လံာ်တၢ်ဟးထီၣ်ကွံာ် 20:24 - Sgaw Karen Common Bible

²⁴ မၤထီၣ်တၢ်လုၢ်လီၢ်တခါလၢဟီၣ်ခိၣ်လၢယဂီၢ်ဒီးလၢအဖီခိၣ်န့ၣ် လုၢ်ထီၣ်ပာ်ထီၣ်သုသိဒီးသုဂီၤဘုၣ်ဂီၤဖံးတဖၣ်ဒ်တၢ်လုၢ်မၤ ဃူမၤဖိးတဖၣ်လၢကဘၣ်တၢ်ဆူးကဲၤအီၤခဲလၢာ်န့ၣ်တက့ၢ်. လၢတၢ်လီၢ်ကိးပူၤဒဲးဖဲယပာ်လီၤဆီအီၤလၢသုဂီၢ်ဒ်သိးသု ကဘူၣ်ထီၣ်ဘါထီၣ်ယၤအလီၢ်န့ၣ်ယကဟဲဆူသုအိၣ်ဒီးဆိၣ်ဂ့ၤသုန့ၣ်လီၤ.

လံာ်တၢ်ဟးထီၣ်ကွံာ် 20:24 Iomraidhean Croise

လံာ်တၢ်ကဲထီၣ်အခီၣ်ထံး 12:2

ယကဟ့ၣ်လီၤနၤလၢနစၢၤနသွဲၣ်အါအါဂီၢ်ဂီၢ်, ဒီးအဝဲသ့ၣ်ကကဲထီၣ်ပှၤတကလုာ်ဖးဒိၣ်န့ၣ်လီၤ. ယကဆိၣ်ဂ့ၤနၤဒီးမၤဟူထီၣ်သါလီၤနမံၤဒ်သိးနကကဲ ထီၣ်တၢ်ဆိၣ်ဂ့ၤတမံၤလီၤ.

လံာ်စီၤၡမူၤအ့လးခံဘ့ၣ်တဘ့ၣ် 6:12

စီၤပၤစီၤဒၤဝံးနၢ်ဟူဘၣ်ဝဲလၢ, မ့ၢ်လၢယွၤအတၢ်အၢၣ်လီၤအီ လီၤအတလါစီဆှံအဃိ, ယွၤဆိၣ်ဂ့ၤစီၤဧိၤဘ့းအ့ဒိၣ်အဟံၣ်ဖိဃီဖိဒီး ကယဲၢ်တၢ်အိၣ်ဒီးအီၤခဲလၢာ်န့ၣ်လီၤ. လၢတၢ်န့ၣ်အဃိအဝဲစိာ်ထီၣ်ယွၤအတၢ်အၢၣ်လီၤအီလီၤအတလါစီဆှံ လၢစီၤဧိၤဘ့းအ့ဒိၣ်အဟံၣ်ဒီးက့ၤစိာ်အီၤဆူ ဝ့ၢ်ယရူၤရှလ့ၣ်အိၣ်ဒီးတၢ်မၤမူးဖးဒိၣ်တမူးန့ၣ်လီၤ.

လံာ်စီၤပၤအခီၣ်ထံးတဘ့ၣ် 8:29

အံးလီၤကွၢ်လီၤယွၤအတၢ်လုၢ်ဟံၣ်အံၤလၢမုၢ်ဆါဆဲးလၢမုၢ်နၤ, တၢ်လီၢ်အံၤလၢနဃုထၢတ့ၢ်အီၤလၢတၢ်ဘူၣ်ထီၣ်ဘါထီၣ်နၤအဂီၢ် န့ၣ်တက့ၢ်. ဒိကနၣ်ယၤ, ဖဲယဃၣ်ဃီၤယမဲာ်ဆူယွၤအတၢ်လုၢ်ဟံၣ်အံၤဒီးဘါထု ကဖၣ်အခါန့ၣ်တက့ၢ်.

