လံာ်သိၣ်လီၤသီလီၤတၢ် 26:15 - Sgaw Karen Common Bible

¹⁵ ကွၢ်လီၤတၢ်လၢနလီၢ်စီဆှံလၢမူခိၣ်ဒီးဆိၣ်ဂ့ၤနပှၤဂီၢ်မုၢ် အံၣ်စရ့လးတက့ၢ်. ဆိၣ်ဂ့ၤစ့ၢ်ကီးကီၢ်လၢအထူးအတီၤဒီးဟီၣ်ခိၣ်ညၣ်ထ့ၣ်ဂ့ၤဝဲ လၢနဟ့ၣ်လီၤပှၤ, ဒ်နအၢၣ်လီၤတ့ၢ်ပမိၢ်ပၢ်ဖံဖုလၢပျၢၤတဖၣ်အသိးန့ၣ်တက့ၢ်.

လံာ်သိၣ်လီၤသီလီၤတၢ် 26:15 Iomraidhean Croise

လံာ်စီၤပၤအခီၣ်ထံးတဘ့ၣ် 8:27

ဘၣ်ဆၣ်ဒီးကစၢ်ယွၤဧၢ, မ့ၢ်နအိၣ်နဆိးနီၢ်နီၢ်လၢဟီၣ်ခိၣ်အံၤ ကသ့စ့ၢ်ကီးဧါ. ကယဲၢ်မူခိၣ်အလီၢ်ဒၣ်လဲာ်တလဲၢ်ဝဲလၢနကအိၣ်ကဆိးဘၣ်အဃိ, ယွၤအတၢ်လုၢ်ဟံၣ်လၢယဘှီ ထီၣ်အံၤတြီၢ်ဝဲလၢလၢလီၣ်လီၣ်လၢနဂီၢ်ကသ့ဒ်လဲၣ်.

လံာ်စီၤပၤအခီၣ်ထံးတဘ့ၣ် 8:43

ဒိကနၣ်လၢ်အဝဲအတၢ်ထုကဖၣ်န့ၣ်တက့ၢ်. လၢမူခိၣ်ဖဲနအိၣ်နဲဆိးနဲအလီၢ်န့ၣ်, ဒိကနၣ်လၢ်အီၤဒီးမၤတၢ်လၢအဝဲဃ့ဝဲလၢနကမၤန့ၢ်အီၤဒ်သိး ကယဲၢ်ပှၤဂီၢ်မုၢ်အိၣ်လၢဟီၣ်ခိၣ်ချၢခဲလၢာ်, ကသ့ၣ်ညါနၤဒီးစူၢ်နၤဒ်နပှၤဂီၢ်မုၢ်အံၣ်စရ့လးဖိမၤဝဲအသိး န့ၣ်တက့ၢ်. တုၤနုၤတစု, အဝဲသ့ၣ်ကသ့ၣ်ညါဝဲဒၣ်လၢယွၤအတၢ်လုၢ်ဟံၣ်လၢ ယသူၣ်ထီၣ်တ့ၢ်လံအီၤအံၤမ့ၢ်တၢ်လီၢ်တတီၤလၢနကဘၣ်တၢ်ဘူၣ်ထီၣ် ဘါထီၣ်နၤအဂီၢ်န့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 30:27

ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်ဃ့တၢ်ဆိၣ်ဂ့ၤလၢ ယွၤ, လၢပှၤဂီၢ်မုၢ်အဂီၢ်န့ၣ်လီၤ. လၢအဝဲအဟံၣ်အိၣ်လၢမူခိၣ်အပူၤ န့ၣ်, ကစၢ်ယွၤနၢ်ဟူတ့ၢ်အဝဲသ့ၣ်အတၢ်ထုကဖၣ်တဖၣ်ဒီးတူၢ်လိာ်အဝဲသ့ၣ် န့ၣ်လီၤ.

