လံာ်ယဃ့းစက့လး 8:17 - Sgaw Karen Common Bible

¹⁷ ယွၤစံးဘၣ်ယၤ, “ပှၤကညီလၢအသံသ့ဧၢ, နထံၣ်တၢ်န့ၣ်ကစီဒီဧါ. ကီၢ်ယူဒၤအပှၤဂီၢ်မုၢ်တဖၣ်အံၤတသးမံထဲလၢအမၤ တၢ်လီၤသးဘၣ်အၢတဖၣ်လၢနထံၣ်ဘၣ်တ့ၢ်ဖဲအံၤ, ဒီးရၤလီၤတၢ်စုဆူၣ်ခီၣ်တကးလၢထံကီၢ်ဒီဘ့ၣ်ညါဧိၤန့ၣ်ဘၣ်. မ့မ့ၢ်အဝဲသ့ၣ်ကဘၣ်ဟဲဒီးမၤတၢ်သ့ၣ်တဖၣ်အံၤ, ဖဲအံၤလၢယွၤအတၢ်လုၢ်ဟံၣ်အပူၤအံၤ, ဒီးမၤသးဒိၣ်အါထီၣ်ယၤ ဒၣ်လဲာ်န့ၣ်လီၤ. အဝဲသ့ၣ်မၤတရီတပါယၤလၢကျဲအၢအၢသီသီထဲလဲၣ်န့ၣ်ကွၢ် တက့ၢ်. တၢ်န့ၣ်မ့ၢ်တၢ်လီၤသးဆါကတၢၢ်န့ၣ်လီၤ.

လံာ်ယဃ့းစက့လး 8:17 Iomraidhean Croise

လံာ်တၢ်ကဲထီၣ်အခီၣ်ထံး 6:11

ဒီးကယဲၢ်ပှၤအဂၤခဲလၢာ်န့ၣ်မ့ၢ်ထဲပှၤအၢပှၤသီလၢကစၢ်ယွၤအတၢ်ထံၣ် အပူၤန့ၣ်လီၤ. ဒီးတၢ်မၤတၢ်လၢတၢ်စုဆူၣ်ခီၣ်တကးသ့ၣ်တဖၣ်ရၤလီၤအသး သကုၤဆးဒးလီၤ.

လံာ်တၢ်ကဲထီၣ်အခီၣ်ထံး 6:13

ဒီးကစၢ်ယွၤစံးဘၣ်စီၤနိအၤ, “ယပာ်လီၤလံယသးလၢယကမၤဟးဂီၤ ကွံာ်ကယဲၢ်ပှၤဟီၣ်ခိၣ်ဖိခဲလၢာ်န့ၣ်လီၤ. ယကမၤဟးဂီၤကွံာ်အဝဲသ့ၣ်လၢာ်လၢာ်ဆ့ဆ့လီၤ. အဂ့ၢ်ဒ်အံၤ, ဟီၣ်ခိၣ်အံၤပှဲၤဝဲဒီးအဝဲသ့ၣ်အစုဆူၣ်ခီၣ်တကးအတၢ်မၤ တဖၣ်န့ၣ်လီၤ.

လံာ်စီၤပၤခံဘ့ၣ်တဘ့ၣ် 21:16

စီၤမနၤၡ့ၤမၤသံပှၤလၢအတၢ်ကမၣ်တအိၣ်ဘၣ်တဖၣ်အါဂၤတုၤဒၣ်လဲာ် ဝ့ၢ်ယရူၤၡလ့ၣ်အကျဲတဖၣ်, ယွၤဝဲဒီးတၢ်သွံၣ်န့ၣ်လီၤ. လၢတၢ်ဆှၢဃီၤကီၢ်ယူဒၤအပှၤဂီၢ်မုၢ်ဆူတၢ်ဘါထီၣ်တၢ်ဂီၤတၢ် ဖီၣ်အပူၤဒီးဒုးမၤအဝဲသ့ၣ်တၢ်ဒဲးဘးထီဒါယွၤ, အမဲာ်ညါန့ၣ်, အဝဲမၤအါထီၣ်တၢ်အံၤန့ၣ်လီၤ.

