၂ ပ့းတရူး 1:6 - Sgaw Karen Common Bible

⁶ လၢတၢ်သ့ၣ်ညါအမဲာ်ညါပာ်ဖှိၣ်အါထီၣ်တၢ်ကီၤသူၣ် ကီၤသး, ဒီးလၢတၢ်ကီၤသူၣ်ကီၤသးအမဲာ်ညါပာ်ဖှိၣ် အါထီၣ်တၢ်သ့တူၢ်တၢ်, ဒီးလၢတၢ်သ့တူၢ်တၢ်အမဲာ်ညါပာ်ဖှိၣ်အါထီၣ်တၢ်အဲၣ် ထူအဲၣ်ယွၤ,

၂ ပ့းတရူး 1:6 Iomraidhean Croise

လံာ်တၢ်ကဲထီၣ်အခီၣ်ထံး 5:24

အဝဲအိၣ်မူတ့ၢ်ဝဲလၢတၢ်ရ့လိာ်အသးဒီးကစၢ်ယွၤအပူၤ, ဝံၤဒီးတၢ်တထံၣ်အီၤလၢၤဘၣ်. အဂ့ၢ်ဒ်အံၤ, ယွၤစိာ်ထီၣ်ကွံာ်အီၤန့ၣ်လီၤ.

စံးထီၣ်ပတြၢၤ 37:7

အိၣ်ဃိကလာ်လၢယွၤအမဲာ်ညါ, ဒီးခိးအီၤလၢတၢ်ဝံသးစူၤအပူၤန့ၣ်တက့ၢ်. ဘၣ်ကိၢ်ဘၣ်ဂီၤလၢ ပှၤလၢအဘီၣ်ထီၣ်ညီထီၣ်လၢအကျဲဒၣ်ဝဲ, မ့တမ့ၢ်ပှၤလၢအမၤန့ၢ်တၢ်လၢ အတၢ်ကူၣ်အၢအဃိန့ၣ်တဂ့ၤ.

လံာ်ယၡါယၤ 57:1

ပှၤအဂ့ၤတဖၣ်သံဝဲ, ဒီးပှၤတသ့ၣ်ညါနၢ်ပၢၢ်ဒီးပာ်သူၣ်ပာ်သး လၢအဂ့ၢ်နီတဂၤဒၣ်လဲာ်ဘၣ်. ဘၣ်ဆၣ်ဖဲအဝဲသ့ၣ်သံဝဲန့ၣ်, တၢ်တတၢးတနါမၤဘၣ်ဒိဘၣ်ထံးအဝဲသ့ၣ်တသ့နီတမံၤဘၣ်.

လံာ်လူၤကၣ် 21:19

အိၣ်ဆၢထၢၣ်ဂၢၢ်ဂၢၢ်ကျၢၤကျၢၤတက့ၢ်. အဂ့ၢ်ဒ်အံၤ, လၢကျဲဒ်အံၤအပူၤ, သုကအုၣ်က့ၤခီၣ်က့ၤသုနီၢ်ကစၢ်ဒၣ်သုဝဲလီၤ.

လံာ်လူၤကၣ် 8:15

တၢ်ချံလၢအလီၤဘၣ်လၢဟီၣ်ခိၣ်ညၣ်ထ့ၣ်အဂ့ၤပာ်ဖျါထီၣ်ပှၤ တဖၣ်လၢအနၢ်ဟူဘၣ်တၢ်အကလုၢ်ကထါဒီးဟံးဃာ်ဂၢၢ်ကျၢၤ ဝဲလၢသးလၢအဂ့ၤဒီးစူၢ်ယွၤအကလုၢ်အပူၤဒီးမၤဝဲဒ်န့ၣ်သပှၢ် ပှၢ်တုၤအဝဲသ့ၣ်သၣ်ထီၣ်တၤသၣ်တစုလီၤ.

