လံာ်ယဃ့းစက့လး 16:49 - Sgaw Karen Common Bible

⁴⁹ အဝဲဒီးအဖိမုၣ်တဖၣ်ပာ်ထီၣ်ထီအသးမ့ၢ်လၢအဝဲသ့ၣ်အိၣ်ဒီး တၢ်လၢကအီၣ်ဝဲအါအါဂီၢ်ဂီၢ်, ဒီးအိၣ်ဆိးဝဲလၢတၢ်ဃူတၢ်ဖိးဒီးတၢ်ဘှ့ၣ်တၢ်ဘှီၣ်အပူၤအဃိ, ဘၣ်ဆၣ်ဒီးအဝဲသ့ၣ်တကဟု ကယာ်ပှၤဖှီၣ်ဖိယာ်ဖိပှၤအစုတတုၤလီၤအခီၣ်တတုၤလီၤတဖၣ်န့ၣ်ဘၣ်.

လံာ်ယဃ့းစက့လး 16:49 Iomraidhean Croise

လံာ်တၢ်ကဲထီၣ်အခီၣ်ထံး 13:10

စီၤလိာ်ကွၢ်တၢ်ဝးဝးဒီးထံၣ်ဝဲဒၣ်လၢထံကျိယၢ်ဒ့ၣ်အတၢ်ပၢၤ ခိၣ်ဒီဘ့ၣ်ညါကျဲတရဲာ်ဃီဆူဝ့ၢ်စိၤဧၢ်န့ၣ်ထံအိၣ်လၢလၢလီၣ် လီၣ်လီၤဂာ်ဒ်ယွၤအတၤသၣ်လီၢ်အသိးမ့ၢ်ဂ့ၤ, လီၤဂာ်ဒ်ကီၢ်အဲၤကူပတူးအသိးမ့ၢ်ဂ့ၤန့ၣ်လီၤ. (အအံၤမ့ၢ်တၢ်အကတီၢ်လၢယွၤတချုးမၤဟးဂီၤဝ့ၢ်စဒိၣ်ဒီးဂမိၤ ရၤဒံးဘၣ်န့ၣ်လီၤ.)

လံာ်တၢ်ကဲထီၣ်အခီၣ်ထံး 13:13

ပှၤဝ့ၢ်စဒိၣ်ဖိသ့ၣ်တဖၣ်န့ၣ်မ့ၢ်ပှၤအၢပှၤသီဒီးပှၤမၤတၢ်ဒဲး ဘးထီဒါယွၤန့ၣ်လီၤ.

လံာ်တၢ်ကဲထီၣ်အခီၣ်ထံး 18:20

ဒီးယွၤစံးဘၣ်စီၤအၤဘြၤဟၣ်, “တၢ်ဆှိးထီၣ်လီၤပျံၤလီၤ ဖုးထီဒါဝ့ၢ်စဒိၣ်ဒီးဂမိရၤန့ၣ်အိၣ်ဝဲ, ဒီးအတၢ်ဒဲးဘးန့ၣ်ဒိၣ်နီၢ်မးလီၤ.

လံာ်တၢ်ကဲထီၣ်အခီၣ်ထံး 19:24

သတူၢ်ကလာ်န့ၣ်ယွၤမၢလီၤကးဒီးမ့ၣ်အူစူၤလီၤလၢဝ့ၢ်စဒိၣ် ဒီးဝ့ၢ်ဂမိရၤအဖီခိၣ်,

လံာ်တၢ်ကဲထီၣ်အခီၣ်ထံး 19:9

ဘၣ်ဆၣ်အဝဲသ့ၣ်စံးဝဲ, “ပှၤတခီထံတခီကီၢ်ဖိဧၢ, ဟးထီၣ်ကွံာ်လၢပမဲာ်ညါတက့ၢ်. နမ့ၢ်မတၤတဂၤလၢကဘၣ်တဲပှၤမၤ တၢ်ဒ်အံၤဒ်နုၤန့ၣ်လဲၣ်. ဟးထီၣ်ကွံာ်လၢပမဲာ်ညါတက့ၢ်. မ့တမ့ၢ်ဘၣ်ဒီးပကမၤနၤနးန့ၢ်အဝဲသ့ၣ်လီၤ.” အဝဲသ့ၣ်ဆီၣ်ကွံာ်ဝဲစီၤလိာ်ဆူလီၢ်ခံဒီးသုးဘူးထီၣ်အသးလၢ ကမၤဟးဂီၤကွံာ်တြဲၤအဂီၢ်လီၤ.