လံာ်စီၤပၤခံဘ့ၣ်တဘ့ၣ် 24:4

ဒီးလီၤဆီဒၣ်တၢ်မ့ၢ်လၢအဝဲမၤသံကွံာ်ပှၤတဖၣ်လၢအတၢ်ကမၣ် တအိၣ်ဘၣ်အဃိန့ၣ်လီၤ. ယွၤပျၢ်ကွံာ်စီၤမနၤၡ့ၤအတၢ်ကမၣ်တကဲဘၣ်, လၢတၢ်ဂ့ၢ်န့ၣ်အဃိလီၤ.

လံာ်ယံးရမံယၤ 19:4

ယကမၤတၢ်အံၤမ့ၢ်လၢပှၤဂီၢ်မုၢ်လဲၤသဒၣ်ယၤဒီးမၤဘၣ်အၢဘၣ်သီ တ့ၢ်တၢ်လီၢ်အံၤခီဖျိအလုၢ်ထီၣ်ပာ်ထီၣ်တၢ်လုၢ်တၢ်ပာ်တဖၣ်ဖဲအံၤ ဆူကစၢ်အဂၤတဖၣ်အအိၣ်, ကစၢ်တဖၣ်လၢအဝဲသ့ၣ်မ့ၢ်ဂ့ၤ, အမိၢ်ပၢ်ဖံဖုလၢပျၢၤမ့ၢ်ဂ့ၤ, ကီၢ်ယူဒၤအစီၤပၤတဖၣ်မ့ၢ်ဂ့ၤ, တသ့ၣ်ညါတ့ၢ်ဝဲလၢအဂ့ၢ်နီ တမံၤဘၣ်အဃိန့ၣ်လီၤ. အဝဲသ့ၣ်မၤပှဲၤတၢ်လီၢ်အံၤဒီးပှၤလၢ အတၢ်ကမၣ်တအိၣ်တဖၣ်အသွံၣ်,

လံာ်ယံးရမံယၤ 20:8

ဖဲယကတိၤတၢ်တဘျီဂ့ၤတဘျီဂ့ၤန့ၣ်, ယဘၣ်ကိးထီၣ်ဒီးကိးသတြီထီၣ်, “တၢ်မၤဆူၣ်မၤစိးဒီးတၢ်မၤလီၤပှီၢ်ဟးဂီၤ” န့ၣ်လီၤ. ယွၤဧၢ, ယဘၣ်တၢ်ကတိၤဒုၣ်ဒွဲၣ်စံးအၢယၤဒီး တၢ်တပာ်ကဲဘၣ်ယၤထီဘိတထံၣ်ဃီ မ့ၢ်လၢယစံးကတိၤနတၢ်ကစီၣ်အဃိန့ၣ်လီၤ.

လံာ်ယံးရမံယၤ 44:3

အဂ့ၢ်ဒ်အံၤ, အဝဲသ့ၣ်အပှၤဂီၢ်မုၢ် မၤတ့ၢ်တၢ်အၢတၢ်သီ ဒီး မၤသးဒိၣ်ထီၣ်တ့ၢ်ယၤအဃိလီၤ. အဝဲသ့ၣ် လုၢ်ထီၣ် တ့ၢ်တၢ်ဆူ ကစၢ်အဂၤတဖၣ်ဒီး မၤတ့ၢ်ကစၢ်တဖၣ်လၢ အဝဲသ့ၣ်မ့ၢ်ဂ့ၤ, သုဝဲမ့ၢ်ဂ့ၤ, သုမိၢ်ပၢ်ဖံဖုလၢပျၢၤမ့ၢ် ဂ့ၤတဘူၣ်ထီၣ်ဘါထီၣ်နီတဘျီနီတစုဘၣ် အတၢ်မၤန့ၣ်လီၤ.