မၤတၢ် 24:25

ဘၣ်ဆၣ်ဒီးဖဲစီၤပီလူးကတိၤကဒီးတၢ်ဘၣ်ဃးတၢ်ဂ့ၤတၢ်ဝါ, တၢ်ပၢၤသူၣ်ပၢၤသးဒီးမုၢ်စံၣ်ညီၣ်နံၤလၢအကဟဲအဂ့ၢ်န့ၣ်, စီၤဖ့လံးပျံၤတၢ်ဒီးစံးဝဲ, “နက့ၤသ့လံ. ယတၢ်ဆၢကတီၢ်မ့ၢ်အိၣ်န့ၣ်, ယကကိးဒံးနၤလီၤ.”

ရိမ့ၤ 15:4

တၢ်ကိးမံၤဒဲးလၢတၢ်ကွဲးအသးစီဆှံအပူၤန့ၣ်ဘၣ်တၢ် ကွဲးအီၤလၢတၢ်ကသိၣ်လိပှၤအဂီၢ်, ဒ်သိးပကအိၣ်ဒီးတၢ်မုၢ်လၢ်ခီဖျိတၢ်ကွဲးအသးစီဆှံ အတၢ်ဟ့ၣ်ပှၤတၢ်သူၣ်စူၤသးစူၤဒီးတၢ်ဟ့ၣ်ဂံၢ်ဟ့ၣ်ဘါအဃိ န့ၣ်လီၤ.

ရိမ့ၤ 2:7

ပှၤတနီၤမၤတၢ်ဂ့ၤတၢ်ဝါတထံၣ်ဃီ, ဒီးဃုတၢ်လၤတၢ်ကပီၤ, တၢ်ယူးယီၣ်, ဒီးသးလၢအသံတသ့ဘၣ်လီၤ. ကစၢ်ယွၤကဟ့ၣ်တၢ်မူအထူအယိာ်လၢပှၤဒ်န့ၣ်သိးတဖၣ်လီၤ.

ရိမ့ၤ 8:25

ဘၣ်ဆၣ်ဒီးတၢ်လၢပတထံၣ်ဘၣ်အီၤန့ၣ်ပမ့ၢ်မုၢ်လၢ်အီၤဒီး, ပအိၣ်ခိးကွၢ်လၢ်အီၤလၢတၢ်ဝံသးစူၤအပူၤန့ၣ်လီၤ.

1 ကရံၣ်သူး 9:25

ပှၤလိာ်ကွဲဖိကိးဂၤဒဲး, ဖဲအမၤလ့ၤအသးအဆၢကတီၢ်န့ၣ်, ဟ့ၣ်လီၤအသးဆူတၢ်ဒိကနၣ်ဃံးဃံးဒ်သိးအကဘၣ်တၢ်ဒုးကုာ် ထီၣ်အီၤဖီကွီၤလၢအတအိၣ်ကၢအိၣ်ခိးဘၣ်တကွီၤလီၤ. မ့မ့ၢ်ပဝဲသ့ၣ် တဖၣ် ပမၤပဝဲလၢဖီကွီၤတကွီၤလၢအအိၣ်ကၢအိၣ်ခိးလီၤထူလီၤယိာ် အဂီၢ်န့ၣ်လီၤ.

၂ ကရံၣ်သူး 6:4

အခိၣ်တလိာ်လၢတၢ်ကိးမံၤဒဲးလၢပမၤအီၤအပူၤန့ၣ် ပဒုးနဲၣ်လၢပမ့ၢ်ကစၢ်ယွၤအခ့အပှၤတဖၣ်ခီဖျိပတူၢ်တၢ်ကီတၢ်ခဲ တၢ်ဖှီၣ်တၢ်ယာ်ဒီးတၢ်နးတၢ်ဖှီၣ်တဖၣ် လၢတၢ်သူၣ်စူၤသးစူၤ အပူၤန့ၣ်လီၤ.

ကလၤတံ 5:23

တၢ်ဆီၣ်လီၤသး, ဒီးတၢ်ပၢၤသူၣ်ပၢၤသးတဖၣ်န့ၣ်လီၤ. တၢ်သိၣ်တၢ်သီလၢအကထီဒါတၢ်ဒ်သိးအံၤတဖၣ်တအိၣ် ဝဲနီတထံၣ်ဘၣ်.