လံာ်စီၤပၤအခီၣ်ထံးတဘ့ၣ် 8:43

ဒိကနၣ်လၢ်အဝဲအတၢ်ထုကဖၣ်န့ၣ်တက့ၢ်. လၢမူခိၣ်ဖဲနအိၣ်နဲဆိးနဲအလီၢ်န့ၣ်, ဒိကနၣ်လၢ်အီၤဒီးမၤတၢ်လၢအဝဲဃ့ဝဲလၢနကမၤန့ၢ်အီၤဒ်သိး ကယဲၢ်ပှၤဂီၢ်မုၢ်အိၣ်လၢဟီၣ်ခိၣ်ချၢခဲလၢာ်, ကသ့ၣ်ညါနၤဒီးစူၢ်နၤဒ်နပှၤဂီၢ်မုၢ်အံၣ်စရ့လးဖိမၤဝဲအသိး န့ၣ်တက့ၢ်. တုၤနုၤတစု, အဝဲသ့ၣ်ကသ့ၣ်ညါဝဲဒၣ်လၢယွၤအတၢ်လုၢ်ဟံၣ်လၢ ယသူၣ်ထီၣ်တ့ၢ်လံအီၤအံၤမ့ၢ်တၢ်လီၢ်တတီၤလၢနကဘၣ်တၢ်ဘူၣ်ထီၣ် ဘါထီၣ်နၤအဂီၢ်န့ၣ်လီၤ.

လံာ်စီၤပၤအခီၣ်ထံးတဘ့ၣ် 9:3

ယွၤစံးဘၣ်အီၤ, “ယနၢ်ဟူတ့ၢ်နတၢ်ထုကဖၣ်န့ၣ်လံ. ယမၤစီဆှံလံယွၤအတၢ်လုၢ်ဟံၣ်လၢနသူၣ်ထီၣ်တ့ၢ်အီၤအံၤ, ဒ်တၢ်လီၢ်တတီၤလၢယကဘၣ်တၢ်ဘူၣ်ထီၣ်ဘါထီၣ်ယၤလီၤစိၤလီၤထီ န့ၣ်လီၤ.

လံာ်စီၤပၤခံဘ့ၣ်တဘ့ၣ် 5:17

လၢတၢ်န့ၣ်အဃိစီၤနဧၤမၣ်စံးဝဲဒၣ်, “နမ့ၢ်တတူၢ်လိာ်ဘၣ်ယတၢ် ဟ့ၣ်အံၤန့ၣ်, ပျဲယမၤန့ၢ်ဟီၣ်ခိၣ်လၢယကက့ၤစိာ်အီၤဆူဟံၣ်ဒီးယၤ, ဘျဲးစိာ်ကသ့ၣ်လၤခံဒုတက့ၢ်. အဂ့ၢ်ဒ်အံၤ, စးထီၣ်ခဲအံၤဒီးဆူညါန့ၣ်, ယတလုၢ်လၢၤဘၣ်တၢ်လုၢ်တၢ်ပာ်မ့ၢ် ဂ့ၤ, တၢ်လုၢ်မ့ၣ်အူမ့ၢ်ဂ့ၤဆူကစၢ်အဂၤတဖၣ်လၢၤဘၣ်. ယကလုၢ်တၢ်ထဲဆူယွၤတဂၤဧိၤအအိၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 12:13

စီၤရဃၤဘၣ်ပၢတ့ၢ်တၢ်လၢဝ့ၢ်ယရူၤရှလ့ၣ်အပူၤဒီးမၤဆူၣ်ထီၣ် အစိကမီၤဒ်စီၤပၤအသိးန့ၣ်လီၤ. ဖဲအဝဲကဲထီၣ်စီၤပၤန့ၣ်အသးအိၣ်ဝဲလွံၢ်ဆံတနံၣ်, ဒီးပၢတၢ်တဆံနွံနံၣ်လၢဝ့ၢ်ယရူၤရှလ့ၣ်, ဝ့ၢ်လၢယွၤဃုထၢတ့ၢ်ဝဲလၢကယဲၢ်အံၣ်စရ့လးအလီၢ်ကဝီၤအပူၤဒ် တၢ်လီၢ်တတီၤလၢအဝဲကဘၣ်တၢ်ဘူၣ်ထီၣ်ဘါထီၣ်အီၤအဂီၢ်န့ၣ်လီၤ. စီၤရဃၤဘၣ်အမိၢ်န့ၣ်မ့ၢ်နီၢ်နၤဧမၤ, ပှၤလၢကီၢ်ဧၣ်မိၣ်န့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 6:6

ဘၣ်ဆၣ်ဒီး, ခဲကနံၣ်အံၤယဃုထၢလံဝ့ၢ်ယရူၤၡလ့ၣ်ဒ်တၢ်လီၢ်လၢ ယကဘၣ်တၢ်ဘူၣ်ထီၣ်ဘါထီၣ်ယၤအဂီၢ်, ဒီးနဲဒၣ်, စီၤဒၤဝံးဒ်ပှၤလၢကပၢယပှၤဂီၢ်မုၢ်န့ၣ်လီၤ.”

