လံာ်ယဃ့းစက့လး 23:47 - Sgaw Karen Common Bible

⁴⁷ ပျဲပှၤဂီၢ်မုၢ်တဖုလၢအတၢထီၣ်တၢလီၤန့ၣ်ကွံာ်သံအဝဲသ့ၣ်လၢ လၢၢ်ဒီးဒုးအဝဲသ့ၣ်လၢနးတဖၣ်, မၤသံကွံာ်အဖိတဖၣ်ဒီးဒွဲၣ် အူကွံာ်အဝဲသ့ၣ်အဟံၣ်တဖၣ်န့ၣ်တက့ၢ်.

လံာ်ယဃ့းစက့လး 23:47 Iomraidhean Croise

လံာ်ယံးရမံယၤ 32:29

ဒီးဒွဲၣ်အူထီၣ်အီၤလၢ မ့ၣ်အူလီၤ. အဝဲသ့ၣ် ကဆူးထီၣ်ကွံာ် ဝ့ၢ် အံၤ ဃုာ်ဒီးဟံၣ်တဖၣ် ဖဲပှၤဂီၢ်မုၢ်မၤသးဒိၣ်တ့ၢ်ယၤ ခီဖျိတၢ်ဆိၣ် ကဲၤ တၢ်နၢမူလၢဘဧၤလၤ အဂီၢ်လၢ ဟံၣ်ခိၣ်တဖၣ်အလိၤဒီး ခီဖျိ တၢ်လူလီၤဂၢ်လီၤ တၢ်လုၢ်စပံးထံတဖၣ်ဆူ ကစၢ်အဂၤတဖၣ် အအိၣ်အဃိလီၤ.

လံာ်ယံးရမံယၤ 39:8

ဖဲန့ၣ်အခါ, ပှၤဘၤဘူၤလိၣ်ဖိတဖၣ် ဒွဲၣ်အူထီၣ်ကွံာ် စီၤပၤအနူၢ်ဒီၤ အပှၤဂီၢ်မုၢ်အဟံၣ်တဖၣ်, ဒီးမၤလီၤပှီၢ် ကွံာ်ဝ့ၢ်ယရူၤရှလ့ၣ်အခိၣ်ဒူတဖၣ်န့ၣ်လီၤ.

လံာ်ယံးရမံယၤ 52:13

အဝဲဒွဲၣ်အူထီၣ်ကွံာ် ယွၤအတၢ်လုၢ်ဟံၣ်, စီၤပၤအနူၢ်, ဒီးပှၤဂီၢ်မုၢ်လၢ အကါဒိၣ်လၢအအိၣ်ဆိးလၢ ဝ့ၢ်ယရူၤရှလ့ၣ်အပူၤခဲလၢာ်အဟံၣ်အဃီတဖၣ်,

လံာ်ယဃ့းစက့လး 23:25

မ့ၢ်လၢ, ယသးဒိၣ်ထီၣ်နၤအဃိ, ယကပျဲအဝဲသ့ၣ်မၤဘၣ်နၤလၢအတၢ် သးထီၣ်အပူၤန့ၣ်လီၤ. အဝဲသ့ၣ်ကကူးတဲာ်ကွံာ်နနါဒ့တဖၣ်ဒီးနနၢ်တဖၣ်ဒီးကမၤသံကွံာ် နဖိတဖၣ်န့ၣ်လီၤ. မ့ၢ်လီၤ. အဝဲသ့ၣ်ကဟံးန့ၢ်ကွံာ်နဖိခွါတဖၣ်ဒီးနဖိမုၣ်တဖၣ်လၢနအိၣ် ဒီးဒွဲၣ်ကွံာ်မူဒံးအဝဲသ့ၣ်န့ၣ်လီၤ.

လံာ်ယဃ့းစက့လး 23:29

ဒီးမ့ၢ်လၢအဝဲသ့ၣ်သးဟ့နၤအဃိ, ဒီးဘ့ၣ်ကွံာ်နကူနသိးဒီး ပာ်တ့ၢ်နၤအိၣ်ဘ့ၣ်ဆ့, အိၣ်ဖျါဒ်ပှၤဃဲသဲမုၣ်တဂၤအသိးန့ၣ်လီၤ. နတၢ်သးကတၢဒီးနတၢ်မၤပှၤဃဲသဲမုၣ်အတၢ်မၤ, ဒုးလီၤဘၣ်တၢ်အံၤလၢနလိၤန့ၣ်လီၤ.

လံာ်ယဃ့းစက့လး 23:48

လၢကီၢ်ဒီတဘ့ၣ်ညါအပူၤန့ၣ်, ယကဆိကတီၢ်ကွံာ်တၢ်လုၢ်အၢလၢ်သီ, ဒ်အမ့ၢ်တၢ်ဟ့ၣ်ပလီၢ်တမံၤလၢပိာ်မုၣ်ကိးဂၤဒဲးသုတမၤတၢ်မၤကမၣ် မုၣ်ကမၣ်ခွါဒ်အဝဲသ့ၣ်မၤတ့ၢ်ဝဲအသိးတဂ့ၤန့ၣ်လီၤ.