ကလီးစဲ 1:11

မ်သုဘၣ်တၢ်ဟ့ၣ်ဂံၢ်ဟ့ၣ်ဘါသုလၢတၢ်စိတၢ်ကမီၤခဲလၢာ်လၢ အဟဲလၢယွၤ, လၢအအိၣ်ပှဲၤမးဒီးအလၤကပီၤ, ဒ်သိးသုတူၢ်တၢ်ကိးမံၤဒဲးလၢတၢ်သူၣ်စူၤသးစူၤအပူၤကန့ၢ် အဂီၢ်,

၁ သ့းစၤလနံ 1:3

တဘျီလၢ်လၢ်ဖဲပဃ့ဘါထုကဖၣ်တၢ်ဆူပကစၢ်ယွၤဒီးပပၢ် အအိၣ်န့ၣ်, ပသ့ၣ်နီၣ်ထီၣ်သုအိၣ်မူမၤထွဲသုတၢ်စူၢ်တၢ်နာ် အခံဒ်လဲၣ်, သုဖံးသုမၤတၢ်ဆူၣ်ဆူၣ်လၢတၢ်အဲၣ်အဃိဒ်လဲၣ်, ဒီးသုတၢ်မုၢ်လၢ်လၢပကစၢ်ယ့ၣ်ၡူးခရံာ်အပူၤဂၢၢ်ကျၢၤဒ်လဲၣ် အဂ့ၢ်န့ၣ်လီၤ.

၂ သ့းစၤလနံ 1:4

လၢတၢ်န့ၣ်အဃိ, ပနီၢ်ကစၢ်ဒၣ်ပဝဲပကတိၤတၢ်လၢသုဂ့ၢ် အိၣ်ဒီးတၢ်ပာ်ကဖၢလၢပသးလၢသုဃိ, လၢကစၢ်ယွၤ အတၢ်အိၣ်ဖှိၣ်တဖၣ်အပူၤ, ဘၣ်ဃးသုတၢ်အိၣ်ဂၢၢ်အိၣ်ကျၢၤဒီးသုတၢ်နာ်ဖဲသုလဲၤခီဖျိ ကယဲၢ်တၢ်မၤအၢမၤနးဒီးတၢ်နးတၢ်ဖှီၣ်တဖၣ်န့ၣ်လီၤ.

၂ သ့းစၤလနံ 3:5

မ်ကစၢ်ဆှၢသုဆူတၢ်သ့ၣ်ညါနၢ်ပၢၢ်အါထီၣ်ကစၢ်ယွၤ အတၢ်အဲၣ်တၢ်ကွံဒီးတၢ်သ့တူၢ်တၢ်လၢအဟဲလၢခရံာ် အအိၣ်န့ၣ်တက့ၢ်.

၁ တံၤမသ့း 2:10

မ့မ့ၢ်, လၢအဝဲသ့ၣ်ကမၤတၢ်မၤအဂ့ၤတဖၣ်လၢအကြၢးဒီး ပိာ်မုၣ်လၢအစံးလီၤအသးလၢအအဲၣ်ထူအဲၣ်ယွၤန့ၣ်လီၤ.

၁ တံၤမသ့း 2:2

လၢစီၤပၤတဖၣ်အဂီၢ်ဒီးပဒိၣ်ပပှၢ်ခဲလၢာ်အဂီၢ်, ဒ်သိးပကအိၣ်မူဘၣ်ခုၣ်ခုၣ်မုာ်မုာ်လၢတၢ်ယူးယီၣ် ကစၢ်ယွၤဒီးလၢတၢ်လီၤယူးယီၣ်ပာ်ကဲလၢကျဲကိးဘိ ဒဲးအပူၤအဂီၢ်န့ၣ်တက့ၢ်.

