လံာ်စီၤၡမူၤအ့လးခံဘ့ၣ်တဘ့ၣ် 7:16 - Sgaw Karen Common Bible

¹⁶ နကအိၣ်ဒီးနစၢၤနသွဲၣ်တဖၣ်ထီဘိ, ဒီးယကဒုးအိၣ်ဂၢၢ်ဆိးကျၢၤ နဘီနမုၢ်လီၤထူလီၤယိာ်လီၤ. နစၢၤနသွဲၣ်အတၢ်ပၢတၢ်ပြးန့ၣ်အကတၢၢ်တအိၣ်ဘၣ်နီတစု ဘၣ်.”

လံာ်စီၤၡမူၤအ့လးခံဘ့ၣ်တဘ့ၣ် 7:16 Iomraidhean Croise

လံာ်တၢ်ကဲထီၣ်အခီၣ်ထံး 49:10

စီၤယူဒၤကစိာ်စီၤပၤအဘီမုၢ်နီၣ်ထိး, ဒီးအစၢၤအသွဲၣ်ကပၢတၢ် တဘိယူၢ်ဃီလီၤ. ပှၤကလုာ်တဖၣ်ကဟဲစိာ်န့ၢ်အီၤတၢ်ယူးယီၣ်ပာ်ကဲအတၢ်ဟ့ၣ်ဒီးတီၤ လီၤလၢအမဲာ်ညါအိၣ်ဒီးတၢ်စူၢ်အကလုၢ်န့ၣ်လီၤ.

လံာ်စီၤၡမူၤအ့လးခံဘ့ၣ်တဘ့ၣ် 22:51

ကစၢ်ယွၤဟ့ၣ်တၢ်မၤနၢၤဖးဒိၣ်ဆူအစီၤပၤအအိၣ်, အဝဲဒုးနဲၣ်အတၢ်အဲၣ်ဂၢၢ်ကျၢၤဆူပှၤတဂၤလၢအဃုထၢတ့ၢ်ဝဲဒၣ်, ဆူစီၤဒၤဝံးဒီးအဝဲအစၢၤအသွဲၣ်ထီဘိတပယူာ်ဃီ န့ၣ်လီၤ.

လံာ်စီၤၡမူၤအ့လးခံဘ့ၣ်တဘ့ၣ် 7:13

အဝဲကမ့ၢ်ပှၤတဂၤလၢကသူၣ်ထီၣ်တၢ်လုၢ်ဟံၣ်တဖျၢၣ်လၢယဂီၢ်ဒီး ယကမၤလီၤတံၢ်လၢအဝဲအစၢၤအသွဲၣ်ကပၢတၢ်ဆူညါလီၤစိၤလီၤထီန့ၣ်လီၤ.

လံာ်စီၤၡမူၤအ့လးခံဘ့ၣ်တဘ့ၣ် 7:17

စီၤနၤသၣ်တဲဘၣ်စီၤဒၤဝံး, ကယဲၢ်တၢ်ကိးမံၤဒဲးလၢကစၢ်ယွၤ လီၣ်ဖျါထီၣ်န့ၢ်အီၤန့ၣ်လီၤ.

လံာ်စီၤပၤအခီၣ်ထံးတဘ့ၣ် 2:4

နမ့ၢ်စူၢ်အီၤဒီး, ယွၤကဟံးဃာ်အတၢ်အၢၣ်လီၤလၢအမၤတ့ၢ်ဝဲ, ဖဲအဝဲစံးဘၣ်တ့ၢ်ယၤလၢ, ယစၢၤယသွဲၣ်တဖၣ်, ကပၢဘၣ်ကီၢ်အံၣ်စရ့လးအဆၢကတီၢ်ကယံာ်ပှဲၤသိးဒီးအဝဲသ့ၣ်အတၢ် စူၢ်ယတၢ်မၤလိာ်လၢတၢ်သးတီလီၤတံၢ်လီၤဆဲးလၢအသူၣ်ဒီဖျၢၣ် သးဒီဖျၢၣ်န့ၣ်လီၤ.

လံာ်စီၤပၤအခီၣ်ထံးတဘ့ၣ် 9:5

ယကဟံးဃာ်ဂၢၢ်ကျၢၤတၢ်အၢၣ်လီၤလၢယမၤတ့ၢ်အီၤဒီးနပၢ်စီၤဒၤဝံး, ဖဲယတဲဘၣ်တ့ၢ်အီၤလၢကီၢ်အံၣ်စရ့လးကဘၣ်တၢ်ပၢအီၤလၢအဝဲ အစၢၤအသွဲၣ်တဖၣ်ထီဘိန့ၣ်လီၤ.

