လံာ်စီၤၡမူၤအ့လးခံဘ့ၣ်တဘ့ၣ် 2:1 - Sgaw Karen Common Bible

¹ တၢ်အံၤဝံၤအလီၢ်ခံ, စီၤဒၤဝံးသံကွၢ်ယွၤ, “ယဘၣ်လဲၤမၤန့ၢ်ဒီးပၢၤဃာ်ကီၢ်ယူဒၤအဝ့ၢ်တဖျၢၣ်ဖျၢၣ်ဧါ.” ယွၤစံးဆၢဝဲဒၣ်, “မ့ၢ်လီၤ.” စီၤဒၤဝံးသံကွၢ်ဝဲ, “ဝ့ၢ်လၢလဲၣ်တဝ့ၢ်လဲၣ်.” ယွၤစံးဝဲဒၣ်, “ဝ့ၢ်ဃ့ဘြိၣ်” လီၤ.

လံာ်စီၤၡမူၤအ့လးခံဘ့ၣ်တဘ့ၣ် 2:1 Iomraidhean Croise

လံာ်တၢ်ကဲထီၣ်အခီၣ်ထံး 13:18

မၤသးဒ်န့ၣ်ဒီး, စီၤအၤဘြၣ်သုးအဒဲဒီးသူၣ်လီၤအတၢ်အိၣ်တၢ် ဆိးအလီၢ်ဘူးဒီးမးမရ့အသ့ၣ်စီဆှံတဖၣ်လၢအအိၣ်ဖဲဝ့ၢ်ဃ့ ဘြိၣ်န့ၣ်လီၤ. ဒီးမၤထီၣ်ဝဲတၢ်လုၢ်လီၢ်တခါလၢယွၤအဂီၢ်ဖဲန့ၣ်လီၤ.

လံာ်တၢ်ကဲထီၣ်အခီၣ်ထံး 32:2

တုၤအထံၣ်အဝဲသ့ၣ်န့ၣ်စီၤယၤကိာ်စံးဝဲ, “တၢ်လီၢ်အံၤမ့ၢ် ကစၢ်ယွၤသူၣ်ဒဲအလီၢ်လီၤ.” လၢတၢ်န့ၣ်အဃိကိးဝဲတၢ်လီၢ်အံၤ လၢ ‘မၤဃန့ၤ’ လီၤ.

လံာ်စီၤၡမူၤအ့လးခံဘ့ၣ်တဘ့ၣ် 15:7

လွံၢ်နံၣ်ဝံၤအလီၢ်ခံန့ၣ်, စီၤအးဘၡါလိၣ်စံးဘၣ်စီၤပၤစီၤ ဒၤဝံးဒ်အံၤ, “တၢ်ဒိၣ်ဧၢ, ပျဲယလဲၤဆူဝ့ၢ်ဃ့ဘြိၣ်ဒီးမၤလၢပှဲၤယတၢ်အၢၣ် လီၤအီလီၤလၢယမၤတ့ၢ်ဒီးယွၤန့ၣ်တက့ၢ်.

လံာ်စီၤၡမူၤအ့လးခံဘ့ၣ်တဘ့ၣ် 2:11

ဒီးအဝဲပၢတၢ်လၢဝ့ၢ်ဃ့ဘြိၣ်လၢကီၢ်ယူဒၤအပူၤနွံနံၣ်ဒီး ဃုလါန့ၣ်လီၤ.

လံာ်စီၤၡမူၤအ့လးခံဘ့ၣ်တဘ့ၣ် 5:19

စီၤဒၤဝံးသံကွၢ်ယွၤ, “မ့ၢ်ယကဘၣ်ဒုးပှၤဖလ့ၡသးဖိတဖၣ်န့ၣ်ဧါ. မ့ၢ်နကဟ့ၣ်ယၤလၢတၢ်မၤနၢၤန့ၣ်ဧါ.” ယွၤစံးဆၢဝဲဒၣ်, “မ့ၢ်, လဲၤဒုးတက့ၢ်. ယကဟ့ၣ်နၤလၢတၢ်မၤနၢၤန့ၣ်လီၤ.”

လံာ်စီၤၡမူၤအ့လးခံဘ့ၣ်တဘ့ၣ် 5:23

မၤကဒီးတစု, စီၤဒၤဝံးသံကွၢ်တၢ်လၢယွၤဒီးယွၤစံးဆၢ အီၤ, “လဲၤဒုးအဝဲသ့ၣ်ဖဲအံၤတဂ့ၤ. မ့မ့ၢ်လဲၤတရံးဒီးကတဲာ်ကတီၤသုသးဒ်သိးသုကလဲၤဒုးအီၤလၢ အဂၤတကပၤဖဲအဘူးဒီးပံၢ်သလီအထူၣ်တဖၣ်န့ၣ်တက့ၢ်.