၁ တံၤမသ့း 3:16

ပတၢ်ဘူၣ်တၢ်ဘါအတၢ်ခူသူၣ်အံၤဒိၣ်ဝဲယိာ်ဝဲထဲလဲၣ်ထဲလဲၣ် န့ၣ်, ပှၤသမၢဝဲတသ့နီတဂၤဘၣ်. ယွၤအိၣ်ဖျါထီၣ်လၢပှၤကညီအက့ၢ်အဂီၤ, ဘၣ်တၢ်ပာ်တီပာ်လိၤအီၤလၢယွၤအသး, ဒီးဘၣ်တၢ်ထံၣ်ဘၣ်အီၤလၢမူခိၣ်ကလူးတဖၣ်န့ၣ်လီၤ. အဂ့ၢ်ဘၣ်တၢ်စံၣ်တဲၤတဲလီၤအီၤလၢ ပှၤကလုာ်တဖၣ်အကျါ, ဘၣ်တၢ်စူၢ်က့ၤနာ်က့ၤအီၤသကုၤဟီၣ်ခိၣ်ချၢ, ဒီးဘၣ်တၢ်စိာ်ထီၣ်အီၤဆူမူခိၣ်န့ၣ်လီၤ.

၁ တံၤမသ့း 6:11

မ့မ့ၢ်နဲဒၣ်, ကစၢ်ယွၤအပှၤကညီဧၢ, ပဒ့ၣ်ဟးဆှဲးတၢ်သ့ၣ်တဖၣ်အံၤခဲလၢာ်တက့ၢ်. ဂုာ်ကျဲးစၢးဒ်သိးနကအိၣ်ဒီးတၢ်တီတၢ်လိၤ, တၢ်အဲၣ်ထူအဲၣ်ယွၤ, တၢ်စူၢ်တၢ်နာ်, တၢ်အဲၣ်တၢ်ကွံ, တၢ်သ့တူၢ်တၢ်, ဒီးတၢ်သူၣ်ကပုာ်သးကပုာ်သ့ၣ်တဖၣ်န့ၣ်တက့ၢ်.

၁ တံၤမသ့း 6:3

ပှၤတဂၤဂ့ၤတဂၤဂ့ၤလၢအသိၣ်လိသီလိတၢ်စူၢ်တၢ်နာ်လီၤ ဆီလၢအတလီၤပလိာ်ဒီးပကစၢ်ယ့ၣ်ၡူးခရံာ်အတၢ်ကတိၤ အမ့ၢ်အတီတဖၣ်, ဒီးတလီၤပလိာ်ဒီးပတၢ်ဘူၣ်တၢ်ဘါ အတၢ်သိၣ်လိသီလိန့ၣ်,

၁ တံၤမသ့း 6:6

မ့ၢ်လံ, ပှၤတဂၤမ့ၢ်သးမံလၢတၢ်လၢအအိၣ်ဒီးအီၤန့ၣ်, တၢ်ယူးယီၣ်ယွၤဒုးထူးထီၣ်တီၤထီၣ်အီၤစဲဃဲၤန့ၣ်လီၤ.

၂ တံၤမသ့း 3:5

အဝဲသ့ၣ်ကဟံးဃာ်ပတၢ်ဘူၣ်တၢ်ဘါအလုၢ်အလၢ်လၢ အဖျါလၢခိ, ဘၣ်ဆၣ်ဒီးတတူၢ်လိာ်ဝဲအတၢ်စိကမီၤနီၢ်နီၢ် န့ၣ်ဘၣ်. ဟးဆှဲးပှၤဒ်န့ၣ်အသိးတဖၣ်တက့ၢ်.

တံတူး 1:1

လံာ်ပရၢအံၤဟဲလၢ, ကစၢ်ယွၤအခ့အပှၤဒီးယ့ၣ်ၡူးခရံာ်အပှၤ တၢ်မၢဖိစီၤပီလူးအအိၣ်လီၤ. ယဘၣ်တၢ်ဃုထၢဒီးမၢလီၤယၤဒ်သိးယကမၤစၢၤကစၢ်ယွၤ အပှၤဃုထၢဖိတဖၣ်အတၢ်စူၢ်တၢ်နာ်, ဒီးဆှၢအဝဲသ့ၣ်ဆူတၢ်မ့ၢ်တၢ်တီလၢအဘၣ်တၢ်သိၣ်လိအီၤလၢ ပတၢ်ဘူၣ်တၢ်ဘါ,

တံတူး 1:8

အဝဲကဘၣ်အဲၣ်တူၢ်တံၢ်တူၢ်သမှံၤ, ဒီးအဲၣ်တၢ်လၢအဂ့ၤအဝါ န့ၣ်လီၤ. အဝဲကဘၣ်ပၢၤအသး, တီလိၤ, စီဆှံ, ဒီးကီၤသူၣ်ကီၤသး န့ၣ်လီၤ.