လံာ်စီၤပၤခံဘ့ၣ်တဘ့ၣ် 19:34

ယကကဟုကယာ်ဝ့ၢ်အံၤဒီးဒီဒၣ်အိၣ်ပှိၤအီၤလၢယလၤကပီၤဒၣ်ယဲ အဂီၢ်ဒီးမ့ၢ်လၢတၢ်အၢၣ်လီၤအီလီၤလၢယမၤတ့ၢ်ဒီးယခ့ယပှၤစီၤ ဒၤဝံးအဃိန့ၣ်လီၤ.”

လံာ်စီၤပၤခံဘ့ၣ်တဘ့ၣ် 8:19

ဘၣ်ဆၣ်ယွၤတသးအိၣ်လၢကမၤဟးဂီၤကီၢ်ယူဒၤဘၣ်. အဂ့ၢ်ဒ်အံၤ, ယွၤအၢၣ်လီၤတ့ၢ်အခ့အပှၤစီၤဒၤဝံးလၢအဝဲ အစၢၤအသွဲၣ်တဖၣ်ကပၢထွဲဒံးတၢ်ဆူညါထီဘိန့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 6:16

ခဲကနံၣ်အံၤယွၤ, အံၣ်စရ့လးအကစၢ်ယွၤဧၢ, ဟံးဃာ်ဂၢၢ်ကျၢၤတၢ်အၢၣ်လီၤအီလီၤအဂၤတမံၤလၢနမၤတ့ၢ်ဒီးယ ပၢ်, ဖဲနတဲဘၣ်တ့ၢ်အီၤလၢ, ထီဘိအဝဲအစၢၤအသွဲၣ်တဖၣ်အကျါတဂၤကအိၣ် ဝဲလၢကပၢတၢ်ဒ်အံၣ်စရ့လးအစီၤပၤ, ဖဲအဝဲသ့ၣ်မ့ၢ်စူၢ်နတၢ်သိၣ်တၢ်သီလၢနဟ့ၣ်လီၤပှၤယူဒၤဖိ လီၤတံၢ်လီၤဆဲးဒ်နမၤတ့ၢ်ဝဲအသိးန့ၣ်တက့ၢ်.

လံာ်စီၤယိၤဘး 36:7

ကဟုဘံၣ်ကယာ်ဘၢပှၤအတီအလိၤတဖၣ်, ပျဲအဝဲသ့ၣ်ကပၢ တၢ်ဒ်စီၤပၤတဖၣ်အသိးဒီးပျဲအဘၣ်တၢ်မၤလၤကပီၤအီၤအစိၤ စိၤအဃၣ်ဃၣ်လီၤ.

စံးထီၣ်ပတြၢၤ 45:6

ဘီမုၢ်လၢကစၢ်ယွၤဟ့ၣ်တ့ၢ်နၤအံၤ ကအိၣ်ဝဲအစိၤစိၤအဃၣ်ဃၣ်န့ၣ်လီၤ. နပၢနပှၤဂီၢ်မုၢ်လၢတၢ်တီတၢ်လိၤအပူၤ,

စံးထီၣ်ပတြၢၤ 72:5

မ်ပှၤကပျံၤနၤဖဲမုၢ်ဒီးလါအိၣ်ဝဲအဖၢမုၢ် အစိၤစိၤအဃၣ်ဃၣ်န့ၣ်တက့ၢ်.

စံးထီၣ်ပတြၢၤ 89:4

အစၢၤအသွဲၣ်တဂၤကမ့ၢ်စီၤပၤ ထီဘိတထံၣ်ဃီဒီး ယကဒုးအိၣ်ဂၢၢ်ကျၢၤအဘီအမုၢ် အစိၤစိၤအဃၣ်ဃၣ်န့ၣ်လီၤ. ” စ့လၤ

လံာ်ယၡါယၤ 9:6

ဖိသၣ်တဂၤအိၣ်ဖျဲၣ်လၢပဂီၢ်, တၢ်ဟ့ၣ်လီၤပှၤလၢဖိခွါတဂၤလီၤ. ဒီးအဝဲဒၣ်ကမ့ၢ်ပပှၤပၢတၢ်လီၤ. အဝဲကဘၣ်တၢ်ကိးအီၤလၢ “ပှၤလီၤလး ” “တၢ်ကူၣ်လိာ်တၢ်”, “စိဒိၣ်ကမီၤထီကစၢ်ယွၤ”, “ပၢ်အထူအယိာ်”, “တၢ်ဃူတၢ်ဖိးအစီၤပၤ” န့ၣ်လီၤ.

