မၤတၢ် 23:1 - Sgaw Karen Common Bible

¹ စီၤပီလူးကွၢ်ဃီၤတၢ်လိၤလိၤဆူကီၣ်ကးကရၢဖိတဖၣ်အအိၣ်ဒီးစံးဝဲ, “ယဒီပုၢ်ဝဲၢ်သ့ၣ်ဧၢ, ယသးလၢအသ့ၣ်ညါဒၣ်တၢ်လၢအဂ့ၤဆှံဝဲဒၣ်လီၤတံၢ်လီၤဆဲး ဘၣ်ဃးဒီးယတၢ်အိၣ်မူဒီကတီၢ်ညါလၢကစၢ်ယွၤအမဲာ်ညါ, တုၤလီၤလၢမုၢ်မဆါတနံၤအံၤလီၤ.”

မၤတၢ် 23:1 Iomraidhean Croise

တၢ်ကတိၤဒိ. 28:1

ပှၤတတီတလိၤဃ့ၢ်ဝဲဖဲပှၤတလူၤအဝဲသ့ၣ်နီတဂၤဘၣ်အခါန့ၣ်လီၤ. မ့မ့ၢ်ပှၤတီပှၤလိၤတဂၤန့ၣ်ဒူဝဲဒ်ခ့ယုၢ်တဒုအသိးန့ၣ်လီၤ.

လံာ်မးသဲ 5:22

မ့မ့ၢ်ခဲအံၤယစံးဘၣ်သုလၢပှၤတဂၤလၢ်လၢ်လၢအသူၣ်ဒိၣ်သး ဖျိးအဒီပုၢ်ဝဲၢ်ပှၤစူၢ်က့ၤနာ်က့ၤတၢ်န့ၣ်, ကဘၣ်တၢ်ဆှၢထီၣ်အီၤလၢစံၣ်ညီၣ်ကွီၢ်အတၢ်သမံသမိးအဂီၢ်, ဒီးပှၤတဂၤလၢ်လၢ်လၢအကတိၤဒုၣ်ဒွဲၣ်အဒီပုၢ်ဝဲၢ်ပှၤစူၢ်က့ၤ နာ်က့ၤတၢ်န့ၣ်, ကဘၣ်တၢ်ဆှၢထီၣ်အီၤဆူပှၤယူဒၤဖိအပှၤဒိၣ်ပှၤပှၢ်တဖၣ်အကီၣ် ကးလီၤ. ပှၤတဂၤလၢ်လၢ်လၢအကိးအဒီပုၢ်ဝဲၢ်ပှၤစူၢ်က့ၤနာ်က့ၤတၢ်လၢ ပှၤဟးဂီၤဖိန့ၣ်, ဂ့ၤဘၣ်တၢ်ဆှၢအီၤဆူလရာ်မ့ၣ်အူအပူၤလီၤ.

မၤတၢ် 22:1

ဒီပုၢ်ဒီဝဲၢ်, ဒီးပၢ်သ့ၣ်ဧၢ, ဒိကနၣ်ယတၢ်ကတိၤဒီဒၣ်ယသးလၢသုမဲာ်ညါအံၤတက့ၢ်.

မၤတၢ် 22:30

ပှၤသုးဖိတကထိအခိၣ်တဂၤအံၤအဲၣ်ဒိးသ့ၣ်ညါလီၤတံၢ်တၢ် ကမၣ်လၢပှၤယူဒၤဖိတဖၣ်ပာ်လၢစီၤပီလူးအလိၤသတးဒီး, မုၢ်ဆ့ၣ်ထီၣ်တနံၤန့ၣ်အဝဲဒၣ်မၢပှၤဃ့ၣ်လီၤကွံာ်ပျံၤထး တဖၣ်လၢစီၤပီလူးအလိၤဒီးဟ့ၣ်လီၤအကလုၢ်လၢပှၤလုၢ်တၢ် အခိၣ်အဒိၣ်တဖၣ်ဒီးကီၣ်ကးဒီဖုကအိၣ်ဖှိၣ်လီၤ. အန့ၣ်ဝံၤဒီးအဝဲဒၣ်ကိးစီၤပီလူးဒီးဒုးဆၢထၢၣ်အီၤလၢ အဝဲသ့ၣ်အမဲာ်ညါလီၤ.

မၤတၢ် 22:5

ပှၤလုၢ်တၢ်အခိၣ်အဒိၣ်ကတၢၢ်ဒီးကီၣ်ကးဒီဖုညါန့ၣ်အုၣ် အသးသ့ဝဲလၢယကတိၤတၢ်မ့ၢ်တၢ်တီန့ၣ်လီၤ. ယဒိးန့ၢ်ဘၣ်အဝဲသ့ၣ်အတၢ်ပရၢလၢအကွဲးဝဲဆူပှၤ ယူဒၤဖိဒ်သိးဒီးအီၤလၢအအိၣ်ဖဲဝ့ၢ်ဒၤမ့ၤစ့းတဖၣ် အအိၣ်, သတးဒီးယလဲၤဖဲန့ၣ်ဒ်သိးယကဖီၣ်ပှၤပိာ် ယ့ၣ်ၡူးခရံာ်အကျဲတဖၣ်န့ၣ်, စၢဃာ်အီၤလၢပျံၤထးဒီးဟဲက့ၤကိးအီၤဆူဝ့ၢ်ယရူၤၡလ့ၣ် လၢတၢ်စံၣ်ညီၣ်အဂီၢ်န့ၣ်လီၤ.

