လံာ်ယဃ့းစက့လး 9:6 - Sgaw Karen Common Bible

⁶ မၤသံပှၤပိာ်ခွါသးပှၢ်တဖၣ်, ပိာ်ခွါသးစၢ်တဖၣ်, ပိာ်မုၣ်သးစၢ်တဖၣ်, ပိာ်မုၣ်သးပှၢ်တဖၣ်ဒီးဖိသၣ်တဖၣ်တက့ၢ်. ဘၣ်ဆၣ်ဒီး, ထိးဘူးပှၤလၢအအိၣ်ဒီးတၢ်ပနီၣ်လၢအခိၣ်တိသၣ်အလိၤနီတဂၤတ ဂ့ၤ. စးထီၣ်မၤအီၤဖဲယတၢ်လုၢ်ဟံၣ်အံၤတက့ၢ်.” လၢတၢ်န့ၣ်အဃိဒီး, အဝဲသ့ၣ်စးထီၣ်မၤသံပှၤခိၣ်ပှၤနၢ်တဖၣ်လၢအဆၢထၢၣ် ဖဲယွၤအတၢ်လုၢ်ဟံၣ်န့ၣ်လီၤ.

လံာ်ယဃ့းစက့လး 9:6 Iomraidhean Croise

လံာ်တၢ်ကဲထီၣ်အခီၣ်ထံး 4:15

ဘၣ်ဆၣ်ယွၤစံးဆၢအီၤ, “တမ့ၢ်ဘၣ်. ပှၤတဂၤဂၤမ့ၢ်မၤသံနၤဒီးသးသမူနွံဖျၢၣ်ကဘၣ်တၢ်ဟံးန့ၢ်က့ၤ အီၤလၢတၢ်ဟ့ၣ်ကၣ်တၢ်အဂီၢ်န့ၣ်လီၤ.” လၢတၢ်န့ၣ်အဃိယွၤပာ်တၢ်ပနီၣ်တမံၤလၢစီၤကၤယံၣ်အလိၤဒ်သိး ပှၤတဂၤလၢ်လၢ်လၢအထံၣ်အီၤအသုတမၤသံအီၤတဂ့ၤအဂီၢ်န့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 36:17

လၢတၢ်န့ၣ်အဃိယွၤဒုးဟဲတ့ၢ်ကီၢ်ဘၤဘူၤလိၣ်အစီၤပၤလၢကဒုး အဝဲသ့ၣ်အဂီၢ်န့ၣ်လီၤ. စီၤပၤမၤသံကွံာ်ကီၢ်ယူဒၤအပှၤသးစၢ်တဖၣ်လၢယွၤအတၢ်လုၢ်ဟံၣ် အပူၤဒၣ်လဲာ်န့ၣ်လီၤ. အဝဲတသးကညီဘၣ်ပှၤနီတဂၤ, ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ, ပှၤပိာ်ခွါမ့ၢ်ဂ့ၤ, ပှၤပိာ်မုၣ်မ့ၢ်ဂ့ၤ, ပှၤဆူးပှၤဆါမ့ၢ်ဂ့ၤ, ပှၤအိၣ်ဆူၣ်အိၣ်ချ့မ့ၢ်ဂ့ၤန့ၣ်ဘၣ်. ကစၢ်ယွၤဟ့ၣ်လီၤကွံာ်အဝဲသ့ၣ်ခဲလၢာ်ဆူကီၢ်ဘၤဘူၤလိၣ်အစီၤ ပၤအစုပူၤန့ၣ်လီၤ.

လံာ်တၢ်ဟးထီၣ်ကွံာ် 12:23

ဖဲယွၤလဲၤခီဂာ်ကီၢ်အဲၤကူပတူးဒ်သိးကမၤသံပှၤအဲၤကူပတူး ဖိတဖၣ်အခါန့ၣ်ကထံၣ်ဝဲတၢ်သွံၣ်အိၣ်လၢကျိၤတဖၣ်အလိၤဒီးတြဲၤ အထူၣ်တဖၣ်အလိၤဒီးတပျဲဘၣ်အတၢ်သံ အကလူးနုာ်လီၤဆူသုဟံၣ်တဖၣ်အပူၤဒီးမၤသံသုဘၣ်န့ၣ်လီၤ.

