လံာ်သိၣ်လီၤသီလီၤတၢ် 32:36 - Sgaw Karen Common Bible

³⁶ ယွၤကမၤပူၤဖျဲးပှၤဂီၢ်မုၢ်, ဖဲအဝဲထံၣ်ဘၣ်လၢအဝဲသ့ၣ်အဂံၢ်အဘါလၢာ်ကွံာ်လံန့ၣ်လီၤ. အဝဲကအိၣ်ဒီးတၢ်သးကညီၤဘၣ်ပှၤတဖၣ်လၢ အမၤအတၢ်, ဖဲအဝဲထံၣ်ဘၣ်လၢအဝဲသ့ၣ်အတၢ်မၤစၢၤလၢာ်ကွံာ်ဝဲလံန့ၣ်လီၤ.

လံာ်သိၣ်လီၤသီလီၤတၢ် 32:36 Iomraidhean Croise

လံာ်စီၤပၤအခီၣ်ထံးတဘ့ၣ် 14:10

လၢတၢ်အံၤအဃိယဟဲစိာ်တၢ်တတၢးတနါလၢနစီၤပၤအစၢၤအသွဲၣ်တဖၣ် အလိၤ, ဒီးမၤသံကွံာ်ကယဲၢ်နစၢၤနသွဲၣ်ပိာ်ခွါခဲလၢာ်, ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤန့ၣ်လီၤ. ယကဒီၣ်တဲာ်ကွံာ်နပှၤဟံၣ်ဖိဃီဖိတဖၣ်ဒီးအဝဲသ့ၣ်ကဘၣ်တၢ်မၤ ပျီကွံာ်အီၤဒ်တၢ်အ့ၣ်အသိးန့ၣ်လီၤ.

လံာ်စီၤပၤအခီၣ်ထံးတဘ့ၣ် 21:21

လၢတၢ်န့ၣ်အဃိယွၤစံးဘၣ်နၤ, ယကဟဲစိာ်တၢ်တတၢးတနါလၢနဖီခိၣ်န့ၣ်လီၤ. ယကတၢၤကွံာ်နၤဒီးမၤလၢာ်ကွံာ်ကယဲၢ်နပှၤဟံၣ်ဖိဃီဖိပိာ်ခွါ လၢနဟံၣ်ဒူၣ်ဃီထၢအပူၤ, သးစၢ်မ့ၢ်ဂ့ၤ, သးပှၢ်မ့ၢ်ဂ့ၤဒ်သိးသိးန့ၣ်လီၤ.

လံာ်စီၤပၤခံဘ့ၣ်တဘ့ၣ် 14:26

ယွၤထံၣ်ဘၣ်တၢ်နးတၢ်ဖှီၣ်လီၤပျံၤလီၤဖုးလၢပှၤအံၣ်စရ့လး ဖိတူၢ်ဘၣ်ဝဲန့ၣ်လီၤ. ပှၤလၢကမၤစၢၤအဝဲသ့ၣ်တအိၣ်နီတဂၤဘၣ်.

လံာ်စီၤပၤခံဘ့ၣ်တဘ့ၣ် 9:8

ကယဲၢ်စီၤအၤဃာ်အဟံၣ်ဖိဃီဖိဒီးအစၢၤအသွဲၣ်ခဲလၢာ်ကဘၣ်သံဝဲ လီၤ. ယကမၤလၢာ်ကယဲၢ်ပိာ်ခွါခဲလၢာ်လၢအဟံၣ်ဖိဃီဖိ အကျါ, ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤန့ၣ်လီၤ.

စံးထီၣ်ပတြၢၤ 106:45

လၢအဝဲသ့ၣ်အဂီၢ် ယွၤသ့ၣ်နီၣ်ထီၣ်က့ၤ အတၢ်အၢၣ်လီၤအီလီၤဒီး လၢအတၢ်အဲၣ်ဒိၣ်ဝဲအဃိ, အဝဲထိၣ်ကဆှၣ်လီၤက့ၤအသးန့ၣ်လီၤ.

စံးထီၣ်ပတြၢၤ 135:14

အဂ့ၢ်ဒ်အံၤ, ယွၤကစံၣ်ညီၣ်အိၣ်ပှိၤ အပှၤဂီၢ်မုၢ်လၢအတၢ်ကမၣ်တအိၣ်, ဒီးအိၣ်ဒီးတၢ်သးကညီၤအခ့အပှၤတဖၣ်န့ၣ်လီၤ.