တံတူး 2:2

သိၣ်လိပှၤလၢအသးပှၢ်တဖၣ်လၢကပာ်အသးသညူးသပှၢ်, ကအိၣ်မူကဒုလီၤတံၢ်, ဒီးကပၢၤသူၣ်ပၢၤသးအဂီၢ်န့ၣ်တက့ၢ်. အဝဲသ့ၣ်ကဘၣ်အိၣ်ဒီးတၢ်စူၢ်တၢ်နာ်အမ့ၢ်အတီ, တၢ်အဲၣ်တၢ်ကွံ, ဒီးတၢ်သ့တူၢ်တၢ်န့ၣ်လီၤ.

ဧ့ၤဘြံၤ 10:36

သုကဘၣ်ဝံသးစူၤဒီးတူၢ်တၢ်ဒ်သိးသုကမၤတၢ်ဘၣ်ကစၢ်ယွၤ အသးဝံၤ, ဒီးဒိးန့ၢ်ဘၣ်တၢ်လၢအဘၣ်တၢ်စံးပာ်တ့ၢ်အီၤန့ၣ်လီၤ.

ဧ့ၤဘြံၤ 12:1

မၤသးဒ်န့ၣ်ဒီး, ပအိၣ်ဒီးပှၤအုၣ်အသးအါမးဝးတရံးပှၤသတးဒီး မ်ပပာ်လီၤကွံာ်ကယဲၢ်တၢ်အဃၢတမံၤလၢ်လၢ်ဒီးတၢ်ဒဲးဘးလၢ အအိၣ်စဲဘူးဒီးပှၤ, ဝံၤတၢ်ဃ့ၢ်လၢအအိၣ်လၢပမဲာ်ညါန့ၣ်, မ်ပဃ့ၢ်သကိးလၢတၢ်သးစူၤအပူၤန့ၣ်တက့ၢ်.

ဧ့ၤဘြံၤ 6:12

မ်သုသုတကၢၣ်တကျူတဂ့ၤ, မ့မ့ၢ်မ်သုကကွၢ်လိမၤ ဒိးပှၤလၢအနာ်တၢ်ဒီးဝံသးစူၤတၢ်ဒီးန့ၢ်သါဃုာ်တၢ်လၢ ကစၢ်ယွၤစံးပာ်တ့ၢ်ဝဲတဖၣ်န့ၣ်တက့ၢ်.

ဧ့ၤဘြံၤ 6:15

စီၤအၤဘြၤဟၣ်အသူၣ်စူၤသးစူၤသတးဒီးဒိးန့ၢ်တၢ်စံးပာ် န့ၣ်လီၤ.

၂ ပ့းတရူး 1:3

ကစၢ်ယွၤအတၢ်စိကမီၤဟ့ၣ်လီၤပှၤတၢ်ခဲလၢာ်လၢပလိၣ် ဘၣ်အီၤ, ဒ်သိးပကအိၣ်မူတၢ်အဲၣ်ထူအဲၣ်ယွၤအတၢ်အိၣ် မူနီၢ်နီၢ်ခီဖျိပတၢ်သ့ၣ်ညါပှၤလၢအကိးန့ၢ်ပှၤ, ဒ်သိးကဒိးန့ၢ်ဃုာ်အလၤကပီၤဒီးအတၢ်ဂ့ၤတၢ်ဝါတဂၤ န့ၣ်လီၤ.