စံးထီၣ်ပတြၢၤ 28:9

ယွၤဧၢ, မၤပူၤဖျဲးနပှၤဂီၢ်မုၢ် ဒီးဆိၣ်ဂ့ၤပှၤလၢအမ့ၢ်နတၢ်န့ၣ်တက့ၢ်. ကဲထီၣ်အပှၤကွၢ်သိ ဒီးစိာ်ထီၣ်အဝဲသ့ၣ်လီၤစိၤလီၤထီတက့ၢ်.

စံးထီၣ်ပတြၢၤ 51:18

ကစၢ်ယွၤဧၢ, သူၣ်ကညီၤသးကညီၤစံယိၣ် ဒီးမၤစၢၤအီၤတက့ၢ်. သူၣ်ထီၣ်က့ၤယရူၤၡလ့ၣ်အဝ့ၢ်ခိၣ်ဒူတက့ၢ်.

စံးထီၣ်ပတြၢၤ 68:5

ကစၢ်ယွၤလၢအအိၣ်လၢအလီၢ်စီဆှံအပူၤန့ၣ် မ့ၢ်ပှၤဖိၣ်ဃဲအပၢ်ဒီးပှၤလၢကဟုဘံၣ်ကယာ်ဘၢ မုၣ်ကမဲသ့ၣ်တဖၣ်န့ၣ်လီၤ.

စံးထီၣ်ပတြၢၤ 80:14

သ့တၢ်လၢာ်အကစၢ်ယွၤဧၢ, ဃၣ်နသးဆူပအိၣ်တက့ၢ်. ကွၢ်လီၤလၢ်ပှၤလၢမူခိၣ်ဒီး ဟဲအုၣ်က့ၤခီၣ်က့ၤနပှၤဂီၢ်မုၢ်တက့ၢ်.

စံးထီၣ်ပတြၢၤ 80:15

ဟဲဒီးအုၣ်က့ၤခီၣ်က့ၤ စပံးမုၢ်လၢ နသူၣ်လီၤတ့ၢ်အီၤ, စပံးမုၢ်ဖိလၢနဒုးဒိၣ်ထီၣ်ဆူၣ်ထီၣ်အီၤအံၤတက့ၢ်.

စံးထီၣ်ပတြၢၤ 90:17

ယွၤ, ပကစၢ်ဧၢ, မ်နတၢ်ဆိၣ်ဂ့ၤဆိၣ်ဝါတဖၣ်အိၣ်ဒီးပှၤတက့ၢ်. ဟ့ၣ်လီၤလၢ်ပှၤတၢ်မၤနၢၤလၢ ပစုအတၢ်မၤခဲလၢာ်အပူၤန့ၣ်တက့ၢ်. မ့ၢ်မးပစုအတၢ်မၤန့ၣ်, ဒုးအိၣ်ဂၢၢ်ဆိးကျၢၤအီၤတက့ၢ်.

လံာ်ယၡါယၤ 57:15

ယဲဒၣ်အံၤ, ယမ့ၢ်ကစၢ်ယွၤလၢအအိၣ်ထီၣ်ထီဒီးစီဆှံဝဲ, ယွၤလၢအအိၣ်မူအစိၤစိၤအဃၣ်ဃၣ်လီၤ. ယအိၣ်လၢတၢ်လီၢ်ထီၣ်ထီဒီးစီဆှံတတီၤ, ဘၣ်ဆၣ်ဒီးယအိၣ်စ့ၢ် ကီးလၢပှၤဂီၢ်မုၢ်လၢအဆီၣ်လီၤအသးဒီးပီၢ်ယၢ်လီၤက့ၤအသး အကျါ, ဒ်သိးယဟ့ၣ်က့ၤအဝဲသ့ၣ်အတၢ်နာ် န့ၢ်ဒီးတၢ်မုၢ်လၢ်ကသ့ဝဲအဂီၢ်လီၤ.