လံာ်ယံးရမံယၤ 6:7

ဒ်ထံပူၤတပူၤကတီၤဃာ်အထံဆှံထံဂ့ၤအသိးန့ၣ်, ဝ့ၢ်ယရူၤရှလ့ၣ်ကတီၤဃာ်အတၢ်အၢတၢ်သီ, သီကဘှဲဒဲန့ၣ်လီၤ. ယနၢ်ဟူတၢ်စုဆူၣ်ခီၣ်တကးဒီးတၢ်မၤဟးဂီၤလၢဝ့ၢ်န့ၣ်အပူၤ, ဒီးတၢ်လၢယထံၣ်ခဲလၢာ်န့ၣ်မ့ၢ်ဒၣ်တၢ်ဆူးတၢ်ဆါဒီးတၢ်ပူၤလီၢ်ပူၤကျဲ တဖၣ်န့ၣ်လီၤ.

လံာ်သးသယုၢ်တၢ် 1:5

အဒုၣ်အဒါတဖၣ်မၤနၢၤကွံာ်အီၤဒီးအိၣ်ဝဲဘီၣ်ထီၣ်ညီထီၣ်ဝဲ လီၤ. အဂ့ၢ်ဒ်အံၤ, ကစၢ်ယွၤဒုးတူၢ်ဘၣ်အီၤတၢ်လၢကယဲၢ်အတၢ်ဒဲးဘး တဖၣ်အဃိလီၤ. အဖိအလံၤတဖၣ်ဘၣ်တၢ်ဖီၣ်န့ၢ်အီၤဒီးစိာ်ကွံာ်အီၤဆူတၢ်မၢကဲ ကုၢ်အလီၢ်လီၤ.

လံာ်ယဃ့းစက့လး 11:6

သုမၤသံတ့ၢ်ပှၤဂီၢ်မုၢ်အါမးလၢဝ့ၢ်အံၤအပူၤတုၤဒၣ်လဲာ်, ကျဲဘိတဖၣ်ပှဲၤဝဲဒီးတၢ်အစိၣ်တဖၣ်န့ၣ်လီၤ.

လံာ်ယဃ့းစက့လး 16:26

နပျဲပှၤအဲၤကူပတူးဖိတဖၣ်လၢအအိၣ်လၢနဃၢၤလၢအသးကတၢန့ၣ် ကမံဃုာ်ဒီးနၤလၢလီၢ်မံခးအဖီခိၣ်လီၤ. ဒီးနသူနတၢ်မၤပှၤဃဲသဲမုၣ်အတၢ်မၤလၢကမၤသးထီၣ်ယၤအဂီၢ်န့ၣ် လီၤ.

လံာ်ယဃ့းစက့လး 18:12

အဝဲလီန့ၢ်ပှၤဖှီၣ်ဖိယာ်ဖိတဖၣ်, အဝဲဂုာ်ဆူၣ်တၢ်, အဝဲဟံးန့ၢ်ကွံာ်တၢ်လၢပှၤလၢအဃ့လိၢ်တၢ်တဂၤဟ့ၣ်အီၤဒ်တၢ်ဟ့ၣ် ကီၤအသိးန့ၣ်လီၤ. အဝဲလဲၤဆူပှၤတစူၢ်တနာ်ယွၤအတၢ်ဘါလီၢ်တဖၣ်, ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်လၢအလီၤသးဘၣ်အၢန့ၣ်လီၤ.

လံာ်ယဃ့းစက့လး 23:25

မ့ၢ်လၢ, ယသးဒိၣ်ထီၣ်နၤအဃိ, ယကပျဲအဝဲသ့ၣ်မၤဘၣ်နၤလၢအတၢ် သးထီၣ်အပူၤန့ၣ်လီၤ. အဝဲသ့ၣ်ကကူးတဲာ်ကွံာ်နနါဒ့တဖၣ်ဒီးနနၢ်တဖၣ်ဒီးကမၤသံကွံာ် နဖိတဖၣ်န့ၣ်လီၤ. မ့ၢ်လီၤ. အဝဲသ့ၣ်ကဟံးန့ၢ်ကွံာ်နဖိခွါတဖၣ်ဒီးနဖိမုၣ်တဖၣ်လၢနအိၣ် ဒီးဒွဲၣ်ကွံာ်မူဒံးအဝဲသ့ၣ်န့ၣ်လီၤ.

