လံာ်သိၣ်လီၤသီလီၤတၢ် 17:17 - Sgaw Karen Common Bible

¹⁷ စီၤပၤန့ၣ်တဘၣ်အိၣ်ဒီးအမါတဖၣ်အါဂၤဘၣ်, မ့ၢ်လၢတၢ်အံၤကဒုးဃၣ်ကွံာ်အီၤလၢယွၤအအိၣ်ဒီးအဝဲတဘၣ်မၤ ထူးထီၣ်တီၤထီၣ်အသးလၢစ့ဒီးထူန့ၣ်ဘၣ်.

လံာ်သိၣ်လီၤသီလီၤတၢ် 17:17 Iomraidhean Croise

လံာ်တၢ်ကဲထီၣ်အခီၣ်ထံး 2:24

လၢတၢ်န့ၣ်အဃိပိာ်ခွါကဟးသဒၣ်အမိၢ်အပၢ်ဒီးပာ်ဖှိၣ်အသးဒီးအမါ, ဒီးကဲထီၣ်ပှၤတဂၤဃီန့ၣ်လီၤ.

လံာ်စီၤၡမူၤအ့လးခံဘ့ၣ်တဘ့ၣ် 12:11

ယဆိၣ်တၢ်ဒီးနၤလၢယကဒုးအိၣ်ထီၣ်ပှၤတဂၤဂၤလၢနဟံၣ်ဖိဃီဖိအကျါ လၢကဟဲစိာ်တၢ်ကီတၢ်ခဲလၢနလိၤန့ၣ်လီၤ. နကထံၣ်ဘၣ်တၢ်န့ၣ်ဖဲယဟံးန့ၢ်ကွံာ်နမါတဖၣ်လၢနအိၣ် ဒီးဟ့ၣ်လီၤကွံာ်အဝဲသ့ၣ်ဆူပှၤအဂၤတဂၤအအိၣ်အခါ, ဒီးအဝဲကမံဃုာ်ဂဲၤဃုာ်ဒီးပိာ်မုၣ်တဖၣ်န့ၣ်လၢကမျၢၢ်အမဲာ်ညါ ဖဲမုၢ်ဆါအကတီၢ်န့ၣ်လီၤ.

လံာ်စီၤၡမူၤအ့လးခံဘ့ၣ်တဘ့ၣ် 5:13

တုၤအသုးအလီၢ်လၢဝ့ၢ်ဃ့ဘြိၣ်ဆူဝ့ၢ်ယရူၤၡလ့ၣ်ဝံၤအလီၢ်ခံန့ၣ်, စီၤဒၤဝံးဟံးန့ၢ်အါထီၣ်အသံမါတဖၣ်ဒီးအမါတဖၣ်ဒီးအိၣ်အါထီၣ်ဒီး အဖိခွါတဖၣ်ဒီးအဖိမုၣ်တဖၣ်န့ၣ်လီၤ.

လံာ်စီၤပၤအခီၣ်ထံးတဘ့ၣ် 10:21

ကယဲၢ်စီၤၡလိၤမိၤအလီခီအီတၢ်တဖၣ်န့ၣ်ဘၣ်တၢ်ပိာ်အီၤလၢထူ, ဒီးကယဲၢ်တၢ်ပီးတၢ်လီတဖၣ်လၢအအိၣ်ဝဲလၢလဘၤနိၣ်အပှၢ်လၢ်ကျါ အဒၢးဖးဒိၣ်အပူၤန့ၣ်မ့ၢ်ထူစီခဲလၢာ်န့ၣ်လီၤ. စ့တဘၣ်တၢ်သူအီၤနီတစဲးမ့ၢ်လၢ, စီၤၡလိၤမိၤအမုၢ်နံၤန့ၣ်, စ့တဘၣ်တၢ်ပာ်လုၢ်ပာ်ပှ့ၤအီၤဘၣ်အဃိန့ၣ်လီၤ.

လံာ်စီၤပၤအခီၣ်ထံးတဘ့ၣ် 10:27

ဖဲအဝဲပၢတၢ်အစိၤန့ၣ်, လၢဝ့ၢ်ယရူၤၡလ့ၣ်အပူၤစ့ဘၣ်တၢ်ပာ်အီၤ ဒ်သိးဒၣ်ဒီးလၢၢ်ဧိၤလ့ဧိၤ, ဒီးလၢကီၢ်ယူဒၤအကစၢၢ်ခီၣ်ထံးတဖၣ်န့ၣ်သ့ၣ်ဆှိအ့ရ့းအိၣ်ဝဲ အါအါဂီၢ်ဂီၢ်ဒ်သိးဒၣ်သ့ၣ်သိးဝံာ်ဒၢမုၢ်ဆ့ၣ်မုၢ်ဂီၤန့ၣ်လီၤ.

