လံာ်ယဃ့းစက့လး 7:26 - Sgaw Karen Common Bible

²⁶ တၢ်တတၢးတနါတမံၤကပိာ်ထွဲထီၣ်အဂၤတမံၤအခံ, ဒီးတၢ်သးအုးအကစီၣ်ကတုၤအိၣ်သုတထံၣ်ဃီလီၤ. သုကဃ့ကညးဝံတဖၣ်လၢကလီၣ်ဖျါန့ၢ်သုတၢ်လၢအဝဲသ့ၣ်ထံၣ် ဆိဝဲလီၤ. ပှၤလုၢ်တၢ်အခိၣ်တဖၣ်ကသိၣ်လိပှၤဂီၢ်မုၢ်အဂီၢ် တၢ်တအိၣ်ဒီးအီၤနီတမံၤဘၣ်, ဒီးပှၤသးပှၢ်တဖၣ်တမ့ၢ်ကအိၣ်ဒီးတၢ်ဟ့ၣ်ကူၣ်လၢကဟ့ၣ်ဝဲနီတမံၤဘၣ်.

လံာ်ယဃ့းစက့လး 7:26 Iomraidhean Croise

စံးထီၣ်ပတြၢၤ 74:9

ပတထံၣ်ဘၣ်ပတၢ်ပနီၣ်စီဆှံတဖၣ်လၢၤဘၣ်, ဝံတအိၣ်လၢၤနီတဂၤဘၣ်, ဒီးတၢ်အံၤကယံာ်ဆံးယံာ်လဲၣ်န့ၣ် ပှၤလၢပကျါတသ့ၣ်ညါနီတဂၤဘၣ်.

လံာ်ယၡါယၤ 47:11

တၢ်တတၢးတနါကဟဲတုၤအိၣ်နၤ ဒီးနတၢ်မၤကဒါပှၤအမဲာ်တမံၤဂ့ၤတမံၤဂ့ၤ, ဆိကတီၢ်အီၤတန့ၢ်ဘၣ်. တၢ်ဟးဂီၤကလီၤဘၣ်နၤသတူၢ်ကလာ်, တၢ်ဟးဂီၤလၢနတမံမီၢ်တ့ၢ်နီတစုဘၣ်န့ၣ်လီၤ.

လံာ်ယံးရမံယၤ 18:18

အန့ၣ်ဒီးပှၤဂီၢ်မုၢ်စံးဝဲဒၣ်, “မ်ပမၤတၢ်တမံၤမံၤဘၣ်ဃး စီၤယံးရမံယၤတက့ၢ်. ထီဘိန့ၣ်ပှၤလုၢ်တၢ်အခိၣ်တဖၣ်လၢ ကသိၣ်လိပှၤမ့ၢ်ဂ့ၤ, ပှၤကူၣ်တၢ်သ့တဖၣ်လၢကဟ့ၣ်ကူၣ်ဟ့ၣ်ဖးပှၤမ့ၢ်ဂ့ၤ, ဒီးဝံတဖၣ်လၢကစံးဘၣ်တဲဘၣ်ပှၤလၢကစၢ်ယွၤအတၢ်ကစီၣ် မ့ၢ်ဂ့ၤန့ၣ်ကအိၣ်ဝဲလီၤ. မ်ပလိာ်ကွီၢ်ထီဒါအီၤဒီးတၢ်လၢ အစံးဝဲန့ၣ်, မ်ပသုတဒိကနၣ်တဂ့ၤ.”

လံာ်ယံးရမံယၤ 21:2

“ဝံသးစူၤကတိၤတၢ်ဒီးယွၤလၢပဂီၢ်တက့ၢ်. အဂ့ၢ်ဒ်အံၤ, ကီၢ်ဘၤဘူၤလိၣ်အစီၤပၤနဘူၤကးန့စၢ်ဒီးအဝဲအသုးမုၢ် ကဝီၤဃာ်ဝ့ၢ်လံ. ဘၣ်တဘၣ်ယွၤကမၤတၢ်လီၤလးအါမံၤ အကျါတမံၤလၢပဂီၢ်ဒီးမၢဆူၣ်စီၤနဘူၤကးန့စၢ်လၢအဂုၤ က့ၤဆူအလီၢ်ခံန့ၣ်လီၤ.”