မၤတၢ် 23:15

လၢတၢ်န့ၣ်အဃိခဲကနံၣ်အံၤ, သုဝဲဒီးကီၣ်ကးမၤလိာ်ရိမ့ၤသုးဖိတကထိအခိၣ်လၢအကဟဲ ဆှၢစီၤပီလူးဆူသုအိၣ်, ပာ်မၤသုသးလၢသုအဲၣ်ဒိးသ့ၣ်ညါလီၤတံၢ်ဂ့ၤထီၣ်အဝဲ အဂ့ၢ်အကျိၤန့ၣ်တက့ၢ်. မ့မ့ၢ်ပဝဲ, ပကအိၣ်ကတဲာ်ကတီၤ ပသးလၢပကမၤသံအီၤတချုးအဝဲဒၣ်ဟဲတုၤဖဲအံၤန့ၣ်လီၤ.”

မၤတၢ် 23:20

အဝဲဒၣ်စံးဆၢဝဲ, “ပှၤယူဒၤဖိအခိၣ်အနၢ်တဖၣ်အၢၣ်လီၤအီလီၤသကိးလိာ်အသး လၢခဲမုၢ်ဆ့ၣ်န့ၣ်, ကပာ်မၤအသးလၢကီၣ်ကးသးအိၣ်သ့ၣ်ညါလီၤတံၢ်တၢ်ဂ့ၢ် ဘၣ်ဃးဒီးစီၤပီလူးဒီးကမၢနလဲၤဆှၢအီၤဆူကီၣ်ကးအအိၣ်လီၤ.

မၤတၢ် 23:28

အဝဲသ့ၣ်ပာ်တၢ်ကမၣ်မနုၤတမံၤလၢအလိၤလဲၣ်န့ၣ်, ယသးအိၣ် သ့ၣ်ညါယဲအဃိ, ယဆှၢအီၤဆူအဝဲသ့ၣ်အကီၣ်ကးအအိၣ်လီၤ.

မၤတၢ် 23:6

ဖဲစီၤပီလူးထံၣ်လၢပှၤအိၣ်ဖဲန့ၣ်တနီၤမ့ၢ်ပှၤစးဒူၤကဲဒီး အဂၤတနီၤမ့ၢ်ပှၤဖၤရံၤၡဲန့ၣ်, အဝဲဒၣ်ကိးထီၣ်လၢကီၣ်ကး တၢ်အိၣ်ဖှိၣ်အပူၤ, “ယဒီပုၢ်ဝဲၢ်သ့ၣ်ဧၢ, ယမ့ၢ်ပှၤဖၤရံၤၡဲတဂၤ, ပှၤဖၤရံၤၡဲတဖၣ်အဖိခွါလီၤ. ယဘၣ်တၢ်သမံသမိးယၤဖဲအံၤမ့ၢ်လၢယမုၢ်လၢ်ပှၤသံကဘၣ် တၢ်ဒုးဂဲၤဆၢထၢၣ်သမူထီၣ်က့ၤအီၤအဃိလီၤ.”

မၤတၢ် 24:16

လၢတၢ်န့ၣ်အဃိယဂုာ်ကျဲးစၢးယဲဒၣ်အဂ့ၤကတၢၢ်ထီဘိဒ်သိး ယကအိၣ်ဒီးသးလၢအသ့ၣ်ညါဒၣ်တၢ်လၢအဂ့ၤအပူၤလၢကစၢ်ယွၤဒီး ပှၤကညီအမဲာ်ညါန့ၣ်လီၤ.

မၤတၢ် 6:15

ကယဲၢ်ပှၤဆ့ၣ်နီၤအိၣ်လၢကီၣ်ကးအလီၢ်န့ၣ်, ကွၢ်စူၣ်စီၤစတ့းဖၣ်ဒီးထံၣ်ဝဲလၢအဝဲဒၣ်အမဲာ်ဖျါလီၤဂာ်ဒ် မူခိၣ်ကလူးတဂၤအမဲာ်အသိးန့ၣ်လီၤ.

1 ကရံၣ်သူး 4:4

ယသးလၢအသ့ပဲာ်ဖးနီၤဖးတၢ်ဂ့ၤဒီးတၢ်အၢအဆၢဖျါဆှံကစီဒီလီၤ. ဘၣ်ဆၣ်ဒီးအဝဲန့ၣ်တမၤဖျါလၢယတၢ်ဒဲးဘးတအိၣ်စဲဃဲၤနီၢ်နီၢ် န့ၣ်ဘၣ်. ကစၢ်မ့ၢ်ပှၤလၢအစံၣ်ညီၣ်ထိၣ်ကွၢ်တဲာ်ကွၢ်ယၤလီၤ.

