ကလၤတံ 1:4 - Sgaw Karen Common Bible

⁴ ခရံာ်ဟ့ၣ်လီၤကွံာ်အသးလၢပတၢ်ဒဲးဘးတဖၣ်အဂီၢ်ဒ်သိး ကဒုးထူၣ်ဖျဲးထီၣ်ကွံာ်ပှၤလၢဆၢကတီၢ်အအၢအသီတကတီၢ် အံၤန့ၣ်လီၤ. မၤဝဲလၢတၢ်ဒိကနၣ်ပပၢ်ယွၤအတၢ်ဘၣ်အသး အပူၤန့ၣ်လီၤ.

ကလၤတံ 1:4 Iomraidhean Croise

စံးထီၣ်ပတြၢၤ 40:8

ယကစၢ်ယွၤဧၢ, ယသးခုမၤယဲနတၢ်ဘၣ်နသးန့ၣ်လီၤ. ယပၢၤဃာ်နတၢ်သိၣ်တၢ်သီလၢယသးပူၤလီၤ.’’

လံာ်ယၡါယၤ 65:17

ယွၤစံးဝဲ, “ယတ့လီၤဟီၣ်ခိၣ်အသီဒီးမူခိၣ်အသီလီၤ. တၢ်လၢအမၤတ့ၢ်အသးလၢအပူၤကွံာ်တဖၣ်ကဘၣ်တၢ်သး ပ့ၤနီၣ်ကွံာ်အီၤလၢာ်လၢာ်ဆ့ဆ့န့ၣ်လီၤ.

လံာ်မးသဲ 13:22

တၢ်ချံလၢအဘၣ်တၢ်ဖှံလီၤအီၤလၢတၤဆှုၣ်တၤမဲအကျါတဖၣ်, မ့ၢ်ပှၤလၢအနၢ်ဟူတၢ်ကစီၣ်, ဘၣ်ဆၣ်တၢ်ဘၣ်ယိၣ်ဘၣ်ဘီဘၣ်ဃးဒီးဟီၣ်ခိၣ် ဒီးတၢ်အဲၣ်တၢ်ထူးတၢ်တီၤတဖၣ်ခဲဘၢကွံာ်တၢ်ကစီၣ်သတးဒီး တသၣ်ထီၣ်ဘၣ်ဝဲဘၣ်.

လံာ်မးသဲ 20:28

ဒ်ပှၤကညီဖိခွါအသိး, လၢအဟဲဝဲတမ့ၢ်ဘၣ်လၢပှၤကမၤန့ၢ်တၢ်အခ့အပှၤ အတၢ်မၤလၢအဂီၢ်ဘၣ်. မ့ၢ်ဒ်သိးကမၤတၢ်အခ့အပှၤအတၢ်မၤလၢပှၤဂၤ အဂီၢ်, ဒီးကဟ့ၣ်လီၤအသးသမူလၢကအုၣ်က့ၤခီၣ်က့ၤပှၤအါဂၤအသးသမူ အဂီၢ်လီၤ.”

လံာ်မးသဲ 26:28

တၢ်အံၤမ့ၢ်ယသွံၣ်, လၢအစဲပနီၣ်ဃာ်ကစၢ်ယွၤအတၢ်အၢၣ်လီၤအီ လီၤ, ယသွံၣ်လၢအဘၣ်တၢ်ဂၢ်လီၤကွံာ်အီၤ, ဒ်သိးပှၤအါဂၤအတၢ်ဒဲးဘးကဘၣ်တၢ်ပျၢ်ကွံာ်အီၤအဂီၢ်လီၤ.

လံာ်မးသဲ 26:42

ယ့ၣ်ၡူးလဲၤကဒီးဝဲခံဘျီတဘျီဒီးဃ့ဘါထုကဖၣ်ယွၤဒီး စံး, “ယပၢ်ဧၢ, တၢ်နးတၢ်ဖှီၣ်အလီခီအံၤ, တၢ်ထုးကွံာ်အီၤလၢယအိၣ်မ့ၢ်တသ့ဘၣ်ဒီး, ယမ့ၢ်ဘၣ်အီအီၤန့ၣ်, မ်အကမ့ၢ်ဒၣ်ဝဲဒ်တၢ်ဘၣ်နသးအသိးန့ၣ်တက့ၢ်.”