လံာ်ယဃ့းစက့လး 28:16

နတၢ်ဖံးတၢ်မၤအါလၢ တၢ်ဆါတၢ်ပှ့ၤဒီး တၢ်အံၤန့ၣ်ဆှၢဃီၤနၤဆူတၢ်မၤဆူၣ်မၤစိးတၢ်ဒီးတၢ်မၤဒဲးဘးန့ၣ်လီၤ. လၢတၢ်န့ၣ်အဃိ, ယမၤဆူၣ်ဒ်သိး နကဟးထီၣ်ကွံာ်လၢယကစၢၢ်စီဆှံဒီးမူခိၣ်ကလူး တဂၤလၢအခိးဒီဒၣ်နၤန့ၣ်နီၣ်ဟးထီၣ်ကွံာ်နၤယံၤဒီး လၢၢ်တၢ်မျၢ်ကပြုၢ်ကပြီၤတဖၣ်န့ၣ်လီၤ.

လံာ်ယဃ့းစက့လး 45:9

ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “သုဝဲကီၢ်အံၣ်စရ့လးအပှၤပၢတၢ်သ့ၣ်ဧၢ, သုမၤတ့ၢ်တၢ်ဒဲးဘး ယံာ်တ့ၢ်မးလံ. ဆိကတီၢ်သုတၢ်မၤဆူၣ်မၤစိးဒီး တၢ်မၤနးမၤဖှီၣ်န့ၣ်တက့ၢ်. မၤတၢ်လၢအဘၣ်ဒီးအမ့ၢ်အ တီန့ၣ်တက့ၢ်. သုတဘၣ်နီၣ်ဟးထီၣ်ကွံာ်လၢၤယပှၤဂီၢ်မုၢ် လၢအကီၢ်ပူၤနီတဘျီဘၣ်. ယၤ, ယွၤပၢဘၣ်တၢ်ခဲလၢာ် ကစၢ်တဲဘၣ်သုတၢ်အံၤန့ၣ်လီၤ.

လံာ်ယဃ့းစက့လး 7:11

တၢ်မၤဆူၣ်မၤစိးဒုးဒိၣ်ထီၣ်အါထီၣ်တၢ်အၢတၢ်သီန့ၣ်လီၤ. အဝဲသ့ၣ်အတၢ်ထူးတၢ်တီၤ, အတၢ်ဃံဒိၣ်လၤဒိၣ်, အတၢ်လၤကပီၤလၢအမ့ၢ်အဝဲသ့ၣ်အတၢ်တဖၣ်န့ၣ်, တအိၣ်လီၤတဲာ်နီတမံၤလၢၤဘၣ်.

လံာ်ယဃ့းစက့လး 7:23

တၢ်ကိးမံၤဒဲးန့ၣ်အိၣ်လၢတၢ်မရံၢ်ဘံဘူအပူၤန့ၣ်လီၤ. ထံဧိၤကီၢ်ဧိၤန့ၣ်ပှဲၤဒီးတၢ်မၤသံမၤဝီတဖၣ်ဒီးဝ့ၢ်တဖၣ် န့ၣ်ပှဲၤဒီးတၢ်မၤဆူၣ်မၤစိးန့ၣ်လီၤ.

လံာ်ယဃ့းစက့လး 8:6

ကစၢ်ယွၤစံးဘၣ်ယၤ, “ပှၤကညီလၢအသံသ့ဧၢ, နထံၣ်ဘၣ်တၢ်လၢအမၤ အသးလံကစီဒီဧါ, ကွၢ်ဃီၤတၢ်လၢအလီၤသးဘၣ်အၢတဖၣ်, လၢကီၢ် အံၣ်စရ့လးအပှၤဂီၢ်မုၢ်မၤဝဲဖဲအံၤ, ဒီးနီၣ်ထီၣ်ကွံာ်ယၤယံၤထီၣ်ယံၤထီၣ်ဒီးယတၢ်လီၢ်စီဆှံန့ၣ်တက့ၢ်. နကထံၣ်ဘၣ်ဒံးတၢ်လီၤမဲာ်ဆှးတဖၣ်အါန့ၢ်ဒိၣ်န့ၢ်ဒံးဒၣ်လဲာ်တၢ် အံၤန့ၣ်လီၤ.”