၂ ပ့းတရူး 3:11

မ့ၢ်လၢတၢ်သ့ၣ်တဖၣ်အံၤခဲလၢာ်ကဘၣ်တၢ်မၤဟးဂီၤကွံာ် အီၤလၢကျဲဒ်အံၤအဃိ, သုကြၢးမ့ၢ်ပှၤဒ်လဲၣ်, သုတၢ်အိၣ်မူတဖၣ်ကြၢးစီဆှံဝဲဒီးကြၢးဘၣ်တၢ်ပာ်စီဆှံ အီၤလၢကစၢ်ယွၤအဂီၢ်,

လံာ်လီၣ်ဖျါ 1:9

ယမ့ၢ်ယဲစီၤယိၤဟၣ်, သုဒီပုၢ်ဝဲၢ်, ဒီးဒ်ပှၤပိာ်ယ့ၣ်ၡူးအခံတဂၤ အသိးန့ၣ်, ယမ့ၢ်သုတံၤသကိးလၢအတူၢ်သကိးတၢ်ဒီးသုလၢ တၢ်သးစူၤအပူၤ, တၢ်တူၢ်ဘၣ်တၢ်မၤအၢမၤနးလၢအတုၤအိၣ်ပှၤတဖၣ်လၢ အဘၣ်ဃးဒီးအဝဲဒၣ်အဘီအမုၢ်န့ၣ်လီၤ. ယဘၣ်တၢ်ပာ်ယၤလၢကီးပးမူးမ့ၢ်လၢယစံၣ်တဲၤတဲလီၤတ့ၢ်ယဲ ကစၢ်ယွၤအကလုၢ်ကထါ, ဒီးယအုၣ်တ့ၢ်ယသးလၢယ့ၣ်ၡူး အဂ့ၢ်အဃိန့ၣ်လီၤ.

လံာ်လီၣ်ဖျါ 13:10

ပှၤတဂၤလၢ်လၢ်လၢတၢ်တိာ်ပာ်လၢတၢ်ကဘၣ်ဖီၣ်န့ၢ်အီၤန့ၣ် ကဘၣ်တၢ်ဖီၣ်န့ၢ်အီၤသပှၢ်ကတၢၢ်, ပှၤတဂၤလၢ်လၢ်လၢတၢ်တိာ်ပာ်လၢအကဘၣ်တၢ်မၤသံ အီၤလၢနးန့ၣ်, ကဘၣ်တၢ်မၤသံအီၤလၢနးသပှၢ်ကတၢၢ် လီၤ. အဝဲအံၤန့ၣ်အလီၢ်အိၣ်လၢကစၢ်ယွၤအပှၤဂီၢ်မုၢ်တဖၣ် ကဝံသးစူၤတူၢ်တၢ်ဒီးကစူၢ်တၢ်နာ်တၢ်လီၤ.

လံာ်လီၣ်ဖျါ 14:12

ဖဲအံၤန့ၣ်အလီၢ်အိၣ်လၢကစၢ်ယွၤအပှၤဂီၢ်မုၢ်တဖၣ်, ပှၤလၢအဒိကနၣ်ဒီးအိၣ်မူထွဲကစၢ်ယွၤအတၢ်မၤလိာ်တဖၣ် ဒီးတီလၢယ့ၣ်ၡူးန့ၣ်, ကတူၢ်တၢ်လၢတၢ်သူၣ်စူၤသးစူၤအပူၤလီၤ.

လံာ်လီၣ်ဖျါ 2:2

ယသ့ၣ်ညါတၢ်လၢနမၤတ့ၢ်နဲတဖၣ်လီၤ. ယသ့ၣ်ညါဘၣ်ဃးနဖံးတၢ်မၤတၢ်ဆူၣ်ဆံးအါ, ဒီးနသူၣ်စူၤသးစူၤတ့ၢ်နဲဆံးအါအဂ့ၢ်လီၤ. ယသ့ၣ်ညါလၢနပျဲပှၤအၢပှၤသီတဖၣ်မၤဖဲအသးဒၣ်ဝဲန့ၣ် တကဲဘၣ်. ဒီးလၢနမၤကွၢ်တ့ၢ်နဲပှၤတဖၣ်လၢအစံးလၢ အမ့ၢ်ပှၤတၢ်မၢဖိတဖၣ်ဘၣ်ဆၣ်တမ့ၢ်ဘၣ်, ဒီးနသ့ၣ်ညါဘၣ်တ့ၢ်နဲလၢအဝဲသ့ၣ်မ့ၢ်ပှၤလီတၢ်ဖိတဖၣ် န့ၣ်လီၤ.