လံာ်ကွဲးနီၣ်တၢ်အခီၣ်ထံးတဘ့ၣ် 14:3

ဖဲန့ၣ်, လၢဝ့ၢ်ယရူၤၡလ့ၣ်အပူၤန့ၣ်စီၤဒၤဝံးဟံးန့ၢ်အါထီၣ် အမါတဖၣ်ဒီးမၤန့ၢ်အါထီၣ်အဖိခွါတဖၣ်ဒီးဖိမုၣ်တဖၣ်န့ၣ် လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 1:15

ဖဲအဝဲပၢတၢ်အကတီၢ်န့ၣ်, စ့ဒီးထူတဖၣ်ကဲထီၣ်တၢ်လၢတမ့ၢ်တၢ် လီၤဆီလၢၤဘၣ်ဒ်ဒၣ်လၢၢ်တဖၣ်လၢဝ့ၢ်ယရူၤၡလ့ၣ်အပူၤအသိး, ဒီးသ့ၣ်ဆှိအ့ရ့းတဖၣ်အိၣ်ဝဲအါအါကလဲာ်ဒ်ဒၣ်သိးဝံၣ်ဒၢမုၢ် ဆ့ၣ်မုၢ်ဂီၤလၢအအိၣ်လၢယူဒၤအကစၢၢ်ကလိတဖၣ်အခီၣ်ထံး အသိးန့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 11:21

စီၤရဃၤဘၣ်အိၣ်ဒီးအမါခဲလၢာ်တဆံဃိးဂၤ, ဒီးအသံၣ်မါဃုဆံဂၤန့ၣ်လီၤ. အဖိခွါအိၣ်ဝဲခံဆံဃိးဂၤ ဒီးအဖိမုၣ်အိၣ်ဝဲအဂၤဃုဆံန့ၣ်လီၤ. လၢအမါဒီးအသံၣ်မါတဖၣ်ခဲလၢာ်အကျါန့ၣ်အဲၣ်အမါနီၢ်မၤကၤ အဒိၣ်ကတၢၢ်လီၤ.

လံာ်စီၤနဃ့မယၤ 13:26

ယစံးဘၣ်အဝဲသ့ၣ်ဒ်အံၤ, “စီၤပၤၡလိၤမိၤမၤတၢ်ဒဲးဘးန့ၣ် မ့ၢ်လၢပှၤတခီဘီမုၢ်ဖိပိာ်မုၣ်တဖၣ်အဃိန့ၣ်လီၤ. အဝဲမ့ၢ်တ့ၢ်ပှၤတဂၤလၢအဒိၣ်န့ၢ်ကယဲၢ်ထံဧိၤကီၢ်ဧိၤအစီၤပၤ အဂၤတဖၣ်တက့ၢ်န့ၣ်လီၤ. ကစၢ်ယွၤအဲၣ်အီၤဒီးဒုးကဲထီၣ်အီၤစီၤပၤလၢကီၢ်အံၣ်စရ့လး ဒီဘ့ၣ်အဖီခိၣ်ဘၣ်ဆၣ်အဝဲလီၤတဲာ်ဆူတၢ်ဒဲးဘးအံၤအပူၤန့ၣ်လီၤ.

စံးထီၣ်ပတြၢၤ 62:10

သန့ၤသုသးလၢတၢ်မၤအၢတၢ်တဂ့ၤ. မုၢ်လၢ်ဒိးန့ၢ်တၢ်တမံၤမံၤလၢတၢ်မၤန့ၢ်ဆူၣ်ပှၤဂၤ အတၢ်န့ၣ်တဂ့ၤ. သုတၢ်စုလီၢ်ခီၣ်ခိၣ်န့ၣ်မ့ၢ်အါထီၣ်ဒၣ်လဲာ် ပာ်သုသးလၢအီၤန့ၣ်တဂ့ၤ.

တၢ်ကတိၤဒိ. 31:3

မၤလၢာ်နဂံၢ်နဘါခဲလၢာ်လၢတၢ်မုာ်ဖံးမုာ်ညၣ်ဒီးနကျိၣ်နစ့ခဲ လၢာ်လၢပိာ်မုၣ်တဖၣ်အဃိတဂ့ၤ. အဝဲသ့ၣ်တဖၣ်မၤဟးဂီၤတ့ၢ် စီၤပၤတဖၣ်ဒၣ်လဲာ်လီၤ.