လံာ်ယံးရမံယၤ 16:6

ပှၤထူးပှၤတီၤဒီးပှၤဖှီၣ်ဖိယာ်ဖိကသံလၢထံကီၢ်အံၤအပူၤ, ဘၣ်ဆၣ် ပှၤတခူၣ်လီၤအဝဲသ့ၣ်မ့ၢ်ဂ့ၤ, ဟီၣ်တၢ်ယၢၤတၢ်လၢအဝဲသ့ၣ်အဂီၢ် မ့ၢ်ဂ့ၤနီတဂၤဘၣ်. ပှၤတဂဲာ်လီၤအသးမ့ၢ်ဂ့ၤ, လူၤအခိၣ်လၢတၢ်ဒုးနဲၣ်အတၢ်သးအုးအဃိမ့ၢ်ဂ့ၤနီတဂၤဘၣ်.

လံာ်ယံးရမံယၤ 25:29

ယကစးထီၣ် ယတၢ်မၤဟးဂီၤတၢ်အံၤလၢ ယဝ့ၢ်ဒၣ်ယဲအပူၤန့ၣ်လီၤ. မ့ၢ်အဝဲသ့ၣ်ဆိကမိၣ်ဝဲလၢ ကပူၤဖျဲးဒီး တၢ်စံၣ်ညီၣ်န့ၣ်ဧါ. တပူၤဖျဲးဘၣ်. အဝဲသ့ၣ်ကဘၣ်တၢ်စံၣ်ညီၣ်အီၤ, မ့ၢ်လၢယကဒုးအိၣ်ထီၣ်တၢ်ဒုးတၢ်ယၤလၢပှၤဂီၢ်မုၢ်လၢ အအိၣ်လၢ ဟီၣ်ခိၣ်ချၢခဲလၢာ်အကျါအဃိန့ၣ်လီၤ. ယၤ, ယွၤသ့တၢ်လၢာ်အံၤ, ကတိၤလံတၢ်လံ.”

လံာ်ယံးရမံယၤ 44:7

အဃိဒီးယၤ, ယွၤသ့တၢ်လၢာ်, အံၣ်စရ့လးအကစၢ်ယွၤ, သံကွၢ်သုခဲအံၤလၢ ဘၣ်မနုၤအဃိလၢ သုမၤတၢ်အၢတၢ်သီဒ်သိးအံၤ တမံၤထီဒါသုကစၢ်ဒၣ်သုဝဲန့ၣ်လဲၣ်. မ့ၢ်သုသးအိၣ်ဒုးလီၤဘၣ်တၢ်တတၢးတနါလၢ ပှၤပိာ်ခွါတဖၣ်, ပှၤပိာ်မုၣ်တဖၣ်, ဖိသၣ်တဖၣ်ဒီၤ ဖိသၣ်အီၣ်နုၢ်ထံ တဖၣ်အလိၤ, ဒ်သိးပှၤဂီၢ်မုၢ်အသုတအိၣ် တီၢ်လၢၤဘၣ် နီတဂၤအဂီၢ်န့ၣ်ဧါ.

လံာ်ယံးရမံယၤ 44:8

ဘၣ်မနုၤအဃိ သုမၤသးဒိၣ်ထီၣ်ယၤ ခီဖျိသုဘူၣ်ထီၣ်ဘါထီၣ် တၢ်ဂီၤတၢ်ဖီၣ်တဖၣ်ဒီး ခီဖျိသုလုၢ်ထီၣ်တၢ်ဆူကစၢ်အဂၤတဖၣ် ဖဲ ကီၢ်အဲၤကူပတူးအံၤအပူၤ, တၢ်လီၢ်ဖဲ သုဟဲအိၣ်ဟဲ ဆိးအံၤန့ၣ်လဲၣ်. မ့ၢ်သုမၤတၢ်အံၤ ထဲဒၣ်သုကမၤဟးဂီၤ လီၤသုသးအဂီၢ်ဧိၤ, ဒ်သိးပှၤကလုာ်ကိးကလုာ်ဒဲးလၢ ဟီၣ်ခိၣ်အံၤကနံၤဘၣ်ဖၣ်လဲ သုဒီး ပာ်သုမံၤဒ်တၢ်ဆိၣ်အၢတမံၤအသိးအဂီၢ်ဧိၤန့ၣ်ဧါ.

