လံာ်ပှၤစံၣ်တဲၤတဲလီၤတၢ် 4:1 - Sgaw Karen Common Bible

¹ မၤကဒီးတစု, ယကွၢ်တၢ်စံၣ်ညီၣ်တတီခဲလၢာ်လၢအမၤဒံးအသးလၢ ဟီၣ်ခိၣ်ချၢအံၤန့ၣ်လီၤ. ပှၤလၢအဘၣ်တၢ်မၤနးမၤဖှီၣ်အီၤတဖၣ်ဟီၣ်တၢ်ယၢၤတၢ်ဘၣ်ဆၣ်ပှၤမၤ စၢၤအီၤတအိၣ်နီတဂၤဘၣ်. ပှၤတမၤစၢၤအီၤနီတဂၤဘၣ်န့ၣ်မ့ၢ်လၢတၢ်စိကမီၤအိၣ်လၢပှၤမၤ နးမၤဖှီၣ်တၢ်တဖၣ်အစုပူၤအဃိန့ၣ်လီၤ.

လံာ်ပှၤစံၣ်တဲၤတဲလီၤတၢ် 4:1 Iomraidhean Croise

လံာ်စီၤယိၤဘး 16:4

သုမ့ၢ်အိၣ်ဘၣ်လၢယလီၢ်, ဒီးယမ့ၢ်အိၣ်ဘၣ်လၢသုလီၢ်သတး ဒီးတၢ်လၢသုစံးခဲလၢာ်န့ၣ်ယကစံးယဲစ့ၢ်ကီးလီၤ. ယဂံၤဂုၤ ယခိၣ်လၢတၢ်ကူၣ်သ့ဒီးမၤလီၤအုးသုလၢယတၢ်ကတိၤတဖၣ် သ့ဝဲလီၤ.

လံာ်စီၤယိၤဘး 35:9

တုၤပှၤကညီဘၣ်တၢ်မၤအၢမၤနးအီၤဒီးအဝဲသ့ၣ်ကအု ကစွါထီၣ်ဝဲ, ဒီးကိးထီၣ်ပှၤတဂၤဂၤလၢကအုၣ်က့ၤခီၣ်က့ၤအီၤ န့ၣ်လီၤ.

လံာ်စီၤယိၤဘး 6:29

သုလဲၤတလၢကွံာ်အခၢးလံ. ဆိကတီၢ်သုတၢ်စံၣ်ညီၣ်တတီ န့ၣ်တက့ၢ်. စံးအၢစံးသီယၤတဂ့ၤ. ယအိၣ်လၢတၢ်အဘၣ် တကပၤလီၤ.

လံာ်စီၤယိၤဘး 9:24

ကစၢ်ယွၤဟ့ၣ်လီၤဟီၣ်ခိၣ်ဆူပှၤတတီတလိၤအစုပူၤန့ၣ်လီၤ. မၤဘျီၣ်ကွံာ်ပှၤစံၣ်ညီၣ်ကွီၢ်သ့ၣ်တဖၣ်အမဲာ်လီၤ. ကစၢ်ယွၤမ့ၢ် တမၤတၢ်အံၤဘၣ်ဒီးမ့ၢ်မတၤမၤလဲၣ်.

စံးထီၣ်ပတြၢၤ 12:5

“ဘၣ်ဆၣ်ခဲကနံၣ်အံၤယကဟဲ” ယွၤစံးဝဲဒၣ်, “အဂ့ၢ်မ့ၢ်လၢပှၤဖှီၣ်ဖိယာ်ဖိတဖၣ် ဘၣ်တၢ်ဆီၣ်ဘံၣ်ဆီၣ်ဘၢအီၤ, ဒီးပှၤလၢအလိၣ်ဘၣ်တၢ်မၤစၢၤတဖၣ် ကအုကစွါထီၣ်ဝဲအဃိလီၤ. ယကဟ့ၣ်အဝဲသ့ၣ်တၢ်ပူၤဖျဲးလၢ အဆၢဒိးန့ၢ်ဘၣ်ဝဲန့ၣ်လီၤ.”