လံာ်စီၤပၤအခီၣ်ထံးတဘ့ၣ် 2:11

အဝဲမ့ၢ်တ့ၢ်ကီၢ်အံၣ်စရ့လးအစီၤပၤအနံၣ်လွံၢ်ဆံ, ဒီးပၢတၢ်လၢဝ့ၢ်ဃ့ဘြိၣ်အပူၤနွံနံၣ်ဒီးလၢဝ့ၢ်ယရူၤၡလ့ၣ် အပူၤသၢဆံသၢနံၣ်န့ၣ်လီၤ.

လံာ်ကွဲးနီၣ်တၢ်အခီၣ်ထံးတဘ့ၣ် 29:7

တၢ်လၢအဝဲသ့ၣ်ဟ့ၣ်လီၤလၢတၢ်ဘှီထီၣ်ယွၤအတၢ်လုၢ်ဟံၣ်အဂီၢ်မ့ၢ် ဒ်လာ်အံၤလီၤ. ထူကံကၢ်ယဲၢ်ကထိဒီးဒၤရံးတကလး, စ့အကံကၢ်တကလး, တိၢ်ဘီအကံကၢ်တကလးဃိးကထိ, ဒီးထးအကံကၢ်တကလီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 11:10

ဝ့ၢ်စိးရၤ, ဝ့ၢ်အးယၤလိၣ်ဒီးဝ့ၢ်ဃ့ဘြိၣ်သ့ၣ်တဖၣ်န့ၣ်လီၤ.

စံးထီၣ်ပတြၢၤ 143:8

ဒုးသ့ၣ်နီၣ်ယၤလၢနတၢ်အဲၣ်ဂၢၢ်ကျၢၤကိးဂီၤဒဲးတက့ၢ်. အဂ့ၢ်ဒ်အံၤ, ယသန့ၤယသးလၢနၤလီၤ. သိၣ်လိယၤလၢကျဲလၢယဂ့ၤပိာ်တဘိန့ၣ်တက့ၢ်. အဂ့ၢ်ဒ်အံၤ, ယစိာ်ထီၣ်ယသးဆူနအိၣ်လီၤ.

စံးထီၣ်ပတြၢၤ 27:4

ယဃ့တ့ၢ်ယွၤလၢတၢ်တမံၤအဂီၢ်, ယဆၢန့ၢ်ဘၣ်ထဲတၢ်တမံၤဧိၤ, ဒ်သိးယကအိၣ်ကဆိးဘၣ်လၢယွၤအဟံၣ်ပူၤတစိၤဒၣ်ယၤ, လၢယကထံၣ်ဘၣ်ယွၤအတၢ်ဂ့ၤတၢ်ဝါ ဒီးဃ့န့ၢ်ယွၤအတၢ်ပၢတၢ်ဆှၢန့ၣ်လီၤ.

လံာ်ယဃ့းစက့လး 36:37

ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “ယကပျဲပှၤအံၣ်စရ့လးဖိ တဖၣ်ဃ့ကဒီးတၢ်မၤစၢၤလၢယၤ, ဒီးယကဒုးအါထီၣ်အဝဲသ့ၣ် အနီၣ်ဂံၢ်ဒ်သိတဖုအသိးန့ၣ်လီၤ.

လံာ်တၢ်ဂံၢ် 13:22

အဆိကတၢၢ်အဝဲသ့ၣ်လဲၤဆူကီၢ်န့ၣ်အကလံၤထံးတကပၤ တုၤဆူဝ့ၢ်ဃ့ဘြိၣ်, တၢ်လီၢ်ဖဲစီၤအဃံမ့ၣ်, စီၤၡ့ၤၡဲ, ဒီးစီၤတးလမဲအဒူၣ်ထၢတဖၣ်ပှၤဟဲလီၤစၢၤလၢပှၤတကလုာ်လၢအနီၢ် ဒိၣ်နီၢ်သွါတဖၣ်လၢပှၤကိးအီၤလၢပှၤဧနးဖိအိၣ်ဝဲဆိးဝဲအလီၢ်န့ၣ်လီၤ. (ဝ့ၢ်ဃ့ဘြိၣ်န့ၣ်ဘၣ်တၢ်သူၣ်ထီၣ်အီၤဆိန့ၣ်ဝ့ၢ်စိၤဧၢ်လၢကီၢ် အဲၤကူပတူးအပူၤနွံနံၣ်န့ၣ်လီၤ.)

