လံာ်သိၣ်လီၤသီလီၤတၢ် 28:65 - Sgaw Karen Common Bible

⁶⁵ သုတထံၣ်န့ၢ်ဘၣ်တၢ်ဃူတၢ်ဖိးလၢတၢ်လီၢ်နီတပူၤ, တၢ်လီၢ်လၢတၢ်ကကိးအီၤလၢသုတၢ်န့ၣ်တအိၣ်ဘၣ်နီတပူၤဘၣ်. ယွၤကလုၣ်ဘၢသုဒီးတၢ်ကိၢ်တၢ်ဂီၤ, တၢ်မုၢ်လၢ်လၢာ်ကွံာ်ဒီးတၢ် သးဟးဂီၤန့ၣ်လီၤ.

လံာ်သိၣ်လီၤသီလီၤတၢ် 28:65 Iomraidhean Croise

လံာ်တၢ်ကဲထီၣ်အခီၣ်ထံး 8:9

ဘၣ်ဆၣ်ဒီးမ့ၢ်လၢထံလုၣ်ဘၢဒံးဟီၣ်ခိၣ်ဒီဘ့ၣ်ညါ, ဒီးထိၣ်လွံၢ်တထံၣ်န့ၢ်ဘၣ်တၢ်လီၢ်လၢကစီၢ်လီၤဝဲအဂီၢ်ဘၣ်. ဒီးယူၤကဒါက့ၤဝဲဆူကဘီအအိၣ်, ဒီးစီၤနိအၤယူာ်ဃီၤအစုဒီးဒုးနုာ်ကဒါက့ၤအီၤန့ၣ်လီၤ.

လံာ်စီၤယိၤဘး 11:20

မ့မ့ၢ်ပှၤတတီတလိၤတဖၣ် ကကွၢ်တၢ်ဝးဝးလၢ တၢ်သးဟးဂီၤအပူၤဒီး ထံၣ်ဘၣ်ဝဲလၢတၢ်ထူၣ်ဖျဲး အဂီၢ်ကျဲတအိၣ်နီတဘိဘၣ်. အဝဲသ့ၣ်အတၢ်မုၢ် လၢ်ထဲတမံၤဧိၤမ့ၢ်ဒၣ်တၢ်သံကဟဲဝဲန့ၣ်လီၤ.

လံာ်ယၡါယၤ 51:17

ဝ့ၢ်ယရူၤၡလ့ၣ်ဧၢ, ဖုသံနီၣ်ထီၣ်တက့ၢ်. ထိၣ်ဂဲၤထီၣ်နသးဒီးဆၢထၢၣ်တက့ၢ်. နအီတ့ၢ်တၢ်စံၣ်ညီၣ်အလီခီလၢယွၤ, လၢအတၢ်သးထီၣ်အပူၤ, ဟ့ၣ်နၤလၢနကအီအဂီၢ်လံ. နအီလၢာ်ကွံာ်အီၤဒီးဒုးလဲၤနၤကနူၤနူၤကပၤပၤလီၤ.

လံာ်ယၡါယၤ 57:21

ပှၤတၢ်ဒဲးဘးဖိတဖၣ်အဂီၢ်န့ၣ်, တၢ်ပူၤဖျဲးတအိၣ်ဘၣ်.” ယွၤစံးဝဲဒၣ်.

လံာ်ယၡါယၤ 65:14

အဝဲသ့ၣ်ကသးဝံၣ်တၢ်လၢတၢ်သးခုအဃိ, မ့မ့ၢ်သုဝဲ သုကဟီၣ်လၢတၢ်သူၣ်ကၢ်သးလီၤအပူၤလီၤ.

လံာ်သးသယုၢ်တၢ် 1:3

ကီၢ်ယူဒၤအပှၤဂီၢ်မုၢ်ဘၣ်တၢ်နီၣ်ထီၣ်ဆူၣ်အီၤယံၤဒီးအဟံၣ် အဃီဒီးကဲထီၣ်ကုၢ်တဖၣ်လၢအစုကတၢၢ်ခီၣ်ကတၢၢ်န့ၣ်လီၤ. အဝဲသ့ၣ်အိၣ်ဝဲလၢထံဂုၤကီၢ်ဂၤတဖၣ်အပူၤဒီး တၢ်အလီၢ်တအိၣ်ဘၣ် နီတပူၤလၢကကိးဝဲလၢအတၢ်ဒၣ်ဝဲဘၣ်. ဘၣ်တၢ်ကဝီၤဃာ်အီၤလၢအဒုၣ်အဒါတဖၣ်ဒီး တၢ်ထူၣ်ဖျဲးအကျဲတအိၣ်နီတဘိဘၣ်.

လံာ်သးသယုၢ်တၢ် 3:65

ဆိၣ်အၢအဝဲသ့ၣ်ဒီးမၤပှဲၤအီၤလၢတၢ်သးဟးဂီၤတက့ၢ်.

လံာ်သးသယုၢ်တၢ် 5:17

ပဆိးက့လၢပသူၣ်ကံၢ်သးလဲနီၢ်နီၢ်ဒီးပမဲာ်ထံတဖၣ် လီၤဆှု တုၤပထံၣ်တၢ်တသ့လၢၤဘၣ်.