လံာ်ယံးရမံယၤ 6:11

ယွၤဧၢ, နတၢ်သးဒိၣ်ထီၣ်ထီဒါအဝဲသ့ၣ်န့ၣ်, အီၣ်ဂီၤတၢ်လၢယပူၤစ့ၢ်ကီး, ဒီးယပၢၤအီၤတန့ၢ်ယံာ်ယံာ်လၢၤဘၣ်.” အန့ၣ်ဒီးယွၤစံးဘၣ်တ့ၢ်ယၤ, “လူလီၤယတၢ် သးကဲၤထီၣ်လၢဖိသၣ်တဖၣ်လၢအအိၣ် လၢကျဲဘိတဖၣ်အပူၤအလိၤဒီးလၢပှၤပိာ်ခွါ သးစၢ်တဖၣ်လၢအပာ်ဖှိၣ်အသးအလိၤန့ၣ်တက့ၢ်. ဝၤတဖၣ်ဒီးမါတဖၣ်ကဘၣ်တၢ်စိာ်ယံၤကွံာ်အီၤ, ဒီးပှၤအသးပှၢ်ဒၣ်လဲာ်တဘၣ်တၢ်ပျဲပူၤအီၤဘၣ်.

လံာ်ယံးရမံယၤ 9:21

တၢ်သံဟဲဝဲခီဖျိပပဲတြီဖိတဖၣ် ဒီးဟဲနုာ်လီၤလၢပနူၢ်ဧိၤစီၤဧိၤတဖၣ်အပူၤန့ၣ်လီၤ. ဒီၣ်တဲာ်ကွံာ်လံဖိသၣ်တဖၣ်လၢကျဲဘိတဖၣ်အပူၤ ဒီးပိာ်ခွါသးစၢ်တဖၣ်လၢတၢ်ဆါတၢ်ပှ့ၤ အလီၢ်တဖၣ်လံ.

လံာ်ယဃ့းစက့လး 11:1

ကစၢ်ယွၤအသးစိာ်ထီၣ်ယၤဒီးဆှၢယၤဆူ ယွၤအတၢ်လုၢ်ဟံၣ်အတြဲၤလီၤ. ဘူးဒီးတြဲၤဖဲန့ၣ်, ယထံၣ်ဘၣ်ပှၤဃုဆံယဲၢ်ဂၤ, အိၣ်ဃုာ်ဒီးစီၤဧၤစူၢ်အဖိခွါစီၤယၤစါနယၤ, ဒီးစီၤဘနါယၤအဖိခွါစီၤပလၤတယၤ, လၢအမ့ၢ်ပှၤကလုာ်အခိၣ် အနၢ်ခံဂၤန့ၣ်လီၤ.

လံာ်ယဃ့းစက့လး 9:4

လဲၤခီဖျိဝ့ၢ်ယရူၤၡလ့ၣ်ဒီဝ့ၢ်ညါ, “ဒီးပာ်တၢ်ပနီၣ်တမံၤလၢ ပှၤကိးဂၤဒဲးအခိၣ်တိသၣ်အလိၤ, ပှၤတဖၣ်လၢအဘၣ်တၢ်ကိၢ်တၢ်ဂီၤဒီးဘၣ်ကီဘၣ်ခဲ, မ့ၢ်လၢတၢ်လီၤသးဘၣ်အၢတဖၣ်လၢတၢ်မၤတ့ၢ်အီၤလၢဝ့ၢ်ပူၤအဃိ န့ၣ်တက့ၢ်.”

လံာ်ယဃ့းစက့လး 9:5

ဒီးယနၢ်ဟူကစၢ်ယွၤစံးဘၣ်ပှၤအဂၤတဖၣ်, “ပိာ်အဝဲအခံခီဖျိ ဝ့ၢ်ဒီဝ့ၢ်ညါဒီးမၤသံတၢ်တက့ၢ်. ပျၢ်ဖျဲးပှၤနီတဂၤတဂ့ၤ. သးကညီၤပှၤနီတဂၤတဂ့ၤ.