စံးထီၣ်ပတြၢၤ 138:6

နမ့ၢ်အိၣ်လၢတၢ်လီၢ်လၢ အထီဒိၣ်မးဒၣ်လဲာ်, နအံးက့ၤကွၢ်က့ၤပှၤလၢ အဆီၣ်လီၤအသး, ဒီးပှၤလၢအပာ်ထီၣ်ထီအသးန့ၣ် အိၣ်သဒၢလၢအမဲာ်ညါတသ့ဘၣ်.

တၢ်ကတိၤဒိ. 16:18

တၢ်ပာ်ထီၣ်ထီသးန့ၣ်ဆှၢပှၤဆူတၢ်ဟးဂီၤ, ဒီးတၢ်ပာ်ကဖိသးန့ၣ်ဆူတၢ်လီၤပှီၢ်လီၤ.

တၢ်ကတိၤဒိ. 16:5

ယွၤသးဟ့ပှၤကိးဂၤဒဲးလၢအပာ်ထီၣ်ထီအသးဒီးတပျဲပူၤကွံာ် အဝဲသ့ၣ်လၢတၢ်စံၣ်ညီၣ်နီတစုဘၣ်.

တၢ်ကတိၤဒိ. 18:12

တချုးအဘၣ်တၢ်မၤဟးဂီၤအီၤဒံးဘၣ်ဒီးပှၤတဂၤပာ်ထီၣ်ထီ အသးလီၤ. မ့မ့ၢ်တၢ်ဆီၣ်လီၤသးန့ၣ်အိၣ်ဆိန့ၢ်တၢ်လၤကပီၤ တက့ၢ်လီၤ.

တၢ်ကတိၤဒိ. 21:13

နမ့ၢ်ဂ့ၢ်လိာ်လၢနကဒိကနၣ်ပှၤအဖှီၣ်အယာ်အတၢ်ကိးထီၣ်ဒီး, နတၢ်ကိးထီၣ်ဒၣ်နဲလၢတၢ်မၤစၢၤအဂီၢ်စ့ၢ်ကီးတၢ်တနၢ်ဟူ ဘၣ်အီၤဘၣ်န့ၣ်လီၤ.

တၢ်ကတိၤဒိ. 21:4

ပှၤတတီတလိၤတဖၣ်န့ၣ်ဘၣ်တၢ်ပၢအီၤလၢအတၢ်ပာ်ထီၣ်ထီအသးဒီးပာ် ကဖၢလၢအသး, ဒီးတၢ်န့ၣ်မ့ၢ်တၢ်ဒဲးဘးလီၤ.

လံာ်ယၡါယၤ 1:10

ယရူၤၡလ့ၣ်ဧၢ, နပှၤပၢတၢ်တဖၣ်ဒီး နပှၤဂီၢ်မုၢ်တဖၣ်လီၤဂာ်ဒၣ်ဒီးပှၤအိၣ်လၢဝ့ၢ်စဒိၣ်ဒီးဂမိရၤတဖၣ်လီၤ. ကနၣ်တၢ်လၢယွၤစံးဘၣ်နၤန့ၣ်တက့ၢ်. ပာ်သူၣ်ပာ်သးလၢတၢ်လၢ ပကစၢ်ယွၤသိၣ်လိသီလိနၤန့ၣ်တက့ၢ်.

လံာ်ယၡါယၤ 16:6

ပှၤယူဒၤဖိတဖၣ်စံးဝဲ, “ပနၢ်ဟူတ့ၢ်ပှၤမိၤအးဖိတဖၣ်ပာ် ထီၣ်ထီအသးထဲလဲၣ်လီၤ. ပသ့ၣ်ညါလၢအဝဲသ့ၣ်ပာ်ကဖၢလၢအ သးဒီးပာ်ထီၣ်ထီအသးလီၤ. ဘၣ်ဆၣ်ဒီး, အတၢ်ကတိၤ ဒိၣ်အကိာ်တဖၣ်န့ၣ်မ့ၢ်တၢ်အိၣ်ကလီလီၤ.”