လံာ်ကွဲးနီၣ်တၢ်ခံဘ့ၣ်တဘ့ၣ် 7:16

အဂ့ၢ်ဒ်အံၤ, ယဃုထၢတ့ၢ်တၢ်လီၢ်အံၤဒီးပာ်စီဆှံတ့ၢ်အီၤဒ် အမ့ၢ်တၢ်လီၢ်လၢယကဘၣ်တၢ်ဘူၣ်ထီၣ်ဘါထီၣ်ယၤတဘိ ယူၢ်ဃီန့ၣ်လီၤ. ယကအံးလီၤကွၢ်လီၤတၢ်လီၢ်အံၤဒီးဒီဒၣ်အိၣ် ပှိၤအီၤကိးဆၢကိးကတီၢ်ဒဲးန့ၣ်လီၤ.

လံာ်စီၤဧ့စြၤ 6:12

မ်စီၤပၤတဂၤလၢ်လၢ်မ့ၢ်ဂ့ၤ, ပှၤတကလုာ်လၢ်လၢ်မ့ၢ်ဂ့ၤ, လၢအခီၣ်ဆၢတၢ်မၤလိာ်အံၤဒီးဂုာ်ကျဲးစၢးလၢကမၤဟးဂီၤတၢ် လုၢ်ဟံၣ်ဖဲန့ၣ်, ဘၣ်တၢ်တ့ၢ်လီၤကွံာ်အီၤလၢကစၢ်ယွၤလၢအဃုထၢဝ့ၢ်ယရူၤၡလ့ၣ်ဒ် တၢ်လီၢ်ဖဲအဝဲကဘၣ်တၢ်ဘူၣ်ထီၣ်ဘါထီၣ်အီၤန့ၣ်တက့ၢ်. ယၤ, စီၤဒၤရယါဝ့ၣ်ဟ့ၣ်လီၤလံတၢ်ကလုၢ်အံၤလီၤ. တၢ်အံၤတၢ်ကဘၣ်စူၢ်အီၤလၢလၢပှဲၤပှဲၤန့ၣ်လီၤ.”

လံာ်စီၤနဃ့မယၤ 1:9

ဘၣ်ဆၣ်ဒီးသုမ့ၢ်ဃၣ်ကဒါက့ၤသုသးဆူယအိၣ်ဒီးမၤတၢ်လၢယမၤ လိာ်တ့ၢ်လံသုန့ၣ်, သုမ့ၢ်လီၤပြံလီၤပြါဆူဟီၣ်ခိၣ်အက တၢၢ်ဒၣ်လဲာ်ယကဟဲက့ၤစိာ်ကဒါက့ၤသုဆူတၢ်လီၢ်လၢယဃုထၢအီၤ လၢယကဘၣ်တၢ်ဘူၣ်ထီၣ်ဘါထီၣ်ယၤအဂီၢ်န့ၣ်လီၤ.

စံးထီၣ်ပတြၢၤ 101:2

ယကပလီၢ်ယသးလၢညါ လၢတၢ်အိၣ်မူလၢ တၢ်ပာ်တၢ်ကမၣ် လၢအလိၤအလီၢ်တအိၣ်ဘၣ်အပူၤန့ၣ်လီး. နကဟဲဆူယအိၣ်အကတီၢ်ဖဲလဲၣ်. လၢယဟံၣ်ပူၤန့ၣ်, ယကအိၣ်မူလၢ တၢ်သးကဆှီအပူၤ,

စံးထီၣ်ပတြၢၤ 122:2

ယရူၤၡလ့ၣ်ဧၢ, ပခီၣ်ဆၢထၢၣ်တ့ၢ်လံလၢနပဲတြီတဖၣ်အပူၤလီၤ.

စံးထီၣ်ပတြၢၤ 128:5

မ်ယွၤဆိၣ်ဂ့ၤနၤလၢစံယိၣ်, မ်နထံၣ်ဘၣ်ယရူၤၡလ့ၣ်အတၢ်အီၣ်ကုးအီပှဲၤ တစိၤဒၣ်နၤတက့ၢ်.