လံာ်မးသဲ 6:9

ဃ့ဘါထုကဖၣ်သုဝဲဒ်အံၤတက့ၢ်. ‘အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံအီၤတက့ၢ်.

လံာ်မၢ်ကူး 10:45

အဂ့ၢ်ဒ်လဲၣ်န့ၣ်, ပှၤကညီဖိခွါဒၣ်လဲာ်ဟဲဝဲတမ့ၢ်လၢပှၤကကဲအခ့ အပှၤအဂီၢ်ဘၣ်. မ့ၢ်ဒ်သိးကကဲတၢ်ခ့တၢ်ပှၤဒီးဟ့ၣ်လီၤအသးသမူလၢ တၢ်ပှ့ၤက့ၤပှၤဂီၢ်မုၢ်တဖၣ်အဂီၢ်လီၤ.”

လံာ်လူၤကၣ် 22:19

အဝဲန့ၣ်ဝံၤအလီၢ်ခံ, အဝဲဒၣ်ဟံးန့ၢ်ကိၣ်, စံးဘျုးစံးဖှိၣ်ကစၢ်ယွၤ, စိၢ်ဘျဲးဝဲ, ဒီးဟ့ၣ်လီၤအီၤဆူအဝဲသ့ၣ်အအိၣ်ဒီးစံးဝဲ, “အဝဲအံၤမ့ၢ်ယနီၢ်ခိလၢအဘၣ်တၢ်ဟ့ၣ်လီၤအီၤလၢသုဂီၢ်လီၤ. မၤတၢ်အဝဲအံၤလၢတၢ်သ့ၣ်နီၣ်ထီၣ်က့ၤယၤအဂီၢ်န့ၣ်တက့ၢ်.”

လံာ်လူၤကၣ် 22:42

“ပၢ်ဧၢ,” အဝဲဒၣ်စံးဝဲ, “မ့ၢ်ဘၣ်နသးဒီးထုးကွံာ်လၢ်လီခီအံၤလၢယအိၣ်တက့ၢ်. ဘၣ်ဆၣ်ဒီး, တမ့ၢ်ဖဲဒၣ်ယသးဘၣ်. မ်နတၢ်ဘၣ်နသးဘၣ်တၢ်မၤလၢထီၣ်ပှဲၤထီၣ်အီၤတက့ၢ်.”

လံာ်ယိၤဟၣ် 10:11

ယဲဒၣ်အံၤယမ့ၢ်ပှၤကွၢ်သိလၢအဂ့ၤတဂၤလၢအဟ့ၣ်လီၤကွံာ် အသးသမူလၢအသိအဂီၢ်လီၤ.

လံာ်ယိၤဟၣ် 12:31

ခဲကနံၣ်အံၤ, မ့ၢ်တၢ်ဆၢကတီၢ်လၢဟီၣ်ခိၣ်ကဘၣ်တၢ်စံၣ်ညီၣ်အီၤ အဂီၢ်လီၤ. ခဲကနံၣ်အံၤပှၤလၢအပၢဟီၣ်ခိၣ်တဂၤန့ၣ်, ကဘၣ်တၢ်တၢၤကွံာ်အီၤလၢစီၤပၤအလီၢ်လီၤ.

လံာ်ယိၤဟၣ် 5:30

ယမၤတၢ်လၢယစိကမီၤဒၣ်ယဲတသ့နီတမံၤဘၣ်. ယစံၣ်ညီၣ်တၢ်ဒ်ယွၤစံးဘၣ်တဲဘၣ်ယၤအသိးအဃိ ယတၢ်စံၣ်ညီၣ်န့ၣ်ဘၣ်ဝဲလီၤ. အဂ့ၢ်ဒ်အံၤ, တမ့ၢ်ယကျဲးစၢးမၤတၢ်လၢအဘၣ်ယသးန့ၣ်ဘၣ်. မ့မ့ၢ်, ယမၤထဲပှၤလၢအမၢလီၤယၤတဂၤအတၢ်ဘၣ်အသး အဃိန့ၣ်လီၤ.