စံးထီၣ်ပတြၢၤ 142:4

တုၤယကွၢ်တၢ်လၢယကပိာ်ကပၤန့ၣ်ဒီး ယတထံၣ်န့ၢ်ဘၣ်ပှၤလၢကမၤစၢၤယၤနီတဂၤဘၣ်. ပှၤမၤပူၤဖျဲးယၤတအိၣ်ဘၣ်. ပှၤကွၢ်ထွဲယၤတအိၣ်ဘၣ်.

စံးထီၣ်ပတြၢၤ 142:5

ယွၤဧၢ, ယကိးထီၣ်နၤလၢတၢ်မၤစၢၤအဂီၢ်, နဲဒၣ်ယွၤဧၢ, နမ့ၢ်ပှၤလၢအဒီဒၣ်အိၣ်ပှိၤယၤ, နမ့ၢ်တၢ်ခဲလၢာ်လၢယဆၢဒိးန့ၢ်ဘၣ်အီၤလၢ တၢ်အိၣ်မူအံၤအပူၤန့ၣ်လီၤ.

စံးထီၣ်ပတြၢၤ 42:3

ဖဲယဒုၣ်ယဒါတဖၣ်သံကွၢ်ယၤတထံၣ်ဃီလၢ “နကစၢ်ယွၤအိၣ်ဖဲလဲၣ်” န့ၣ်ဒီး, ယမဲာ်ထံမဲာ်နိမ့ၢ်ယတၢ်အီၣ်လၢ မုၢ်ဆါဆဲးလၢမုၢ်နၤန့ၣ်လီၤ.

စံးထီၣ်ပတြၢၤ 42:9

ယစံးဘၣ်ကစၢ်ယွၤ, ယလၢၢ်, “ဘၣ်မနုၤလၢနသးပ့ၤနီၣ်ကွံာ်ယၤလဲၣ်. ဘၣ်မနုၤလၢယဘၣ်ဟီၣ်ဘၣ်ယၢၤလၢ ဒုၣ်ဒါအတၢ်ဆီၣ်ဘံၣ်ဆီၣ်ဘၢယၤအဃိန့ၣ်လဲၣ်.”

စံးထီၣ်ပတြၢၤ 69:20

တၢ်ဒုၣ်ဒွဲၣ်ဒုးသူၣ်ကၢ်သးလီၤတ့ၢ်ယၤ, တုၤဒၣ်လဲာ်ယအိၣ်လၢ တၢ်သူၣ်ဟးဂီၤသးဟးဂီၤအပူၤန့ၣ်လီၤ. ယကွၢ်လၢ်ပှၤလၢအကသးကညီၤတၢ်, ဘၣ်ဆၣ်တအိၣ်နီတဂၤဘၣ်. ဒီးပှၤလၢအမၤမုာ်တၢ်တဖၣ်, ဘၣ်ဆၣ်ယတထံၣ်န့ၢ်နီတဂၤဘၣ်.

စံးထီၣ်ပတြၢၤ 69:21

တုၤတၢ်သၣ်ဝံၤယသးဒီးအဝဲသ့ၣ်ဟ့ၣ်ယၤ တၢ်အစုၣ်လၢတၢ်အီၣ်အဂီၢ် ဒီးတုၤတၢ်သူယသးလၢထံဒီးအဝဲသ့ၣ်ဟ့ၣ်ယၤ တၤဆံၣ်အထံလၢယကအီအဂီၢ်န့ၣ်လီၤ.

စံးထီၣ်ပတြၢၤ 80:5

နဒုးအီၣ်တ့ၢ်လံပှၤလၢမဲာ်ထံအကိၣ်, ဒီးနဒုးအီပှၤလၢမဲာ်ထံလၢလီခီဖးဒိၣ်န့ၣ်လီၤ.

လံာ်တၢ်ဟးထီၣ်ကွံာ် 1:16

“ဖဲသုမၤစၢၤပှၤဧ့ၤဘြံၤမုၣ်တဖၣ်ဆံးစၢ်အဖိန့ၣ်မ့ၢ်အိၣ် ဖျဲၣ်ထီၣ်အပိာ်ခွါဖိဒီးမၤသံကွံာ်အီၤတက့ၢ်. မ့မ့ၢ်အပိာ်မုၣ်ဖိဒီးပျဲအမူတက့ၢ်,” န့ၣ်လီၤ.

