၂ သ့းစၤလနံ 1:4 - Sgaw Karen Common Bible

⁴ လၢတၢ်န့ၣ်အဃိ, ပနီၢ်ကစၢ်ဒၣ်ပဝဲပကတိၤတၢ်လၢသုဂ့ၢ် အိၣ်ဒီးတၢ်ပာ်ကဖၢလၢပသးလၢသုဃိ, လၢကစၢ်ယွၤ အတၢ်အိၣ်ဖှိၣ်တဖၣ်အပူၤ, ဘၣ်ဃးသုတၢ်အိၣ်ဂၢၢ်အိၣ်ကျၢၤဒီးသုတၢ်နာ်ဖဲသုလဲၤခီဖျိ ကယဲၢ်တၢ်မၤအၢမၤနးဒီးတၢ်နးတၢ်ဖှီၣ်တဖၣ်န့ၣ်လီၤ.

၂ သ့းစၤလနံ 1:4 Iomraidhean Croise

ရိမ့ၤ 12:12

မ်သုတၢ်မုၢ်လၢ်ဒုးသးခုသု, အိၣ်ဒီးတၢ်ဝံသးစူၤလၢသုတၢ်ကီတၢ်ခဲတဖၣ်အပူၤ, ဒီးဃ့ဘါထုကဖၣ်တၢ်ကိးဆၢကတီၢ်ဒဲးန့ၣ်တက့ၢ်.

ရိမ့ၤ 2:7

ပှၤတနီၤမၤတၢ်ဂ့ၤတၢ်ဝါတထံၣ်ဃီ, ဒီးဃုတၢ်လၤတၢ်ကပီၤ, တၢ်ယူးယီၣ်, ဒီးသးလၢအသံတသ့ဘၣ်လီၤ. ကစၢ်ယွၤကဟ့ၣ်တၢ်မူအထူအယိာ်လၢပှၤဒ်န့ၣ်သိးတဖၣ်လီၤ.

ရိမ့ၤ 8:25

ဘၣ်ဆၣ်ဒီးတၢ်လၢပတထံၣ်ဘၣ်အီၤန့ၣ်ပမ့ၢ်မုၢ်လၢ်အီၤဒီး, ပအိၣ်ခိးကွၢ်လၢ်အီၤလၢတၢ်ဝံသးစူၤအပူၤန့ၣ်လီၤ.

1 ကရံၣ်သူး 7:17

ပှၤတဂၤဘၣ်တဂၤကြၢးအိၣ်မူဝဲဆူညါ, လီၤပလိာ်ဒီးကစၢ်အတၢ်ဟ့ၣ်လၢအဟ့ၣ်အီၤ, ဒီးဒ်အအိၣ်မူတ့ၢ်ဝဲဖဲကစၢ်ယွၤကိးအီၤအဆၢကတီၢ်န့ၣ်လီၤ. အဝဲအံၤမ့ၢ်တၢ်ဘျၢလၢယသိၣ်လီၤသီလီၤယဲလၢတၢ်အိၣ်ဖှိၣ်ကိး ဖုဒဲးအပူၤလီၤ.

၂ ကရံၣ်သူး 12:10

ယသူၣ်မံယသးမံယဲလၢတၢ်ဂံၢ်စၢ်ဘါစၢ်တဖၣ်, တၢ်ကတိၤဒုၣ်ဒွဲၣ်ကတိၤတရီတပါတဖၣ်, တၢ်နးတၢ်ဖှီၣ် တဖၣ်, တၢ်မၤအၢမၤနးတဖၣ်ဒီးတၢ်ကီတၢ်ခဲတဖၣ်အပူၤလၢ ခရံာ်အဃိန့ၣ်လီၤ. အဂ့ၢ်ဒ်အံၤ, ဖဲယဂံၢ်စၢ်ဘါစၢ်န့ၣ်, မ့ၢ်ယဂံၢ်ဆူၣ်ဘါဆူၣ်လီၤ.

၂ ကရံၣ်သူး 7:14

ယကတိၤပာ်ကဖၢလၢစဲဃဲၤယသးလၢသုဂ့ၢ်လၢအဝဲဒၣ် အမဲာ်ညါ, ဒီးသုတမၤဟးဂီၤတ့ၢ်ယသးဘၣ်. ထီဘိန့ၣ်ပစံးဘၣ်တဲဘၣ်သုလၢတၢ်မ့ၢ်တၢ်တီဒီးလၢကျဲ တဘိဃီန့ၣ်, ပတၢ်ကတိၤပာ်ကဖၢလၢပသးလၢစီၤတံတူး အမဲာ်ညါအံၤမ့ၢ်ဝဲတီဝဲလံ.