စံးထီၣ်ပတြၢၤ 134:3

ယွၤလၢအတ့လီၤမူခိၣ်, ဒီးဟီၣ်ခိၣ်တဂၤန့ၣ် မ်အဆိၣ်ဂ့ၤနၤလၢစံယိၣ်တက့ၢ်.

စံးထီၣ်ပတြၢၤ 74:7

အဝဲသ့ၣ်မၤဟးဂီၤနတၢ်လုၢ်ဟံၣ်ဒီး ဒွဲၣ်အူကွံာ်ဝဲဒၣ်လၢမ့ၣ်အူန့ၣ်လီၤ. နတၢ်ဘူၣ်ထီၣ်ဘါထီၣ်အလီၢ်န့ၣ်အဝဲသ့ၣ် မၤဘၣ်အၢဘၣ်သီကွံာ်ဝဲ န့ၣ်လီၤ.

စံးထီၣ်ပတြၢၤ 76:2

အဝဲအိၣ်ဒီးအဟံၣ်လၢဝ့ၢ်ယရူၤၡလ့ၣ်အပူၤ, ဒီးအိၣ်ဝဲဆိးဝဲလၢကစၢၢ်စံယိၣ်လီၤ.

စံးထီၣ်ပတြၢၤ 78:68

အခိၣ်တလိာ်အဝဲဃုထၢဝဲယူဒၤအဒူၣ်, ဒီးကစၢၢ်စံယိၣ်လၢအအဲၣ်ဝဲဒိၣ်မးန့ၣ်လီၤ.

လံာ်တၢ်ဟးထီၣ်ကွံာ် 10:25

စီၤမိၤၡ့စံးဆၢဝဲဒၣ်, “နကဘၣ်ဟ့ၣ်လီၤပှၤလၢဆၣ်ဖိကီၢ်ဖိ တဖၣ်လၢတၢ်လုၢ်တၢ်ပာ်ဒီးတၢ်လုၢ်မ့ၣ်အူအဂီၢ်, ဒ်သိးပကလုၢ်ထီၣ်အီၤဆူယွၤ, ပကစၢ်ယွၤအအိၣ်န့ၣ်လီၤ.

လံာ်တၢ်ဟးထီၣ်ကွံာ် 18:12

အန့ၣ်ဝံၤဒီးစီၤယံးသရိၤဟဲစိာ်တၢ်လုၢ်မၤဘူၣ်တမံၤလၢတၢ် ကဘၣ်ဆူးကဲၤထီၣ်အီၤခဲလၢာ်ဒီးတၢ်လုၢ်တၢ်ပာ်အဂၤတဖၣ်လၢ ကဘၣ်တၢ်လုၢ်ထီၣ်ပာ်ထီၣ်အီၤဆူကစၢ်ယွၤအအိၣ်န့ၣ်လီၤ. ဒီးစီၤအၤဟရိၣ်ဒီးကယဲၢ်ပှၤအံၣ်စရ့လးဖိအခိၣ်အနၢ်တဖၣ်လဲၤ ဃုာ်ဒီးအီၤဒ်သိးကအီၣ်တၢ်အီၣ်စီဆှံဒ်တၢ်ဘူၣ်ထီၣ်ဘါထီၣ်အတၢ် မၤတမံၤအသိးန့ၣ်လီၤ.

လံာ်တၢ်ဟးထီၣ်ကွံာ် 20:25

သုမ့ၢ်မၤတၢ်လုၢ်လီၢ်တခါလၢယဂီၢ်လၢလၢၢ်န့ၣ်ဘှီထီၣ်အီၤလၢ လၢၢ်တဖၣ်လၢတၢ်ကူးတဲာ်အီၤန့ၣ်တဂ့ၤ. အဂ့ၢ်ဒ်အံၤဖဲသုသူထးပျၤတဘိလၢလၢၢ်တဖၣ်အဖီခိၣ်န့ၣ်မ့ၢ်သု ဒုးကဲထီၣ်အီၤဒ်တၢ်လၢယတကြၢးသူအီၤဘၣ်န့ၣ်လီၤ.