လံာ်တၢ်ဟးထီၣ်ကွံာ် 1:22

လၢခံကတၢၢ်န့ၣ်, စီၤပၤဟ့ၣ်လီၤအကလုၢ်ဆူပှၤအဲၤကူပတူးဖိ ဒီးစံးဝဲ, “ဟံးန့ၢ်ပှၤဧ့ၤဘြံၤဖိသၣ်ပိာ်ခွါဖိလၢအအိၣ် ဖျဲၣ်ထီၣ်သီကိးဂၤဒဲးဒီးတ့ၢ်လီၤကွံာ်အီၤဆူထံကျိနံၤလါ အပူၤတက့ၢ်. မ့မ့ၢ်ဖိသၣ်ပိာ်မုၣ်ဖိတဖၣ်န့ၣ်ပျဲအမူကိးဂၤဒဲး တက့ၢ်.”

တၢ်ကတိၤဒိ. 19:7

ပှၤဖှီၣ်ဖိယာ်ဖိတဂၤအဒီပုၢ်ဝဲၢ်တဖၣ်ဒၣ်လဲာ်သးဟ့အီၤလီၤ. အတံၤသကိးတဖၣ်ဟးယံၤဒီးအီၤန့ၣ်တလီၤကမၢကမၣ်ဘၣ်. ကျဲးစၢးဝဲဆူၣ်ထဲလဲၣ်ထဲလဲၣ်ဘၣ်ဆၣ်မၤအဝဲသ့ၣ်တန့ၢ်နီတဂၤဘၣ်.

တၢ်ကတိၤဒိ. 28:3

ပှၤပၢတၢ်တဂၤလၢအမၤနးမၤဖှီၣ်ပှၤဖှီၣ်ဖိယာ်ဖိန့ၣ်, မၤအသးဒ်တၢ်ဟဲစူၤလီၤဆူၣ်ဆူၣ်လၢအမၤဟးဂီၤကွံာ် တၢ်မုၢ်တၢ်ဘိတၤသူတၤသၣ်တဖၣ်န့ၣ်လီၤ.

တၢ်ကတိၤဒိ. 29:2

ဒုးနဲၣ်ယၤပှၤပၢတၢ်အတီအလိၤတဂၤတက့ၢ်. ဒီးယကဒုးနဲၣ်နၤပှၤဂီၢ်မုၢ်လၢအသူၣ်ဖှံသးညီတဖုလီၤ. ဒုးနဲၣ်ယၤပှၤပၢတၢ်အအၢအသီတဂၤတက့ၢ်. ဒီးယကဒုးနဲၣ်နၤပှၤဂီၢ်မုၢ်လၢအဘၣ်ကိၢ်ဘၣ်ဂီၤတဖုန့ၣ်လီၤ.

လံာ်ပှၤစံၣ်တဲၤတဲလီၤတၢ် 3:16

အါန့ၢ်အန့ၣ်, လၢဟီၣ်ခိၣ်အံၤအပူၤယပာ်သူၣ်ပာ်သးစ့ၢ်ကီးလၢ, ဖဲတၢ်စံၣ်ညီၣ်တီဒီးတၢ်အဘၣ်ကြၢးအိၣ်ဝဲအလီၢ်န့ၣ်, တၢ်ထံၣ်န့ၢ်တၢ်တတီတလိၤလီၤ.