၂ ကရံၣ်သူး 7:4

ယနာ်န့ၢ်သုအဒိၣ်အမုၢ်လီၤ. ယပာ်ကဖၢလၢမးယသးလၢ သုဃိလီၤ. လၢပတၢ်ကီတၢ်ခဲတၢ်နးတၢ်ဖှီၣ်ခဲလၢာ်အပူၤ န့ၣ်, ယလၢပှဲၤဒံးယဲဒီးတၢ်သးဒူလီၤ. ယပှဲၤလုာ်ကွံာ်ယဲဒီး တၢ်သးဖှံလီၤ.

၂ ကရံၣ်သူး 9:2

ယသ့ၣ်ညါလၢသုသးဆူၣ်မၤစၢၤသုဝဲ, ဒီးယကတိၤပာ်ကဖၢလၢလံယသးလၢသုဂ့ၢ်လၢ ပှၤမၤက့းဒနံဖိတဖၣ်အမဲာ်ညါန့ၣ်လီၤ. ယစံးယဲ, “ဒီပုၢ်ဝဲၢ်လၢကီၢ်အဃါယၤတဖၣ်အသးဆူၣ် ဟ့ၣ်တ့ၢ်လံတၢ်မၤစၢၤလၢအပူၤကွံာ်တနံၣ်လံၤလံၤလီၤ” သုတၢ်သးဆူၣ်န့ၣ်ထိၣ်ဟူးထိၣ်ဂဲၤလံအဝဲသ့ၣ်အါဒံ အါဂၤအသးလံန့ၣ်လီၤ.

၂ ကရံၣ်သူး 9:4

ဘၣ်ဆၣ်ဒီးပှၤကီၢ်မၤက့းဒနံဖိတဖၣ်မ့ၢ်ဟဲပိာ်ယခံ ဒီးထံၣ်လၢသုတအိၣ်ကတဲာ်ကတီၤဒံးသုသးန့ၣ်, ပကမဲာ်ဆှးပဝဲဆံးဒိၣ်လဲၣ်. ပတတဲဒံးလၢသုတၢ်မဲာ်ဆှး အဂ့ၢ်ဘၣ်. အဂ့ၢ်မ့ၢ်လၢပနာ်တ့ၢ်လံလၢာ်လၢာ်ဆ့ဆ့လၢ သုကအိၣ်ကတဲာ်ကတီၤသုသးအဃိန့ၣ်လီၤ.

၁ သ့းစၤလနံ 1:3

တဘျီလၢ်လၢ်ဖဲပဃ့ဘါထုကဖၣ်တၢ်ဆူပကစၢ်ယွၤဒီးပပၢ် အအိၣ်န့ၣ်, ပသ့ၣ်နီၣ်ထီၣ်သုအိၣ်မူမၤထွဲသုတၢ်စူၢ်တၢ်နာ် အခံဒ်လဲၣ်, သုဖံးသုမၤတၢ်ဆူၣ်ဆူၣ်လၢတၢ်အဲၣ်အဃိဒ်လဲၣ်, ဒီးသုတၢ်မုၢ်လၢ်လၢပကစၢ်ယ့ၣ်ၡူးခရံာ်အပူၤဂၢၢ်ကျၢၤဒ်လဲၣ် အဂ့ၢ်န့ၣ်လီၤ.

၁ သ့းစၤလနံ 2:14

ပဒီပုၢ်ဝဲၢ်သ့ၣ်ဧၢ, တၢ်လၢအမၤအသးဒီးသုတဖၣ်န့ၣ်မ့ၢ်တၢ်တမံၤဃီလၢအမၤတ့ၢ် အသးဒီးကစၢ်ယွၤအတၢ်အိၣ်ဖှိၣ်လၢကီၢ်ယူဒၤအပူၤ, ပှၤတဖၣ်လၢအဘၣ်ဃးဒီးယ့ၣ်ၡူးခရံာ်န့ၣ်လီၤ. သုတူၢ်ဘၣ်တၢ်တမံၤဃီလၢသုပှၤကလုာ်တဖၣ်အစုပူၤ, ဒ်အဝဲသ့ၣ်တူၢ်ဘၣ်တၢ်လၢပှၤယူဒၤဖိအစုပူၤအသိး န့ၣ်လီၤ.

