လံာ်ဧၤမိၣ် 1:11 - Sgaw Karen Common Bible

¹¹ ဒီးယွၤစံးဝဲဒၣ်, “ပှၤကီၢ်အဒိၣ်ဖိတဖၣ်မၤတ့ၢ်လံတၢ်ဒဲးဘး တဘျီဝံၤတဘျီလံ. ဒီးလၢတၢ်အံၤအဃိယကစံၣ်ညီၣ်အီၤ သပှၢ်ကတၢၢ်န့ၣ်လီၤ. အဝဲသ့ၣ်လူၤမၤဟး ဂီၤအဒီပုၢ်ဝဲၢ်ပှၤအံၣ်စရ့လးဖိတဖၣ်လၢဃဲာ်ဧိၤနးဧိၤ, ဒီးတပာ်ဖျါထီၣ်အတၢ်သးကညီၤအဝဲသ့ၣ်ဘၣ်. အတၢ်သးထီၣ်အကတၢၢ်တအိၣ်ဘၣ်ဒီးတပျဲအလီၤပံာ်ကွံာ်ဘၣ်.

လံာ်ဧၤမိၣ် 1:11 Iomraidhean Croise

လံာ်ကွဲးနီၣ်တၢ်ခံဘ့ၣ်တဘ့ၣ် 20:10

ခဲကနံၣ်အံၤပှၤဂီၢ်မုၢ်လၢကီၢ်ဧၣ်မိၣ်, ကီၢ်မိၤအးဒီးကီၢ်အဒိၣ်တဖၣ်ဟဲထီၣ်ဒုးပှၤလံ. ဖဲပမိၢ်ပၢ်ဖံဖုလၢပျၢၤတဖၣ်ဟးထီၣ်လၢကီၢ်အဲၤကူပတူးအပူၤ န့ၣ်, နတပျဲအဝဲသ့ၣ်လဲၤနုာ်ဆူထံကီၢ်သ့ၣ်တဖၣ်န့ၣ်အပူၤဘၣ်. လၢတၢ်န့ၣ်, အဃိပမိၢ်ပၢ်ဖံဖုလၢပျၢၤတဖၣ်လဲၤပူၤကွံာ်လၢ အဝဲသ့ၣ်အကီၢ်အဃၢၤဒီးတမၤဟးဂီၤကွံာ်ဘၣ်အဝဲသ့ၣ်ဘၣ်.

လံာ်ကွဲးနီၣ်တၢ်ခံဘ့ၣ်တဘ့ၣ် 20:11

အအံၤမ့ၢ်တၢ်လၢအဝဲသ့ၣ်မၤဆၢက့ၤပှၤန့ၣ်လီၤ. အဝဲသ့ၣ်ဟဲထီၣ်ဒ်သိးကဟီထီၣ်ကွံာ်ပှၤလၢထံကီၢ်လၢနဟ့ၣ်ပှၤ အပူၤန့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 28:17

မ့ၢ်လၢပှၤအဒိၣ်ဖိတဖၣ်ဟဲနုာ်လီၤဒုးဆူၣ်ကဒီးကီၢ်ယူဒၤဒီး ဖီၣ်န့ၢ်ပှၤဘၣ်စၢဃာ်အါဂၤအဃိန့ၣ်လီၤ.

စံးထီၣ်ပတြၢၤ 137:7

ယွၤဧၢ, သ့ၣ်နီၣ်ထီၣ်က့ၤတၢ်လၢပှၤအဒိၣ်ဖိတဖၣ် မၤတ့ၢ်အီၤဖဲ ဝ့ၢ်ယရူၤရှလ့ၣ်ဘၣ် တၢ်မၤနၢၤအီၤအနံၤန့ၣ်တက့ၢ်. သ့ၣ်နီၣ်ထီၣ်အဝဲသ့ၣ်စံးဝဲခဲအံၤခဲအံၤ မၤဟးဂီၤအီၤတုၤလၢ အခီၣ်ထံး” န့ၣ်တက့ၢ်.

စံးထီၣ်ပတြၢၤ 85:5

မ့ၢ်နကသးထီၣ်ပှၤလီၤထူလီၤယိာ်ဧါ. မ့ၢ်နကမၤယံာ်ထီၣ်နတၢ်သးထီၣ်ဆူ ကယဲၢ်စိၤခဲလၢာ်န့ၣ်ဧါ.

လံာ်ပှၤစံၣ်တဲၤတဲလီၤတၢ် 7:9

ပၢၤဃာ်နတၢ်သူၣ်ဒိၣ်သးထီၣ်တက့ၢ်. တၢ်စၢဃးပှၤဂၤအတၢ်ကမၣ်နၣ်မ့ၢ်တၢ်မၢးလီၤ.

လံာ်ယၡါယၤ 57:16

ယဟ့ၣ်တ့ၢ်ယပှၤဂီၢ်မုၢ်လၢတၢ်မူ, ဒီးယတပာ်တၢ်ကမၣ် လၢအဝဲသ့ၣ်အလိၤဒီးသူၣ်ဒိၣ်သးဖျိးအဝဲသ့ၣ်လီၤစိၤလီၤ ထီလၢၤဘၣ်.