လံာ်ဧၤမိၣ် 3:2

“လၢပှၤကလုာ်ခဲလၢာ်လၢဟီၣ်ခိၣ်ချၢအကျါန့ၣ်, သုမ့ၢ်ပှၤထဲတကလုာ်ဧိၤလၢယသ့ၣ်ညါတ့ၢ်ယဲဒီးအံးထွဲကွၢ်ထွဲ တ့ၢ်န့ၣ်လီၤ. တၢ်န့ၣ်မ့ၢ်တၢ်လၢအဒုးကဲထီၣ်သုတၢ်ကမၣ်လၢတၢ် လီၤပျံၤလီၤဖုးဖးဒိၣ်ဒီးလၢတၢ်န့ၣ်အဃိယဘၣ်စံၣ်ညီၣ်သုလၢ တၢ်န့ၣ်တဖၣ်အဂ့ၢ်လီၤ.”

လံာ်လူၤကၣ် 12:47

တၢ်ခ့တၢ်ပှၤလၢအသ့ၣ်ညါအကစၢ်အဲၣ်ဒိးအမၤတၢ်မနုၤ, ဘၣ်ဆၣ်ဒီး တအိၣ်ကတဲာ်ကတီၤအသးဒီးမၤတၢ်လၢအကစၢ်အဲၣ်ဒိးဝဲန့ၣ်, ကဘၣ်တၢ်စံၣ်ညီၣ်ဒီးဖျ့အီၤနးနးကလဲာ်လီၤ.

လံာ်သိၣ်လီၤသီလီၤတၢ် 2:34

တကတီၢ်ဃီန့ၣ် ပဂုာ်န့ၢ်ဒီး မၤဟးဂီၤကွံာ်ကယဲၢ်ဝ့ၢ်ခဲလၢာ်ဒီး မၤသံကွံာ်ပှၤပိာ်ခွါတဖၣ်, ပှၤပိာ်မုၣ်တဖၣ်ဒီး ဖိသၣ်တဖၣ်ကိးဂၤဒဲးန့ၣ်လီၤ. ပတပျဲပှၤအိၣ်မူလီၤတဲာ်နီတဂၤဘၣ်.

လံာ်သိၣ်လီၤသီလီၤတၢ် 3:6

ပမၤဟးဂီၤကွံာ်ဝ့ၢ်ခဲလၢာ်ဒီးမၤသံကွံာ်ကယဲၢ်ပှၤပိာ်ခွါ, ပှၤပိာ်မုၣ်ဒီးဖိသၣ်တဖၣ်, ဒ်သိးဒၣ်ပမၤတ့ၢ်အီၤလၢဝ့ၢ်တဖၣ် အပူၤလၢအဘၣ်ဃးဒီးဝ့ၢ်ဃ့ၡဘိၣ်အစီၤပၤစီၤစံဃိၣ်အသိးန့ၣ်လီၤ.

လံာ်သိၣ်လီၤသီလီၤတၢ် 32:23

ယကဟဲစိာ်တၢ်တတၢးတနါတဖၣ်လၢအကတၢၢ်တအိၣ်ဘၣ်လၢအဝဲသ့ၣ်အလိၤ, ဒီးသူကယဲၢ်ယပျၢ်တဖၣ်ခဲလၢာ်ထီဒါအဝဲသ့ၣ်န့ၣ်လီၤ.

၂ တံၤမသ့း 2:19

ဘၣ်ဆၣ်ဒီးတၢ်အခီၣ်ထံးဂၢၢ်ကျၢၤလၢကစၢ်ယွၤပာ်လီၤ တ့ၢ်ဝဲန့ၣ်, တၢ်မၤဟူးမၤဝးအီၤတန့ၢ်ဘၣ်. လၢအလိၤတၢ်ကတိၤတဖၣ်အံၤအိၣ်ကွဲးအသး, “ကစၢ်သ့ၣ်ညါပှၤလၢအမ့ၢ်အတၢ်လီၤ.” ဒီး “ပှၤလၢအစံးလၢအဝဲဘၣ်ဃးဒီးကစၢ်န့ၣ်ကဘၣ် ဃၣ်ကွံာ်အသးလၢတၢ်မၤကမၣ်တၢ်န့ၣ်လီၤ.”