စံးထီၣ်ပတြၢၤ 50:4

အဝဲကိးဖှိၣ်မူခိၣ်ဒီးဟီၣ်ခိၣ်ဒ်ပှၤအုၣ်အသးတဖၣ်အသိး လၢကကွၢ်အဝဲ ကစံၣ်ညီၣ်အပှၤဂီၢ်မုၢ်အဂီၢ်န့ၣ်လီၤ.

စံးထီၣ်ပတြၢၤ 7:8

ယွၤစံၣ်ညီၣ်ပှၤကလုာ်ခဲလၢာ်လီၤ. ယွၤဧၢ, စံၣ်ညီၣ်ယၤဒ်ယတၢ်တီတၢ်လိၤ ဒီးယသူးယသ့ၣ်အိၣ်ဒီးယၤအသိးန့ၣ်တက့ၢ်.

စံးထီၣ်ပတြၢၤ 90:13

နတၢ်သးထီၣ်ကယံာ်ဒံးဝဲဆံးယံာ်လဲၣ်. ယွၤဧၢ, သူၣ်ကညီၤသးကညီၤလၢ် နခ့နပှၤတဖၣ်န့ၣ်တက့ၢ်.

စံးထီၣ်ပတြၢၤ 96:13

အဝဲသ့ၣ်ကသးဝံၣ်တၢ်လၢ ယွၤအမဲာ်ညါ လၢအဝဲဟဲဝဲအဃိ, အဝဲဟဲဝဲဒ်သိးကစံၣ်ညီၣ်ဟီၣ်ခိၣ်လီၤ. အဝဲကစံၣ်ညီၣ်ဟီၣ်ခိၣ်လၢတၢ်တီတၢ်လိၤအပူၤ ဒီးပှၤဂီၢ်မုၢ်တဖၣ်လၢအဝဲ အတၢ်မ့ၢ်တၢ်တီအပူၤန့ၣ်လီၤ.

လံာ်တၢ်ဟးထီၣ်ကွံာ် 32:14

မၤသးဒ်န့ၣ်ဒီးယွၤလဲလိာ်ကွံာ်အတၢ်ပာ်လီၤသးဒီးတဒုးလီၤဘၣ် တၢ်တတၢးတနါလၢအပှၤဂီၢ်မုၢ်အလိၤလၢကမၤပျံၤမၤဖုးအဝဲ သ့ၣ်လၢၤဘၣ်.

လံာ်ယံးရမံယၤ 20:11

ဘၣ်ဆၣ်ဒီးနဲဒၣ်ယွၤဧၢ, နအိၣ်လၢယအိၣ်တခီ, ဂံၢ်ဆူၣ်ဘါဆူၣ် ဒီးစိဒိၣ်ကမီၤထီ, ဒီးပှၤလၢအမၤအၢမၤနးယၤတဖၣ်ကဃၣ်ကွံာ် ဝဲန့ၣ်လီၤ. အဝဲသ့ၣ်ကဘၣ်တၢ်မၤမဲာ်ဆှးအီၤလီၤထူလီၤယိာ်, မ့ၢ်လၢအဝဲသ့ၣ်မၤန့ၢ်မၤနၢၤတၢ်တသ့ဘၣ်အဃိန့ၣ်လီၤ.

လံာ်ယံးရမံယၤ 31:20

ကီၢ်အံၣ်စရ့လးဧၢ, နမ့ၢ်ယဖိခွါသးဘိ, ဖိလၢ ယအဲၣ်ဘၣ်အီၤအဂ့ၤကတၢၢ်လီၤ. တဘျီလၢ်လၢ်ဖဲ ယယၢၤထီၣ်ဘၣ်နမံၤန့ၣ်, ယဆိကမိၣ်ထီၣ်နၤလၢ တၢ်အဲၣ်အပူၤလီၤ. ယသးစဲဘူးဒီးနၤလီၤ. ယကအိၣ်ဒီး တၢ်သူၣ်ကညီၤသးကညီၤလီၤ.

လံာ်ယံးရမံယၤ 42:10

‘သုသးမ့ၢ်အိၣ်လၢ သုကအိၣ်ဆိးဘၣ်ဒံးလၢ ကီၢ်အံၤ အပူၤဒီး, ယကမၤထီၣ်သု, ဒီးတမၤလီၤပှီၢ်သုဘၣ်. ယကသူၣ်လီၤဒီး ယတထဲးလီၤကွံာ်ဘၣ်သုဘၣ်. တၢ်ဟးဂီၤလၢ ယဒုးဘၣ်သုန့ၣ် ဒုးသးအုးတ့ၢ်ယၤဒိၣ်မးလီၤ.

