မၤတၢ် 5:5 - Sgaw Karen Common Bible

⁵ တုၤစီၤအနၤနံနၢ်ဟူဘၣ်တၢ်အံၤဒီးတဘျီဃီလီၤဃံၤသံဝဲဒၣ်လီၤ. ဒီးပှၤခဲလၢာ်လၢအနၢ်ဟူဘၣ်တၢ်ဂ့ၢ်အံၤပျံၤတၢ်ဒိၣ်ဒိၣ်ကလဲာ်လီၤ.

မၤတၢ် 5:5 Iomraidhean Croise

လံာ်စီၤပၤခံဘ့ၣ်တဘ့ၣ် 2:24

စီၤအလံၤၡါဃၣ်တရံးအသးဒီးကွၢ်ဒီးဆိၣ်အၢအီၤလၢယွၤအမံၤ အပူၤန့ၣ်လီၤ. တုၤနုၤတစု, တၤသူမိၢ်ခံဒုဟဲထီၣ်လၢသ့ၣ်ပှၢ်အကျါဒီးအ့ၣ် ဖှီလီၤကလဲကွံာ်ဖိသၣ်ပိာ်ခွါလွံၢ်ဆံခံဂၤန့ၣ်လီၤ.

လံာ်ကွဲးနီၣ်တၢ်အခီၣ်ထံးတဘ့ၣ် 13:12

အန့ၣ်တစု, စီၤဒၤဝံးပျံၤဘၣ်ကစၢ်ယွၤဒီးစံးဝဲ, “ခဲကနံၣ်အံၤယက့ၤစိာ်တၢ်အၢၣ်လီၤအီလီၤအတလါဒီးယၤကသ့ဒ် လဲၣ်.”

လံာ်ကွဲးနီၣ်တၢ်အခီၣ်ထံးတဘ့ၣ် 15:13

အဂ့ၢ်ဒ်အံၤ, လၢအခီၣ်ထံးကတၢၢ်တဘျီန့ၣ်, သုတအိၣ်ဘၣ်ဖဲန့ၣ်လၢ သုကစိာ်အီၤအဃိ, ယွၤ, ပကစၢ်ယွၤစံၣ်ညီၣ်တ့ၢ်ပှၤ, လၢပတဘူၣ်ထီၣ်ဘါထီၣ်ဘၣ်အီၤဒ်ပကြၢးမၤတ့ၢ်အီၤအသိးဘၣ်အဃိ န့ၣ်လီၤ.”

စံးထီၣ်ပတြၢၤ 119:120

ယညၣ်ကနိးလၢတၢ်ပျံၤနၤအဃိ, ဒီးယပျံၤနတၢ်စံၣ်ညီၣ်တဖၣ်လီၤ.

စံးထီၣ်ပတြၢၤ 64:9

အန့ၣ်ဒီး ပှၤခဲလၢာ်ကပျံၤတၢ်လီၤ. အဝဲသ့ၣ်က ဆိကမိၣ်ဝဲတၢ်လၢယွၤမၤတ့ၢ်ဝဲဒီး တဲဖျါထီၣ်ကစၢ်ယွၤအတၢ်မၤတဖၣ်န့ၣ်လီၤ.

လံာ်ယံးရမံယၤ 5:14

ယွၤ, သ့တၢ်လၢာ်ကစၢ်ယွၤစံးဘၣ်တ့ၢ်ယၤ, “စီၤယံးရမံယၤဧၢ, မ့ၢ်လၢပှၤသ့ၣ်တဖၣ်အံၤစံးတ့ၢ်တၢ်ဒ်သိးအံၤအဃိ, ယတၢ်ကတိၤတဖၣ်လၢနကိာ်ပူၤန့ၣ်, ယကဒုးကဲထီၣ်အီၤဒ်မ့ၣ်အူအသိးန့ၣ်လီၤ. ပှၤဂီၢ်မုၢ်အံၤကမၤအသးဒ်သ့ၣ်မုၣ်အသိးဒီးမ့ၣ်အူကအီၣ်ကွံာ် အဝဲသ့ၣ်န့ၣ်လီၤ.”

လံာ်ယဃ့းစက့လး 11:13

ဖဲယကတိၤတၢ်လၢဝံအကျိာ်အဖၢမုၢ်န့ၣ်, စီၤပလၤတယၤလီၤဃံၤသံဝဲလီၤ. ယထိၣ်လီၤဃံၤအီထီလာ်ယသးလၢဟီၣ်ခိၣ်လိၤဒီးကိးသတြီထီၣ်, ယွၤပၢဘၣ်တၢ်ဘၣ်တ့ခဲလၢာ်ကစၢ်ဧၢ, တဘၣ်မၤဒ်န့ၣ်တဂ့ၤ. မ့ၢ်နမၤသံပှၤကိးဂၤဒဲးလၢအအိၣ်လီၤတဲာ်လၢကီၢ်အံၣ်စရ့လး အပူၤအံၤန့ၣ်ဧါ.

