မၤတၢ် 20:6 - Sgaw Karen Common Bible

⁶ ဘူၣ်ကိၣ်တအိၣ်ဘၣ်ဒီးကိၣ်မံၣ်ဝံၤအလီၢ်ခံ, ပဒိးထီၣ်ကဘီဖဲဝ့ၢ်ဖံလံးပံၤဒီးဖဲယဲၢ်သီပူၤကွံာ်ဝံၤန့ၣ် ပထံၣ်လိာ်ပသးဒီးအဝဲသ့ၣ်ဖဲဝ့ၢ်တြိၤအါဒီးပအိၣ်ဖဲန့ၣ်တနွံလီၤ.

မၤတၢ် 20:6 Iomraidhean Croise

လံာ်တၢ်ဟးထီၣ်ကွံာ် 23:15

လၢလါအၤဘံာ်, လါလၢသုဟးထီၣ်ကွံာ်လၢကီၢ်အဲၤကူပတူးအပူၤ န့ၣ်မၤဘူၣ်ကိၣ်တအိၣ်ဘၣ်ဒီးကိၣ်မံၣ်အမူးဒ်ယမၤလိာ်တ့ၢ်သု အသိးန့ၣ်တက့ၢ်. ဖဲဘူၣ်အံၤအဆၢကတီၢ်နွံသီအတီၢ်ပူၤန့ၣ်သု တဘၣ်အီၣ်ကိၣ်လၢဘၣ်တၢ်မၤအီၤလၢကိၣ်မံၣ်န့ၣ်, နီတစဲးဘၣ်. သုမ့ၢ်တဟဲစိာ်တၢ်မၤဘူၣ်တမံၤဘၣ်ဒီးဟဲဘါထီၣ်ယၤနီတစုတဂ့ၤ.

လံာ်တၢ်ဟးထီၣ်ကွံာ် 34:18

တိၢ်န့ၣ်ဘူၣ်ကိၣ်တအိၣ်ဘၣ်ဒီးကိၣ်မံၣ်အမူးတက့ၢ်. ဒ်ယမၤလိာ်တ့ၢ်သုအသိးန့ၣ်အီၣ်ကိၣ်လၢတအိၣ်ဘၣ်ဒီးကိၣ်မံၣ်လၢ နွံသီအတီၢ်ပူၤဖဲလါအၤဘံာ်အပူၤန့ၣ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ်လါတလါလၢသုဟးထီၣ်လၢကီၢ်အဲၤကူပတူးအပူၤန့ၣ်လီၤ.

မၤတၢ် 12:3

ဖဲအဝဲဒၣ်ထံၣ်ဘၣ်လၢတၢ်မၤတမံၤအံၤဘၣ်သူၣ်ဘၣ်သးပှၤယူဒၤဖိ တဖၣ်န့ၣ်, အဝဲဟ့ၣ်လီၤကဒီးအကလုၢ်လၢပှၤကဖီၣ်ဃာ်စီၤပ့းတရူး စ့ၢ်ကီးန့ၣ်လီၤ. (တၢ်မၤတမံၤအံၤန့ၣ်, မ့ၢ်ဝဲဒၣ်ဖဲဘူၣ်ကိၣ်တအိၣ်ဘၣ်ဒီးကိၣ်မံၣ်အဆၢကတီၢ်န့ၣ်လီၤ.)

မၤတၢ် 16:10

စီၤပီလူးဒိးန့ၢ်တၢ်ထံၣ်လၢညါခီဝံၤအလီၢ်ခံတဘျီဃီ, ပအိၣ်ကတဲာ်ကတီၤပသးလၢပကဟးထီၣ်ဒီးလဲၤဆူကီၢ်မၤက့းဒနံ, အဂ့ၢ်မ့ၢ်လၢပနာ်လၢယွၤကိးပှၤဒ်သိးပကစံၣ်တဲၤတဲလီၤတၢ်သးခု အကစီၣ်ဆူပှၤထံဖိကီၢ်ဖိဖဲန့ၣ်တဖၣ်အအိၣ်အဃိန့ၣ်လီၤ.

မၤတၢ် 16:12

စးထီၣ်ဖဲန့ၣ်ပလဲၤတၢ်လၢခိအကျဲဆူဝ့ၢ်ဖံလံးပံၤ, လၢအမ့ၢ်ဝ့ၢ်တဝ့ၢ်လၢအဘၣ်ဃးဒီးကီၢ်မၤက့းဒနံအကီၢ်ဆၣ်အဆိကတၢၢ်တဘ့ၣ်, လၢအအိၣ်လၢရိမ့ၤအတၢ်ပၢအဖီလာ်န့ၣ်လီၤ. ပအိၣ်ပဝဲစှၤနံၤစှၤသီဖဲန့ၣ်လီၤ.