လံာ်တၢ်ဂံၢ် 27:21

အဝဲကဘၣ်သန့ၤအသးလၢပှၤလုၢ်တၢ်အခိၣ်စီၤအလၤဧစၢ်, ပှၤတဂၤလၢအကမၤလိတၢ်ဘၣ်ယသးခီဖျိအူရံၣ်ဒီးထူမံၣ်န့ၣ်လီၤ. လၢကျဲဒ်အံၤန့ၣ်စီၤအလၤဧစၢ်ကနဲၣ်န့ၢ်စီၤယိၤၡူဒီးကီၢ်အံၣ်စရ့လး အကမျၢၢ်ဒီဖုန့ၣ်အကျဲလၢကယဲၢ်အတၢ်ဂ့ၢ်တၢ် ကျိၤခဲလၢာ်အပူၤန့ၣ်လီၤ.”

လံာ်စီၤယိၤၡူ 15:13

ဒ်ယွၤမၤလိာ်စီၤမိၤၡ့အသိး, ပှၤယူဒၤဖိအကီၢ်တနီၤဘၣ်တၢ်ဟ့ၣ်လီၤအီၤဆူစီၤယဖူန့ၤအဖိ ခွါစီၤကၤလ့းလၢယူဒၤအဒူၣ်တခီန့ၣ်လီၤ. အဝဲဒိးန့ၢ်ဘၣ်ဃ့ဘြိၣ်, ဝ့ၢ်လၢအဘၣ်ဃးဒီးစီၤအၢ်ဘၤလၢအမ့ၢ်စီၤဧနးအပၢ်န့ၣ်လီၤ.

လံာ်ပှၤစံၣ်ညီၣ်ကွီၢ် 1:1

ဖဲစီၤယိၤၡူသံဝံၤအလီၢ်ခံန့ၣ်ပှၤအံၣ်စရ့လးဖိသံကွၢ်တၢ်လၢယွၤ, “မ့ၢ်မတၤလၢပပှၤအဒူၣ်တဖၣ်အကျါကြၢးမ့ၢ်ပှၤအဆိကတၢၢ်တဒူၣ်လၢ ကလဲၤထီၣ်ဒုးပှၤကနၤဧၣ်ဖိတဖၣ်လဲၣ်.”

လံာ်စီၤၡမူၤအ့လးအခီၣ်ထံးတဘ့ၣ် 10:22

အဝဲသ့ၣ်သံကွၢ်ယွၤ, “မ့ၢ်ပှၤအဂၤအိၣ်တဂၤဂၤဒံးဧါ.” ယွၤစံးဆၢဝဲဒၣ်, “စီၤစီလူးအိၣ်ဖဲန့ၣ်ဒီးအိၣ်ခူသူၣ်လၢ တၢ်ဖိတၢ်လံၤအကျါလီၤ.”

လံာ်စီၤၡမူၤအ့လးအခီၣ်ထံးတဘ့ၣ် 23:2

မၤသးဒ်န့ၣ်ဒီးအဝဲသံကွၢ်တၢ်လၢယွၤ, “မ့ၢ်ယကဘၣ်လဲၤဒုး ပှၤဖလ့ၡသးဖိတဖၣ်န့ၣ်ဧါ.” ယွၤစံးဆၢအီၤ, “မ့ၢ်လီၤ, လဲၤဒုးအဝဲသ့ၣ်ဒီးမၤပူၤမၤဖျဲးက့ၤဝ့ၢ်ကံလၤ တက့ၢ်.”

လံာ်စီၤၡမူၤအ့လးအခီၣ်ထံးတဘ့ၣ် 23:4

မၤသးဒ်န့ၣ်ဒီး, စီၤဒၤဝံးသံကွၢ်ကဒီးတၢ်လၢကစၢ်ယွၤဒီးယွၤ စံးဘၣ်အီၤ, “လဲၤဒီးဒုးဝ့ၢ်ကံလၤတက့ၢ်. အဂ့ၢ်ဒ်အံၤ, ယဟ့ၣ်လီၤသုတၢ်မၤနၢၤလၢပှၤဖလ့ၡသးဖိတဖၣ်အဖီ ခိၣ်လီၤ.”

လံာ်စီၤၡမူၤအ့လးအခီၣ်ထံးတဘ့ၣ် 30:31

ဒီးဆူဝ့ၢ်ဃ့ဘြိၣ်လီၤ. အဝဲဆှၢလီၤတၢ်န့ၣ်ဆူကယဲၢ်တၢ်လီၢ်ကိးပူၤဒဲးဖဲအဝဲဒီးအတံၤသကိးတဖၣ်လဲၤဟးညီနူၢ်တ့ၢ်ဝဲ န့ၣ်လီၤ.