လံာ်တၢ်ဟးထီၣ်ကွံာ် 24:4

စီၤမိၤၡ့ကွဲးလီၤကယဲၢ်ယွၤအတၢ်မၤလိာ်တဖၣ်န့ၣ်လီၤ. မုၢ်ဆ့ၣ်ထီၣ်တနံၤဂီၤဂီၤန့ၣ်, အဝဲဘှီထီၣ်ဝဲတၢ်လုၢ်လီၢ်တခါ လၢကစၢၢ်ခီၣ်ထံးဒီးဆီလီၤလၢၢ်တဆံခံဖျၢၣ်, တဖျၢၣ်စုာ်စုာ်လၢပှၤအံၣ်စရ့လးဖိတဆံခံဒူၣ်, တဒူၣ်စုာ်စုာ်အဂီၢ်လီၤ.

လံာ်တၢ်ဟးထီၣ်ကွံာ် 24:5

အန့ၣ်ဝံၤဒီးအဝဲမၢလီၤပိာ်ခွါသးစၢ်တဖၣ်ဒီးအဝဲသ့ၣ်ဆူး ကဲၤထီၣ်တၢ်လုၢ်တၢ်ပာ်တဖၣ်ဆူယွၤအအိၣ်ဒီးလုၢ်ထီၣ်ပာ်ထီၣ်ဂီၤ ဘုၣ်ဂီၤဖံးတနီၤဒ်တၢ်လုၢ်မၤဃူမၤဖိးတဖၣ်အသိးန့ၣ်လီၤ.

လံာ်တၢ်ဟးထီၣ်ကွံာ် 27:1

ဘှီထီၣ်တၢ်လုၢ်လီၢ်တခါလၢသ့ၣ်ဖှ့ၡံးတၤတက့ၢ်. ကဘၣ်မ့ၢ်အကပၤလွံၢ်ခီဃူလိာ်အသး, အလဲၢ်ယဲၢ်ပျၢ်, အထီအိၣ်ယဲၢ်ပျၢ်, ဒီးအကစီၤထီၣ်ကဘၣ်အိၣ်သၢပျၢ်လီၤ.

လံာ်ယၡါယၤ 64:5

နတူၢ်လိာ်မုာ်ပှၤတဖၣ်လၢအထံၣ်န့ၢ်တၢ်သးခုလၢတၢ်မၤတၢ် အလိၤအဘၣ်, ပှၤတဖၣ်လၢအသ့ၣ်နီၣ်ထီၣ်ဝဲလၢနအဲၣ်ဒိး လၢအဝဲသ့ၣ်ကအိၣ်မူဝဲဒ်လဲၣ်န့ၣ်လီၤ. နသူၣ်ဒိၣ်သးဖျိးဘၣ်ပှၤ, ဘၣ်ဆၣ်ပမၤထွဲဒံးဒၣ်တၢ်ဒဲးဘးလီၤ. စးထီၣ်လၢပျၢၤလံၤလံၤန့ၣ်, နသးကဲၤထီၣ်ပှၤဒိၣ်ဒိၣ်မုၢ်မုၢ်ဒၣ်လဲာ်, ပတဆိတ့ၢ်လၢတၢ်မၤကမၣ်တၢ်န့ၣ်ဘၣ်.

လံာ်တၢ်ဘူၣ်ထီၣ်ဘါထီၣ် 17:9

ဒ်တၢ်လုၢ်မၤဘူၣ်ဆူယွၤအအိၣ်, လၢတၢ်လီၢ်အဂၤတပူၤပူၤလၢ အတမ့ၢ်ဘၣ်တၢ်ဘူၣ်ထီၣ်ဘါထီၣ်ယွၤအဒဲအကျဲစၢၤဘၣ်န့ၣ်အဝဲတဘၣ် တၢ်ပာ်လၢၤအီၤဒ်ပှၤတဂၤလၢကစၢ်ယွၤအပှၤဂီၢ်မုၢ်အကျါလၢၤဘၣ်.

လံာ်မၤလကံ 1:11

ပှၤဂီၢ်မုၢ်လၢမုၢ်ထီၣ်တခီပၢၢ်တုၤလၢမုၢ်နုာ်တခီမၤလၤကပီၤယၤလီၤ. ဒီးအဝဲသ့ၣ်ကဆိၣ်ကဲၤတၢ်နၢမူလၢယဂီၢ်လၢတၢ်လီၢ်ကိးပူၤဒဲးဒီး ကလုၢ်တၢ်လုၢ်ကဆှီလၢယဂီၢ်လီၤ. အဝဲသ့ၣ်ခဲလၢာ်မၤလၤကပီၤယၤလီၤ.