လံာ်ဒၤနံးယ့လး 12:7

မူခိၣ်ကလူးန့ၣ်ယူာ်ထီၣ်အစုခံခီလိာ်ဆူမူခိၣ်ဒီးမၤတၢ်အၢၣ်လီၤ အီလီၤလၢကစၢ်ယွၤလၢအမူဝဲလီၤထူလီၤယိာ်တဂၤအမံၤန့ၣ်လီၤ. ယနၢ်ဟူအဝဲဒၣ်စံး, “တၢ်န့ၣ်ကမ့ၢ်သၢနံၣ်ဃုလါန့ၣ်လီၤ. ဖဲတၢ်မၤအၢမၤနးကစၢ်ယွၤအပှၤဂီၢ်မုၢ်ဝံၤဝဲန့ၣ်, တၢ်ခဲလၢာ် အံၤကလၢထီၣ်ပှဲၤထီၣ်ဝဲဒၣ်န့ၣ်လီၤ.”

လံာ်ယိၤအ့လး 2:14

ဘၣ်သ့ၣ်သ့ၣ်ယွၤ, သုကစၢ်ယွၤကလဲလိာ်အတၢ်ပာ်လီၤသး ဒီးဆိၣ်ဂ့ၤသုလၢတၢ်မုၢ်တၢ်ဘိအါအါဂီၢ်ဂီၢ်န့ၣ်လီၤ. တုၤနုၤတစုသုလုၢ်ထီၣ်အီၤလၢဘုဧိၤဟုဧိၤဒီးစပံးထံကသ့ ဝဲန့ၣ်လီၤ.

လံာ်ယိၤအ့လး 2:18

တုၤနုၤတစုယွၤကသူၣ်အိၣ်သးအိၣ်အထံအကီၢ်, ဒီးသးကညီၤအပှၤဂီၢ်မုၢ်န့ၣ်လီၤ.”

လံာ်တၢ်ဘူၣ်ထီၣ်ဘါထီၣ် 26:43

ဘၣ်ဆၣ်ဒီး, အဆိကတၢၢ်ထံကီၢ်ကဘၣ်တၢ်မၤပျီကွံာ်အီၤဒီးအပှၤဂီၢ်မုၢ်, ဒ်သိးအကမုာ်လၤသးခုဘၣ်ဒီးတၢ်အိၣ်ဘှံးအလၢအပှဲၤ, ဒီးအဝဲသ့ၣ်ကဘၣ်ဟ့ၣ်တၢ်အဘူးအလဲအလၢအပှဲၤလၢအလုၢ်သ့ၣ်ခါပတာ် ယတၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီးယတၢ်မၤလိာ်တဖၣ်အဃိန့ၣ်လီၤ.

လံာ်ဧၤမိၣ် 7:3

ယွၤလဲလိာ်က့ၤအသးဒီးစံးဝဲ, တၢ်လၢနထံၣ်တ့ၢ်န့ၣ်တမၤအသးဘၣ်.

လံာ်ဧၤမိၣ် 7:6

ယွၤလဲလိာ်က့ၤကဒီးအသးဒီးစံးဝဲ, တၢ်အံၤတမၤအသးစ့ၢ်ကီး ဘၣ်.

ဧ့ၤဘြံၤ 10:30

အဂ့ၢ်ဒ်အံၤပသ့ၣ်ညါပှၤလၢအစံးဝဲ, “တၢ်ဟ့ၣ်ကၣ်တၢ်မ့ၢ် ယတၢ်မၤဒီးယကဟ့ၣ်ကၣ်ဆၢက့ၤတၢ်လီၤ.” ပသ့ၣ်ညါစ့ၢ်ကီး ပှၤလၢအစံး, “ကစၢ်ကစံၣ်ညီၣ်အပှၤဂီၢ်မုၢ်” န့ၣ်လီၤ.

လံာ်ပှၤစံၣ်ညီၣ်ကွီၢ် 2:18

ဖဲယွၤဟ့ၣ်လီၤပှၤအံၣ်စရ့လးဖိလၢခိၣ်နၢ်တဘျီလၢ်လၢ်န့ၣ်, ယွၤမၤစၢၤအီၤဒီးအုၣ်က့ၤခီၣ်က့ၤပှၤဂီၢ်မုၢ်လၢအဒုၣ်အဒါတဖၣ်အစုပူၤဖဲခိၣ်နၢ်တဂၤန့ၣ်အိၣ်မူဒံးဝဲအဆၢကတီၢ်န့ၣ်လီၤ. ယွၤသးကညီၤအဝဲသ့ၣ်မ့ၢ်လၢအဝဲသ့ၣ်ကအုကစွါဝဲလၢ အတၢ်နးတၢ်ဖှီၣ်ဒီးတၢ်မၤအၢမၤနးအပူၤအဃိန့ၣ်လီၤ.