လံာ်ယံးရမံယၤ 37:17

လၢခံဒီး, စီၤပၤစံးဒကံယၤမၢပှၤလဲၤကိးယၤ, ဒီးဖဲန့ၣ်လၢနူၢ်အပူၤန့ၣ်, အဝဲသံကွၢ်ခူသူၣ်ယၤ, “မ့ၢ်တၢ်ကစီၣ်အိၣ်တမံၤမံၤလၢ ယွၤအအိၣ်ဧါ.” ယစံးဆၢအီၤ, “အိၣ်လီၤ.” ဒီးယစံးအါထီၣ်အီၤ, “နကဘၣ်တၢ်ဟ့ၣ်လီၤကွံာ်နၤဆူ ကီၢ်ဘၤဘူၤလိၣ်အစီၤပၤအစုပူၤန့ၣ်လီၤ.”

လံာ်ယံးရမံယၤ 4:20

တၢ်တတၢးတနါတမံၤပိာ်ထွဲအဂၤတမံၤအခံလီၤ. ထံကီၢ်ဒီဘ့ၣ်အိၣ်လီၤတဲာ်လၢတၢ်ဟးဂီၤတဖၣ် အပူၤလီၤ. သတူၢ်ကလာ်ပအိၣ်ဆိးအဒဲတဖၣ်ဘၣ် တၢ်မၤဟးဂီၤအီၤ ဒီးအယၣ်ဘျးသဒၢတဖၣ်ဘၣ်တၢ်ဖှီယာ်ကွံာ်အီၤ အက့က့အခီခီန့ၣ်လီၤ.

လံာ်သးသယုၢ်တၢ် 2:9

ဝ့ၢ်အပဲတြီတဖၣ်ဒါလီၤအသးလီၤဘျၢကွံာ်လၢတၢ်လီၤပှီၢ်လီၤ ကလဲတဖၣ်အဖီလာ်ဒီးအနီၣ်ဘိတဖၣ်ဘၣ်တၢ်ဒိကၢ်လီၤကလဲကွံာ်အီၤ န့ၣ်လီၤ. စီၤပၤဒီးပှၤတူၢ်ဒိၣ်ကီၤဒိၣ်တဖၣ်န့ၣ်ခဲအံၤအိၣ်လၢတၢ်စိာ် မၢကဲကုၢ်အီၤအပူၤလီၤ. ပှၤယူဒၤဖိအတၢ်သိၣ်တၢ်သီန့ၣ်တဘၣ်တၢ်သိၣ်လိသီလိအီလၢၤဘၣ် ဒီးဝံတဖၣ်တန့ၢ်ဘၣ်တၢ်ထံၣ်လၢညါခီလၢယွၤအအိၣ်နီတမံၤလၢၤ ဘၣ်.

လံာ်ယဃ့းစက့လး 11:2

ကစၢ်ယွၤစံးဘၣ်ယၤ, “ပှၤကညီလၢအသံသ့ဧၢ, ပှၤတဖၣ်အံၤ ကူၣ်ထီၣ်တၢ်အၢတၢ်သီဒီးလၢဝ့ၢ်အံၤအပူၤန့ၣ်အဝဲသ့ၣ်ဟ့ၣ်ကူၣ် တၢ်လၢအတဂ့ၤတဖၣ်လီၤ.

လံာ်ယဃ့းစက့လး 14:1

ပှၤအံၣ်စရ့လးဖိအခိၣ်အနၢ်တနီၤဟဲဃ့တၢ်ဟ့ၣ်ကူၣ်ဟ့ၣ်ဖးလၢ ယၤ, ဘၣ်ဃးဒီးယွၤအတၢ်ဘၣ်အသးအဂ့ၢ်န့ၣ်လီၤ.

