လံာ်သိၣ်လီၤသီလီၤတၢ် 26:14 - Sgaw Karen Common Bible

¹⁴ ဖဲယအိၣ်ဒီးတၢ်သူၣ်အုးသးအုးအခါန့ၣ်ယတအီၣ်တၢ်န့ၣ်နီ တစဲးဘၣ်, ယတဟံးန့ၢ်အီၤနီတစဲးလၢယဟံၣ်ပူၤဖဲယတကဆှီ ဘၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးအခါဘၣ်. ဒီးယတဟ့ၣ်လီၤအီၤဒ်တၢ်မၤဘူၣ်အသိးဆူပှၤသံန့ၣ်နီတစဲးဘၣ်. ယစူၢ်နၤ, ယွၤဧၢ, ယမၤတၢ်ခဲလၢာ်ဒ်နတၢ်မၤလိာ်တ့ၢ်အသိးဘၣ်ဃး တၢ်ဆံဆဲၣ်ပူတပူန့ၣ်လီၤ.

လံာ်သိၣ်လီၤသီလီၤတၢ် 26:14 Iomraidhean Croise

စံးထီၣ်ပတြၢၤ 106:28

မၤကဒီးဖဲပဧိၢ်န့ၣ်, ကစၢ်ယွၤအပှၤဂီၢ် မုၢ်လဲၤသကိးတၢ်လၢ တၢ်ဘူၣ်ထီၣ်ဘါထီၣ်ဘဧၤလးအပူၤ, ဒီးအီၣ်တၢ်လုၢ်တၢ်ပာ်တဖၣ်လၢ တၢ်လုၢ်ထီၣ်အီၤဆူ ကစၢ်လၢအသံတဖၣ်န့ၣ်လီၤ.

စံးထီၣ်ပတြၢၤ 18:22

ယတိၢ်န့ၢ်အတၢ်သိၣ်တၢ်သီခဲလၢာ်, ယတလုၢ်သ့ၣ်ခါပတာ် အတၢ်မၤလိာ်တဖၣ်န့ၣ်ဘၣ်.

လံာ်ယံးရမံယၤ 16:7

ပှၤတအီၣ်ဃုာ်တၢ်မ့ၢ်ဂ့ၤ, အီဃုာ်တၢ်မ့ၢ်ဂ့ၤနီတဂၤဒီးပှၤတဂၤ ဂၤလၢတၢ်မၤမုာ်ထီၣ်က့ၤအဂီၢ်ဖဲပှၤလၢအအဲၣ်ဝဲတဂၤသံန့ၣ်ဘၣ်. လၢပှၤတဂၤလၢအပၢ်သံအဃိမ့ၢ်ဂ့ၤ, အမိၢ်သံအဃိမ့ၢ်ဂ့ၤအဂီၢ်ဒၣ် လဲာ်, ပှၤတဒုးနဲၣ်အတၢ်သူၣ်ဘၣ်ဒိသးဘၣ်ထံးနီတဂၤဘၣ်.

လံာ်ယဃ့းစက့လး 24:17

ပျဲနတၢ်ဟီၣ်သါသကူးဘၣ်တၢ်နၢ်ဟူအီၤတဂ့ၤ. လဲၤတၢ်လၢတၢ်တဖၢၣ်ဘၣ်နခိၣ်မ့ၢ်ဂ့ၤ, တၢ်တဒိးဘၣ်ခီၣ်ဖံးမ့ၢ် ဂ့ၤဒ်အမ့ၢ်တၢ်သးအုးအပနီၣ်တမံၤအသိးတဂ့ၤ. ကျၢၢ်ဘၢနမဲာ်မ့ၢ်ဂ့ၤ, အီၣ်တၢ်အီၣ်လၢပှၤဘၣ်မိၣ်ဘၣ်မးတဖၣ်အီၣ်ဝဲမ့ၢ်ဂ့ၤန့ၣ်တဂ့ၤ.”