လံာ်ယိၤဟၣ် 6:38

အဂ့ၢ်ဒ်လဲၣ်န့ၣ်, ယဟဲလီၤလၢမူခိၣ် ဒ်သိးယကမၤပှၤလၢအမၢလီၤယၤတဂၤအတၢ်ဘၣ်အသး ဒီးတမ့ၢ်တၢ်ဘၣ်ယသးဒၣ်ယဲအဂီၢ်န့ၣ်ဘၣ်.

ရိမ့ၤ 1:7

လၢတၢ်န့ၣ်အဃိယကွဲးတၢ်ဆူသုဝဲခဲလၢာ်လၢအအိၣ် လၢဝ့ၢ်ရိမ့ၤအပူၤ, ပှၤလၢကစၢ်ယွၤအဲၣ်ဘၣ်အီၤဒီးကိးထီၣ်အီၤလၢ အကမ့ၢ်အပှၤဂီၢ်မုၢ်ဒၣ်ဝဲတဖၣ်အဂီၢ်အအိၣ်န့ၣ်လီၤ. ပပၢ်ကစၢ်ယွၤပပၢ်ဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုး တၢ်ဖှိၣ်ဒီးတၢ်ဃူတၢ်ဖိးတက့ၢ်.

ရိမ့ၤ 12:2

တဘၣ်အိၣ်မူထိၣ်သုသးလၢပှၤဟီၣ်ခိၣ်ဖိတဖၣ်အတၢ်အိၣ်မူ အတီၤတဂ့ၤ. မ့မ့ၢ်တခီ ပျဲယွၤလဲလိာ်သုလၢသုသူၣ်ကံၢ်သးလဲ ခီဖျိတၢ်လဲလိာ်ကွံာ်သုတၢ်ဆိကမိၣ်လၢာ်လၢာ်ဆ့ဆ့တက့ၢ်. အန့ၣ်ဒီး, သုကသ့ၣ်ညါကစၢ်ယွၤအတၢ်ဘၣ်အသး - တၢ်လၢ အဂ့ၤ, ဒီးတၢ်လၢအဒုးသးမုာ်သးခုအီၤ, ဒီးတၢ်လၢတၢ် ပှဲၤမ့ၢ်တၢ်ဒ်လဲၣ်ဒ်လဲၣ်န့ၣ်လီၤ.

ရိမ့ၤ 4:25

အဝဲဘၣ်တၢ်ဟ့ၣ်လီၤကွံာ်အီၤလၢအကသံလၢပတၢ်ဒဲးဘး တဖၣ်အဃိ, ဒီးဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤဒ်သိး အကပာ်တီပာ်လိၤပှၤအဂီၢ်န့ၣ်လီၤ.

ရိမ့ၤ 8:27

ဒီးကစၢ်ယွၤလၢအထံၣ်တုာ်ကွၢ်ဖျါပှၤကညီအသးကံၢ်ပူၤ န့ၣ်, သ့ၣ်ညါယွၤအသးအတၢ်ဆိကမိၣ်မ့ၢ်တၢ်မနုၤလဲၣ် န့ၣ်လီၤ. အဂ့ၢ်ဒ်အံၤ, ကစၢ်ယွၤအသးဃ့သကွံၢ်ကညးတၢ်ဒီး ကစၢ်ယွၤလၢအပှၤဂီၢ်မုၢ်တဖၣ်အဂီၢ်, ဒီးဒ်အတၢ်ဘၣ် အသးအသိးန့ၣ်လီၤ.

ရိမ့ၤ 8:3

မ့ၢ်လၢပှၤကညီအန့ဆၢၣ်အဂံၢ်စၢ်ဘါစၢ်အဃိ, တၢ်လၢတၢ်သိၣ်တၢ်သီမၤတသ့ဘၣ်န့ၣ်ကစၢ်ယွၤမၤဝဲလီၤ. အဝဲစံၣ်ညီၣ်ဃၣ်တၢ်ဒဲးဘးလၢပှၤကညီအန့ဆၢၣ်အပူၤ, ခီဖျိအတၢ်ဆှၢလီၤအဖိခွါဒၣ်ဝဲအိၣ်ဒီးန့ဆၢၣ်လၢအမ့ၢ် ပှၤကညီအတၢ်ဒဲးဘးအန့ဆၢၣ်ဒ်သိးအကတြူာ် ကွံာ်တၢ်ဒဲးဘးအဂီၢ်န့ၣ်လီၤ.