လံာ်ယၡါယၤ 61:1

ယွၤပၢဘၣ်တၢ်ခဲလၢာ်ကစၢ် မၤပှဲၤတ့ၢ်ယၤဒီးအသးဒၣ်ဝဲလီၤ. အဝဲဃုထၢတ့ၢ်ယၤဒီးမၢလီၤတ့ၢ်ယၤ ဒ်သိးယကစံၣ်တဲၤတဲလီၤတၢ်သးခုကစီၣ်လၢ ပှၤဖှီၣ်ဖိယာ်ဖိ, ဒ်သိးယကမၤဘျါက့ၤပှၤအသူၣ်ကၢ်သးလီၤ, ဒ်သိးယကဘိးဘၣ်သ့ၣ်ညါတၢ်ပျၢ်ဖျဲးလၢ ပှၤဘၣ်တၢ်မၢကဲကုၢ်အီၤတဖၣ်အဂီၢ် ဒီးတၢ်သဘျ့လၢပှၤအိၣ်လၢဃိာ်ပူၤတဖၣ်အဂီၢ်လီၤ.

လံာ်ယၡါယၤ 63:15

ယွၤဧၢ, ကွၢ်လီၤပှၤလၢမူခိၣ်ဖဲနအိၣ်နဆိးလၢန တၢ်စီဆှံဒီးနတၢ်လၤကပီၤအပူၤန့ၣ်တက့ၢ်. နတၢ်သးအိၣ်ဘၣ်ပှၤဒိၣ်ဒိၣ်မုၢ်မုၢ်န့ၣ်အိၣ်ဖဲလဲၣ်. နတၢ်စိကမီၤအိၣ်ဖဲလဲၣ်. နတၢ်အဲၣ်ဒီးနတၢ်သးအိၣ်မၤစၢၤပှၤအိၣ်ဖဲလဲၣ်. ပာ်နသးဒ်နတသ့ၣ်ညါပှၤဘၣ်အသိးန့ၣ်တဂ့ၤ.

လံာ်ယံးရမံယၤ 31:23

ယွၤသ့တၢ်လၢာ်, အံၣ်စရ့လးအကစၢ်ယွၤ, စံးဝဲဒၣ်, “ဖဲယပာ်ကဒါက့ၤ ပှၤဂီၢ်မုၢ်လၢအထံအကီၢ်န့ၣ်, အဝဲသ့ၣ်ကစံးကဒီးဝဲတဘျီလၢကီၢ်ယူဒၤဒီး အဝ့ၢ်တဖၣ်အပူၤလၢ, ‘မ်ယွၤဆိၣ်ဂ့ၤ ဝ့ၢ်ယရူၤၡလ့ၣ် အကစၢၢ်စီဆှံ, တၢ်အလီၢ်စီဆှံဖဲ အဝဲအိၣ်ဝဲဆိးဝဲန့ၣ်တက့ၢ်.’

လံာ်စကၤရယၤ 2:13

ပှၤကိးဂၤဒဲးသ့ၣ်ဧၢ, အိၣ်ဘှီၣ်ကလာ်လၢယွၤအမဲာ်ညါတက့ၢ်. အဂ့ၢ်ဒ်အံၤ, အဝဲဟဲလၢအအိၣ်အဆိးအလီၢ်စီဆှံန့ၣ်လီၤ.

လံာ်မးသဲ 6:9

ဃ့ဘါထုကဖၣ်သုဝဲဒ်အံၤတက့ၢ်. ‘အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံအီၤတက့ၢ်.

မၤတၢ် 7:49

‘ကစၢ်ကစၢ်ယွၤစံးဝဲ, မူခိၣ်မ့ၢ်ယလီၢ်ပစိာ်, ဒီးဟီၣ်ခိၣ်မ့ၢ်ယခီၣ်ယီၢ်လီၤတၢ်အလီၢ်လီၤ. သုကဘှီထီၣ်န့ၢ်ယၤလၢဟံၣ်ဒ်လဲၣ်တကလုာ်လဲၣ်. တၢ်လီၢ်လၢယကအိၣ်ကဆိးအဂီၢ်အိၣ်ဖဲလဲၣ်.

