လံာ်စီၤၡမူၤအ့လးခံဘ့ၣ်တဘ့ၣ် 16:10 - Sgaw Karen Common Bible

¹⁰ စီၤပၤစံးဘၣ်စီၤအဘံၡဲၤဒီးအဒီပုၢ်ဝဲၢ်ခွါစီၤယိၤအာ်, “တၢ်အံၤတဘၣ်ဃးဒီးသုနီတမံၤဘၣ်. အဝဲမ့ၢ်ဆိၣ်အၢယၤလၢ ယွၤတဲဘၣ်အီၤအဃိဒီး, ဘၣ်မနုၤအဝဲမၤတၢ်အံၤလဲၣ်န့ၣ်, မတၤအိၣ်ဒီးတၢ်ခွဲးတၢ်ယာ်လၢ ကသံကွၢ်ဝဲလဲၣ်.”

လံာ်စီၤၡမူၤအ့လးခံဘ့ၣ်တဘ့ၣ် 16:10 Iomraidhean Croise

လံာ်တၢ်ကဲထီၣ်အခီၣ်ထံး 50:20

သုကူၣ်ထီၣ်တၢ်အၢထီဒါယၤ, ဘၣ်ဆၣ်ဒီးကစၢ်ယွၤလဲလိာ်ကွံာ်အီၤဆူတၢ်အဂ့ၤ, ဒ်သိးပှၤဂီၢ်မုၢ်အါဂၤလၢအအိၣ်မူတနံၤအံၤအသးသမူတဖၣ်, ကဘၣ်တၢ်ပာ်ကီၤအီၤလၢတၢ်မၤတ့ၢ်အသးအဃိလီၤ.

လံာ်စီၤၡမူၤအ့လးခံဘ့ၣ်တဘ့ၣ် 19:22

ဘၣ်ဆၣ်ဒီး, စီၤဒၤဝံးစံးဘၣ်စီၤအဘံၡဲၤဒီးအဒီပုၢ်ဝဲၢ်ခွါစီၤယိၤအာ်ဒ်အံၤ, “မတၤတဂၤဃ့သုတၢ်ဟ့ၣ်ကူၣ်န့ၣ်လဲၣ်. မ့ၢ်သုအဲၣ်ဒိးဟ့ၣ်ယၤတၢ်ကီတၢ်ခဲဧါ. ခဲအံၤယမ့ၢ်ပှၤတဂၤလၢ အကဲကီၢ်အံၣ်စရ့လးအစီၤပၤလီၤ. ဒီးတနံၤအံၤပှၤတဘၣ်မၤသံပှၤအံၣ်စရ့လးဖိနီတဂၤဘၣ်.”

လံာ်စီၤၡမူၤအ့လးခံဘ့ၣ်တဘ့ၣ် 19:23

ဒီးအဝဲစံးဘၣ်စီၤၡံမံၤ, “ယဆိၣ်တၢ်ဒီးနၤလၢနတဘၣ်တၢ်မၤသံ ဘၣ်နၤဘၣ်.”

လံာ်စီၤၡမူၤအ့လးခံဘ့ၣ်တဘ့ၣ် 3:39

ယမ့ၢ်စီၤပၤတဂၤလၢကစၢ်ယွၤဃုထၢတ့ၢ်ဒၣ်လဲာ်န့ၣ်တနံၤအံၤ ယဂံၢ်ယဘါစၢ်လီၤ. နီၢ်စရူယၤအဖိခွါတဖၣ်အံၤဆူၣ်စိးအၢသီကဲၣ်ဆိးလၢယဂီၢ်လီၤ. မ်ယွၤစံၣ်ညီၣ်ပှၤအအၢအသီတဖၣ်အံၤဒ်အဝဲသ့ၣ်ကြၢးဒိးဘၣ်ဝဲ အသိးန့ၣ်တက့ၢ်.”

လံာ်စီၤပၤအခီၣ်ထံးတဘ့ၣ် 17:18

အဝဲစံးဘၣ်စီၤအ့ၤလံယၤ, “ကစၢ်ယွၤအပှၤကညီတဂၤဧၢ, နမၤဘၣ်ယၤတၢ်အံၤဘၣ်မနုၤအဃိလဲၣ်. မ့ၢ်နဟဲဖဲအံၤဒ်သိး နကဒုးသ့ၣ်နီၣ်ကစၢ်ယွၤလၢယတၢ်ဒဲးဘးတဖၣ်ဒီးလၢတၢ်န့ၣ်အဃိ ကဒုးအိၣ်ထီၣ်ယဖိခွါအတၢ်သံန့ၣ်ဧါ.”