ရိမ့ၤ 8:32

အဝဲတဟံးဃာ်က့ၤအဖိခွါဒၣ်ဝဲဒၣ်လဲာ်ဘၣ်, မ့မ့ၢ်လုၢ်ထီၣ် အီၤဒ်တၢ်လုၢ်အသိးလၢပဝဲခဲလၢာ်အဂီၢ်န့ၣ်လီၤ. အဝဲဒၣ်ဟ့ၣ်လီၤပှၤအဖိခွါဒၣ်ဝဲလံသတးဒီး, မ့ၢ်အတဟ့ၣ်ကလီစ့ၢ်ကီးပှၤလၢတၢ်အဂၤခဲလၢာ်န့ၣ်ဘၣ်ဧါ.

1 ကရံၣ်သူး 15:3

တၢ်လၢယဒိးန့ၢ်ဘၣ်တ့ၢ်ယဲန့ၣ်, ယဟ့ၣ်လီၤကဒီးယဲဆူသုအိၣ် တဆီလၢအမ့ၢ်တၢ်အကါဒိၣ်ကတၢၢ်တမံၤ, လၢခရံာ်သံလၢ ပတၢ်ဒဲးဘးအဃိဒ်အအိၣ်ကွဲးအသးလၢတၢ်ကွဲးအသးစီဆှံ အပူၤအသိး,

၂ ကရံၣ်သူး 4:4

အဝဲသ့ၣ်တစူၢ်တနာ်တၢ်ဘၣ်. အဂ့ၢ်မ့ၢ်လၢဟီၣ်ခိၣ်တဘ့ၣ်အံၤအကစၢ်လၢအအၢအသီ တဂၤပာ်အဝဲသ့ၣ်အသူၣ်အသးလၢတၢ်ခံးတၢ်နၤအပူၤ အဃိန့ၣ်လီၤ. အဝဲဒၣ်တြီဃာ်အဝဲသ့ၣ်ဒ်သိးအသုတထံၣ် ဘၣ်တၢ်ကပီၤလၢအကပီၤလီၤလၢအဝဲသ့ၣ်အလိၤ, တၢ်ကပီၤလၢအဟဲလၢတၢ်သးခုကစီၣ်ဘၣ်ဃးခရံာ် လၢအလီၤဂာ်ဒီးယွၤလၢလၢပှဲၤပှဲၤတဂၤအလၤကပီၤတဂ့ၤ န့ၣ်လီၤ.

ကလၤတံ 2:20

လၢတၢ်န့ၣ်အဃိ, ပှၤလၢအမူဝဲခဲအံၤန့ၣ်, တမ့ၢ်လၢၤယၤဘၣ်, မ့မ့ၢ်ခရံာ်မ့ၢ်ပှၤလၢအမူဝဲလၢယပူၤလီၤ. တၢ်အိၣ်မူလၢယအိၣ်မူ ခဲကနံၣ်အံၤ, မ့ၢ်ယမူလၢတၢ်နာ်ဘၣ်ဃးဒီးကစၢ်ယွၤအဖိခွါလၢ အအဲၣ်ယၤဒီးဟ့ၣ်လီၤကွံာ်အသးသမူလၢယဂီၢ်တဂၤန့ၣ်အပူၤလီၤ.

ကလၤတံ 6:14

မ့မ့ၢ်ယဲဒၣ်အံၤ, ယကပာ်ကဖၢလၢယသးထဲဒၣ်လၢပကစၢ် ယ့ၣ်ၡူးခရံာ်အထူၣ်စုညါအဃိလီၤ. အဂ့ၢ်ဒ်အံၤ, ခီဖျိလၢ အထူၣ်စုညါန့ၣ်, တၢ်ဘၣ်ဃးဒီးဟီၣ်ခိၣ်သံသဒၣ်ကွံာ်ယၤဒီး ယသံသဒၣ်ကွံာ်တၢ်ဘၣ်ဃးဒီးဟီၣ်ခိၣ်န့ၣ်လီၤ.