လံာ်ပှၤစံၣ်တဲၤတဲလီၤတၢ် 5:8

ဖဲလၢနထံၣ်ဘၣ်ထံကီၢ်ပဒိၣ်ပပှၢ်မၤနးမၤဖှီၣ်ပှၤဖှီၣ်ဖိယာ်ဖိဒီးတပျဲ ဘၣ်အဝဲသ့ၣ်ဒိးန့ၢ်တၢ်စံၣ်ညီၣ်တီဒီးအခွဲးအယာ်တဖၣ်ဘၣ်န့ၣ်, ကမၢကမၣ်တဂ့ၤ. ပဒိၣ်ပပှၢ်ကိးဂၤဒဲးန့ၣ်ဘၣ်တၢ်ဒီဒၣ်အိၣ်ပှိၤ အီၤလၢပှၤလၢအဖီခိၣ်တဂၤ, ဒီးအဝဲသ့ၣ်ခံဂၤလိာ်န့ၣ်ဘၣ်တၢ်ဒီဒၣ်အိၣ်ပှိၤဒံးအီၤလၢ ပဒိၣ်ပပှၢ်တဖၣ်လၢအဒိၣ်န့ၢ်ထီန့ၢ်အဝဲသ့ၣ်န့ၣ်လီၤ.

လံာ်ပှၤစံၣ်တဲၤတဲလီၤတၢ် 7:7

ဖဲပှၤကူၣ်တၢ်သ့တဂၤလီန့ၢ်ပှၤတဂၤဂၤန့ၣ်, မ့ၢ်ဒၣ်အဝဲမၤအသးဒ်ပှၤဟးဂီၤဖိတဂၤအသိးန့ၣ်လီၤ. နမ့ၢ်ဟံးန့ၢ်ခိၣ်ဖးလာ်ဆှိးဒီး, နမၤဟးဂီၤနသကဲာ်ပဝးန့ၣ်လီၤ.

လံာ်ပှၤစံၣ်တဲၤတဲလီၤတၢ် 8:9

ဖဲယဆိကမိၣ်ထီၣ်တၢ်မၤအသးတဖၣ်လၢဟီၣ်ခိၣ်အံၤဒီး, ယထံၣ်ဘၣ်လၢဟီၣ်ခိၣ်အံၤပှၤတနီၤအိၣ်ဒီးအစိကမီၤဒီးပှၤအဂၤ တဖၣ်ဘၣ်တူၢ်တၢ်လၢအဝဲသ့ၣ်အစုတီၤအဖီလာ်လီၤ.

လံာ်ယၡါယၤ 5:7

ကီၢ်အံၣ်စရ့လးမ့ၢ်ယွၤသ့တၢ်လၢာ်အစပံးလီၢ် ဒီးကီၢ်ယူဒၤအပှၤဂီၢ်မုၢ်မ့ၢ်စပံးမုၢ်လၢ အဝဲသူၣ်လီၤဖျးလီၤဝဲလီၤ. အဝဲမုၢ်လၢ်ဝဲလၢအဝဲသ့ၣ်ကမၤတၢ်လၢအဂ့ၤ, ဘၣ်ဆၣ်အခိၣ်တလိာ်န့ၣ်, အဝဲသ့ၣ်မၤသံမၤဝီတၢ်လီၤ. အဝဲမုၢ်လၢ်ဝဲလၢအဝဲသ့ၣ်ကမၤတၢ်အဘၣ်, ဘၣ်ဆၣ်ဒီးပှၤလၢအဝဲသ့ၣ်မၤအၢမၤသီတ့ၢ်တဖၣ်ကိးထီၣ်လၢတၢ် စံၣ်ညီၣ်တီအဂီၢ်လီၤ.

လံာ်ယၡါယၤ 51:23

ယကဟ့ၣ်လီၤအီၤဆူ, ပှၤတဖၣ်လၢအမၤအၢမၤနးသု, လၢအမၢသုမံလီၤလၢကျဲဘိတဖၣ်အပူၤ ဒီးယီၢ်တံၢ်သုဒ်ဟီၣ်ခိၣ်ကမူၣ်အသိး, အအိၣ်န့ၣ်လီၤ.”