လံာ်သိၣ်လီၤသီလီၤတၢ် 1:8

ကယဲၢ်တၢ်ခဲလၢာ်အံၤမ့ၢ်ကီၢ်လၢယၤ, ယွၤ, အၢၣ်လီၤတ့ၢ်လၢကဟ့ၣ် အီၤဆူသုမိၢ်ပၢ်ဖံဖုလၢပျၢၤတဖၣ်လၢအမ့ၢ်စီၤအၤဘြၤဟၣ်, စီၤအံၤစဲးဒီးစီၤယၤကိာ်ဒီးဆူအဝဲသ့ၣ်အစၢၤအသွဲၣ်တဖၣ် အအိၣ်န့ၣ်လီၤ. လဲၤဒီးမၤန့ၢ်အီၤတက့ၢ်.”

လံာ်သိၣ်လီၤသီလီၤတၢ် 26:14

ဖဲယအိၣ်ဒီးတၢ်သူၣ်အုးသးအုးအခါန့ၣ်ယတအီၣ်တၢ်န့ၣ်နီ တစဲးဘၣ်, ယတဟံးန့ၢ်အီၤနီတစဲးလၢယဟံၣ်ပူၤဖဲယတကဆှီ ဘၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးအခါဘၣ်. ဒီးယတဟ့ၣ်လီၤအီၤဒ်တၢ်မၤဘူၣ်အသိးဆူပှၤသံန့ၣ်နီတစဲးဘၣ်. ယစူၢ်နၤ, ယွၤဧၢ, ယမၤတၢ်ခဲလၢာ်ဒ်နတၢ်မၤလိာ်တ့ၢ်အသိးဘၣ်ဃး တၢ်ဆံဆဲၣ်ပူတပူန့ၣ်လီၤ.

လံာ်သိၣ်လီၤသီလီၤတၢ် 26:7

တုၤနုၤတစုပကိးထီၣ်တၢ်မၤစၢၤဆူယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤအအိၣ်န့ၣ်လီၤ. အဝဲနၢ်ဟူပှၤဒီးထံၣ်ပတၢ်တူၢ်ဘၣ်ခီၣ်ဘၣ်, တၢ်ကိၢ်တၢ်ဂီၤ, ဒီးတၢ်နးတၢ်ဖှီၣ်တဖၣ်န့ၣ်လီၤ.

လံာ်သိၣ်လီၤသီလီၤတၢ် 26:9

အဝဲဆှၢဃီၤပှၤဖဲအံၤဒီးဟ့ၣ်ပှၤကီၢ်တဘ့ၣ်လၢအထူးအတီၤဒီး ဟီၣ်ခိၣ်ညၣ်ထ့ၣ်ဂ့ၤဝဲန့ၣ်လီၤ.

လံာ်သိၣ်လီၤသီလီၤတၢ် 6:3

ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ဒိကနၣ်တၢ်တဖၣ်န့ၣ်, ဒီးစူၢ်အီၤတက့ၢ်. အန့ၣ်တစု, တၢ်ခဲလၢာ်ကလဲၤအသးဂ့ၤဂ့ၤဘၣ် ဘၣ်လၢသုဂီၢ်, ဒီးသုကကဲထီၣ်ပှၤတကလုာ်ဖးဒိၣ်ဒီးအိၣ်ဆိးလၢကီၢ်တဘ့ၣ်အပူၤ လၢအထူးအတီၤဒီးပှဲၤဝဲဒီးဟီၣ်ခိၣ်ညၣ်ထ့ၣ်အဂ့ၤ, ဒ်ယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤအၢၣ်လီၤတ့ၢ်ဝဲ အသိးန့ၣ်လီၤ.