အ့းဖ့းစူး 1:11

တၢ်ခဲလၢာ်ဘၣ်တၢ်မၤအီၤဒ်ကစၢ်ယွၤအတၢ်ရဲၣ်တၢ်ကျဲၤဒီး အတၢ်စံၣ်ညီၣ်တဲာ်တၢ်အသိးလီၤ. ယွၤဃုထၢထီၣ်ပှၤဒ်သိး ပကကဲထီၣ်အပှၤဂီၢ်မုၢ်ခီဖျိတၢ်အိၣ်မူလၢခရံာ်အပူၤ, ဒ်အတၢ်တိာ်အိၣ်ဝဲအသိး, သန့ၤထီၣ်အသးလၢယွၤ အတၢ်စံၣ်ညီၣ်တဲာ်တ့ၢ်ဝဲလၢတၢ်အခီၣ်ထံးလံၤလံၤန့ၣ်လီၤ.

အ့းဖ့းစူး 2:2

အကတီၢ်ဖဲန့ၣ်အခါသုအိၣ်မူတ့ၢ်သုဝဲလၢတၢ်ဒဲးဘးအပူၤ, သုလဲၤတ့ၢ်တၢ်လၢဟီၣ်ခိၣ်အကျဲအၢကျဲသီတဖၣ်အပူၤ ဒီးသုစူၢ်တ့ၢ်တၢ်ဝံတၢ်နါလၢမူကပိာ်လိၤတဖၣ်အကစၢ် လၢအပၢဘၣ်ပှၤတဖၣ်လၢအတစူၢ်ဘၣ်ကစၢ်ယွၤန့ၣ်လီၤ.

အ့းဖ့းစူး 5:16

တၢ်ဆၢကတီၢ်ဒီးတၢ်ခွဲးတၢ်ယာ်ကိးကတီၢ်ဒဲးလၢသုဒိးန့ၢ်ဘၣ် န့ၣ်, သူအီၤအဂ့ၤကတၢၢ်တက့ၢ်. အဂ့ၢ်ဒ်အံၤမုၢ်နံၤတဖၣ်အံၤမ့ၢ် အအၢအသီလီၤ.

အ့းဖ့းစူး 5:2

ဒ်ခရံာ်အဲၣ်ပှၤဒီးဟ့ၣ်လီၤကွံာ်အသးသမူလၢပဂီၢ်ဒ်တၢ်လုၢ်လၢ အနၢမူဒီးဘၣ်ကစၢ်ယွၤအသးအသိးန့ၣ်, အိၣ်မူသုဝဲလၢတၢ်အဲၣ်တၢ်ကွံအပူၤတက့ၢ်.

အ့းဖ့းစူး 6:12

အဂ့ၢ်ဒ်အံၤ, ပတဒုးလိာ်ပသးဒီးပှၤကညီဘၣ်. မ့မ့ၢ်ပဒုးလိာ်ပသးဒီးသးအၢလၢအအိၣ်ဒီးအစိအကမီၤ လၢမူခိၣ်, ပှၤပၢထံပၢကီၢ်တဖၣ်, ပဒိၣ်ပပှၢ်တဖၣ်ဒီးဟီၣ်ခိၣ်အစိကမီၤလၢအဒုးအိၣ်ထီၣ်တၢ်ခံးတၢ် နၤတစိၤအံၤတဖၣ်န့ၣ်လီၤ.

ဖံလံးပံၤ 4:20

မ်တၢ်လၤကပီၤအိၣ်ဒီးပပၢ်ယွၤအစိၤစိၤအဃၣ်ဃၣ်တက့ၢ်. အၤမ့ၣ်.