လံာ်ဟိၤၡ့ 9:4

လၢတခီထံတခီကီၢ်တဖၣ်အပူၤန့ၣ်, အဝဲသ့ၣ်လုၢ်ထီၣ်အစပံးထံ အတၢ်လုၢ်တၢ်ပာ်တဖၣ်မ့ၢ်ဂ့ၤ, ဟဲစိာ်ဃီၤအတၢ်လုၢ်တၢ်ပာ်တ ဖၣ်မ့ၢ်ဂ့ၤဆူယွၤအအိၣ်တသ့လၢၤဘၣ်. အဝဲသ့ၣ်အတၢ်အီၣ်ကမၤတကဆှီဘၣ် ပှၤလၢအအီၣ်အီၤကိးဂၤဒဲးဒ်တၢ်အီၣ်လၢအဘၣ်တၢ်အီၣ်အီၤဖဲတၢ် သံတၢ်ပှၢ်အလီၢ်တဖၣ်အသိးန့ၣ်လီၤ. တၢ်န့ၣ်အဘျုးကအိၣ်ဒၣ်ထဲလၢကဒုးသးမံက့ၤပှၤလၢအတၢ်သၣ်ဝံၤ သၣ်စ့ၤန့ၣ်လီၤ. လဲၤစိာ်အီၤဆူယွၤအတၢ်လုၢ်ဟံၣ်အပူၤဒ်တၢ်လုၢ်တၢ်ပာ်အသိးတသ့ ဘၣ်နီတမံၤဘၣ်.

လံာ်တၢ်ဘူၣ်ထီၣ်ဘါထီၣ် 21:1

ဒီးယွၤမၤလိာ်စီၤမိၤၡ့လၢကတဲဘၣ်ပှၤလုၢ်တၢ်အခိၣ်တဖၣ်လၢအလီၤစၢၤလၢစီၤအၤဟရိၣ်လၢ, “ပှၤလုၢ်တၢ်အခိၣ်တဘၣ်မၤတကဆှီအသးနီတဂၤဒ်တၢ်ဘူၣ်တၢ် ဘါအလုၢ်အလၢ်အိၣ်ဝဲအသိးလၢတၢ်မၤတၢ်တမံၤမံၤဖဲအဘူး အတံၢ်တဂၤအတၢ်သံအမူးအပူၤ,

လံာ်တၢ်ဘူၣ်ထီၣ်ဘါထီၣ် 21:11

ဒီးတဘၣ်လဲၤဆူတၢ်သံစိၣ်အဃၢၤမ့ၢ်ဂ့ၤ, တဘၣ်မၤဘၣ်အၢအသးလၢ အပၢ်မ့ၢ်ဂ့ၤအမိၢ်မ့ၢ်ဂ့ၤအဃိဒၣ်လဲာ်န့ၣ်ဘၣ်.

လံာ်တၢ်ဘူၣ်ထီၣ်ဘါထီၣ် 7:20

ဘၣ်ဆၣ်ဒီးပှၤလၢအတကဆှီဘၣ်တဂၤလၢ်လၢ်မ့ၢ်အီၣ်တၢ်ညၣ်န့ၣ်ဒီး, ကဘၣ်တၢ်ပာ်အီၤဒ်ပှၤလၢအတမ့ၢ်ယွၤအပှၤဂီၢ်မုၢ်အကျါတဂၤန့ၣ်လီၤ.

လံာ်မၤလကံ 2:13

အအံၤမ့ၢ်တၢ်အဂၤတမံၤလၢသုမၤန့ၣ်လီၤ. သုမၤလီၤဘျၢကွံာ်ယွၤအတၢ်လုၢ်လီၢ်လၢမဲာ်ထံမဲာ်နိ, တၢ်ဟီၣ်တၢ်ယၢၤဒီးတၢ်ကအုကစွါမ့ၢ်လၢအတတူၢ်လိာ်လၢၤဘၣ်တၢ်လုၢ် တဖၣ်လၢသုဟဲစိာ်ဆူအအိၣ်အဃိလီၤ.

