လံာ်စီၤဧ့စြၤ 10:8 - Sgaw Karen Common Bible

⁸ မ့ၢ်ပှၤဂီၢ်မုၢ်အခိၣ်အနၢ်တဖၣ်အတၢ်ဟ့ၣ်လီၤအကလုၢ်န့ၣ်လီၤ. ဒီးလၢသၢသီအတီၢ်ပူၤပှၤတဂၤဂ့ၤတဂၤဂ့ၤဟဲမ့ၢ်တတုၤဘၣ်ဒီး ကယဲၢ်အတၢ်စုလီၢ်ခီၣ်ခိၣ်ခဲလၢာ်ကဘၣ်တၢ်ဟံးန့ၢ်ကွံာ်အီၤဒီး အနီၢ်ကစၢ်ဒၣ်ဝဲအတၢ်ခွဲးတၢ်ယာ်ဒ်တၢ်အိၣ်မူကရူၢ်ကရၢဖိ တဂၤကလီၤမၢ်ကွံာ်ဝဲန့ၣ်လီၤ.

လံာ်စီၤဧ့စြၤ 10:8 Iomraidhean Croise

လံာ်စီၤဧ့စြၤ 10:7

တၢ်ကစီၣ်တမံၤဘၣ်တၢ်ဆှၢလီၤအီၤသကုၤဆးဒးလၢဝ့ၢ်ယရူၤၡလ့ၣ် ဒီးကီၢ်ယူဒၤ, လၢကယဲၢ်ပှၤဟဲက့ၤကဒါက့ၤလၢတၢ်စိာ်မၢကဲကုၢ်အလီၢ်ခဲလၢာ် ကဘၣ်ထံၣ်လိာ်သကိးအသးလၢဝ့ၢ်ယရူၤၡလ့ၣ်အပူၤလီၤန့ၣ်,

လံာ်စီၤဧ့စြၤ 10:9

လၢသၢသီအတီၢ်ပူၤ, ဖဲလါခွံလါတလါထီၣ်အသီခံဆံန့ၣ်, ကယဲၢ်ပှၤပိာ်ခွါခဲလၢာ်လၢအအိၣ်ဆိးဝဲလၢယူဒၤဒီးဘံၣ်ယၤ မံၣ်အဒူၣ်အလီၢ်ကဝီၤပူၤန့ၣ်ဟဲဆူဝ့ၢ်ယရူၤၡလ့ၣ်ဒီးပာ်ဖှိၣ် ထီၣ်အသးဖဲတၢ်လုၢ်ဟံၣ်အဂၢၤပူၤန့ၣ်လီၤ. တၢ်ဟဲစူၤဖးဒိၣ်, ဒီးမ့ၢ်လၢမူခိၣ်ကလံၤသီၣ်ဂီၤဒီးတၢ်အိၣ်ဖှိၣ်ရိဖှိၣ်အတၢ် ကါဒိၣ်အဃိ, ပှၤကိးဂၤဒဲးကနိးကစုာ်ဝဲဒၣ်န့ၣ်လီၤ.

လံာ်စီၤဧ့စြၤ 7:26

ပှၤတဂၤလၢ်လၢ်မ့ၢ်တစူၢ်ဘၣ်နကစၢ်ယွၤအတၢ်ဘူၣ်တၢ်ဘါ အတၢ်သိၣ်တၢ်သီတဖၣ်မ့ၢ်ဂ့ၤ, ထံကီၢ်အတၢ်သိၣ်တၢ်သီတဖၣ်မ့ၢ်ဂ့ၤန့ၣ်, အဝဲကဘၣ်တၢ်စံၣ်ညီၣ်အီၤဘၣ်ဆၢဘၣ်ကတီၢ်ခီဖျိတၢ်မၤသံ, မ့တမ့ၢ်တၢ်နီၣ်ထီၣ်ဟီထီၣ်ကွံာ်အီၤ, မ့တမ့ၢ်ဟံးန့ၢ်ကွံာ်အတၢ်စုလီၢ်ခီၣ်ခိၣ်, မ့တမ့ၢ်တၢ်ဒၢနုာ်အီၤဆူဃိာ်ပူၤန့ၣ်လီၤ.”