လံာ်ယၡါယၤ 3:9

အတၢ်ကွၢ်မဲာ်လၢတၢ်ထံၣ်တဆှံတဖၣ်ကဘၣ်တၢ်ဟံးဃာ်အီၤ လၢတၢ်ထီဒါက့ၤအဝဲသ့ၣ်အဂီၢ်လီၤ. အဝဲသ့ၣ်မၤတၢ်ဒဲးဘးဖျိ ဖျိဖျါဖျါဒ်ပှၤအိၣ်လၢဝ့ၢ်စဒိၣ်တဖၣ်မၤတ့ၢ်ဝဲအသိးလီၤ. အဝဲသ့ၣ်ဘၣ်တၢ်စံၣ်ညီၣ်ဃါမနၤလီၤ. အဝဲ သ့ၣ်ဟဲစိာ်တၢ်အံၤလၢအဖီခိၣ်ဒၣ်ဝဲလီၤ.

လံာ်ယၡါယၤ 47:8

ဒိကနၣ်တၢ်အံၤတက့ၢ်, ပှၤလၢအအဲၣ်တၢ်မုာ်တၢ်လၤ, ပှၤလၢအဆိကမိၣ်လၢအပူၤဖျဲးဒီးအိၣ်ဘံၣ်အိၣ်ဘၢတဂၤဧၢ. နစံးလၢနဒိၣ်ထဲသိးဒီးကစၢ်ယွၤဒီးပှၤအဂၤလၢအလီၤဂာ်ဒီးနၤ တအိၣ်နီတဂၤဘၣ်. နဆိကမိၣ်တ့ၢ်လၢနတကဲထီၣ်ဘၣ်မုၣ်ကမဲတဂၤနီတစုမ့ၢ်ဂ့ၤ, နတတူၢ်ဘၣ်နဖိသံလံၤသံအတၢ်ကိၢ်တၢ်ဂီၤမ့ၢ်ဂ့ၤဘၣ်န့ၣ်လီၤ.

လံာ်ယံးရမံယၤ 48:11

ယွၤစံးဝဲဒၣ်, “ကီၢ်မိၤအးအအိၣ်ဂၢၢ်ဆိးကျၢၤဝဲထီဘိ ဒီး တဘၣ်တၢ်စိာ်မၢကဲကုၢ်အီၤ နီတစုဘၣ်. ကီၢ်မိၤအးလီၤဂာ်ဒီး စပံးထံလၢတၢ်ပာ်အီၤဒီး တၢ်တမၤတံာ်တာ်အီၤအသိး, ဒီးတဘၣ်တၢ်လူလီၤအီၤလၢ ကတံၤတဖျၢၣ်ဆူအဂၤတဖျၢၣ်အပူၤနီတစုဘၣ်. အတၢ်ဝံၣ်တၢ်ဆၢန့ၣ်တဟးဂီၤကွံာ်နီတစုဘၣ်ဒီး အတၢ်ဘိၣ်တၢ်ဘဲ ဂ့ၤဒၣ်ထီဘိန့ၣ်လီၤ.

လံာ်ယဃ့းစက့လး 16:46

နဝဲၢ်မုၣ်မ့ၢ်ၡၤမရံဒီးအဒူအသဝီတဖၣ်လၢကလံၤစိးတခီန့ၣ် လီၤ. နပုၢ်မုၣ်ဃုာ်ဒီးအဒူသဝီတဖၣ်မ့ၢ်ဝဲဝ့ၢ်စဒိၣ်လၢကလံၤထံး န့ၣ်လီၤ.

လံာ်ယဃ့းစက့လး 18:12

အဝဲလီန့ၢ်ပှၤဖှီၣ်ဖိယာ်ဖိတဖၣ်, အဝဲဂုာ်ဆူၣ်တၢ်, အဝဲဟံးန့ၢ်ကွံာ်တၢ်လၢပှၤလၢအဃ့လိၢ်တၢ်တဂၤဟ့ၣ်အီၤဒ်တၢ်ဟ့ၣ် ကီၤအသိးန့ၣ်လီၤ. အဝဲလဲၤဆူပှၤတစူၢ်တနာ်ယွၤအတၢ်ဘါလီၢ်တဖၣ်, ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်လၢအလီၤသးဘၣ်အၢန့ၣ်လီၤ.