၁ သ့းစၤလနံ 2:19

သုဆိကမိၣ်လၢပတၢ်ပာ်ကဖၢလၢပသးအလီၢ်ဒီးပတၢ်သးခု ကမ့ၢ်တၢ်မနုၤလဲၣ်. မ့ၢ်ဒၣ်သုလီၤ. ဒီးသုကမ့ၢ်ပတၢ်မၤနၢၤအပနီၣ်လၢပကပာ်ကဖၢလၢပသးအဒိၣ် ကတၢၢ်လၢပကစၢ်ယ့ၣ်ၡူးအမဲာ်ညါဖဲအဟဲဝဲန့ၣ်လီၤ.

၂ သ့းစၤလနံ 3:5

မ်ကစၢ်ဆှၢသုဆူတၢ်သ့ၣ်ညါနၢ်ပၢၢ်အါထီၣ်ကစၢ်ယွၤ အတၢ်အဲၣ်တၢ်ကွံဒီးတၢ်သ့တူၢ်တၢ်လၢအဟဲလၢခရံာ် အအိၣ်န့ၣ်တက့ၢ်.

ဧ့ၤဘြံၤ 10:36

သုကဘၣ်ဝံသးစူၤဒီးတူၢ်တၢ်ဒ်သိးသုကမၤတၢ်ဘၣ်ကစၢ်ယွၤ အသးဝံၤ, ဒီးဒိးန့ၢ်ဘၣ်တၢ်လၢအဘၣ်တၢ်စံးပာ်တ့ၢ်အီၤန့ၣ်လီၤ.

ဧ့ၤဘြံၤ 6:12

မ်သုသုတကၢၣ်တကျူတဂ့ၤ, မ့မ့ၢ်မ်သုကကွၢ်လိမၤ ဒိးပှၤလၢအနာ်တၢ်ဒီးဝံသးစူၤတၢ်ဒီးန့ၢ်သါဃုာ်တၢ်လၢ ကစၢ်ယွၤစံးပာ်တ့ၢ်ဝဲတဖၣ်န့ၣ်တက့ၢ်.

ဧ့ၤဘြံၤ 6:15

စီၤအၤဘြၤဟၣ်အသူၣ်စူၤသးစူၤသတးဒီးဒိးန့ၢ်တၢ်စံးပာ် န့ၣ်လီၤ.

ယၤကိာ် 5:11

ပှၤလၢအသ့တူၢ်တၢ်န့ၣ်, ပကိးအီၤလၢပှၤဘၣ်ဆိၣ်ဂ့ၤလီၤ. သုနၢ်ဟူတ့ၢ်လံစီၤယိၤဘးအတၢ်သးစူၤအဂ့ၢ်, ဒီးသုသ့ၣ်ညါကစၢ်အတၢ်တိာ်ဒီးအတၢ်ဆိၣ်ဂ့ၤအီၤလၢခံ ကတၢၢ်ဒ်လဲၣ်အဂ့ၢ်န့ၣ်လီၤ. အဂ့ၢ်ဒ်လဲၣ်န့ၣ်ကစၢ်ပှဲၤဝဲဒီးတၢ်သးကညီၤဒီးတၢ်သူၣ်အိၣ်သး အိၣ်န့ၣ်လီၤ.

၂ ပ့းတရူး 1:6

လၢတၢ်သ့ၣ်ညါအမဲာ်ညါပာ်ဖှိၣ်အါထီၣ်တၢ်ကီၤသူၣ် ကီၤသး, ဒီးလၢတၢ်ကီၤသူၣ်ကီၤသးအမဲာ်ညါပာ်ဖှိၣ် အါထီၣ်တၢ်သ့တူၢ်တၢ်, ဒီးလၢတၢ်သ့တူၢ်တၢ်အမဲာ်ညါပာ်ဖှိၣ်အါထီၣ်တၢ်အဲၣ် ထူအဲၣ်ယွၤ,

လံာ်လီၣ်ဖျါ 14:12

ဖဲအံၤန့ၣ်အလီၢ်အိၣ်လၢကစၢ်ယွၤအပှၤဂီၢ်မုၢ်တဖၣ်, ပှၤလၢအဒိကနၣ်ဒီးအိၣ်မူထွဲကစၢ်ယွၤအတၢ်မၤလိာ်တဖၣ် ဒီးတီလၢယ့ၣ်ၡူးန့ၣ်, ကတူၢ်တၢ်လၢတၢ်သူၣ်စူၤသးစူၤအပူၤလီၤ.