လံာ်စီၤနဃ့မယၤ 13:28

စီၤယဟိယဒါမ့ၢ်ပှၤလုၢ်တၢ်အခိၣ်အဒိၣ်ကတၢၢ်စီၤအ့လယၤၡံာ်အဖိ ခွါ, ဘၣ်ဆၣ်, စီၤယဟိယဒါအဖိခွါတဖၣ်အကျါတဂၤဒိးတ့ဒိးဖျီအသး ဒီးစီၤစၤနဘလးလၢဝ့ၢ်ဃိရၣ်တခီအဖိမုၣ်အဃိယဟီထီၣ် ကွံာ်စီၤယဟိယဒါလၢဝ့ၢ်ယရူၤရှလ့ၣ်န့ၣ်လီၤ.

လံာ်စီၤနဃ့မယၤ 13:3

တုၤကီၢ်အံၣ်စရ့လးအပှၤဂီၢ်မုၢ်နၢ်ဟူတၢ်သိၣ်တၢ်သီ အံၤဘၣ်တၢ်ဖးထီၣ်အီၤန့ၣ်, အဝဲသ့ၣ်နီၣ်ထီၣ်ကွံာ်ကယဲၢ်ပှၤတခီ ဘီမုၢ်ခဲလၢာ်လၢအတၢ်ကရၢကရိအပူၤန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 27:28

တၢ်တမံၤမံၤဒ်အမ့ၢ်ပှၤကညီမ့ၢ်ဂ့ၤ, စံာ်လၢအဘၣ်တၢ်လုၢ်ထီၣ်အီၤလၢာ်လၢာ်ဆ့ဆ့မ့ၢ်ဂ့ၤန့ၣ်, တၢ်ဆါလီၤအီၤမ့ၢ်ဂ့ၤ, တၢ်ပှ့ၤက့ၤအီၤမ့ၢ်ဂ့ၤ, တသ့လ့ၤတက့ၤဘၣ်. မ့ၢ်တၢ်လၢအဘၣ်ဃးဒီးယွၤလီၤစိၤန့ၣ်လီၤ.

လံာ်မးသဲ 18:17

ဒီးမ့ၢ်တဒိကနၣ်ဘၣ်အဝဲသ့ၣ်ဘၣ်ဒီး, စံးဘၣ်တဲဘၣ်တၢ်အိၣ်ဖှိၣ်လၢတၢ်ဂ့ၢ်တၢ်ကျိၤခဲလၢာ်တက့ၢ်. ဒီး, မ့ၢ်တဒိကနၣ်ဘၣ်တၢ်အိၣ်ဖှိၣ်အကလုၢ်ဘၣ်ဒီး, ပာ်အီၤဒ်ပှၤတစူၢ်တနာ်ဘၣ်ယွၤဒီး, ဒ်ပှၤဃ့သွဲတဂၤအသိးန့ၣ်တက့ၢ်.

လံာ်ယိၤဟၣ် 16:2

သုကဘၣ်တၢ်ဟီထီၣ်ကွံာ်သုလၢဘူၣ်ဘျီၣ်လၢအမ့ၢ် တၢ်ဘါလီၢ်တဖၣ်အပူၤ, ဒီးတၢ်ဆၢကတီၢ်ကတုၤဝဲဖဲ ပှၤတဂၤလၢ်လၢ်လၢအမၤသံသုန့ၣ်, ကဆိကမိၣ်ဝဲလၢအမၤတၢ်ဒ်အံၤအဃိဒီး မ့ၢ်အမၤကစၢ်ယွၤအတၢ်မၤန့ၣ်လီၤ.