လံာ်ယဃ့းစက့လး 9:9

ကစၢ်ယွၤစံးဆၢတၢ်ဒီးစံးဝဲ, “ကီၢ်အံၣ်စရ့လးဒီးကီၢ်ယူဒၤ အပှၤဂီၢ်မုၢ်တဖၣ်မၤတၢ်ဒဲးဘးတဖၣ်လၢအလီၤပျံၤလီၤဖုးန့ၣ်လီၤ. အဝဲသ့ၣ်မၤသံတ့ၢ်တၢ်လၢထံကီၢ်ဒီဘ့ၣ်ညါဒီးမၤပှဲၤဝ့ၢ် ယရူၤၡလ့ၣ်ဒီးတၢ်မၤကမၣ်တၢ်သိၣ်တၢ်သီန့ၣ်လီၤ. အဝဲသ့ၣ်စံးဝဲလၢယၤ, ယွၤအံၤ, ပာ်လီၤတဲာ်ကွံာ်အဝဲသ့ၣ်အထံ အကီၢ်ဒီးလၢယတထံၣ်အဝဲသ့ၣ်ဘၣ်န့ၣ်လီၤ.

လံာ်ဧၤမိၣ် 3:10

ပှၤသ့ၣ်တဖၣ်အံၤမၤပှဲၤအဟံၣ်အဃီဒီးတၢ်တဖၣ်လၢအမၤန့ၢ်ဝဲတၢ်မၤ ဆူၣ်မၤနၢၤဒီးတၢ်ဂုာ်ဆူၣ်ပျီဆူၣ်န့ၣ်လီၤ. ကဘၣ်အိၣ်မူတီတီလိၤလိၤဒ်လဲၣ်ဒၣ်လဲာ်န့ၣ်တသ့ၣ်ညါဝဲဘၣ်.

လံာ်ဧၤမိၣ် 6:3

သုဂ့ၢ်လိာ်လၢသုကတူၢ်လိာ်တၢ်အၢတၢ်သီအမုၢ်တနံၤန့ၣ်ဘၣ်ဆၣ် ဒီး, တၢ်လၢသုမၤန့ၣ်ဟဲစိာ်ဒၣ်မုၢ်တနံၤန့ၣ်အတၢ်ဘူးထီၣ်လီၤ.

လံာ်မံကၤ 2:2

ဖဲအသးလီစံာ်ဧိၤပှဲၤဧိၤတဖၣ်န့ၣ်, ဂုာ်န့ၢ်ဆူၣ်ဝဲလီၤ. ဖဲအသးလီဟံၣ်ဧိၤဃီဧိၤတဖၣ်န့ၣ်ဟံးန့ၢ်ကွံာ်ဝဲလီၤ. တပျဲပူၤဘၣ်ပှၤအဟံၣ်အဃီဒီးအစုလီၢ်ခီၣ်ခိၣ်နီတဂၤဘၣ်.

လံာ်မံကၤ 6:12

သုပှၤထူးပှၤတီၤတဖၣ်န့ၣ်ဃုဆူၣ်အဘျုး လၢပှၤဖှီၣ်ဖိယာ်ဖိအဖီခိၣ်ဒီးသုဝဲခဲလၢာ် သုမ့ၢ်ပှၤလီတၢ်ဖိတဖၣ်လီၤ.

လံာ်စဖါနယၤ 1:9

ယကစံၣ်ညီၣ်ကယဲၢ်ပှၤလၢအဘူၣ်ထီၣ်ဘါထီၣ် တၢ်ဒ်ပှၤဘါတၢ်ဂီၤတၢ်ဖီၣ်တဖၣ်အသိး, ဒီးပှၤလၢအဟုၣ်တၢ်ဒီးမၤသံတၢ်ဒ်သိးအကမၤပှဲၤအကစၢ်အဟံၣ်လၢ အတၢ်ဂုာ်န့ၢ်တဖၣ်န့ၣ်လီၤ.”