မၤတၢ် 16:8

လၢတၢ်န့ၣ်အဃိ, အဝဲသ့ၣ်လဲၤခီဂာ်ကီၢ်မူၤစံဒီးလဲၤလီၤဝဲ ဆူဝ့ၢ်တြိၤအါန့ၣ်လီၤ.

မၤတၢ် 20:16

စီၤပီလူးပာ်လီၤအသးလၢအကလဲၤခီပတာ်ကွံာ်ဝ့ၢ်အ့းဖ့း စူးဒ်သိးအဆၢကတီၢ်သုတလၢာ်ကွံာ်ဝဲဖဲကီၢ်အၤစံတဂ့ၤန့ၣ်လီၤ. အဝဲဒၣ်အဲၣ်ဒိးလဲၤတုၤဝ့ၢ်ယရူၤၡလ့ၣ်ဆိဆိ, မ့ၢ်သ့န့ၣ်, လၢဘူၣ်ယဲၢ်ဆံအနံၤအဂီၢ်လီၤ.

မၤတၢ် 20:5

အဝဲသ့ၣ်တဖၣ်လဲၤဆိဆူဝ့ၢ်တြိၤအါလၢပမဲာ်ညါဒီးအိၣ်ခိး ပှၤဖဲန့ၣ်လီၤ.

မၤတၢ် 21:4

ပထံၣ်ပှၤစူၢ်က့ၤနာ်က့ၤတၢ်ဖဲန့ၣ်တနီၤ, ဒီးအိၣ်ဒီးအဝဲသ့ၣ်တနွံလီၤ. အဝဲသ့ၣ်တဖၣ်န့ၣ်သးစီဆှံထိၣ်ဂဲၤအီၤသတးဒီး, တဲဘၣ်စီၤပီလူးလၢအသုတလဲၤဆူဝ့ၢ်ယရူၤၡလ့ၣ်တဂ့ၤန့ၣ်လီၤ.

မၤတၢ် 21:8

မုၢ်ဆ့ၣ်ထီၣ်တနံၤန့ၣ်ပဟးထီၣ်ဒီးလဲၤတုၤလၢဝ့ၢ်ကဲၤစါရံၤလီၤ. ဖဲန့ၣ်ပလဲၤဆူပှၤစိာ်တၢ်သးခုကစီၣ်စီၤဖံလံးပူးအဟံၣ်, ဒီးအိၣ်ဒီးအီၤလီၤ. အဝဲဒၣ်မ့ၢ်ပှၤလၢအဘၣ်တၢ်ဃုထၢထီၣ်အီၤဖဲဝ့ၢ်ယရူၤၡလ့ၣ်နွံ ဂၤအကျါတဂၤလီၤ.

မၤတၢ် 28:14

ဖဲန့ၣ်ပထံၣ်လိာ်ပသးဒီးပှၤစူၢ်က့ၤနာ်က့ၤတၢ်တဖၣ်, ဒီးအဝဲသ့ၣ်မၢပအိၣ်ဒီးအီၤတနွံလီၤ. ဒီးပလဲၤတုၤပဝဲလၢဝ့ၢ်ရိမ့ၤန့ၣ်လီၤ.

ဖံလံးပံၤ 1:1

လၢ, စီၤပီလူးဒီးစီၤတံၤမသ့း, ယ့ၣ်ၡူးခရံာ်အခ့အပှၤတဖၣ် ဆူ, ကစၢ်ယွၤအပှၤဂီၢ်မုၢ် ဖဲဝ့ၢ်ဖံလံးပံၤခဲလၢာ်လၢအမ့ၢ် တၢ်တမံၤဃီဒီးယ့ၣ်ၡူးခရံာ်, ဃုာ်ဒီးတၢ်အိၣ်ဖှိၣ်အခိၣ်အနၢ်ဒီး ပှၤလၢအမၤစၢၤတၢ်တဖၣ်အအိၣ်,

၁ သ့းစၤလနံ 2:2

သုသ့ၣ်ညါလၢတချုးပဟဲဒံးဘၣ်ဆူသုအိၣ်န့ၣ်ပဘၣ်တၢ်မၤနးမၤ ဖှီၣ်ဒီးကတိၤတရီတပါပှၤဖဲဝ့ၢ်ဖံလံးပံၤဒ်လဲၣ်န့ၣ်လီၤ. ဒီးတၢ်ထီဒါအိၣ်ဝဲအဒိၣ်အမုၢ်သနာ်က့, ပကစၢ်ယွၤဟ့ၣ်ပှၤတၢ်သးဒူဒ်သိးပကတဲဘၣ်သုတၢ်ကစီၣ် အမုာ်လၢအဟဲလၢအဝဲဒၣ်အအိၣ်န့ၣ်လီၤ.