လံာ်ယၡါယၤ 59:7

ထီဘိန့ၣ်သုကူၣ်ကျဲၤတၢ်အၢတၢ်သီတမံၤမံၤ, ဒီးသုကမၤအီၤန့ၣ်သုခိးတကဲဒၣ်လဲာ်ဘၣ်. သုတမၤယံာ်မၤနီၢ်သုသးနီတစဲးလၢသုကမၤသံပှၤဂီၢ်မုၢ်လၢအ တၢ်ကမၣ်တအိၣ်န့ၣ်ဘၣ်. ဖဲသုလဲၤတပူၤလၢ်လၢ်န့ၣ်, သုပာ်တီၢ်တၢ်ဟးဂီၤဒီးတၢ်မၤဟးဂီၤ,

လံာ်ယံးရမံယၤ 16:7

ပှၤတအီၣ်ဃုာ်တၢ်မ့ၢ်ဂ့ၤ, အီဃုာ်တၢ်မ့ၢ်ဂ့ၤနီတဂၤဒီးပှၤတဂၤ ဂၤလၢတၢ်မၤမုာ်ထီၣ်က့ၤအဂီၢ်ဖဲပှၤလၢအအဲၣ်ဝဲတဂၤသံန့ၣ်ဘၣ်. လၢပှၤတဂၤလၢအပၢ်သံအဃိမ့ၢ်ဂ့ၤ, အမိၢ်သံအဃိမ့ၢ်ဂ့ၤအဂီၢ်ဒၣ် လဲာ်, ပှၤတဒုးနဲၣ်အတၢ်သူၣ်ဘၣ်ဒိသးဘၣ်ထံးနီတဂၤဘၣ်.

လံာ်သးသယုၢ်တၢ် 1:16

လၢတၢ်န့ၣ်အဃိဒီးယမဲာ်ချံတဖၣ်ပုာ်ထီၣ်ယွၤလီၤလၢယမဲာ်ထံ မဲာ်နိန့ၣ်လီၤ. ပှၤမၤမုာ်ထီၣ်ယသးတသ့ဘၣ်နီတဂၤဘၣ်. ပှၤဟ့ၣ်ဆူၣ်ထီၣ်ယဂံၢ်ယဘါတသ့ဘၣ်နီတဂၤဘၣ်. ဒုၣ်ဒါတဖၣ်မၤနၢၤတ့ၢ်ယၤလံ. တၢ်တအိၣ်လီၤတဲာ်ဘၣ်ဒီးယပှၤဂီၢ် မုၢ်လၢတၢ်နီတမံၤလၢၤဘၣ်.

လံာ်သးသယုၢ်တၢ် 1:17

ယယူာ်ထီၣ်ယစုတဖၣ်ဘၣ်ဆၣ်ဒီးတမ့ၢ်လၢပှၤကမၤစၢၤယၤနီ တဂၤဘၣ်. ယွၤကိးထီၣ်တ့ၢ်ဒုၣ်ဒါတဖၣ်ဒ်သိးကထီဒါယၤကိးကပၤဒဲးလီၤ. အဝဲသ့ၣ်ပာ်ယၤဒ်တၢ်လီၤသးဘၣ်အၢတနီၤအသိးလီၤ.

လံာ်သးသယုၢ်တၢ် 1:2

ဟီၣ်ဝဲယၢၤဝဲသီတနၤကျၢၤ, ဒီးမဲာ်ထံမဲာ်နိတဖၣ်ယွၤလီၤဝဲ လၢအဘိးပၤတဖၣ်လီၤ. ကယဲၢ်အတံၤသကိးလၢညါတဖၣ်အကျါပှၤ တအိၣ်လီၤတဲာ်ဘၣ်နီတဂၤလၢကမၤမုာ်ထီၣ်အီၤဘၣ်. အဒီသိၣ်ဒီမှံၤတဖၣ်ဟ့ၣ်လီၤကွံာ်အီၤဒီးခဲအံၤအဝဲသ့ၣ်ထီ ဒါအီၤလီၤ.

လံာ်သးသယုၢ်တၢ် 1:9

အတၢ်တကဆှီဘၣ်န့ၣ်ဘၣ်တၢ်ထံၣ်အီၤညီကဒၣ်, ဘၣ်ဆၣ်ဒီးတပာ်သူၣ်ပာ်သးလၢတၢ်ကစံၣ်ညီၣ်အီၤဃါမနၤအဂ့ၢ်ဘၣ်. အတၢ်လီၤပှီၢ်မ့ၢ်တၢ်လီၤပျံၤလီၤဖုးလီၤ. ပှၤမၤမုာ်ထီၣ်အီၤတသ့နီတဂၤဘၣ်. အဒုၣ်အဒါတဖၣ်မၤနၢၤတၢ်လံ. ဒီးကိးပသူထီၣ်ဝဲဆူယွၤအအိၣ်လၢတၢ်သးကညီၤအဂီၢ်လီၤ.