လံာ်ယဃ့းစက့လး 18:16

တဆီၣ်ဘံၣ်ဆီၣ်ဘၢပှၤနီတဂၤမ့ၢ်ဂ့ၤ, တဂုာ်ဆူၣ်ပျီဆူၣ်ပှၤနီ တဂၤမ့ၢ်ဂ့ၤန့ၣ်ဘၣ်. အဝဲဟ့ၣ်ကဒါက့ၤတၢ်လၢပှၤဃ့လိၢ်တၢ်တဂၤဟ့ၣ်ပာ်အီၤဒ်တၢ်အုၣ် ကီၤအသိးန့ၣ်လီၤ. အဝဲလုၢ်အီၤလုၢ်အီ ပှၤလၢတၢ်သၣ်ဝံၤအသးတဖၣ်ဒီးဒုးကူဒုးသိးပှၤလၢအအိၣ်ဘ့ၣ်ဆ့ တဖၣ်န့ၣ်လီၤ.

လံာ်ယဃ့းစက့လး 18:7

အဝဲတလီန့ၢ်ပှၤနီတဂၤမ့ၢ်ဂ့ၤ, တဂုာ်န့ၢ်ပှၤနီတဂၤမ့ၢ်ဂ့ၤအတၢ်ဘၣ်. တၢ်လၢပှၤဃ့လိၢ်တၢ်တဂၤဟ့ၣ်အီၤဒ်တၢ်အုၣ်ကီၤအသိးန့ၣ်, အဝဲဟ့ၣ်ကဒါက့ၤဝဲလီၤ. အဝဲဟ့ၣ်အီၣ်ပှၤလၢတၢ်သၣ်ဝံၤအသးဒီး ဒုးကူဒုးသိးဆူပှၤလၢအအိၣ်ဘ့ၣ်ဆ့န့ၣ်လီၤ.

လံာ်ယဃ့းစက့လး 23:42

တၢ်ကနၢ်ဟူဘၣ်ပှၤကမျၢၢ်တဖုလၢအတၢ်ကိၢ်တၢ်ဂီၤတအိၣ်ဘၣ် အကလုၢ်, ပှၤပိာ်ခွါတဖုလၢအဘၣ်တၢ်ဟဲကိးအီၤလၢပှၢ်မုၢ်ကနၢ အပူၤန့ၣ်လီၤ. အဝဲသ့ၣ်ကဒုးသိးထီၣ်ပိာ်မုၣ်တဖၣ်လၢထံဖှံၣ် တဖၣ်လၢအစုဒုၣ်လိၤ, ဒီးပာ်ထီၣ်ခိၣ်သလုးဃံလၤတဖၣ်လၢအဝဲသ့ၣ်အခိၣ်တဖၣ်အဖီခိၣ် န့ၣ်လီၤ.

လံာ်ယဃ့းစက့လး 28:17

နပာ်ထီၣ်ထီတ့ၢ်နသးလၢနက့ၢ်ဘၣ်ဂီၤဂ့ၤအဃိဒီး နတၢ်မံၤဟူသၣ်ဖျါဒုးကဲထီၣ်နၤလီၤဂာ်ဒ်ပှၤဟးဂီၤဖိ တဂၤအသိးန့ၣ်လီၤ. မ့ၢ်လၢတၢ်အံၤအဃိယတ့ၢ်လီၤကွံာ် နၤလၢဟီၣ်ခိၣ်လိၤ, ပာ်တ့ၢ်နၤဒ်တၢ်ဟ့ၣ်ပလီၢ်တမံၤအသိးလၢ စီၤပၤအဂၤတဖၣ်အဂီၢ်လီၤ.

လံာ်ယဃ့းစက့လး 28:9

ဖဲအဝဲသ့ၣ်ဟဲလၢ ကမၤသံနၤန့ၣ်မ့ၢ်နကစံးဒံး ဒၣ်လၢနမ့ၢ်ယွၤတဂၤန့ၣ်ဧါ. ဖဲနကွၢ်ဆၢၣ်မဲာ်ဘၣ်ဒီး ပှၤလၢကမၤသံနၤတဖၣ်န့ၣ်, နကမ့ၢ်ပှၤတဂၤလၢ အသံသ့ဒီးတမ့ၢ်ဘၣ် တၢ်စီတၢ်ဆှံလ့ၤတက့ၤဘၣ်န့ၣ်လီၤ.