လံာ်ယဃ့းစက့လး 24:21

ယကဟ့ၣ်လီၤတၢ်ကစီၣ်အံၤဆူသုဝဲပှၤအံၣ်စရ့လးဖိတဖၣ် အအိၣ်န့ၣ်လီၤ. သုပာ်ထီၣ်ထီသုသးလၢယွၤအတၢ်လုၢ်ဟံၣ်အတၢ်ဂံၢ်တၢ်ဘါ အဃိလီၤ. သုအဲၣ်ဒိးကွၢ်ဃီၤအီၤဒီးလဲၤဆူအအိၣ်, ဘၣ်ဆၣ်ယွၤကမၤဘၣ်အၢကွံာ်အီၤန့ၣ်လီၤ. ဒီးသုပှၤဟံၣ်ဖိလၢ အသးစၢ်တဖၣ်လၢအအိၣ်လီၤတဲာ်လၢဝ့ၢ်ယရူၤၡလ့ၣ်အပူၤန့ၣ် ကဘၣ်တၢ်မၤသံကွံာ်အီၤလၢတၢ်ဒုးအပူၤန့ၣ်လီၤ.

လံာ်ယဃ့းစက့လး 24:6

တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲဒၣ်န့ၣ်လီၤ. “ပှၤမၤသံတၢ်ဖိတဖၣ်အဝ့ၢ်န့ၣ်ဘၣ်တၢ်စံၣ်ညီၣ်ဃါမနၤလီၤ. ဝ့ၢ်န့ၣ်လီၤဂာ်ဒ်သပၢၤတဖျၢၣ်လၢအထီၣ်အ့ၣ်လၢတၢ်တမၤကဆှဲ ကဆှီထီၣ်အီၤနီတဘျီဘၣ်န့ၣ်လီၤ. တၢ်ညၣ်တကူာ်ဘၣ်တကူာ်ဘၣ်တၢ်ထုးထီၣ်ကွံာ်အီၤဒီးတအိၣ်လီၤ တဲာ်တ့ၢ်နီတကူာ်ဘၣ်.

လံာ်ယဃ့းစက့လး 9:6

မၤသံပှၤပိာ်ခွါသးပှၢ်တဖၣ်, ပိာ်ခွါသးစၢ်တဖၣ်, ပိာ်မုၣ်သးစၢ်တဖၣ်, ပိာ်မုၣ်သးပှၢ်တဖၣ်ဒီးဖိသၣ်တဖၣ်တက့ၢ်. ဘၣ်ဆၣ်ဒီး, ထိးဘူးပှၤလၢအအိၣ်ဒီးတၢ်ပနီၣ်လၢအခိၣ်တိသၣ်အလိၤနီတဂၤတ ဂ့ၤ. စးထီၣ်မၤအီၤဖဲယတၢ်လုၢ်ဟံၣ်အံၤတက့ၢ်.” လၢတၢ်န့ၣ်အဃိဒီး, အဝဲသ့ၣ်စးထီၣ်မၤသံပှၤခိၣ်ပှၤနၢ်တဖၣ်လၢအဆၢထၢၣ် ဖဲယွၤအတၢ်လုၢ်ဟံၣ်န့ၣ်လီၤ.

လံာ်တၢ်ဘူၣ်ထီၣ်ဘါထီၣ် 20:10

ဒီးပှၤလၢအအဲၣ်ဘၢအမါဒီးမံဃုာ်ဒီးပှၤလၢအဃၢၤအမါန့ၣ်, ကဘၣ်တၢ်မၤသံကွံာ်အီၤခံဂၤလိာ်လီၤ.

လံာ်သိၣ်လီၤသီလီၤတၢ် 13:16

ဟဲစိာ်ဃီၤပှၤဂီၢ်မုၢ်လၢအအိၣ်ဖဲန့ၣ်တဖၣ်အတၢ်ဖိတၢ်လံၤခဲလၢာ် ဒီးပာ်ဖှိၣ်ထီၣ်အီၤဖဲဝ့ၢ်န့ၣ်အတၢ်လီၤပျီတက့ၢ်. ဒီးဆူးထီၣ်ကွံာ်ဝ့ၢ်န့ၣ်ဒီးတၢ်ခဲလၢာ်လၢအအိၣ်လၢအပူၤဒ်တၢ် လုၢ်တမံၤအသိးဆူယွၤသုကစၢ်ယွၤအအိၣ်တက့ၢ်. ဝ့ၢ်န့ၣ်ကဘၣ်တၢ်ပာ်တီၢ်အီၤလၢတၢ်ဟးဂီၤအပူၤလီၤထူလီၤယိာ် ဒီးတၢ်တဘှီထီၣ်က့ၤကဒီးအီၤနီတစုလၢၤဘၣ်န့ၣ်လီၤ.