လံာ်သိၣ်လီၤသီလီၤတၢ် 13:5

မ့မ့ၢ်မၤသံကွံာ်ပှၤဖးတၢ်မံမီၢ်တဖၣ်အခီပညီတဂၤလၢ်လၢ်မ့ တမ့ၢ်ဝံတဂၤလၢအတဲဘၣ်သုလၢသုကပူထီၣ်ထီဒါယွၤ, လၢအမၤပူၤဖျဲးသုလၢကီၢ်အဲၤကူပတူးအပူၤတၢ်လီၢ်ဖဲသုမ့ၢ်တ့ၢ်ကုၢ်တဖၣ်န့ၣ်တက့ၢ်. ပှၤဒ်အံၤတဂၤန့ၣ်အၢဝဲသီဝဲဒီးကျဲးစၢးဆှၢကွံာ်သုလၢတၢ် အိၣ်မူလၢယွၤမၤလိာ်တ့ၢ်သုလၢသုကအိၣ်မူအီၤန့ၣ်လီၤ. အဝဲကြၢးဘၣ်တၢ်မၤသံအီၤဒ်သိးသုကမၤပူၤဖျဲးသုသးလၢတၢ် အၢတၢ်သီအံၤန့ၣ်လီၤ.

လံာ်သိၣ်လီၤသီလီၤတၢ် 15:5

စူၢ်အီၤဒီးမၤကယဲၢ်တၢ်ခဲလၢာ်လၢယမၤလိာ်တ့ၢ်သုလၢမုၢ်မဆါ တနံၤအံၤန့ၣ်တက့ၢ်.

လံာ်သိၣ်လီၤသီလီၤတၢ် 16:11

သူၣ်ခုသးခုလၢအမဲာ်ညါ, ဃုာ်ဒီးသုဖိတဖၣ်, သုကုၢ်သုပှၤတဖၣ်ဒီးပှၤလ့ၤဝံဖိတဖၣ်, ပှၤတခီဘီမုၢ်ဖိတ ဖၣ်, ပှၤဖိၣ်ဃဲတဖၣ်, ဒီးပှၤမုၣ်ကမဲတဖၣ်လၢအအိၣ်ဆိးလၢသုဝ့ၢ်တဖၣ်ပူၤန့ၣ်တက့ၢ်. မၤတၢ်အံၤဖဲတၢ်ဘူၣ်ထီၣ်ဘါထီၣ်အလီၢ်တတီၤန့ၣ်တက့ၢ်.

လံာ်သိၣ်လီၤသီလီၤတၢ် 26:13

စံးဘၣ်ယွၤ, တၢ်ဆံဆဲၣ်ပူတပူစီဆှံတအိၣ်တ့ၢ်လၢယဟံၣ်ပူၤနီ တမံၤဘၣ်. ယဟ့ၣ်လီၤအီၤဆူပှၤလ့ၤဝံဖိတဖၣ်, ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်ဒီးပှၤမုၣ်ကမဲတဖၣ်အအိၣ် ဒ်နမၤလိာ်တ့ၢ်ယၤလၢယကမၤအီၤန့ၣ်လီၤ. နတၢ်မၤလိာ်ဘၣ်ဃးဒီးတၢ်ဆံဆဲၣ်ပူတပူန့ၣ်ယတလဲၤသဒၣ်အီၤမ့ၢ်ဂ့ၤ, သးပ့ၤနီၣ်အီၤမ့ၢ်ဂ့ၤဘၣ်.

လံာ်သိၣ်လီၤသီလီၤတၢ် 26:15

ကွၢ်လီၤတၢ်လၢနလီၢ်စီဆှံလၢမူခိၣ်ဒီးဆိၣ်ဂ့ၤနပှၤဂီၢ်မုၢ် အံၣ်စရ့လးတက့ၢ်. ဆိၣ်ဂ့ၤစ့ၢ်ကီးကီၢ်လၢအထူးအတီၤဒီးဟီၣ်ခိၣ်ညၣ်ထ့ၣ်ဂ့ၤဝဲ လၢနဟ့ၣ်လီၤပှၤ, ဒ်နအၢၣ်လီၤတ့ၢ်ပမိၢ်ပၢ်ဖံဖုလၢပျၢၤတဖၣ်အသိးန့ၣ်တက့ၢ်.