လံာ်ဧၤမိၣ် 3:10

ပှၤသ့ၣ်တဖၣ်အံၤမၤပှဲၤအဟံၣ်အဃီဒီးတၢ်တဖၣ်လၢအမၤန့ၢ်ဝဲတၢ်မၤ ဆူၣ်မၤနၢၤဒီးတၢ်ဂုာ်ဆူၣ်ပျီဆူၣ်န့ၣ်လီၤ. ကဘၣ်အိၣ်မူတီတီလိၤလိၤဒ်လဲၣ်ဒၣ်လဲာ်န့ၣ်တသ့ၣ်ညါဝဲဘၣ်.

လံာ်ဧၤမိၣ် 3:9

ဘိးဘၣ်သ့ၣ်ညါတၢ်ဆူပှၤအိၣ်လၢကီၢ်အဲၤကူပတူးဒီးဝ့ၢ် အၤစဒိာ်အနူၢ်အစီၤတဖၣ်အပူၤဒီးစံး, “ပာ်ဖှိၣ်ထီၣ်သုသးလၢကစၢၢ် ကလိတဖၣ်လၢအအိၣ်ဝးတရံးကီၢ်ၡၤမရံဒီးကွၢ်တၢ်တၢထီၣ်တၢလီၤ ဖးဒိၣ်လၢအပူၤဒီးတၢ်မၤအၢမၤနးတဖၣ်လၢအဘၣ်တၢ်မၤအီၤဖဲန့ၣ် တက့ၢ်.

လံာ်မၤလကံ 2:13

အအံၤမ့ၢ်တၢ်အဂၤတမံၤလၢသုမၤန့ၣ်လီၤ. သုမၤလီၤဘျၢကွံာ်ယွၤအတၢ်လုၢ်လီၢ်လၢမဲာ်ထံမဲာ်နိ, တၢ်ဟီၣ်တၢ်ယၢၤဒီးတၢ်ကအုကစွါမ့ၢ်လၢအတတူၢ်လိာ်လၢၤဘၣ်တၢ်လုၢ် တဖၣ်လၢသုဟဲစိာ်ဆူအအိၣ်အဃိလီၤ.

လံာ်မၤလကံ 3:18

တုၤနုၤတစု, ယပှၤဂီၢ်မုၢ်ကထံၣ်ဘၣ်တၢ်လီၤဆီလၢအမၤအ သးလၢပှၤတီပှၤလိၤဒီးပှၤတတီတလိၤ, ပှၤလၢအမၤယတၢ်ဒီးပှၤလၢ အတမၤယတၢ်အဘၢၣ်စၢၤန့ၣ်လီၤ.”

လံာ်မၤလကံ 3:5

ယွၤသ့တၢ်လၢာ်စံးဝဲ, “ယကလီၣ်ဖျါထီၣ်ယသးလၢသုကျါလၢယကစံၣ်ညီၣ်တၢ်, ဒီးယကအုၣ်ယသးတကီၢ်ခါထီဒါပှၤလၢအမၤကဒါပှၤမဲာ်, ထီဒါပှၤအဲၣ်ဘၢမါအဲၣ်ဘၢဝၤ, ထီဒါပှၤအုၣ်အသးကဘျံးကဘျၣ်, ပှၤလၢအလီန့ၢ်ပှၤမၤတၢ်ဖိလၢအဘူးအလဲတဖၣ်အပူၤ, ဒီးပှၤလၢအဟံးန့ၢ်တၢ်ခွဲးတၢ်ယာ်လၢပှၤမုၣ်ကမဲ, ပှၤဖိၣ်ဃဲတဖၣ်ဒီးပှၤတခီဘီမုၢ်ဖိတဖၣ် အဖီခိၣ်ဒီးထီဒါကယဲၢ်ပှၤလၢအတယူးယီၣ်ပာ်ကဲဘၣ်ယၤတဖၣ် န့ၣ်လီၤ.