လံာ်ယဃ့းစက့လး 21:7

တုၤအဝဲသ့ၣ်သံကွၢ်နၤ, ဘၣ်မနုၤအဃိလၢနကအုကစွါလဲၣ်န့ၣ်, တဲဘၣ်အဝဲသ့ၣ်လၢတၢ်န့ၣ်မ့ၢ်လၢတၢ်ကစီၣ်လၢအကဟဲဝဲ အဃိန့ၣ်လီၤ. ဖဲအဟဲတုၤန့ၣ်အဝဲသ့ၣ်အသးတဖၣ်ကပှဲၤဝဲဒီး တၢ်ပျံၤတၢ်ဖုး, အဝဲသ့ၣ်အစုတဖၣ်ကလီၤဘျ့ကွံာ်, အဝဲသ့ၣ်အတၢ်သူၣ်ဒူသးဒူကလီၤမၢ်ကွံာ်ဒီးအဝဲသ့ၣ်အခီၣ်လ့ၢ်ခိၣ် တဖၣ်ကကနိးကစုာ်ဝဲန့ၣ်လီၤ. တၢ်ဆၢကတီၢ်တုၤဃီၤလံ. မ့ၢ်ခဲကနံၣ်အံၤလီၤ. ယွၤ, ပၢဘၣ်တၢ်ခဲလၢာ်ကစၢ်ကတိၤလံတၢ်လံ.

လံာ်ယဃ့းစက့လး 22:26

ပှၤလုၢ်တၢ်အခိၣ်တဖၣ်လုၢ်သ့ၣ်ခါပတာ်ယတၢ်ဘူၣ်တၢ်ဘါအတၢ်သိၣ်တၢ် သီဒီးတအိၣ်ဒီးတၢ်ပာ်ကဲတၢ်လၢအစီဆှံန့ၣ်ဘၣ်. အဝဲသ့ၣ်တပာ်လီၤဆီတၢ်လၢအစီအဆှံဒီးအတစီ တဆှံန့ၣ်ဘၣ်. အဝဲသ့ၣ်တသိၣ်လိတၢ်လီၤဆီလၢတၢ်လၢအကဆှီဒီး အတကဆှီဘၣ်အဘၢၣ်စၢၤန့ၣ်ဘၣ်. ဒီးအဝဲသ့ၣ်တကနၣ်ဃုာ်မုၢ်အိၣ်ဘှံးနံၤန့ၣ်ဘၣ်. လၢတၢ်န့ၣ်အဃိကီၢ်အံၣ်စရ့လးအပှၤဂီၢ်မုၢ်တယူးယီၣ်ပာ်ကဲယၤ ဘၣ်.

လံာ်ယဃ့းစက့လး 33:31

လၢတၢ်န့ၣ်အဃိ, ယပှၤဂီၢ်မုၢ်ပာ်ဖှိၣ်ထီၣ်အသးဒ်သိးကနၢ်ဟူ တၢ်လၢနကစံးအီၤ, ဘၣ်ဆၣ်အဝဲသ့ၣ်တမၤတၢ်လၢနတဲဘၣ် အဝဲသ့ၣ်လၢကဘၣ်မၤဝဲန့ၣ်ဘၣ်. တၢ်ကတိၤတဖၣ်လၢအလီၤ အဲၣ်လီၤကွံန့ၣ်အိၣ်ဝဲလၢအနိးဖံးတဖၣ်အလိၤ, ဘၣ်ဆၣ်အဝဲသ့ၣ် မၤထွဲဒံးဒၣ်အတၢ်သူၣ်လီသးကွံအကျဲတဖၣ်န့ၣ်လီၤ.

လံာ်ယဃ့းစက့လး 8:1

လၢပတၢ်ကဲကုၢ်ဃုနံၣ်တနံၣ်, လါဃုလါတလါထီၣ်ယဲၢ်သီ အနံၤန့ၣ်, ကီၢ်ယူဒၤအပှၤခိၣ်ပှၤနၢ်လၢတၢ်ကဲကုၢ်အပူၤတဖၣ် ဆ့ၣ်နီၤသကိးဒီးယၤလၢယဟံၣ်ပူၤန့ၣ်လီၤ. သတူၢ်ကလာ်, ယွၤပၢဘၣ်တၢ်ခဲလၢာ်ကစၢ်အစိကမီၤလီၤဘၣ်လၢယလိၤန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 26:18

ဒီးတၢ်စံၣ်ညီၣ်လၢထးတဖၣ်အံၤဘၣ်သုဒၣ်လဲာ်န့ၣ်သုမ့ၢ်တဒိ ကနၣ်ဘၣ်ယၤဒီး, ယကမၤအါထီၣ်တၢ်စံၣ်ညီၣ်နွံဘျီလၢသုဂီၢ်လီၤ.

