လံာ်နီၢ်အ့ၤစတၢ် 9:18 - Sgaw Karen Common Bible

¹⁸ မ့မ့ၢ်, ပှၤယူဒၤဖိလၢအအိၣ်လၢဝ့ၢ်ၡူၡၣ်တဖၣ်န့ၣ်, မၤသံအဒုၣ်အဒါလၢတဆံသၢနံၤတနံၤဒီးတဆံလွံၢ်နံၤတနံၤန့ၣ် လီၤ. ဒီးလၢတဆံယဲၢ်နံၤတနံၤန့ၣ်အိၣ်ဘှံးဝဲဒီးပာ်ဝဲဒ် အမ့ၢ်တၢ်သူၣ်ခုသးခုအတၢ်အီၣ်တၢ်အီအမူးအမုၢ်တနံၤန့ၣ်လီၤ.

လံာ်နီၢ်အ့ၤစတၢ် 9:18 Iomraidhean Croise

လံာ်နီၢ်အ့ၤစတၢ် 8:11

လံာ်ပရၢတဖၣ်အံၤ, ပာ်ဖျါထီၣ်လၢစီၤပၤဟ့ၣ်တၢ်ပျဲဆူ ပှၤယူဒၤဖိလၢအအိၣ်လၢဝ့ၢ်ကိးဖျၢၣ်ဒဲးအပူၤ, ဒ်သိးကကရၢကရိထီၣ်အသးလၢတၢ်ဒီဒၣ်က့ၤအသးဒၣ်ဝဲအဂီၢ်န့ၣ်လီၤ. ပှၤတကလုာ်ဂ့ၤတကလုာ်ဂ့ၤမ့ၢ်အိၣ်လၢကီၢ်တဘ့ၣ်ဂ့ၤ တဘ့ၣ်ဂ့ၤအပူၤလၢအဟဲဒုးပှၤယူဒၤဖိ, အဝဲသ့ၣ်အဖိတဖၣ်ဒီးအပှၤပိာ်မုၣ်တဖၣ်န့ၣ်, အဝဲသ့ၣ်မၤဆၢက့ၤဝဲသ့ဒီးမၤသံကွံာ်ပှၤလၢခံ ကတၢၢ်တဂၤဒီးဟံးန့ၢ်ကွံာ်ဝဲအတၢ်ဖိတၢ်လံၤသ့န့ၣ်လီၤ.

လံာ်နီၢ်အ့ၤစတၢ် 9:1

မုၢ်တနံၤလၢစီၤပၤအတၢ်ဘိးဘၣ်သ့ၣ်ညါကဘၣ်ကဲထီၣ်လိၣ်ထီၣ်, လါအၢ်ဒးထီၣ်တဆံသၢသီတသီ, မုၢ်တနံၤဖဲပှၤယူဒၤဖိအဒုၣ်အဒါတဖၣ်မုၢ်လၢ်မၤန့ၢ်တၢ်ဒိၣ်စိ လၢပှၤယူဒၤဖိအဖီခိၣ်ဟဲတုၤဝဲလံ. ဘၣ်ဆၣ်လၢတၢ်န့ၣ်အလီၢ်ပှၤယူဒၤဖိတဖၣ်အိၣ်ဒီးတၢ်မၤနၢၤလၢ အဝဲသ့ၣ်အဖီခိၣ်န့ၣ်လီၤ.

လံာ်နီၢ်အ့ၤစတၢ် 9:11

လၢမုၢ်တနံၤဃီန့ၣ်, ပှၤလၢအဘၣ်တၢ်မၤသံအီၤလၢဝ့ၢ်ၡူၡၣ်ပူၤအနီၣ်ဂံၢ်န့ၣ်ဘၣ်တၢ် ပာ်ဖျါထီၣ်အီၤဆူစီၤပၤန့ၣ်လီၤ.

လံာ်နီၢ်အ့ၤစတၢ် 9:13

နီၢ်အ့ၤစတၢ်စံးဆၢဝဲ, “မ့ၢ်ဘၣ်တၢ်ဒိၣ်ကစၢ်စီၤပၤအသးဒီး, မ်ပှၤယူဒၤဖိလၢဝ့ၢ်ၡူၡၣ်အပူၤမၤကဒီးဝဲခဲမုၢ်ဆ့ၣ်တနံၤဒ် တနံၤအံၤတၢ်ပျဲအဝဲသ့ၣ်မၤအသိးန့ၣ်တက့ၢ်. ဒီးမ်ပှၤဘျးထီၣ်စီၤဟၤမၣ်အဖိခွါအဂၤတဆံအစိၣ်လၢသ့ၣ်အလိၤ တက့ၢ်.”

လံာ်နီၢ်အ့ၤစတၢ် 9:15

လၢလါအးဒၢ်ထီၣ်တဆံလွံၢ်နံၤတနံၤန့ၣ် ပှၤယူဒၤဖိလၢအအိၣ်လၢဝ့ၢ်ၡူၡၣ်အပူၤတဖၣ်ပာ်ဖှိၣ်ထီၣ်ကဒီး အသး, ဒီးမၤသံပှၤသၢကယၤလၢဝ့ၢ်ပူၤန့ၣ်လီၤ. ဘၣ်ဆၣ်ဒီး, အဝဲသ့ၣ်တဂုာ်ဆူၣ်ပျီဆူၣ်တၢ်နီတမံၤန့ၣ်ဘၣ်.

လံာ်နီၢ်အ့ၤစတၢ် 9:2

လၢပှၤယူဒၤဖိအိၣ်ဝဲဆိးဝဲအလီၢ်လၢဝ့ၢ်တဖျၢၣ်လၢ်လၢ်လၢဘီမုၢ် အပူၤန့ၣ်, အဝဲသ့ၣ်ကရၢကရိထီၣ်အသးဒ်သိးကထီဒါပှၤတဂၤ လၢ်လၢ်လၢအဟဲမၤအၢအီၤန့ၣ်လီၤ. ပှၤဂီၢ်မုၢ်လၢအအိၣ်လၢတၢ်လီၢ်တပူၤလၢ်လၢ်န့ၣ်ပျံၤဘၣ်အဝဲသ့ၣ်, ဒီးပှၤဆၢထၢၣ်ထီဒါအဝဲသ့ၣ်တဘူၣ်ဘၣ်နီတဂၤဘၣ်.

လံာ်နီၢ်အ့ၤစတၢ် 9:21

တဲဘၣ်အဝဲသ့ၣ်လၢကဘၣ်တိၢ်န့ၢ်ဖံးဃာ်လါအးဒၢ်ထီၣ်တဆံ လွံၢ်နံၤတနံၤဒီးတဆံယဲၢ်နံၤတနံၤတဖၣ်ဒ်တၢ်အိၣ်ဘှံးအမုၢ်နံၤ တဖၣ်အသိးကိးနံၣ်ဒဲးန့ၣ်လီၤ.