ကလၤတံ 3:10 - Sgaw Karen Common Bible

¹⁰ ပှၤတဖၣ်လၢအသန့ၤအသးလၢတၢ်ဒိကနၣ်တၢ်သိၣ်တၢ်သီန့ၣ်, အိၣ်မူလၢတၢ်ဆိၣ်အၢအဖီလာ်န့ၣ်လီၤ. အဂ့ၢ်ဒ်အံၤတၢ်ကွဲးအသးစံးဝဲ, “ပှၤတဂၤဂၤမ့ၢ်တအိၣ်မူပိာ်ထွဲတၢ်သိၣ်တၢ်သီ လၢတၢ်ကွဲးဃာ်အီၤကိးထံၣ်ဒဲးန့ၣ်, ကတူၢ်ဘၣ်ကစၢ်ယွၤ အတၢ်စံၣ်ညီၣ်လီၤ” (သိၣ်သီ ၂၇:၂၆).

ကလၤတံ 3:10 Iomraidhean Croise

လံာ်တၢ်ကဲထီၣ်အခီၣ်ထံး 4:11

နဘၣ်တၢ်ပာ်နၤလၢတၢ်ဆိၣ်အၢအဖီလာ်ဒီးနသူၣ်နဖျးတၢ်လၢဟီၣ်ခိၣ် တသ့လၢၤဘၣ်န့ၣ်လီၤ. တၢ်လီၤဂာ်ဒ်ဟီၣ်ခိၣ်အိးထီၣ်အထးခိၣ်လၢကတူၢ်လိာ်ယူၢ်လီၤနပုၢ် အသွံၣ်ဖဲနမၤသံအီၤန့ၣ်လီၤ.

လံာ်ယၡါယၤ 43:28

ဒီးနပှၤပၢတၢ်တဖၣ်မၤတရီတပါယလီၢ်စီဆှံလီၤ. လၢတၢ်န့ၣ်အဃိ, ယဟဲစိာ်တ့ၢ်တၢ်ဟးဂီၤလၢ ကီၢ်အံၣ်စရ့လးအဖီခိၣ် ဒီးယပျဲယပှၤဂီၢ်မုၢ်ဒၣ်ယဲဘၣ်တၢ်မၤအီၤ တရီတပါလီၤ.”

လံာ်ယံးရမံယၤ 11:3

လၢယၤ, ယွၤ, အံၣ်စရ့လးအကစၢ်ယွၤပာ်လီၤ တ့ၢ်တၢ်ဆိၣ်အၢတမံၤလၢကလီၤဘၣ်လၢ ကယဲၢ်ပှၤတဂၤလၢ်လၢ်လၢအတစူၢ်ဘၣ် တၢ်အဂ့ၢ်တဖၣ်လၢတၢ်ပာ်လီၤအီၤလၢ တၢ်အၢၣ်လီၤအီလီၤအဂီၢ်, အဖီခိၣ်န့ၣ်လီၤ.

လံာ်ယံးရမံယၤ 32:23

ဘၣ်ဆၣ်, ဖဲအဝဲသ့ၣ်ဟဲနုာ်လီၤဆူ ထံကီၢ်အံၤဒီး မၤန့ၢ်အီၤဝံၤန့ၣ်တစူၢ်နတၢ်မၤလိာ်တဖၣ်မ့ၢ်ဂ့ၤ, တအိၣ်မူဒ် နသိၣ်က့ၤသီက့ၤအီၤ အသိးမ့ၢ်ဂ့ၤဘၣ်. တၢ်လၢနဟ့ၣ် လီၤနကလုၢ်လၢ ကမၤဝဲန့ၣ်, အဝဲသ့ၣ်တမၤဝဲနီတမံၤဘၣ်. လၢတၢ်န့ၣ်အဃိ, နဒုးလီၤဘၣ်တၢ်ဟးဂီၤခဲလၢာ်အံၤလၢ အဝဲသ့ၣ်အလိၤန့ၣ်လီၤ.

လံာ်ယဃ့းစက့လး 18:4

ပှၤကိးဂၤဒဲးအတၢ်အိၣ်မူန့ၣ်ဘၣ်ဃးဒီးယၤ, မိၢ်ပၢ်တဖၣ်အတၢ်အိၣ်မူ ဒီးဒ်န့ၣ်အသိးဖိတဖၣ်အတၢ်အိၣ်မူစ့ၢ်ကီးန့ၣ်လီၤ. ပှၤတဂၤလၢအမၤတၢ်ဒဲးဘးန့ၣ်မ့ၢ်ပှၤတဂၤလၢကဘၣ်သံဝဲန့ၣ်လီၤ.

လံာ်မးသဲ 25:41

တုၤနုၤတစု, စီၤပၤကစံးဘၣ်ပှၤအိၣ်လၢအစုစ့ၣ်တဖၣ်ဒ်အံၤ, ‘ဟးဖးဒီးယၤတက့ၢ်. ပှၤလၢအဘၣ်ကစၢ်ယွၤအတၢ်ဆိၣ်အၢသ့ၣ်ဧၢ, လဲၤနုာ်ဆူမ့ၣ်အူလၢအတလီၤပံာ်ဘၣ်နီတဘျီဘၣ်, လၢအဘၣ်တၢ်ကတဲာ်ကတီၤပာ်စၢၤလၢမုၣ်ကီၤလံၢ်ဒီးအကလူးတဖၣ် အဂီၢ်, အပူၤန့ၣ်တက့ၢ်.