လံာ်ယိၤဟၣ် 9:22

အမိၢ်အပၢ်တဖၣ်စံးဆၢတၢ်ဒ်အံၤမ့ၢ်လၢအပျံၤပှၤယူဒၤဖိအခိၣ် အနၢ်တဖၣ်လၢအပာ်လီၤတ့ၢ်လံအသးလၢပှၤတဂၤလၢ်လၢ်လၢ အစံးလၢအနာ်ယ့ၣ်ၡူးမ့ၢ်ခရံာ်န့ၣ်, ကဘၣ်တၢ်ဟီထီၣ်ကွံာ်အီၤလၢဘူၣ်ဘျီၣ်ပူၤအဃိန့ၣ်လီၤ.

လံာ်ယိၤဟၣ် 9:34

အဝဲသ့ၣ်စံးဆၢတၢ်ဒီးစံးဝဲ, “နအိၣ်ဖျဲၣ်ထီၣ်ဒီး တၢ်ကွၢ်ဒိၣ်ထီၣ်နၤလၢတၢ်ဒဲးဘးယိာ်အပူၤဒီးနဂုာ် ကျဲးစၢးသိၣ်လိသီလိပှၤန့ၣ်ဧါ.” အန့ၣ်ဒီး, အဝဲသ့ၣ်ဟီထီၣ်ကွံာ်အီၤလၢဘူၣ်ဘျီၣ်ပူၤန့ၣ်လီၤ.

လံာ်စီၤယိၤၡူ 6:19

တၢ်ကိးမံၤဒဲးလၢအဘၣ်တၢ်မၤအီၤလၢစ့, ထူ, တိၢ်ဘီ, ဒီးထးန့ၣ်ကဘၣ်တၢ်ပာ်လီၤဆီအီၤလၢယွၤအဂီၢ်လီၤ. ကဘၣ်တၢ်ဒၢနုာ်အီၤလၢယွၤအတၢ်ပာ်ဖှိၣ်အလီၢ်န့ၣ်လီၤ.”

လံာ်ပှၤစံၣ်ညီၣ်ကွီၢ် 21:5

အဝဲသ့ၣ်သံကွၢ်ဝဲ, “မ့ၢ်ပှၤတဖုဖုလၢအံၣ်စရ့လးအဒူၣ်အကျါ လၢအတလဲၤဘၣ်ဆူတၢ်ပာ်ဖှိၣ်ထီၣ်အသးအလီၢ်လၢယွၤ အမဲာ်ညါဖဲမံးစပၤန့ၣ်အိၣ်ဧါ.” (အဝဲသ့ၣ်ဆိၣ်တၢ်လၢပှၤတဂၤလၢ်လၢ်လၢအတလဲၤဘၣ်ဆူမံးစပၤန့ၣ် ကဘၣ်တၢ်မၤသံကွံာ်အီၤန့ၣ်လီၤ.)

လံာ်စီၤၡမူၤအ့လးအခီၣ်ထံးတဘ့ၣ် 11:7

အဝဲဟံးန့ၢ်ဂီၤဖံးဖါခံဒုဒီးဒီၣ်တဲာ်အီၤတကူာ်တကူာ်ဒီး မၢပှၤစိာ်တၢ်ကစီၣ်တဖၣ်စိာ်တၢ်ညၣ်အကူာ်တဖၣ်န့ၣ်သကုၤကီၢ်အံၣ် စရ့လးဒီဘ့ၣ်ဃုာ်ဒီးတၢ်ဟ့ၣ်ပလီၢ်အံၤန့ၣ်လီၤ. “ပှၤတဂၤလၢ်လၢ်လၢအတပိာ်ဘၣ်စီၤစီလူးဒီးစီၤၡမူအ့လးအခံ ဆူတၢ်ဒုးအပူၤန့ၣ်, အဂီၤဖံးဖါတဖၣ်ကဘၣ်တၢ်မၤအီၤဒ်အံၤလီၤ. ကီၢ်အံၣ်စရ့လးအပှၤဂီၢ်မုၢ်ပျံၤတၢ်လၢယွၤကမၤဝဲ, ဒီးဟဲထီၣ်သကိးဝဲခဲလၢာ်တအိၣ်ဒီးတၢ်လီၤတိၢ်ဘၣ်လီၤ.