လံာ်စီၤပၤအခီၣ်ထံးတဘ့ၣ် 2:5

တၢ်အိၣ်ဒံးအဂၤတမံၤန့ၣ်လီၤ. နသ့ၣ်နီၣ်ထီၣ်တၢ်လၢစီၤယိၤအာ် မၤဘၣ်တ့ၢ်ယၤခီဖျိမၤသံသုးခိၣ်ဖးဒိၣ်ခံဂၤလၢအံၣ်စရ့လး အသုးမုၢ်အပူၤလၢအမ့ၢ်ဝဲ, စီၤန့ၢ်အဖိခွါစီၤအဘံန့ၢ်, ဒီးစီၤယ့သ့ၢ်အဖိခွါစီၤဧမါစၤလီၤ. နသ့ၣ်နီၣ်ထီၣ်လၢအဝဲမၤသံတ့ၢ်အဝဲသ့ၣ်လၢတၢ်မုာ်တၢ်ခုၣ်အကတီၢ် ဒ်လဲၣ်, ဒ်တၢ်ဟ့ၣ်ကၣ်အသိးလၢတၢ်သံတဖၣ်လၢအဝဲသ့ၣ်မၤဘၣ်တ့ၢ်ဝဲဖဲတၢ် ဒုးတၢ်ယၤအကတီၢ်အဃိန့ၣ်လီၤ. အဝဲမၤသံကွံာ်ပှၤလၢအတၢ်ကမၣ်တအိၣ်တဖၣ်, ဒီးယဟံးန့ၢ်မူဒါလၢတၢ်လၢအဝဲအမၤတ့ၢ်ဝဲအဂီၢ်အဃိ, ခဲကနံၣ်အံၤယတူၢ်ဘၣ်က့ၤယဲတၢ်မၤအသးတဖၣ်လၢအပိာ်ထွဲထီၣ်အခံ န့ၣ်လီၤ.

လံာ်စီၤပၤခံဘ့ၣ်တဘ့ၣ် 18:25

မ့ၢ်သုဆိကမိၣ်လၢ, ယဟဲထီၣ်ဒုးသုထံသုကီၢ်ဒီးမၤဟးဂီၤ ကွံာ်အီၤန့ၣ်, တအိၣ်ဘၣ်ဒီးယွၤအတၢ်မၤစၢၤဘၣ်န့ၣ်ဧါ. ယွၤအကစၢ်ဒၣ်ဝဲတဲဘၣ်ယၤလၢယကလဲၤထီၣ်ဒုးအီၤဒီးမၤဟးဂီၤ ကွံာ်အီၤန့ၣ်လီၤ.

လံာ်စီၤယိၤဘး 9:12

အဝဲဟံးထီၣ်ကွံာ်တၢ်လၢအသးလီဝဲဒီးပှၤတြီအီၤတသ့ နီတဂၤဘၣ်န့ၣ်လီၤ. ပှၤသံကွၢ်အီၤလၢ, “နမၤတၢ်မနုၤလဲၣ်” န့ၣ်တဘူၣ်နီတဂၤဘၣ်န့ၣ်လီၤ.

စံးထီၣ်ပတြၢၤ 39:9

ယအိၣ်တအုၣ်လီၤ. ယတအဲးထီၣ်ယထးခိၣ်ဘၣ်. အဂ့ၢ်ဒ်အံၤ, တၢ်အံၤမ့ၢ်တၢ်လၢနမၤတ့ၢ်နဲလီၤ.

လံာ်ပှၤစံၣ်တဲၤတဲလီၤတၢ် 8:4

စီၤပၤမၤတၢ်လၢတၢ်စိတၢ်ကမီၤလီၤ. ဒီးတၢ်လၢအမၤဝဲန့ၣ်, ပှၤတၤအီၤတသ့ဘၣ်နီတဂၤဘၣ်.

လံာ်သးသယုၢ်တၢ် 3:37

ယွၤမ့ၢ်တဘၣ်သူၣ်ဘၣ်သးဘၣ်ဒီးပှၤဒုးကဲထီၣ်လိၣ်ထီၣ်တၢ် တသ့ဘၣ်နီတမံၤနီတဂၤဘၣ်.

လံာ်ဒၤနံးယ့လး 4:35

ကယဲၢ်ပှၤအိၣ်လၢဟီၣ်ခိၣ်ချၢခဲလၢာ်န့ၣ်ပာ်ဝဲဒ်တမ့ၢ် တၢ်နီတမံၤအသိး, ဒီးမၤတၢ်ဖဲအတၢ်ဘၣ်အသးဒၣ်ဝဲလၢမူခိၣ် တၢ်သုးမုၢ်ဂီၢ်မုၢ်အကျါ, ဒီးလၢပှၤအိၣ်လၢဟီၣ်ခိၣ်ချၢတဖၣ် အကျါန့ၣ်လီၤ. ပှၤတြီအစုမ့ၢ်ဂ့ၤ, သံကွၢ်အီၤမ့ၢ်နမၤတၢ်မနုၤလဲၣ်မ့ၢ်ဂ့ၤ တန့ၢ်ဘၣ်နီတဂၤဘၣ်.