လံာ်ယဃ့းစက့လး 29:3

စံးလၢတၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဘၣ် ကီၢ်အဲၤကူပတူးအစီၤပၤန့ၣ်တက့ၢ်. ယမ့ၢ်နဒုၣ်နဒါ, နသမၣ် ဖးဒိၣ်လၢအမံလီၤလၢ နထံကျိအပူၤန့ၣ်လီၤ. နစံးနဲလၢထံကျိ နံၤလါမ့ၢ်နတၢ်ဒီးနမၤအီၤလၢ နနီၢ်ကစၢ်ဒၣ်နဲလီၤ.

လံာ်ဒၤနံးယ့လး 4:30

ဒီးစံးဝဲဒၣ်, “ဘၤဘူၤလိၣ်ဒိၣ်ဝဲဆံးဒိၣ်ဆံးဒိၣ်လဲၣ်န့ၣ်ကွၢ်တက့ၢ်. ယသူၣ်ထီၣ်အီၤဒ်ယဝ့ၢ်ခိၣ်အသိးလၢကလီၣ်ဖျါ ထီၣ်ယစိကမီၤဒီးယဂံၢ်ယဘါယလၤကပီၤယကဟုကညီၢ်လီၤ.”

လံာ်ဒၤနံးယ့လး 4:37

ခဲကနံၣ်အံၤ, ယၤစီၤနဘူၤကးန့စၢ်စံးထီၣ်ပတြၢၤ, ယူးယီၣ်ဒီး မၤလၤကပီၤမူခိၣ်အစီၤပၤန့ၣ်လီၤ. အဂ့ၢ်ဒ်အံၤ, အတၢ်မၤခဲလၢာ်ဘၣ်ဝဲ, ဒီးအကျဲတဖၣ်တီဝဲလိၤဝဲန့ၣ်လီၤ. ပှၤလၢအမၤတၢ်လၢတၢ် ပာ်ထီၣ်ထီအသးတဖၣ်န့ၣ်ဆီၣ်လီၤဝဲဒၣ်သ့လီၤ.”

လံာ်ဒၤနံးယ့လး 5:23

နပာ်ထီၣ်ထီတ့ၢ်နသးထီဒါမူခိၣ်အကစၢ်ဒီးဟဲစိာ်နုာ်လီခီတဖၣ်လၢ ဘၣ်တၢ်ဟဲက့ၤစိာ်အီၤလၢအတၢ်လုၢ်ဟံၣ်ဒီးနဲဒၣ်ဒီးနပဒိၣ်ပပှၢ်တဖၣ်, နမါတဖၣ်ဒီးနသံၣ်မါတဖၣ်ဒၢနုာ်အီစပံးထံလၢအပူၤလီၤ. ဒီးနစံးထီၣ်ပတြၢၤကစၢ်ထူ, ကစၢ်စ့, ကစၢ်တိၢ်ဘီ, ကစၢ်ထး, ကစၢ်သ့ၣ်ဒီးကစၢ်လၢၢ်လၢအတထံၣ်တၢ်, တနၢ်ဟူတၢ်ဒီး တသ့ၣ်ညါတၢ်နီတမံၤတဖၣ်န့ၣ်လီၤ. မ့မ့ၢ်ကစၢ်ယွၤလၢအစံၣ်ညီၣ် နတၢ်မူ, တၢ်သံဒီးအပၢၤဃးကယဲၢ်နမၤတၢ်တမံၤလၢ်လၢ်န့ၣ်နတမၤလၤ ကပီၤတ့ၢ်အီၤဘၣ်.

လံာ်ဧိၤဘါဒယၤ 1:3

နတၢ်သးထီၣ်ထီန့ၣ်လီန့ၢ်လံနၤလံ. နဝ့ၢ်ခိၣ်မ့ၢ်တိာ်ခၢၣ်သနၢၣ်လၢတၢ်မၤကျၢၤအီၤဒီးလၢၢ် နအိၣ်နဆိးအလီၢ်လၢတၢ်လီၢ်ထီၣ်ထီ ဒီးနစံးလၢအသးကံၢ်ပူၤ, “မ့ၢ်မတၤထုးလီၤယၤကန့ၢ်တဂၤလဲၣ်.”

လံာ်လူၤကၣ် 17:28

တၢ်ကမၤအသးဒ်တၢ်မၤတ့ၢ်အသးဖဲစီၤလိာ်အဆၢကတီၢ်အသိးန့ၣ်လီၤ. ပှၤအီၣ်တၢ်ဒီးအီတၢ်, ပှ့ၤတၢ်ဒီးဆါတၢ်, သူၣ်လီၤတၢ်ဒီးဘှီထီၣ်တၢ်ကွ့ၢ်ကွ့ၢ်လီၤ.