၂ ကရံၣ်သူး 1:12

ပပာ်ကဖၢလၢပသးမ့ၢ်လၢပသးလၢပသ့ၣ်ညါဒၣ်တၢ်, သးလၢအနီၤဖးတၢ်ဂ့ၤဒီးတၢ်အၢအဆၢဒုးနာ်နီၢ်နီၢ် ပှၤလၢပတၢ်အိၣ်မူလၢဟီၣ်ခိၣ်တဘ့ၣ်အံၤအချၢဒီးလီၤဆီ ဒၣ်တၢ်ပတၢ်ဘၣ်ထွဲဒီးသုတဖၣ်, ဘၣ်တၢ်ပၢဆှၢအီၤလၢကစၢ်ယွၤအတၢ်ဟ့ၣ်လၢအမ့ၢ် ဝဲတၢ်ကတိၤတၢ်လိၤလိၤပျီပျီဒီးတၢ်ပာ်သးသပှၢ်ပှၢ်, လၢတၢ်စိကမီၤဘၣ်ဃးယွၤအဘျုး, ဒီးတဘၣ်တၢ်ပၢဆှၢ အီၤလၢပှၤကညီအတၢ်ကူၣ်ဘၣ်ကူၣ်သ့ဘၣ်အဃိန့ၣ်လီၤ.

၂ ကရံၣ်သူး 4:2

ပညိကွံာ်တၢ်ဖံးတၢ်မၤခူသူၣ်ဒီးတၢ်ဖံးတၢ်မၤလၢအလီၤမဲာ် ဆှးတဖၣ်ခဲလၢာ်ခဲဆ့လီၤ. ပတမၤတၢ်လၢတၢ်ကဘျံးကဘျၣ် အပူၤဘၣ်. ပတဒုးနၢ်ပၢၢ်ကမၣ်ပှၤလၢကစၢ်ယွၤအကလုၢ် ကထါအဂ့ၢ်အကျိၤစ့ၢ်ကီးဘၣ်. လၢတၢ်မ့ၢ်တၢ်တီအတၢ်ကပီၤလၢလၢပှဲၤပှဲၤအပူၤန့ၣ်, ပအိၣ်မူလၢကစၢ်ယွၤအမဲာ်ညါ, ဒီးဂုာ်ကျဲးစၢးပာ်ဖျါပနီၢ်ကစၢ် ဒၣ်ဝဲအတၢ်အုၣ်အသးလၢအဂ့ၤဆူပှၤဂၤအသးလၢအသ့ၣ်ညါ ဒၣ်တၢ်အဂ့ၤအဝါအမဲာ်ညါန့ၣ်လီၤ.

၂ တံၤမသ့း 1:3

ယစံးဘျုးကစၢ်ယွၤလၢယမၤအတၢ်လၢသးလၢအသ့ၣ်ညါ ဒၣ်တၢ်အဂ့ၤတီတီအပူၤ, ဒ်ယမိၢ်ပၢ်ဖံဖုလၢပျၢၤတဖၣ်မၤတ့ၢ်ဝဲ အသိးန့ၣ်လီၤ. ယစံးဘျုးအီၤဖဲယသ့ၣ်နီၣ်ထီၣ်နၤထီဘိလၢ ယတၢ်ထုကဖၣ်အပူၤ, လၢမုၢ်ဆါဆဲးလၢမုၢ်နၤန့ၣ်လီၤ.

ဧ့ၤဘြံၤ 13:18

ဘါထုကဖၣ်တၢ်လၢပဂီၢ်တဘိယူၢ်ဃီတက့ၢ်. ပနာ်လၢပအိၣ်ဒီးသးလၢအသ့ၣ်ညါတၢ်လၢအတီ လၢအအဲၣ်ဒိးမၤတၢ်လၢအဂ့ၤအဘၣ်ဝဲကိးဆၢကိး ကတီၢ်လီၤ.

၁ ပ့းတရူး 3:16

ဘၣ်ဆၣ်ဒီး, မၤအီၤလၢတၢ်ကပုာ်လုးဒီးတၢ်ပာ်ကဲအပူၤ တက့ၢ်. ပၢၤဃာ်သုသးလၢအသ့ၣ်ညါဒၣ်တၢ်အဂ့ၤတက့ၢ်. ဒ်သိးပှၤမ့ၢ်ကတိၤတရီတပါသုဒၣ်လဲာ်, ပှၤလၢအကတိၤအၢသုသကဲာ်ပဝးအဂ့ၤဒ်ပှၤပိာ်ခရံာ်အခံ တဖၣ်အသိးအံၤ, ကမဲာ်ဆှးဝဲလၢအတၢ်ကတိၤတဖၣ်အဃိ န့ၣ်တက့ၢ်.