ရိမ့ၤ 4:15

တၢ်သိၣ်တၢ်သီဒုးအိၣ်ထီၣ်ကစၢ်ယွၤအတၢ်သးထီၣ်ဒီးဖဲ တၢ်သိၣ်တၢ်သီတအိၣ်ဘၣ်န့ၣ်, တၢ်လုၣ်သ့ၣ်ခါပတာ် တၢ်သိၣ်တၢ်သီတအိၣ်ဘၣ်လီၤ.

ရိမ့ၤ 6:23

အဂ့ၢ်ဒ်လဲၣ်န့ၣ်, တၢ်ဒဲးဘးအဘူးအလဲမ့ၢ်တၢ်သံလီၤ. မ့မ့ၢ်ကစၢ်ယွၤအတၢ်ဟ့ၣ်ကလီမ့ၢ်တၢ်မူအထူအယိာ် လၢပကစၢ်ယ့ၣ်ၡူးခရံာ်အပူၤန့ၣ်လီၤ.

ရိမ့ၤ 8:7

လၢတၢ်န့ၣ်အဃိ, ပှၤဟီၣ်ခိၣ်ဖိတဂၤကဲထီၣ်ကစၢ်ယွၤ အဒုၣ်အဒါဖဲအဝဲအတၢ်ဆိကမိၣ်ဆိကမးဘၣ်တၢ်ပၢ ဆှၢအီၤလၢပှၤဟီၣ်ခိၣ်ဖိအန့ဆၢၣ်န့ၣ်လီၤ. အဂ့ၢ်ဒ်လဲၣ်န့ၣ် အဝဲတကစၢ်ယွၤအတၢ်သိၣ်တၢ်သီဘၣ်. နီၢ်နီၢ်န့ၣ်စူၢ်ဝဲ တကဲဘၣ်န့ၣ်လီၤ.

၂ ကရံၣ်သူး 3:7

တၢ်သိၣ်တၢ်သီန့ၣ်ဘၣ်တၢ်ဆဲးကွဲးအီၤလၢလံာ်မဲာ်ဖျၢၣ်, လၢလၢၢ်ဘ့ၣ်ဘၣ်အလိၤ, ဒီးကစၢ်ယွၤအလၤကပီၤအိၣ်ဖျါထီၣ်ဖဲတၢ်ဟ့ၣ်လီၤအီၤအဆၢ ကတီၢ်န့ၣ်လီၤ. ဖဲတၢ်ကပြုၢ်ကပြီၤလၢစီၤမိၤၡ့အမဲာ်သၣ် အလိၤလီၤစၢ်ကွံာ်အဆၢကတီၢ်ဒၣ်လဲာ်န့ၣ်, အသဟီၣ်ဆူၣ်မးဝဲတုၤဒၣ်လဲာ်ပှၤအံၣ်စရ့လးဖိတဖၣ်ကွၢ်ထံကွၢ် ဆးအီၤတန့ၢ်ဘၣ်လီၤ. တၢ်သိၣ်တၢ်သီလၢအဒုးအိၣ်ထီၣ် တၢ်သံန့ၣ်, ဖဲအသဟီၣ်ဆူၣ်အဆၢကတီၢ်မ့ၢ်ဟဲဝဲအိၣ်ဒီးတၢ်လၤ ကပီၤထဲထဲန့ၣ်ဒီး,

ကလၤတံ 2:16

သနာ်က့ပသ့ၣ်ညါလၢပှၤကညီတဂၤဘၣ်တၢ်မၤလိၤမၤဘၣ်အီၤဒီး ကစၢ်ယွၤခီဖျိဒၣ်ထဲလၢတၢ်စူၢ်တၢ်နာ်လၢယ့ၣ်ၡူးခရံာ်အပူၤ, ဒီးတမ့ၢ်ဝဲဒၣ်ခီဖျိတၢ်မၤထွဲတၢ်သိၣ်တၢ်သီအခံန့ၣ်ဘၣ်. ပဝဲစ့ၢ်ကီးပစူၢ်က့ၤနာ်က့ၤယ့ၣ်ၡူးခရံာ်ဒ်သိးပကဘၣ်တၢ်မၤ လိၤမၤဘၣ်ပှၤဒီးကစၢ်ယွၤခီဖျိပတၢ်စူၢ်တၢ်နာ်လၢခရံာ် အပူၤ, ဒီးတမ့ၢ်ဝဲတၢ်မၤထွဲတၢ်သိၣ်တၢ်သီန့ၣ်ဘၣ်. အဂ့ၢ်ဒ်အံၤ, တၢ်တမၤလိၤမၤဘၣ်ပှၤဒီးကစၢ်ယွၤလၢတၢ်မၤထွဲတၢ်သိၣ် တၢ်သီအခံအဃိနီတဂၤဘၣ်.

လံာ်သိၣ်လီၤသီလီၤတၢ် 27:26

“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢတစူၢ်ဘၣ်ကယဲၢ်ကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ်သီတဖၣ် ဒီးတၢ်သိၣ်လိတဖၣ်န့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

လံာ်သိၣ်လီၤသီလီၤတၢ် 29:20

ယွၤတပျၢ်ကွံာ်ပှၤဒ်န့ၣ်အသိးတဂၤအတၢ်ကမၣ်ဘၣ်, အခိၣ်တလိာ်, ယွၤအတၢ်သးကဲၤထီၣ်ကကဲၤကပျီၤထီၣ်ဘၣ်ထီဒါအီၤ, ဒီးကယဲၢ်တၢ်တတၢးတနါတဖၣ်လၢအအိၣ်ကွဲးအသးလၢလံာ်အံၤအပူၤ ကလီၤဘၣ်လၢအလိၤ, တုၤလၢယွၤမၤဟးဂီၤကွံာ်အီၤလၢာ်လၢာ်ဆ့ဆ့တစုန့ၣ်လီၤ.