၁ သ့းစၤလနံ 1:3

တဘျီလၢ်လၢ်ဖဲပဃ့ဘါထုကဖၣ်တၢ်ဆူပကစၢ်ယွၤဒီးပပၢ် အအိၣ်န့ၣ်, ပသ့ၣ်နီၣ်ထီၣ်သုအိၣ်မူမၤထွဲသုတၢ်စူၢ်တၢ်နာ် အခံဒ်လဲၣ်, သုဖံးသုမၤတၢ်ဆူၣ်ဆူၣ်လၢတၢ်အဲၣ်အဃိဒ်လဲၣ်, ဒီးသုတၢ်မုၢ်လၢ်လၢပကစၢ်ယ့ၣ်ၡူးခရံာ်အပူၤဂၢၢ်ကျၢၤဒ်လဲၣ် အဂ့ၢ်န့ၣ်လီၤ.

၁ သ့းစၤလနံ 3:11

မ်ပကစၢ်ယွၤဒီးပပၢ်အနီၢ်ကစၢ်ဒၣ်ဝဲ, ဒီးပကစၢ်ယ့ၣ်ၡူးန့ၣ်ကတဲာ်ကတီၤကျဲလၢပဂီၢ်, ဒ်သိးပကဟဲဆူသုအိၣ်အဂီၢ်န့ၣ်တက့ၢ်.

၁ သ့းစၤလနံ 3:13

လၢကျဲဒ်အံၤအပူၤန့ၣ်, အဝဲဒၣ်ကဒုးဆူၣ်ထီၣ်သုဂံၢ်သုဘါ, ဒီးသုကလၢပှဲၤဒီးစီဆှံဝဲလၢပကစၢ်ယွၤဒီးပပၢ်အမဲာ်ညါ ဖဲပကစၢ်ယ့ၣ်ၡူးဟဲဝဲအိၣ်ဒီးပှၤလၢအဘၣ်ဃးဒီး အီၤခဲလၢာ်အကတီၢ်န့ၣ်လီၤ.

၂ သ့းစၤလနံ 2:16

မ်ပကစၢ်ယ့ၣ်ၡူးခရံာ်အနီၢ်ကစၢ်ဒၣ်ဝဲ, ဒီးပပၢ်ကစၢ် ယွၤ, လၢအအဲၣ်ပှၤဒီးလၢအဘျုးအဖှိၣ်အဃိဟ့ၣ်ပှၤတၢ်သးဒူလၢ အအိၣ်စံာ်အိၣ်ကျၢၤဒီးတၢ်မုၢ်လၢ်အဂၢၢ်အကျၢၤတဂၤန့ၣ်,

၁ တံၤမသ့း 2:6

လၢအဟ့ၣ်လီၤအသးလၢတၢ်ပှ့ၤက့ၤပှၤဟီၣ်ခိၣ်ဖိခဲလၢာ် အဂီၢ်န့ၣ်လီၤ. တၢ်အဝဲအံၤမ့ၢ်တၢ်အုၣ်အသးဘၣ်ဆၢဘၣ် ကတီၢ်လၢကစၢ်ယွၤသးအိၣ်လၢပှၤခဲလၢာ်ကတုၤလၢတၢ် အုၣ်က့ၤခီၣ်က့ၤအဂ့ၢ်န့ၣ်လီၤ.

တံတူး 2:14

အဝဲဒၣ်ဟ့ၣ်လီၤအသးလၢပဂီၢ်ဒ်သိးကမၤထူၣ်ဖျဲးပှၤလၢတၢ် အၢတၢ်သီခဲလၢာ်ဒီးကဒုးကဲထီၣ်ပှၤ, ပှၤတကလုာ်လၢအကဆှီဝဲလၢအဘၣ်ဃးထဲဒၣ်ဒီးအီၤဒီး အသးဆူၣ်လၢတၢ်မၤဂ့ၤတၢ်အဂီၢ်န့ၣ်လီၤ.

ဧ့ၤဘြံၤ 2:5

ကစၢ်ယွၤတပာ်ဘၣ်ကလူးတဖၣ်လၢအကပၢဟီၣ်ခိၣ် အသီလၢအကဟဲ, ဟီၣ်ခိၣ်လၢပစံးတ့ၢ်လၢအဂ့ၢ်န့ၣ်ဘၣ်.

