒီးဖဲမုၢ်နၤအကတီၢ်န့ၣ်အဝဲသ့ၣ်အီသံးမူၤဝဲန့ၣ်လီၤ.

၂ သ့းစၤလနံ 2:5

သုကသ့ၣ်နီၣ်ထီၣ်ကစီဒီလီၤ. ယစံးဘၣ်တဲဘၣ်သုတၢ်သ့ၣ်တဖၣ် အံၤခဲလၢာ်, ဖဲယအိၣ်ဒံးဒီးသုအဖၢမုၢ်န့ၣ်လီၤ.

ဧ့ၤဘြံၤ 13:4

မ်တၢ်န့ၢ်မါန့ၢ်ဝၤဒီးလီၢ်မံတဘၣ်အၢဘၣ်န့ၣ်, အိၣ်ဒီးအလၤကပီၤလၢပှၤခဲလၢာ်အကျါတက့ၢ်. အဂ့ၢ်ဒ်အံၤ, ကစၢ်ယွၤကစံၣ်ညီၣ်ပှၤလၢအမၤကမၣ်ပိာ်မုၣ် ပိာ်မၢၤဒီးပှၤလၢအအဲၣ်ဘၢတၢ်န့ၣ်လီၤ.

၁ ပ့းတရူး 4:3

သုမၤလၢာ်တ့ၢ်တၢ်ဆၢကတီၢ်လၢအပူၤကွံာ်ခီဖျိသုမၤ တၢ်လၢပှၤတသ့ၣ်ညါယွၤတဖၣ်သးအိၣ်မၤဝဲန့ၣ်လီၤ. သုတၢ်အိၣ်မူဘၣ်တၢ်မၤလၢာ်အီၤလၢတၢ်တဆဲးတလၤ, တၢ်သးကတၢ, တၢ်အီမူၤအီဘှီးသး, တၢ်အီသံးဂဲၤ ကလံာ်တဖၣ်, တၢ်အီသံးအမူးတဖၣ်, ဒီးတၢ်လီၤသးဘၣ်အၢလၢတၢ်ဘါထီၣ်တၢ်ဂီၤတၢ်ဖီၣ် တဖၣ်န့ၣ်လီၤ.

လံာ်လီၣ်ဖျါ 21:27

ဘၣ်ဆၣ်ဒီးတၢ်လၢအတကဆှီန့ၣ်တနုာ်လီၤဘၣ်ဆူဝ့ၢ်ပူၤနီ တမံၤဘၣ်. ဒ်န့ၣ်အသိး, ပှၤတဂၤလၢ်လၢ်လၢအမၤတၢ်လၢ အလီၤမဲာ်ဆှး, မ့တမ့ၢ်လီတၢ်ဝ့ၤတၢ်န့ၣ်, တနုာ်လီၤဘၣ်ဝဲဘၣ်. ထဲဒၣ်ပှၤတဖၣ်လၢအမံၤအိၣ်ကွဲးအသးလၢသိဖိအလံာ်မူ အပူၤန့ၣ်, ကနုာ်လီၤဘၣ်ဆူဝ့ၢ်အပူၤလီၤ.

လံာ်လီၣ်ဖျါ 22:15

မ့မ့ၢ်, ဖဲဝ့ၢ်အချၢန့ၣ်, ပှၤလၢအဘၣ်တၢ်ဘိးဃၣ်အီၤဆူတၢ် အၢတၢ်သီတဖၣ်, ဒီးပှၤသ့ၣ်တဖၣ်လၢအဟိၣ်တၢ်ယီတၢ်, ပှၤမၤကမၣ်မုၣ်ကမၣ်ခွါဒီးပှၤမၤသံမၤဝီတၢ်တဖၣ်, ပှၤလၢအဘါတၢ်ဂီၤတၢ်ဖီၣ်တဖၣ်ဒီးပှၤသ့ၣ်တဖၣ်လၢ အလီတၢ်, လၢတၢ်စံးတၢ်ကတိၤ, ဒီးတၢ်ဖံးတၢ်မၤခံမံၤလၢာ်န့ၣ်, အိၣ်ဝဲဒၣ်လီၤ.