လံာ်မးသဲ 18:20

အဂ့ၢ်ဒ်အံၤ, ဖဲပှၤခံဂၤမ့ၢ်ဂ့ၤ, သၢဂၤမ့ၢ်ဂ့ၤပာ်ဖှိၣ်ထီၣ်အသးလၢ ယမံၤအပူၤန့ၣ်, ယအိၣ်လၢအဝဲသ့ၣ်အသိးအကျါလီၤ.”

လံာ်မးသဲ 28:20

ဒီးသိၣ်လိသီလိအဝဲသ့ၣ်လၢအကတိၢ်န့ၢ်ဒီး မၤထွဲတၢ်လၢယမၤလိာ်တ့ၢ်သုကိးမံၤဒဲးန့ၣ်တက့ၢ်. ဒီးယကအိၣ်ဒီးသုထီဘိ တုၤတၢ်အစိၤကတၢၢ်တစုန့ၣ်လီၤ.”

လံာ်သိၣ်လီၤသီလီၤတၢ် 12:11

ယွၤကဃုထၢတၢ်လီၢ်ထဲတတီၤဖဲအဝဲကဘၣ်တၢ်ဘူၣ်ထီၣ်ဘါထီၣ်အီၤအဂီၢ်, ဒီးဖဲန့ၣ်, သုကဘၣ်ဟဲစိာ်ကယဲၢ်တၢ်လၢယမၤလိာ်သုဆူအအိၣ်, လၢအမ့ၢ်သုတၢ်လုၢ်တၢ်ပာ်တဖၣ်လၢတၢ်ကဆိၣ်ကဲၤအီၤဒီးသုတၢ်လုၢ် တၢ်ပာ်အဂၤတဖၣ်, သုတၢ်ဆံဆဲၣ်ပူတပူ တဖၣ်ဒီးတၢ်မၤဘူၣ်တဖၣ်, ဒီးသုတၢ်ဟ့ၣ်လီၤဆီတဖၣ်လၢ သုအၢၣ်လီၤလၢသုကဟ့ၣ်ယွၤန့ၣ်လီၤ.

လံာ်သိၣ်လီၤသီလီၤတၢ် 12:21

တၢ်လီၢ်တတီၤလၢတၢ်ဘူၣ်ထီၣ်ဘါထီၣ်အဂီၢ်မ့ၢ်ယံၤကဲၣ်ဆိးဒီး, အန့ၣ်တစုတဘျီလၢ်လၢ်ဖဲသုအဲၣ်ဒိးန့ၣ်, သုမၤသံ သုဂီၤဘုၣ်ဂီၤဖံးမ့တမ့ၢ်သိတဒုလၢ်လၢ်လၢယွၤဟ့ၣ်သုသ့ဝဲ ဒီးသုကအီၣ်အီၤလၢသုဟံၣ်ဒၣ်သုဝဲဒ်ယစံးဘၣ်တ့ၢ်သုအသိးန့ၣ်လီၤ.

လံာ်သိၣ်လီၤသီလီၤတၢ် 12:5

လၢကယဲၢ်သုဒူၣ်တဖၣ်အလီၢ်ကဝီၤပူၤန့ၣ်, ယွၤကဃုထၢထီၣ်တၢ်လီၢ် တတီၤဖဲပှၤဂီၢ်မုၢ်တဖၣ်ကဘၣ်ဟဲဆူအမဲာ်ညါဒီးဘူၣ်ထီၣ်ဘါထီၣ် အီၤန့ၣ်လီၤ.

လံာ်သိၣ်လီၤသီလီၤတၢ် 14:23

အန့ၣ်ဝံၤဒီးလဲၤဆူတၢ်လီၢ်တတီၤဖဲယွၤသုကစၢ်ယွၤဃုထၢအီၤ လၢတၢ်ကဘူၣ်ထီၣ်ဘါထီၣ်အီၤအဂီၢ်ဒီးဖဲန့ၣ်လၢယွၤအမဲာ်ညါန့ၣ် အီၣ်သုတၢ်ဆံဆဲၣ်ပူတပူဘၣ်ဃးဒီးဘုဧိၤဟုဧိၤသုစပံးထံ ဒီးသုသ့ၣ်စၤယံးအသိ, သုဂီၤဘုၣ်ဂီၤဖံးဒီးသုသိအဝဲၢ်ကိန့ၣ်တက့ၢ်. မၤတၢ်အံၤဒ်သိးဒီးသုကမၤလိန့ၢ်တၢ်အိၣ်ဒီး တၢ်ယူးယီၣ်ပာ်ကဲယွၤသုကစၢ်ယွၤထီဘိတထံၣ်ဃီန့ၣ်တက့ၢ်.