လံာ်လီၣ်ဖျါ 14:4

အဝဲသ့ၣ်မ့ၢ်ပှၤပိာ်ခွါတဖၣ်လၢအပာ်ကဆှီဃာ်အသး ခီဖျိအဟးဆှဲးတၢ်အိၣ်ဃုာ်ဒီးပိာ်မုၣ်ပိာ်မၢၤန့ၣ်လီၤ. အဝဲသ့ၣ်မ့ၢ်ပှၤဖိၣ်သၣ်ခွါဆှံဆှံတဖၣ်လီၤ. အဝဲသ့ၣ်ပိာ်သိဖိအခံဖဲအလဲၤဝဲတပူၤလၢ်လၢ်လီၤ. အဝဲသ့ၣ်ဘၣ်တၢ်ပှ့ၤက့ၤတ့ၢ်အီၤလၢပှၤကညီအဂၤ တဖၣ်အကျါဒီးမ့ၢ်ပှၤအဆိကတၢၢ်တဖၣ်လၢအဘၣ် တၢ်လုၢ်ထီၣ်အီၤဆူကစၢ်ယွၤဒီးဆူသိဖိအအိၣ်န့ၣ်လီၤ.

လံာ်လီၣ်ဖျါ 7:3

ကလူးန့ၣ်စံးဝဲ, “တချုးဒံးလၢပမၤပနီၣ်ဃာ်ပကစၢ်ယွၤအခ့ အပှၤတဖၣ်လၢတၢ်စဲပနီၣ်ဃာ်, လၢအခိၣ်တိသၣ်ဒံးဘၣ်န့ၣ်, တဘၣ်မၤဘၣ်ဒိဘၣ်ထံးဟီၣ်ခိၣ်မ့ၢ်ဂ့ၤ, ပီၣ်လဲၣ်မ့ၢ်ဂ့ၤ, သ့ၣ်ဧိၤဝၣ်ဧိၤတဖၣ်မ့ၢ်ဂ့ၤနီတမံၤဒံးတဂ့ၤ.”

လံာ်လီၣ်ဖျါ 9:4

အဝဲသ့ၣ်ဘၣ်တၢ်မၤလိာ်ပာ်အီၤလၢအသုတမၤဘၣ်ဒိတပံၢ် တမါမ့ၢ်ဂ့ၤသ့ၣ်တဖၣ်မ့ၢ်ဂ့ၤ, တၢ်မုၢ်တၢ်ဘိအဂၤမ့ၢ်ဂ့ၤနီတမံၤ တဂ့ၤန့ၣ်လီၤ. အဝဲသ့ၣ်ကဘၣ်မၤဆူးမၤဆါထဲပှၤလၢအတအိၣ်ဒီးတၢ်ပနီၣ် ဘၣ်ဃးကစၢ်ယွၤအတၢ်စဲပနီၣ်ဃာ်လၢအခိၣ်တိသၣ်အလိၤ တဖၣ်န့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 15:3

လဲၤဒီးဒုးပှၤဧမၤလ့းဖိတဖၣ်ဒီးမၤဟးဂီၤကွံာ်ကယဲၢ်အတၢ် ကိးမံၤလၢအအိၣ်ဒီးအဝဲသ့ၣ်တဖၣ်န့ၣ်တက့ၢ်. ပာ်တ့ၢ်တၢ်နီတမံၤတဂ့ၤ. မၤသံကွံာ်ကယဲၢ်ပှၤပိာ်ခွါကိးဂၤဒဲး, ပိာ်မုၣ်တဖၣ်, ဖိသၣ်တဖၣ်ဒီးဖိသၣ်ဆံးတဖၣ်, ဂီၤဘုၣ်ဂီၤဖံးတဖၣ်, သိတဖၣ်, ကီၤလၤအူးတဖၣ်ဒီးကသ့ၣ်ယီၤတဖၣ်တက့ၢ်.”