လံာ်တၢ်ဘူၣ်ထီၣ်ဘါထီၣ် 10:3

တုၤနုၤတစု, စီၤမိၤၡ့စံးဘၣ်စီၤအၤဟရိၣ်, “အအံၤမ့ၢ်တၢ်လၢယွၤကတိၤတၢ်ဒီးစံး, ကယဲၢ်ပှၤခဲလၢာ်လၢအမၤယတၢ်မၤန့ၣ်ကဘၣ်ယူးယီၣ်ပာ်ကဲယတၢ်စီတၢ်ဆှံလီၤ. ဒီးယကလီၣ်ဖျါထီၣ်ယလၤကပီၤဆူယပှၤဂီၢ်မုၢ်အအိၣ်လီၤ.” မ့မ့ၢ်စီၤအၤဟရိၣ်အိၣ်ဘှီၣ်ကလာ်ဝဲဒၣ်လီၤ.

မၤတၢ် 13:11

ခဲကနံၣ်အံၤကစၢ်အတၢ်စံၣ်ညီၣ်ကလီၤဘၣ်နၤ, နမဲာ်ကဘျီၣ်ဒီးတထံၣ်ဘၣ်မုၢ်ဆါခီအတၢ်ကပီၤလၢတစိၢ်တလီၢ် အတီၢ်ပူၤလီၤ.” တဘျီဃီဖဲန့ၣ်, အဝဲအမဲာ်ကွၢ်တၢ်ဖျါကဒုကယီၢ်ဝံၤခံးလီၤ ကွံာ်, ဒီးအဝဲဒၣ်ဟးဝ့ၤဝီၤကလၢၢ်တၢ်ဒ်သိးအကထံၣ်န့ၢ်ပှၤလၢ အကဟံးဃာ်အစုဒီးဆှၢအီၤန့ၣ်လီၤ.

မၤတၢ် 2:43

တၢ်လီၤလးဒီးတၢ်ပနီၣ်လီၤလးအါမံၤမၤအသးခီဖျိပှၤတၢ်မၢဖိတဖၣ်, ဒီးတၢ်ပျံၤတၢ်ဖုးလီၤဘၣ်ပှၤကိးဂၤဒဲးန့ၣ်လီၤ.

မၤတၢ် 5:13

ပှၤလၢအတမ့ၢ်ပှၤစူၢ်က့ၤနာ်က့ၤတၢ်တဖၣ်န့ၣ်, ဟဲပာ်ဖှိၣ်ထီၣ်အသးဒီးအဝဲသ့ၣ်တဘူၣ်သနာ်က့, ပတြၢၤဘၣ်အဝဲသ့ၣ်ဒိၣ်မးလီၤ.

1 ကရံၣ်သူး 4:21

သုအဲၣ်ဒိးဖဲလဲၣ်တမံၤလဲၣ်. မ့ၢ်ယကဘၣ်ဟဲဆူသုအိၣ်လၢနီၣ်ဖျ့ တဘိဧါ. မ့တမ့ၢ်ဘၣ်ဒီးလၢသးအိၣ်ဒီးတၢ်အဲၣ်တၢ်ကွံဒီး တၢ်သူၣ်ဂ့ၤသးဝါတခီလဲၣ်.

၂ ကရံၣ်သူး 13:10

လၢတၢ်န့ၣ်အဃိယကွဲးတၢ်အဝဲအံၤဖဲယအိၣ်လီၤဖးဒီး သုလီၤ. အဝဲအံၤန့ၣ်မ့ၢ်ဒ်သိးဖဲယဟဲတုၤန့ၣ်, အလီၢ်သုတအိၣ်လၢယကမၤသုဆူၣ်ဆူၣ်လၢတၢ်သူ တၢ်စိတၢ်ကမီၤလၢကစၢ်ယွၤဟ့ၣ်တ့ၢ်ယၤ (တၢ်စိတၢ်ကမီၤလၢတၢ်ကမၤထီၣ်မၤထီသု အဂီၢ်, တမ့ၢ်တၢ်ကမၤဟးဂီၤသုအဂီၢ်ဘၣ်) အပူၤ တဂ့ၤအဂီၢ်န့ၣ်လီၤ.

၂ ကရံၣ်သူး 13:2

ယသးအိၣ်စံးဘၣ်သုဝဲလၢအမၤတ့ၢ်တၢ်ဒဲးဘးလၢအပူၤကွံာ် တဖၣ်ဒီးပှၤအဂၤကိးဂၤဒဲး, ယစံးတ့ၢ်လံယဲလၢအပူၤကွံာ်ဖဲယတၢ်အိၣ်သကိးသုခံဘျီ တဘျီ, ဘၣ်ဆၣ်ယကစံးကဒီးယဲခဲကနံၣ်အံၤဖဲယအိၣ် စီၤစုၤယံၤဒီးသုအဖၢမုၢ်လီၤ. လၢခံတဘျီဖဲယဟဲန့ၣ်, ပှၤတပူၤဖျဲးလၢတၢ်စံၣ်ညီၣ်နီတဂၤဘၣ်.