လံာ်တၢ်ဘူၣ်ထီၣ်ဘါထီၣ် 26:16

ယကစံၣ်ညီၣ်သုလီၤ. ယကဟဲစိာ်တၢ်နးတၢ်ဖှီၣ်လၢသုလိၤဒ်တၢ်ဆါလၢအဘျါတသ့, တၢ်လိၤကိၢ်လၢအကမၤဘျီၣ်သုမဲာ်, ဒီးဟံးထီၣ်ကွံာ်သုသးသမူန့ၣ်လီၤ. သုကသူၣ်လီၤဖျးလီၤဘုဧိၤဟုဧိၤဘၣ်ဆၣ်ကကဲထီၣ်တၢ်ကလီကလီလီၤ. အဂ့ၢ်ဒ်အံၤ, သုဒုၣ်သုဒါကမၤနၢၤသုဒီးအီၣ်ကွံာ်တၢ်လၢသုသူၣ်လီၤတဖၣ်န့ၣ်လီၤ.

လံာ်တၢ်ဘူၣ်ထီၣ်ဘါထီၣ် 26:36

ဒီးသုဝဲပှၤလၢအအိၣ်လၢဒုၣ်ဒါအကီၢ်ပူၤတဖၣ်န့ၣ်ယကမၤပျံၤမၤဖုးသုတုၤဒၣ်လဲာ်သ့ၣ်လၣ်ဟူး ဝးအသီၣ်န့ၣ်ကဒုးထွးထီၣ်ဃ့ၢ်သုန့ၣ်လီၤ. သုကဃ့ၢ်ဒ်သုဘၣ်တၢ်လူၤဖီၣ်န့ၢ်သုလၢတၢ်ဒုးတၢ်ယၤအပူၤအသိး, ဒီးသုကလီၤဃံၤဝဲဖဲသုဒုၣ်သုဒါတလူၤဘၣ်သုအခါဒၣ်လဲာ်န့ၣ်လီၤ.

လံာ်ဧၤမိၣ် 9:4

မ့ၢ်ဘၣ်တၢ်စိၣ်အီၤဆူတၢ်မၢကဲကုၢ်အလီၢ်လၢအဒုၣ်အဒါတဖၣ်ဒၣ် လဲာ်ယကမၤလိာ်လၢအဝဲသ့ၣ်ကဘၣ်တၢ်မၤသံကွံာ်အီၤန့ၣ်လီၤ. ယပာ်လီၤတ့ၢ်ယသးလၢယကမၤဟးဂီၤကွံာ်အီၤလီၤ. တမ့ၢ်လၢယကမၤစၢၤအီၤအဂီၢ်ဘၣ်.

လံာ်ဃဘးကူာ် 3:16

ယနၢ်ဟူကယဲၢ်တၢ်အံၤခဲလၢာ်, ဒီးယကနိးကစုာ်ယဲလီၤ. ယထးခိၣ်ဝးဝဲလၢတၢ်ပျံၤတၢ်ဖုးလီၤ. ယနီၢ်ခိလဲၤကပံၢ်ကပၢ် ဒီးယခီၣ်ဘၣ်တိၢ်လၢယခီၣ်ထံးလီၤ. ယကအိၣ်ဃိကလာ်ဒီးအိၣ်ခိးတၢ်ဆၢကတီၢ် ဖဲကစၢ်ယွၤကစံၣ်ညီၣ်ပှၤလၢအဒုးတၢ် ထီဒါပှၤတဖၣ်န့ၣ်လီၤ.

လံာ်မးသဲ 24:8

တၢ်တဖၣ်အံၤခဲလၢာ် မ့ၢ်ဒံးဒၣ်တၢ်လၢအလီၤဂာ်ဒီးပှၤဟုးဆါထီၣ်သီန့ၣ်လီၤ.

လံာ်လူၤကၣ် 21:26

ပှၤဂီၢ်မုၢ်ကသံတ့ၢ်မးလၢတၢ်ပျံၤတၢ်ဖုးအဃိ, ဖဲအဝဲသ့ၣ်အိၣ်ခိးတၢ်လၢအကဟဲဘၣ်ဟီၣ်ခိၣ်ဒီဘ့ၣ်ညါန့ၣ်လီၤ. အဂ့ၢ်ဒ်အံၤ, တၢ်စိတၢ်ကမီၤလၢမူဖးဖီတဖၣ် ဘၣ်တၢ်နီၣ်ထီၣ်ကွံာ်အီၤလၢအကျိၤဒၣ်ဝဲအပူၤလီၤ.

ရိမ့ၤ 11:10

မ်အဝဲသ့ၣ်အမဲာ်ချံတဖၣ်ဘၣ်တၢ်ကးတံာ်အီၤဒ်သိး အသုတထံၣ်လၢၤတၢ်တဂ့ၤ, ဒီးမ်အပျိၢ်သကူးလီၤအသးလၢအတၢ်ကီတၢ်ခဲတဖၣ် အဖီလာ်ကိးဆၢကတီၢ်ဒဲးန့ၣ်တက့ၢ်.”

လံာ်သိၣ်လီၤသီလီၤတၢ် 28:66

ထီဘိသုသးသမူကအိၣ်လၢတၢ်ဘၣ်ယိၣ်ဘၣ်ဘီအပူၤလီၤ. ကိးမုၢ်နံၤမုၢ်နၤဒဲးန့ၣ်သုကအိၣ်ပှဲၤဒီးတၢ်ပျံၤတၢ်ဖုး, ဒီးသုကအိၣ်မူလၢတၢ်ပျံၤဘၣ်တၢ်သံအပူၤတပယူာ်ဃီ န့ၣ်လီၤ.