လံာ်သိၣ်လီၤသီလီၤတၢ် 16:11

သူၣ်ခုသးခုလၢအမဲာ်ညါ, ဃုာ်ဒီးသုဖိတဖၣ်, သုကုၢ်သုပှၤတဖၣ်ဒီးပှၤလ့ၤဝံဖိတဖၣ်, ပှၤတခီဘီမုၢ်ဖိတ ဖၣ်, ပှၤဖိၣ်ဃဲတဖၣ်, ဒီးပှၤမုၣ်ကမဲတဖၣ်လၢအအိၣ်ဆိးလၢသုဝ့ၢ်တဖၣ်ပူၤန့ၣ်တက့ၢ်. မၤတၢ်အံၤဖဲတၢ်ဘူၣ်ထီၣ်ဘါထီၣ်အလီၢ်တတီၤန့ၣ်တက့ၢ်.

လံာ်သိၣ်လီၤသီလီၤတၢ် 26:2

သုဝဲကိးဂၤဒဲးသုကဘၣ်ဒၢနုာ်သုတၤသူတၤသၣ်လၢသုထၢဖှိၣ် က့ၤအီၤအခီၣ်ထံးတပူန့ၣ်ဆူနာ်တဖျၢၣ်အပူၤဒီးလဲၤစိာ်အီၤဆူ တၢ်ဘူၣ်ထီၣ်ဘါထီၣ်အလီၢ်တတီၤန့ၣ်လီၤ.

လံာ်သိၣ်လီၤသီလီၤတၢ် 7:13

အဝဲဒၣ်ကအဲၣ်သုဒီးဆိၣ်ဂ့ၤသုဒ်သိးသုကအါထီၣ်လၢနီၣ်ဂံၢ်ဒီး အိၣ်ဒီးဖိတဖၣ်အါအါဂီၢ်ဂီၢ်န့ၣ်လီၤ. အဝဲကဆိၣ်ဂ့ၤသုစံာ်ဧိၤပျီဧိၤတဖၣ်, ဒ်သိးသုကအိၣ်ဒီးဘုဧိၤဟုဧိၤ, စပံးထံ, ဒီးသ့ၣ်စၤယံးအသိန့ၣ်လီၤ. ဒီးအဝဲဒၣ်ကဆိၣ်ဂ့ၤသုခီဖျိတၢ်ဟ့ၣ်လီၤသုလၢဂီၤဘုၣ်ဂီၤ ဖံးဒီးသိအါအါကလဲာ်န့ၣ်လီၤ. အဝဲကဟ့ၣ်လီၤသုလၢကယဲၢ်တၢ်ဆိၣ်ဂ့ၤခဲလၢာ်အံၤ, လၢကီၢ်တဘ့ၣ်အပူၤလၢအဝဲအၢၣ်လီၤတ့ၢ်သုမိၢ်ပၢ်ဖံဖု လၢပျၢၤန့ၣ်, လၢအဝဲကဟ့ၣ်လီၤသုန့ၣ်လီၤ.

၁ တံၤမသ့း 2:8

လၢတၢ်အိၣ်ဖှိၣ်အတၢ်ဘူၣ်ထီၣ်ဘါထီၣ်အလီၢ်ကိးပူၤ ဒဲးန့ၣ်, ယသးအိၣ်လၢပိာ်ခွါတဖၣ်ကဃ့ဘါထုကဖၣ်, ပိာ်ခွါလၢအပာ်စီဆှံအသးလၢကစၢ်ယွၤအဂီၢ်ဒီးသ့ယူာ်ထီၣ် အစုလၢတၢ်ထုကဖၣ်အပူၤတအိၣ်ဘၣ်ဒီးတၢ်သူၣ်ဒိၣ်သးဖျိး တၢ်ဂ့ၢ်လိာ်ဘှီလိာ်, တဖၣ်န့ၣ်လီၤ.