လံာ်ယၡါယၤ 9:7

အစီၤလိၣ်စီၤပၤအစိကမီၤကဒိၣ်ထီၣ်ကွ့ၢ်ကွ့ၢ် ဒီးအဘီအမုၢ်ကမုာ်ကခုၣ်ဝဲထီဘိန့ၣ်လီၤ. အဝဲကပၢတၢ်ဒ်ပှၤလၢအကထီၣ်စီၤပၤစီၤဒၤဝံးအလီၢ် တဂၤအသိး, အတၢ်စိတၢ်ကမီၤန့ၣ်ကသူၣ်ထီၣ်ဝဲလၢတၢ်တီတၢ်လိၤ ဒီးတၢ်စံၣ်ညီၣ်တီအဖီခိၣ်, စးထီၣ်ခဲအံၤတုၤတၢ်အစိၤကတၢၢ်န့ၣ်လီၤ. ယွၤ, သ့တၢ်လၢာ်ကစၢ်န့ၣ်, ပာ်လီၤအသးသပှၢ်တၢၢ်လၢကမၤတၢ်အံၤခဲ လၢာ်လီၤ.

လံာ်ယံးရမံယၤ 17:25

အန့ၣ်ဒီး, အဝဲသ့ၣ်အစီၤပၤတဖၣ်ဒီးအစီၤပၤဖိခွါတဖၣ်ကဟဲနုာ်လီၤ လၢဝ့ၢ်ယရူၤၡလ့ၣ်အတြဲၤတဖၣ်, ဒီးကအိၣ်ဒီးစီၤလိၣ်စီၤပၤ အစိကမီၤတမံၤဃီဒ်စီၤဒၤဝံးမၤန့ၢ်တ့ၢ်ဝဲအသိးန့ၣ်လီၤ. အဝဲသ့ၣ်ကဒိးလ့ၣ်ကဟၣ်ဒီးကသ့ၣ်တဖၣ်ဃုာ်ဒီးကီၢ်ယူဒၤဒီးဝ့ၢ် ယရူၤၡလ့ၣ်အပှၤဂီၢ်မုၢ်, ဒီးဝ့ၢ်ယရူၤၡလ့ၣ်ကပှဲၤ ဝဲဒီးပှၤဂီၢ်မုၢ်ထီဘိန့ၣ်လီၤ.

လံာ်ယံးရမံယၤ 33:17

ယၤ, ယွၤအံၤ, ယအၢၣ်လီၤလၢ စီၤဒၤဝံးအစၢၤအသွဲၣ်တဂၤ ကအိၣ်ဝဲထီဘိလၢ ကကဲကီၢ်အံၣ်စရ့လးအစီၤပၤအဂီၢ်.

လံာ်ယဃ့းစက့လး 37:25

အဝဲသ့ၣ်ကအိၣ်ဆိးလၢကီၢ်လၢယဟ့ၣ်လီၤတ့ၢ်ယခ့ယပှၤ စီၤယၤကိာ်, ဒီးကီၢ်ဖဲအဝဲသ့ၣ်အမိၢ်အပၢ်ဖံဖုလၢပျၢၤတဖၣ်အိၣ်ဆိးတ့ၢ်ဝဲအပူၤန့ၣ်လီၤ. အဝဲသ့ၣ်ကအိၣ်ဆိးဖဲန့ၣ်လီၤထူလီၤယိာ်ဃုာ်ဒီးအဖိ အလံၤဒီးအစၢၤအသွဲၣ်ခဲလၢာ်န့ၣ်လီၤ. စီၤပၤတဂၤလၢအလီၤဂာ်ဒီး ယခ့ယပှၤစီၤဒၤဝံးကပၢတၢ်လၢအဝဲသ့ၣ်အဖီခိၣ်အစိၤစိၤအဃၣ် ဃၣ်န့ၣ်လီၤ.

လံာ်ဒၤနံးယ့လး 2:44

လၢစီၤပၤတဖၣ်အမုၢ်နံၤအပူၤန့ၣ်ကစၢ်ယွၤလၢမူခိၣ်ကသူၣ်ထီၣ် ဘီမုၢ်တဘ့ၣ်လၢအကတၢၢ်တအိၣ်ဘၣ်လီၤ. ဘီမုၢ်န့ၣ်ဘၣ်တၢ်မၤနၢၤကွံာ်အီၤတန့ၢ်ဘၣ်. မ့မ့ၢ်ကမၤဟးဂီၤကွံာ်ဘီမုၢ်တဖၣ်လၢာ် လၢာ်ဆ့ဆ့ဒီးကအိၣ်ဂၢၢ်ကျၢၤဝဲလီၤထူလီၤယိာ်လီၤ.