လံာ်မးသဲ 16:23

ယ့ၣ်ၡူးဃၣ်အသးဒီးစံးဘၣ်စီၤပ့းတရူး, “မုၣ်ကီၤလံၢ်ဧၢ, ဟးဖးဒီးယၤတက့ၢ်. နမ့ၢ်ပှၤလၢအမၤတံာ်တာ်ယကျဲလီၤ. အဂ့ၢ်ဒ်အံၤ, နတၢ်ဆိကမိၣ်အံၤတမ့ၢ်တၢ်ဟဲလၢယွၤအအိၣ်ဘၣ်. မ့ၢ်တၢ်ဘၣ်ဃးဒီးပှၤကညီလီၤ.”

လံာ်မးသဲ 8:29

တုၤအထံၣ်ယ့ၣ်ၡူးတဘျီဃီ အဝဲသ့ၣ်ကိးပသူထီၣ်ဒီးစံး, “ကစၢ်ယွၤအဖိခွါနၤဧၢ, နဘၣ်ဃးဒီးပှၤဒ်လဲၣ်. မ့ၢ်နဟဲလၢနကစံၣ်ညီၣ်မၤနးမၤဖှီၣ်ပှၤ တချုးလၢတၢ်အဆၢကတီၢ်ဘၣ်ဝဲန့ၣ်ဧါ.”

လံာ်ယိၤဟၣ် 18:11

ယ့ၣ်ၡူးစံးဘၣ်စီၤပ့းတရူး, “ဖျီၣ်နုာ်က့ၤနနးဆူအတြိးပူၤန့ၣ် တက့ၢ်. မ့ၢ်ယတဘၣ်အီတၢ်နးတၢ်ဖှီၣ်အလီခီလၢယပၢ်ဟ့ၣ်လီၤ ယၤန့ၣ်ဘၣ်ဧါ.”

ရိမ့ၤ 9:20

ဘၣ်ဆၣ်ဒီးပှၤကညီနၤဧၢ, နမ့ၢ်မတၤတဂၤလၢအကကတိၤ ဆၢက့ၤကစၢ်ယွၤန့ၣ်လဲၣ်. သပၢၤဟီၣ်ခိၣ်တဖျၢၣ်တသံကွၢ် က့ၤပှၤလၢအတ့အီၤတဂၤ, “ဘၣ်မနုၤအဃိနတ့ယၤဒ်အံၤလဲၣ်” န့ၣ်ဘၣ်.

၁ ပ့းတရူး 2:23

ဖဲအဝဲဘၣ်တၢ်ကတိၤဒုၣ်ဒွဲၣ်အီၤန့ၣ်, အဝဲတကတိၤဒုၣ်ဒွဲၣ်ဆၢ က့ၤတၢ်ဘၣ်. ဖဲအဝဲတူၢ်ဘၣ်တၢ်နးတၢ်ဖှီၣ်န့ၣ်, အဝဲတမၤ ပျံၤမၤဖုးက့ၤတၢ်ဘၣ်. မ့မ့ၢ်တခီပာ်အတၢ်မုၢ်လၢ်တဖၣ်လၢ ကစၢ်ယွၤ, ပှၤစံၣ်ညီၣ်တီတၢ်တဂၤအပူၤန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 26:19

စီၤပၤဖးဒိၣ်ဧၢ, ဒိကနၣ်တၢ်လၢယဘၣ်ကတိၤအီၤန့ၣ်တက့ၢ်. ယွၤမ့မ့ၢ်ပှၤလၢအဒုးဃၣ်နသးထီဒါယၤဒီးတၢ်လုၢ်မၤဘူၣ်တမံၤ ကဒုးလဲလိာ်ကွံာ်အသးလီၤ. ဘၣ်ဆၣ်ဒီးမ့မ့ၢ်တၢ်လၢပှၤကညီ တဖၣ်မၤတ့ၢ်အီၤဒီးမ်ယွၤအတၢ်ဆိၣ်အၢလီၤလၢအဝဲသ့ၣ်အဖီခိၣ်တက့ၢ်. အဂ့ၢ်ဒ်အံၤ, အဝဲသ့ၣ်နီၣ်ထုးထီၣ်ကွံာ်ယၤလၢယွၤအကီၢ်ပူၤ, ဆူကီၢ်တဘ့ၣ်လၢယဘါထီၣ်သ့ထဲပှၤတခီဘီမုၢ်ဖိအကစၢ်တဖၣ်ဧိၤန့ၣ်လီၤ.