ဧ့ၤဘြံၤ 9:14

တၢ်အံၤမ့ၢ်တၢ်လၢအမ့ၢ်ဝဲတီဝဲအဃိခရံာ်အသွံၣ်ကမၤန့ၢ်တၢ်လၢ ပဂီၢ်ဒိၣ်န့ၢ်အါန့ၢ်အန့ၣ်တက့ၢ်ဆံးဒိၣ်လဲၣ်. ခီဖျိယွၤအသးလၢအမူဝဲလီၤထူလီၤယိာ်န့ၣ်အဝဲလုၢ် ထီၣ်ပာ်ထီၣ်အသးဒၣ်ဝဲဒ်တၢ်လုၢ်အလၢအပှဲၤအသိးလၢ ယွၤန့ၣ်လီၤ. အသွံၣ်ကမၤကဆှီထီၣ်ပသးလၢအသ့ၣ်ညါ ဒၣ်တၢ်, လၢလုၢ်လၢ်အတၢ်ဖံးတၢ်မၤလၢအတဂိာ်တသီၣ်ဘၣ် တဖၣ်ဒ်သိးပကမၤဘၣ်ကစၢ်ယွၤလၢအမူဝဲတဂၤအတၢ်မၤန့ၣ်လီၤ.

ယၤကိာ် 4:4

ပှၤလၢအသးတတီဒီးကစၢ်ယွၤသ့ၣ်ဧၢ, မ့ၢ်သုတသ့ၣ်ညါဘၣ်လၢတၢ်ကဲဟီၣ်ခိၣ်အတံၤသကိး န့ၣ်အခီပညီမ့ၢ်တၢ်ကဲကစၢ်ယွၤအဒုၣ်အဒါန့ၣ်ဘၣ်ဧါ. ပှၤတဂၤဂ့ၤတဂၤဂ့ၤလၢသးအိၣ်ကဲဟီၣ်ခိၣ်အတံၤ သကိးန့ၣ်, ဒုးကဲထီၣ်အသးလၢကစၢ်ယွၤအဒုၣ်အဒါ တဖၣ်န့ၣ်လီၤ.

၁ ပ့းတရူး 2:24

ခရံာ်အကစၢ်ဒၣ်ဝဲစိာ်ထီၣ်ပတၢ်ဒဲးဘးတဖၣ်လၢအနီၢ်ခိ အပူၤဆူထူၣ်စုညါအလိၤ, ဒ်သိးပကသံကွံာ်လၢတၢ်ဒဲးဘးဒီးမူလၢတၢ်တီတၢ်လိၤ အဂီၢ်န့ၣ်လီၤ. ဒီးသုဘျါက့ၤလၢအဝဲဒၣ်ဘၣ်တီၢ်အပူၤလီၢ် တဖၣ်အဃိလီၤ (ၡါ ၅၃:၅).

၁ ပ့းတရူး 3:18

အဂ့ၢ်ဒ်အံၤ, ခရံာ်တူၢ်သံစ့ၢ်ကီးအသးလၢတၢ်ဒဲးဘးအဃိ တဘျီဒီးအဝံၤ, ပှၤအဂ့ၤတဂၤလၢပှၤတၢ်ဒဲးဘးဖိတဖၣ်အဂီၢ်, ဒ်သိးကဆှၢသုဆူယွၤအအိၣ်န့ၣ်လီၤ. အဝဲဘၣ်တၢ်မၤသံအီၤလၢတၢ်ဖံးတၢ်ညၣ်အပူၤ, ဘၣ်ဆၣ်ဒီးဒိးတၢ်မၤမူထီၣ်က့ၤအီၤလၢသူၣ်လၢသးန့ၣ်လီၤ.

၁ ယိၤဟၣ် 2:2

ဒီးခီဖျိခရံာ်အကစၢ်ဒၣ်ဝဲန့ၣ်, ပတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤ, ဒီးတမ့ၢ်လၢၤထဲပတၢ်ဒဲးဘးတဖၣ်အဂီၢ်ဧိၤဘၣ်. မ့ၢ်စ့ၢ်ကီးလၢပှၤဟီၣ်ခိၣ်ဖိခဲလၢာ်အတၢ်ဒဲးဘးတဖၣ် အဂီၢ်လီၤ.