လံာ်တၢ်ဘူၣ်ထီၣ်ဘါထီၣ် 26:21

သုမ့ၢ်ထီဒါဒံးယၤဒီးတဒိကနၣ်ဘၣ်ယၤန့ၣ်, ယကမၤအါထီၣ်ကဒီးတၢ်စံၣ်ညီၣ်နွံဘျီန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 26:24

ယကဃၣ်ဒူချၢယသး လၢသုဒီးစံၣ်ညီၣ်သုနးန့ၢ်ဒံးတၢ်စံၣ်ညီၣ်လၢညါနွံဘျီန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 26:28

ယကဃၣ်ယသးဆူသုအိၣ်လၢတၢ်သးထီၣ်အပူၤဒီးစံၣ်ညီၣ်သုအၢန့ၢ်ဒံးအလီၢ်နွံဘျီန့ၣ်လီၤ.

လံာ်မံကၤ 3:6

“ဝံသ့ၣ်ဧၢ, သုမုၢ်နံၤဘူးကကတၢၢ်လီၤ. သုမုၢ်လီၤနုာ်လံ. အဂ့ၢ်ဒ်အံၤ, သုဆှၢကမၣ်ယပှၤဂီၢ်မုၢ်အဃိဝံအတၢ်ထံၣ် လၢညါခီတဖၣ်တအိၣ်လၢၤဘၣ်ဒီးသုဘၣ်. သုဖးဆိပာ်တၢ်တသ့လၢၤနီတမံၤဘၣ်”.

လံာ်မၤလကံ 2:7

တၢ်န့ၣ်မ့ၢ်ပှၤလုၢ်တၢ်အခိၣ်တဖၣ်အမူအဒါလၢ ကဘၣ်သိၣ်လိတၢ်သ့ၣ်ညါအမ့ၢ်အတီဘၣ်ဃး ဒီးကစၢ်ယွၤန့ၣ်လီၤ. ပှၤဘၣ်လဲၤဆူအဝဲသ့ၣ်အအိၣ်လၢကမၤလိယတၢ်ဘၣ်သး, မ့ၢ်လၢအဝဲသ့ၣ်မ့ၢ်ယွၤသ့တၢ်လၢာ်အပှၤစိာ်တၢ် ကစီၣ်တဖၣ်အဃိန့ၣ်လီၤ.

လံာ်မၤလကံ 2:9

မၤသးဒ်န့ၣ်ဒီး, ယပာ်သုလၢတၢ်တပာ်ကဲဘၣ်အလီၢ်ဒီးတၢ်မၤတရီ တပါအလီၢ်လၢကယဲၢ်ပှၤခဲလၢာ်အမဲာ်ညါန့ၣ်လီၤ. အဂ့ၢ်ဒ်အံၤ, သုတတိၢ်န့ၢ်ဘၣ်ယကျဲဘၣ်. ဒီးသုကွၢ်မဲာ်တၢ်လၢသုတၢ်သိၣ်လိသီလိအပူၤန့ၣ်လီၤ.”

လံာ်သိၣ်လီၤသီလီၤတၢ် 32:23

ယကဟဲစိာ်တၢ်တတၢးတနါတဖၣ်လၢအကတၢၢ်တအိၣ်ဘၣ်လၢအဝဲသ့ၣ်အလိၤ, ဒီးသူကယဲၢ်ယပျၢ်တဖၣ်ခဲလၢာ်ထီဒါအဝဲသ့ၣ်န့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 3:1

လၢမုၢ်နံၤတဖၣ်အပူၤ, ဖဲဖိသၣ်စီၤၡမူၤအ့လးမၤယွၤအတၢ်မၤ လၢစီၤဧ့လံၤအတၢ်နဲၣ်ကျဲအဖီလာ်အခါန့ၣ်, တၢ်ကစီၣ်ဟဲလၢယွၤစှၤဒိၣ်မးလီၤ. ဒီးတၢ်ထံၣ်လၢညါခီတဖၣ် လၢအဟဲလၢအအိၣ်န့ၣ်ကၤဒိၣ်မးလီၤ.