လံာ်ဟိၤၡ့ 8:3

အဝဲသ့ၣ်စူးကွံာ်ညိကွံာ်တၢ်လၢအဂ့ၤလီၤ. လၢတၢ်အံၤအဃိ, အဒုၣ်အဒါတဖၣ်ကလူၤသဖှိအဝဲသ့ၣ်န့ၣ်လီၤ.

လံာ်ယိၤအ့လး 3:19

ကီၢ်အဲၤကူပတူးကကဲထီၣ်တၢ်ဃ့ထီအလီၢ်တတီၤ, ဒီးကီၢ်အဒိၣ်ကကဲထီၣ်တၢ်ဟးဂီၤအလီၢ်တပူၤန့ၣ်လီၤ. အဂ့ၢ်ဒ်အံၤ, အဝဲသ့ၣ်ထီဒါကီၢ်ယူဒၤဒီးမၤသံ အပှၤဂီၢ်မုၢ်လၢအတၢ်ဒဲးဘးတအိၣ်ဘၣ်န့ၣ်လီၤ.

လံာ်မံကၤ 7:18

ယွၤဧၢ, ကစၢ်လၢအဒ်သိးဒီးနၤတအိၣ်ဘၣ်နီတဂၤဘၣ်. နပျၢ်ကွံာ်နပှၤဂီၢ်မုၢ်လၢအအိၣ်မူတ့ၢ်တဖၣ်အတၢ်ဒဲးဘးတဖၣ်လီၤ. နသးတဒိၣ်တထံၣ်ဃီဘၣ်. မ့မ့ၢ်နသးမုာ်လၢတၢ်ဒုးနဲၣ်ပှၤနတၢ်အဲၣ်တပယူာ်ဃီန့ၣ်လီၤ.

လံာ်စကၤရယၤ 1:15

ဒီးယသးထီၣ်ဘၣ်ပှၤကလုာ်တဖၣ်လၢအမုာ်လၤသးခု ဘၣ်လၢတၢ်အိၣ်ဘှ့ၣ်အိၣ်ဘှီၣ်ဒီးတၢ်ဃူတၢ်ဖိးအပူၤဒိၣ်မး လီၤ. အဂ့ၢ်ဒ်အံၤ, ဖဲယဟံးဃာ်ဒံးယတၢ်သးဒိၣ်ထီၣ်ထီဒါယပှၤဂီၢ်မုၢ် အခါ, ပှၤကလုာ်တဖၣ်ဒုးတူၢ်ဘၣ်ခီၣ်ဘၣ်အၢထီၣ်ယပှၤဂီၢ်မုၢ်အတၢ်လီၤ.

လံာ်မၤလကံ 1:2

ဒီးယွၤစံးဘၣ်အပှၤဂီၢ်မုၢ်, “ယအဲၣ်သုထီဘိလီၤ.” ဘၣ်ဆၣ်ဒီးအဝဲသ့ၣ်စံးဆၢဝဲ, “နဒုးနဲၣ်နတၢ်အဲၣ်ပှၤဒ်လဲၣ်.” ယွၤစံးဆၢဝဲ, “စီၤဧ့ၡီၤဒီးစီၤယၤကိာ်မ့ၢ်ပှၤဒီပုၢ်ဝဲၢ်, ဘၣ်ဆၣ်ယအဲၣ်စီၤယၤကိာ်ဒီးအစၢၤအသွဲၣ်တဖၣ်လီၤ.

လံာ်မၤလကံ 1:4

စီၤဧ့ၡီၤအစၢၤအသွဲၣ်လၢအမ့ၢ်ပှၤအဒိၣ်ဖိမ့ၢ်စံးဝဲ, “ပခူပဝ့ၢ်တဖၣ်ဘၣ်တၢ်မၤဟးဂီၤအီၤဘၣ်ဆၣ် ပကဘှီထီၣ်ကဒါက့ၤအီၤလီၤ.” ဒီး, ယွၤကစံးဆၢဝဲ, “မ်အဝဲသ့ၣ်ဘှီထီၣ်ကဒါက့ၤတက့ၢ်. ဒီးယကမၤလီၤပှီၢ်ကွံာ်ကဒီးတဘျီလီၤ. ဒီးပှၤကကိးအဝဲသ့ၣ်လၢ, ထံကီၢ်လၢအအၢအသီဒီးပှၤဂီၢ်မုၢ်လၢယွၤသးထီၣ်ဘၣ်အီၤလီၤ စိၤလီၤထီလီၤ.”

အ့းဖ့းစူး 5:1

ဒ်သုမ့ၢ်ကစၢ်ယွၤအဖိလၢအဘၣ်တၢ်အဲၣ်အီၤအသိးန့ၣ်, သုကဘၣ်ကျဲးစၢးအိၣ်မူလီၤဂာ်ဒီးအီၤလီၤ.

လံာ်သိၣ်လီၤသီလီၤတၢ် 23:7

သးဘၣ်အၢပှၤအဒိၣ်တဖၣ်တဂ့ၤ. အဝဲသ့ၣ်မ့ၢ်သုဘူးသုတံၢ်တဖၣ် န့ၣ်လီၤ. ဒီးသးဘၣ်အၢပှၤအဲၤကူပတူးဖိတဖၣ်န့ၣ်တဂ့ၤ, တဘျီန့ၣ်သုအိၣ်ဆိးတ့ၢ်လၢအဝဲသ့ၣ်အကီၢ်ပူၤန့ၣ်လီၤ.