လံာ်ဒၤနံးယ့လး 7:14

အဝဲဘၣ်တၢ်ဟ့ၣ်လီၤအီၤလၢပှၤပၢတၢ်အစိကမီၤ, တၢ်လၤကပီၤ, ဒီးစီၤလိၣ်စီၤပၤအစိကမီၤ, ဒ်သိးကယဲၢ်ပှၤဂီၢ်မုၢ်လၢထံကီၢ်ခဲလၢာ်, ပှၤကိးကလုာ်ဒဲးဒီးပှၤကတိၤကျိာ်အကလုာ်ကလုာ်တဖၣ်ကမၤ အခ့အပှၤအတၢ်မၤန့ၣ်လီၤ. အစိအကမီၤကအိၣ်လီၤထူလီၤယိာ်, ဒီးအဘီအမုၢ်န့ၣ်အကတၢၢ်တအိၣ်ဘၣ်.

လံာ်မးသဲ 16:18

ဒီးယဲဒၣ်အံၤယစံးလၢနမ့ၢ်ပ့းတရူး, လၢၢ်တဖျၢၣ်, ဒီးလၢလၢၢ်အံၤအဖီခိၣ်န့ၣ်, ယကသူၣ်ထီၣ်ယတၢ်အိၣ်ဖှိၣ်, ဒီးတၢ်သံအစိကမီၤဒၣ်လဲာ်မၤနၢၤအီၤတန့ၢ်ဘၣ်လီၤ.

လံာ်ယိၤဟၣ် 12:34

ပှၤဂီၢ်မုၢ်စံးဆၢတၢ်ဒီးစံးဝဲ, “ပတၢ်သိၣ်တၢ်သီစံးဘၣ်ပှၤလၢ ခရံာ်ကမူဝဲလီၤစိၤလီၤထီလီၤ. မ့မ့ၢ်ဒ်န့ၣ်ဒီး, နစံးလၢပှၤကညီဖိခွါကဘၣ်တၢ်ယူာ်ထီၣ်အီၤန့ၣ်ကသ့ဒ်လဲၣ်. ပှၤကညီဖိခွါအံၤမ့ၢ်မတၤတဂၤလဲၣ်.”

ဧ့ၤဘြံၤ 1:8

ဘၣ်ဆၣ်ဒီးဖဲအဘၣ်ဃးဒီးဖိခွါန့ၣ်စံးဝဲ, “ကစၢ်ယွၤဧၢ, နဘီနမုၢ်အိၣ်ဝဲအစိၤစိၤအဃၣ်ဃၣ်, နပၢတၢ်ဒီးတၢ်တီတၢ်လိၤလီၤ.

လံာ်လီၣ်ဖျါ 11:15

အန့ၣ်ဝံၤဒီး, ကလူးနွံဂၤတဂၤအူထီၣ်အကွဲၤ, ဒီးတၢ်ကလုၢ်တဖၣ်သီၣ်ထီၣ်ဖးဒိၣ်လၢမူခိၣ်, ဒီးစံးဝဲဒၣ်, “ခဲကနံၣ်အံၤ, တၢ်စိကမီၤဘၣ်ဃးဒီးတၢ်ပၢဘၣ်ဟီၣ်ခိၣ်မ့ၢ် ပကစၢ်ဒီးအမ့းၡံအၤအတၢ်, ဒီးအဝဲဒၣ်ကပၢတၢ်လီၤထူလီၤ ယိာ်လီၤ.”

လံာ်စီၤၡမူၤအ့လးအခီၣ်ထံးတဘ့ၣ် 25:28

တၢ်ဒိၣ်ဧၢ, ဝံသးစူၤပျၢ်ကယဲၢ်တၢ်လၢယမၤကမၣ်ဘၣ်တ့ၢ်အီၤတမံၤလၢ်လၢ်န့ၣ်တက့ၢ်. ယွၤကဒုးကဲထီၣ်နၤဒီးနစၢၤနသွဲၣ်တဖၣ်စ့ၢ်ကီးလၢစီၤပၤလီၤ. အဂ့ၢ်ဒ်အံၤ, နဒုးအတၢ်ဒုးတဖၣ်ဒီးလၢနအိၣ်မူဒံးအမုၢ်နံၤတဖၣ် န့ၣ်နတဘၣ်မၤတၢ်အၢတၢ်သီနီတမံၤဘၣ်လီၤ.