လံာ်သိၣ်လီၤသီလီၤတၢ် 22:24 - Sgaw Karen Common Bible

²⁴ သုကဘၣ်ထုးထီၣ်ကွံာ်အဝဲသ့ၣ်ဆူဝ့ၢ်အချၢဒီးကွံာ်သံအီၤလၢလၢၢ်န့ၣ်လီၤ. ပိာ်မုၣ်ဖိန့ၣ်ကဘၣ်သံဝဲမ့ၢ်လၢအဝဲတကိးထီၣ်ဃ့လၢတၢ်မၤစၢၤအဂီၢ်, ဖဲအဝဲအိၣ်ဒၣ်လၢဝ့ၢ်တဖျၢၣ်အပူၤ, တၢ်လီၢ်ဖဲအဝဲကိးပှၤနၢ်ဟူအီၤသ့ဝဲအဃိန့ၣ်လီၤ. ဒီးပိာ်ခွါန့ၣ်ကဘၣ်သံဝဲမ့ၢ်လၢအမံဃုာ်အိၣ်ဃုာ်ဒီးပိာ်မုၣ် ဖိတဂၤလၢအမၤတၢ်တ့တၢ်ဖျီအတၢ်အၢၣ်လီၤဝံၤလံအဃိန့ၣ်လီၤ. လၢကျဲဒ်အံၤန့ၣ်သုကပူၤဖျဲးဒီးတၢ်အၢတၢ်သီၤအံၤန့ၣ်လီၤ.

လံာ်သိၣ်လီၤသီလီၤတၢ် 22:24 Iomraidhean Croise

လံာ်တၢ်ကဲထီၣ်အခီၣ်ထံး 29:21

ဒီးစီၤယၤကိာ်စံးဘၣ်စီၤလၤဘၣ်, “တၢ်ဆၢကတီၢ်ထီၣ်ဘးလံ. ပျဲယဖျီဃုာ်ယသးဒီးနဖိမုၣ်တက့ၢ်.”

လံာ်စီၤယိၤဘး 31:11

တၢ်ဒဲးဘးဒိၣ်ထဲအံၤန့ၣ်ကြၢးဘၣ်တၢ်စံၣ်ညီၣ်သံအီၤလီၤ.

လံာ်ယဃ့းစက့လး 16:38

ယကစံၣ်ညီၣ်ဃၣ်နၤလၢတၢ်မၤကမၣ်မုၣ်ကမၣ်ခွါဒီးတၢ်မၤသံတၢ် အဃိ, ဒီးလၢယတၢ်သးဒိၣ်ဒီးသးကဲၤထီၣ်အပူၤန့ၣ်, ယကစံၣ်ညီၣ်နၤလၢတၢ်သံန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 20:10

ဒီးပှၤလၢအအဲၣ်ဘၢအမါဒီးမံဃုာ်ဒီးပှၤလၢအဃၢၤအမါန့ၣ်, ကဘၣ်တၢ်မၤသံကွံာ်အီၤခံဂၤလိာ်လီၤ.

လံာ်မးသဲ 1:20

ဘၣ်ဆၣ်ဒီး ဖဲအဝဲဆိကမိၣ်တၢ်ဂ့ၢ်အံၤအဖၢမုၢ်န့ၣ်, ယွၤအကလူးတဂၤလီၣ်ဖျါထီၣ်အသးလၢတၢ်မံမီၢ်အပူၤဒီးစံးဘၣ် အီၤ, “စီၤဒၤဝံးအဖိခွါစီၤယိၤသးဧၢ, တဘၣ်ပျံၤလၢနကဟံးန့ၢ်နီၢ်မၤရံဒ်နမါအသိးတဂ့ၤ. အဂ့ၢ်ဒ်အံၤအဝဲဒၢထီၣ်ဒၣ်လၢသးစီဆှံအစိကမီၤလီၤ.

လံာ်မးသဲ 1:24

တုၤစီၤယိၤသးမံပၢၢ်ထီၣ်ဒီး မၤဝဲဒ်ကစၢ်အကလူးစံးဘၣ်တ့ၢ်အီၤ အသိး, ဒီးဟံးန့ၢ်နီၢ်မၤရံဒ်အမါအသိးလီၤ.