လံာ်လူၤကၣ် 21:34

အိၣ်ပလီၢ်သူၣ်ပလီၢ်သးတက့ၢ်. တဘၣ်ပျဲသုဆၢကတီၢ်လၢာ်ကွံာ်လၢ တၢ်အီၣ်လုၣ်ကိအီလုၣ်ကပာ်တၢ်ဒီးအအံၤတဃၣ်အတၢ်ကိၢ်တၢ်ဂီၤ တဖၣ်အဂီၢ်န့ၣ်တဂ့ၤ. မ့တမ့ၢ်ဘၣ်ဒီး, မုၢ်နံၤမုၢ်သီတနံၤန့ၣ်ကဟဲတုၤအိၣ်သုသတူၢ်ကလာ်လီၤ.

လံာ်သိၣ်လီၤသီလီၤတၢ် 32:15

ယွၤအပှၤဂီၢ်မုၢ်ထူးထီၣ်တီၤထီၣ်ဝဲ, ဘၣ်ဆၣ်ထီဒုၣ်ထီဒါတၢ်, အဝဲသ့ၣ်ဘီၣ်ထီၣ်သိထီၣ်ဒီးပှဲၤလုာ်ကွံာ်ဒီးတၢ်အီၣ်တၢ်အီ လီၤ. အဝဲသ့ၣ်လဲၤသဒၣ်ကွံာ်ကစၢ်ယွၤအဝဲသ့ၣ်အတၢ်ဘၣ်တ့အကစၢ် ဒီးစူးကွံာ်ညိကွံာ်အတၢ်အုၣ်က့ၤခီၣ်က့ၤကစၢ်လၢအဒိၣ်ဝဲမုၢ်ဝဲန့ၣ်လီၤ.

ယၤကိာ် 5:5

သုတၢ်အိၣ်မူလၢဟီၣ်ခိၣ်အံၤပှဲၤဒီးဟီၣ်ခိၣ်အတၢ်မုာ်တၢ် ပၢၤဒီးအတၢ်မုာ်လၤသးဖှံလီၤ. သုမၤဘီၣ်ထီၣ်သိထီၣ်သုသးလၢတၢ်မၤသံသုအမုၢ်တနံၤ အဂီၢ်လီၤ.

၁ ပ့းတရူး 5:5

လၢကျဲဒ်န့ၣ်အသိး, သုဝဲလၢအသးစၢ်တဖၣ်သုကဘၣ်ဆီၣ်လီၤသုသးလၢပှၤ သးပှၢ်သ့ၣ်တဖၣ်အဖီလာ်န့ၣ်လီၤ. ဒီးသုဝဲသ့ၣ်ခဲလၢာ်သုကဘၣ်ကူထီၣ်သိးထီၣ်တၢ်ဆီၣ်လီၤသး အဆ့ကၤလၢသုကမၤစၢၤလိာ်သုသးတဂၤဒီးတဂၤအဂီၢ် န့ၣ်လီၤ. အဂ့ၢ်ဒ်အံၤ, တၢ်ကွဲးအသးစံးဝဲ, “ကစၢ်ယွၤထီဒါ ပှၤပာ်ထီၣ်ထီအသး, ဘၣ်ဆၣ်ဟ့ၣ်လီၤတၢ်ဘျုးတၢ်ဖှိၣ်လၢပှၤလၢအဆီၣ်လီၤအသး တဖၣ်န့ၣ်လီၤ” (ကူၣ်သ့ ၃:၃၄),

လံာ်လီၣ်ဖျါ 11:8

ဒီးအဝဲသ့ၣ်အစိၣ်ကအိၣ်မံလီၤလၢဝ့ၢ်ဖးဒိၣ်တဖျၢၣ်ဖဲ အကစၢ်ဘၣ်တၢ်ပျၤထီအီၤလၢထူၣ်စုညါအလိၤန့ၣ် အကျဲမုၢ်ခိၣ်လီၤ. ဝ့ၢ်တဖျၢၣ်န့ၣ်အမံၤလၢအပာ်ဖျါထီၣ်တၢ်ခီဖျိ တၢ်အဒိအတဲာ်မ့ၢ်ဝဲစဒိၣ်, မ့တမ့ၢ်အဲၤကူပတူးလီၤ.