လံာ်မးသဲ 26:56

ဘၣ်ဆၣ်ဒီး, တၢ်တဖၣ်အံၤမၤတ့ၢ်အသး, ဒ်သိးဒီးတၢ်လၢဝံတဖၣ်ကွဲးတ့ၢ်ဝဲလၢတၢ်ကွဲးအသးစီဆှံတဖၣ်အပူၤ, ကလၢထီၣ်ပှဲၤထီၣ်ဝဲအဂီၢ်လီၤ.” တုၤနုၤတစု, အပျဲၢ်အဘီၣ်ခဲလၢာ်ပာ်တ့ၢ်ဒီးဃ့ၢ်သဒၣ်ကွံာ်အီၤ လီၤ.

လံာ်သိၣ်လီၤသီလီၤတၢ် 28:33

ပှၤကလုာ်တကလုာ်လၢထံဂၤကီၢ်ဂၤတခီကဟံးန့ၢ်ကွံာ်ကယဲၢ်တၢ်မုၢ် တၢ်ဘိတၤသူတၤသၣ်တဖၣ်လၢသုကျဲးစၢးမၤတ့ၢ်ဆူၣ်ဆူၣ်ဒီးသူၣ် လီၤဖျးလီၤအီၤ, ဖဲသုတဒိးန့ၢ်တၢ်နီတမံၤဘၣ်, မ့မ့ၢ်တခီသုဘၣ်တၢ်မၤနၢၤမၤပ့ၤ, မၤအၢမၤနးသုဆါဆါကလဲာ် တပယူာ်ဃီန့ၣ်လီၤ.

လံာ်သိၣ်လီၤသီလီၤတၢ် 28:48

လၢတၢ်န့ၣ်အဃိ, သုကမၤဒုၣ်ဒါတဖၣ်လၢယွၤကဆှၢလီၤအီၤဒ်သိး ကထီဒါသုအတၢ်န့ၣ်လီၤ. သုကသၣ်ဝံၤသၣ်စ့ၤ, တၢ်ကသူသုသးလၢထံ, ဒီးအိၣ်ဘ့ၣ်ဆ့, လိၣ်ဘၣ်တၢ်ကိးမံၤဒဲး န့ၣ်လီၤ. ယွၤကမၤနးမၤဖှီၣ်သုဆါဆါကလဲာ်တုၤလီၤလၢသုဘၣ်တၢ်မၤဟး ဂီၤကွံာ်သုတစုန့ၣ်လီၤ.

ယၤကိာ် 5:4

ပှၤလၢအမၤတၢ်လၢသုစံာ်ပျီပူၤတဖၣ်န့ၣ်, သုတဟ့ၣ်အီၤအဘူး အလဲဘၣ်. ဒိကနၣ်အဝဲသ့ၣ်အတၢ်ကဒူးကဒ့ၣ်တဖၣ်တက့ၢ်. ပှၤလၢအထၢဖှိၣ်ပာ်ဖှိၣ်သုဘုတဖၣ်အတၢ်ကိးပသူထီၣ်န့ၣ်, တုၤဃီၤလၢခဲအံၤဒိကနၣ်ယၤတက့ၢ်. ယွၤ, တၢ်သုးမုၢ်ဂီၢ်မုၢ်အကစၢ်အနၢ်ပူၤန့ၣ်လံ.

လံာ်ပှၤစံၣ်ညီၣ်ကွီၢ် 4:3

စီၤပၤယၤဘံၣ်အိၣ်ဒီးလ့ၣ်ကဟၣ်ဒုးသုးထးအဆိခွံကယၤ, ဒီးအဝဲပၢအံၣ်စရ့လးအပှၤဂီၢ်မုၢ်လၢတၢ်အၢတၢ်သီဒီး တၢ်မၤအၢမၤနးဖးဒိၣ်အပူၤအနံၣ်ခံဆံန့ၣ်လီၤ. တုၤနုၤတစုအံၣ်စရ့လးအပှၤဂီၢ်မုၢ်ကိးပသူထီၣ်ဆူယွၤအအိၣ် လၢတၢ်မၤစၢၤအဂီၢ်န့ၣ်လီၤ.