1 ကရံၣ်သူး 5:2

မ့မ့ၢ်ဒ်န့ၣ်ဒီး, သုပာ်ထီၣ်ထီသုသးကသ့ဝဲလၢကျဲဒ်လဲၣ်. အခိၣ်တလိာ်, သုကြၢးအိၣ်ပှဲၤဒီးတၢ်သူၣ်အုးသးအုး, ဒီးပှၤပိာ်ခွါလၢအမၤတၢ်ဒ်န့ၣ်အသိးတဂၤကြၢးဘၣ်တၢ်ဟီထီၣ် ကွံာ်အီၤလၢသုသိးသုကျါန့ၣ်လီၤ.

လံာ်သိၣ်လီၤသီလီၤတၢ် 13:5

မ့မ့ၢ်မၤသံကွံာ်ပှၤဖးတၢ်မံမီၢ်တဖၣ်အခီပညီတဂၤလၢ်လၢ်မ့ တမ့ၢ်ဝံတဂၤလၢအတဲဘၣ်သုလၢသုကပူထီၣ်ထီဒါယွၤ, လၢအမၤပူၤဖျဲးသုလၢကီၢ်အဲၤကူပတူးအပူၤတၢ်လီၢ်ဖဲသုမ့ၢ်တ့ၢ်ကုၢ်တဖၣ်န့ၣ်တက့ၢ်. ပှၤဒ်အံၤတဂၤန့ၣ်အၢဝဲသီဝဲဒီးကျဲးစၢးဆှၢကွံာ်သုလၢတၢ် အိၣ်မူလၢယွၤမၤလိာ်တ့ၢ်သုလၢသုကအိၣ်မူအီၤန့ၣ်လီၤ. အဝဲကြၢးဘၣ်တၢ်မၤသံအီၤဒ်သိးသုကမၤပူၤဖျဲးသုသးလၢတၢ် အၢတၢ်သီအံၤန့ၣ်လီၤ.

လံာ်သိၣ်လီၤသီလီၤတၢ် 17:7

ပှၤအုၣ်အသးတဖၣ်ကဘၣ်တၢ်ကွံာ်ဆိအီၤလၢလၢၢ်တဖၣ်ဝံၤဒီးပှၤဂီၢ်မုၢ် အဂၤလၢအအိၣ်လီၤတဲာ်တဖၣ်ကကွံာ်အီၤလၢလၢၢ်န့ၣ်လီၤ. လၢကျဲအံၤန့ၣ်, သုကမၤပူၤဖျဲးသုသးဒီးတၢ်အၢတၢ်သီ တမံၤအံၤန့ၣ်လီၤ.

လံာ်သိၣ်လီၤသီလီၤတၢ် 21:14

လၢခံ, သုမ့ၢ်တအဲၣ်ဒိးလၢၤအီၤဘၣ်န့ၣ်, သုကဘၣ်ပျဲ အဝဲဟးထီၣ်သဘျ့ကွံာ်န့ၣ်လီၤ. မ့ၢ်လၢသုမၤဆူၣ်အီၤလၢကမံဃုာ်ဒီးသုဝံၤလံအဃိ, သုပာ်အီၤဒ်ကုၢ်တဂၤအသိးဒီးဆါကွံာ်အီၤတသ့လၢၤဘၣ်.

လံာ်သိၣ်လီၤသီလီၤတၢ် 22:23

ပစံးဒၣ်ကလိာ်, ပှၤပိာ်ခွါတဂၤဘၣ်တၢ်ဖီၣ်န့ၢ်အီၤလၢဝ့ၢ်တဖျၢၣ်အပူၤ, လၢအမံဃုာ်အိၣ်ဃုာ်ဒီးပှၤပိာ်မုၣ်ဖိတဂၤလၢအမၤတ့ၢ်တၢ်တ့တၢ် ဖျီအတၢ်အၢၣ်လီၤဆူပှၤအဂၤတဂၤအဃိန့ၣ်လီၤ.

လံာ်သိၣ်လီၤသီလီၤတၢ် 22:25

ပစံးဒၣ်ကလိာ်ပှၤပိာ်ခွါတဂၤကမၤဆူၣ်မၤစိးပိာ်မုၣ်ဖိတဂၤလၢ အမၤတ့ၢ်တၢ်တ့တၢ်ဖျီအတၢ်အၢၣ်လီၤဆူပှၤအဂၤတဂၤဝံၤလံ, လၢအဝ့ၢ်အချၢန့ၣ်လီၤ. အန့ၣ်တစု, ထဲပိာ်ခွါတဂၤဧိၤကဘၣ်တၢ်မၤသံကွံာ်အီၤလီၤ.