၁ ယိၤဟၣ် 3:16

ခရံာ်ဟ့ၣ်လီၤကွံာ်အသးသမူလၢပဂီၢ်, ဒီးလၢကျဲဒ်အံၤန့ၣ်, ပသ့ၣ်ညါဘၣ်တၢ်အဲၣ်တၢ်ကွံမ့ၢ်တၢ်မနုၤလဲၣ်န့ၣ်လီၤ. အဃိ, ပဝဲဒၣ်စ့ၢ်ကီးပကြၢးဟ့ၣ်လီၤကွံာ်ပသးသမူတဖၣ်လၢ ပဒီပုၢ်ဝဲၢ်တဖၣ်အဂီၢ်လီၤ.

လံာ်လီၣ်ဖျါ 1:5

ဒီးလၢယ့ၣ်ၡူးခရံာ်, ပှၤအုၣ်အသးလၢအသးတီဝဲတဂၤ အအိၣ်, ပှၤအဆိကတၢၢ်တဂၤလၢအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤ လၢတၢ်သံဒီးမ့ၢ်စ့ၢ်ကီးပှၤပၢဘၣ်ဟီၣ်ခိၣ်အစီၤပၤတဖၣ်န့ၣ် တက့ၢ်. အဝဲဒၣ်အဲၣ်ပှၤ, ဒီးခီဖျိအဝဲအတၢ်သံန့ၣ်, မၤထူၣ်ဖျဲးထီၣ်ကွံာ်ပှၤလၢပတၢ်ဒဲးတူၢ်ဒဲးဘးတဖၣ်,

လံာ်လီၣ်ဖျါ 5:9

အဝဲသ့ၣ်သးဝံၣ်တၢ်သးဝံၣ်အသီတယုၢ်, “နကြၢးဝဲဘၣ်ဝဲလၢနကဟံးန့ၢ်လံာ်ထူ ဒီးအိးထီၣ်အတၢ်စဲပနီၣ်ဃာ်တဖၣ်လီၤ. အဂ့ၢ်ဒ်အံၤနဘၣ်တၢ်မၤသံနၤ, ဒီးခီဖျိနသွံၣ်န့ၣ်, နပှ့ၤန့ၢ်ပှၤလၢဒူၣ်ဖိထၢဖိကိးဒူၣ်ဒဲးအပူၤ, လၢပှၤကတိၤကျိာ်အါကျိာ်အကျါ, လၢထံကီၢ်အါဘ့ၣ်အပူၤ, ဒီးပှၤကလုာ်အါကလုာ်အပူၤလၢကစၢ်ယွၤအဂီၢ် န့ၣ်လီၤ.

လံာ်လီၣ်ဖျါ 7:9

တၢ်မၤအသးဒ်အံၤဝံၤအလီၢ်ခံန့ၣ်, ယကွၢ်တၢ်, ဒီးပှၤဂီၢ်မုၢ်ဖးဒိၣ်တဖုအိၣ်ဝဲဒၣ်လီၤ. ပှၤဂံၢ်အနီၣ်ဂံၢ် တသ့ဘၣ်နီတဂၤဘၣ်. အဝဲသ့ၣ်ဟဲလၢကလုာ်ကိး ကလုာ်ဒဲး, ဒူၣ်ဖိထၢဖိကိးဒူၣ်ဒဲး, ထံကီၢ်ကိးဘ့ၣ်ဒဲး, ဒီးပှၤကတိၤကျိာ်ကိးကျိာ်ဒဲးအကျါန့ၣ်လီၤ. ဒီးအဝဲသ့ၣ်အိၣ်ဆၢထၢၣ်လၢလီၢ်ပစိာ်ဒီးသိဖိအမဲာ်ညါ, ကူသိးဆ့ကၤအဝါဒီးဟံးဃာ်လိၣ်ဒၢအဒ့တဖၣ်လၢ အစုပူၤန့ၣ်လီၤ.