လံာ်မၤလကံ 2:15

မ့ၢ်ကစၢ်ယွၤတဒုးကဲထီၣ်ဘၣ်သုဒီးသုမါလၢနီၢ်တဂၤ ဃီဒီးသးတဖျၢၣ်ဃီန့ၣ်ဘၣ်ဧါ. အဝဲအတၢ်ကွၢ်စိလၢတၢ်အံၤန့ၣ်မ့ၢ်မနုၤလဲၣ်. တၢ်န့ၣ်မ့ၢ်ဒၣ်ဒ်သိးသုကအိၣ်ဒီး သုဖိတဖၣ်လၢအမ့ၢ်ကစၢ်ယွၤအပှၤဂီၢ်မုၢ်အမ့ၢ်အတီန့ၣ်လီၤ. လၢတၢ်န့ၣ်အဃိ, ပလီၢ်သုသးဒ်သိးသုသုတမၤဟးဂီၤသုတၢ် အၢၣ်လီၤဒီးသုမါနီတဂၤတဂ့ၤန့ၣ်တက့ၢ်.

လံာ်မးသဲ 13:22

တၢ်ချံလၢအဘၣ်တၢ်ဖှံလီၤအီၤလၢတၤဆှုၣ်တၤမဲအကျါတဖၣ်, မ့ၢ်ပှၤလၢအနၢ်ဟူတၢ်ကစီၣ်, ဘၣ်ဆၣ်တၢ်ဘၣ်ယိၣ်ဘၣ်ဘီဘၣ်ဃးဒီးဟီၣ်ခိၣ် ဒီးတၢ်အဲၣ်တၢ်ထူးတၢ်တီၤတဖၣ်ခဲဘၢကွံာ်တၢ်ကစီၣ်သတးဒီး တသၣ်ထီၣ်ဘၣ်ဝဲဘၣ်.

လံာ်မးသဲ 19:5

ဒီးကစၢ်ယွၤစံးဝဲ, ‘လၢတၢ်န့ၣ်အဃိ, ပိာ်ခွါကဟးသဒၣ်ကွံာ်အမိၢ်ဒီးအပၢ်, ဒီးကဘျုးအသးဒီးအမါ, ဒီးတၢ်လၢပှၤခံဂၤန့ၣ်ကကဲထီၣ်တၢ်တသွံၣ်ဃီတညၣ်ဃီလီၤ’ (ကဲထီၣ်. ၂:၂၄).

လံာ်လူၤကၣ် 12:15

ဒီးအဝဲဒၣ်ကတိၤတၢ်ဒီးစံးဘၣ်အဝဲသ့ၣ်ကိးဂၤဒဲး, “ပလီၢ်သူၣ်ပလီၢ်သး, ဒီးဟးဆှဲးတၢ်သးကွံကိးကလုာ်ဒဲးတက့ၢ်. အဂ့ၢ်ဒ်အံၤ, ပှၤကညီတဂၤမ့ၢ်ထူးဝဲတီၤဝဲဆံးအါဆံးအါသနာ်က့ အဝဲအတၢ်အိၣ်မူနီၢ်နီၢ်န့ၣ်, တဘၣ်ဃးဘၣ်ဒီးတၢ်လၢအအိၣ်ဒီးအီၤသ့ၣ်တဖၣ်န့ၣ်ဘၣ်.”

၁ တံၤမသ့း 6:17

မၤလိာ်ပှၤအထူးအတီၤတဖၣ်လၢဟီၣ်ခိၣ်ချၢအံၤလၢအသုတပာ် ကဖၢလၢအသးတဂ့ၤ. မ့မ့ၢ်ကပာ်အတၢ်မုၢ်လၢ်, တမ့ၢ်လၢတၢ်ထူးတၢ်တီၤလၢအတဂၢၢ်တကျၢၤတဖၣ်အပူၤ ဘၣ်. မ့မ့ၢ်, ကမ့ၢ်ဒၣ်ဝဲလၢကစၢ်ယွၤလၢအဟ့ၣ်ပှၤတၢ်ခဲလၢာ် ထူးထူးတီၤတီၤလၢပတၢ်မုာ်လၤသးခုအဂီၢ်, တဂၤအပူၤန့ၣ် တက့ၢ်.

၁ တံၤမသ့း 6:9

ဘၣ်ဆၣ်ဒီး, ပှၤလၢအသးအိၣ်ထူးထီၣ်တီၤထီၣ်တဖၣ်န့ၣ်, လီၤတဲာ်နုာ်လံဆူတၢ်လ့ပစီအပူၤဒီးဘၣ်တၢ်ဖီၣ်ဃာ်အီၤလၢ ပျံၤသကွီၤလၢအမ့ၢ်တၢ်သူၣ်လီသးကွံလၢအတဂိာ်တသီၣ် ဒီးမၤဘၣ်ဒိဘၣ်ထံးတၢ်တဖၣ်, လၢအထုးလီၤကွံာ်အဝဲသ့ၣ်ဆူတၢ်ဟးဂူာ်ဟးဂီၤဒီးတၢ်လီၤပှီၢ် န့ၣ်လီၤ.