၂ ကရံၣ်သူး 7:11

သုတၢ်သးအုးတမံၤအံၤကစၢ်ယွၤမၤအီၤဒ်လဲၣ်န့ၣ်ကွၢ် တက့ၢ်. ဒုးကဲထီၣ်မးသုလၢပှၤပာ်အသးသပှၢ်ပှၢ်ဒ်လဲၣ်. ဒီးအုၣ်အသးလၢသုတၢ်ကမၣ်တအိၣ်ဘၣ်ဒ်လဲၣ်န့ၣ်လီၤ. ဟ့ၣ်သုတၢ်သူၣ်ဒိၣ်သးဖျိးဒ်သိးအံၤ, တၢ်မၤပျံၤမၤဖုးတၢ်ဒ် သိးအံၤ, တၢ်ပာ်သူၣ်ပာ်သးဒ်သိးအံၤတဖၣ်, တၢ်ဘူၣ် ယွၤဘါယွၤလၢ တၢ်သူၣ်တီသးရၤအပူၤဒ်သိးအံၤ, တၢ်အိၣ် ကတဲာ်ကတီၤသးလၢ ကစံၣ်ညီၣ်တၢ်မၤကမၣ် တၢ်ဒ်သိးအံၤန့ၣ်လီၤ. လၢတၢ်ခဲလၢာ်ခဲဆ့အပူၤန့ၣ် သုပာ်ဖျါထီၣ်သုသးဒ်ပှၤလၢအတၢ်ကမၣ်တအိၣ် ဘၣ်လီၤ.

လံာ်သိၣ်လီၤသီလီၤတၢ် 13:11

အန့ၣ်တစု, ကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ်ကနၢ်ဟူတၢ် လၢအမၤတ့ၢ်အသးန့ၣ်လီၤ. အဝဲသ့ၣ်ကပျံၤတၢ်ဖုးတၢ်ဒီးပှၤတမၤကဒီးတၢ်အၢတၢ်သီဒ်န့ၣ်အသိး တမံၤလၢၤဘၣ်န့ၣ်လီၤ.

လံာ်သိၣ်လီၤသီလီၤတၢ် 21:21

ဝံၤဒီးဝ့ၢ်အပှၤကညီတဖၣ်ကဘၣ်ကွံာ်သံအီၤလၢလၢၢ်, ဒီးသုကပူၤဖျဲးလၢတၢ်အၢတၢ်သီအံၤန့ၣ်လီၤ. ပှၤကိးဂၤဒဲးလၢကီၢ်အံၣ်စရ့လးအပူၤကနၢ်ဟူဘၣ်တၢ်မၤတ့ၢ်အသး ဒီးပျံၤတၢ်န့ၣ်လီၤ.

လံာ်စီၤယိၤၡူ 22:20

သ့ၣ်နီၣ်ထီၣ်က့ၤစီၤစ့ရၤအဖိခွါစီၤဧၤကၣ်အတၢ်တဒိ ကနၣ်တၢ်မၤလိာ်ဘၣ်ဃးတၢ်သ့ၣ်တဖၣ်လၢတၢ်ကဘၣ်မၤဟးဂီၤအီၤခဲ လၢာ်အဂ့ၢ်န့ၣ်တက့ၢ်. အံၣ်စရ့လးခဲလၢာ်ဘၣ်တၢ်စံၣ်ညီၣ်အီၤ လၢတၢ်ဂ့ၢ်အဝဲန့ၣ်အဃိလီၤ. စီၤဧၤကၣ်တမ့ၢ်ပှၤထဲတဂၤဧိၤလၢ အသံလၢအတၢ်ဒဲးဘးအဃိန့ၣ်ဘၣ်.”

လံာ်လီၣ်ဖျါ 11:13

တကတီၢ်ဃီဖဲန့ၣ်ဟီၣ်ခိၣ်ဟူးဝးဝဲဒၣ်ဆူၣ်ဆူၣ်ကလဲာ်, ဝ့ၢ်အဆံဆဲၣ်ပူဘၣ်တၢ်မၤဟးဂီၤကွံာ်အီၤ, ဒီးပှၤအဂၤနွံကထိ သံကွံာ်ဝဲဒၣ်လီၤ. ပှၤအိၣ်လီၤတဲာ်တ့ၢ်တဖၣ်အသူၣ်ပျံၤသးဖုး ဒီးစံးထီၣ်ပတြၢၤကစၢ်ယွၤလၢမူခိၣ်တဂၤအတၢ်ဒိၣ်တၢ်မုၢ် န့ၣ်လီၤ.

လံာ်လီၣ်ဖျါ 11:5

ပှၤတဂၤဂၤမ့ၢ်ဂုာ်ကျဲးစၢးမၤဆါအဝဲသ့ၣ်န့ၣ်, မ့ၣ်အူဟဲဖျိးထီၣ်လၢအဝဲသ့ၣ်အကိာ်ပူၤ, ဒီးအီၣ်ကွံာ် အဒုၣ်အဒါတဖၣ်, ဒီးလၢကျဲဒ်အံၤအပူၤ, ပှၤတဂၤလၢ်လၢ်လၢအဂုာ်ကျဲးစၢးမၤဆါအဝဲသ့ၣ်န့ၣ်, ကဘၣ်တၢ်မၤသံကွံာ်အီၤလီၤ.