၂ ကရံၣ်သူး 4:6 - Sgaw Karen Common Bible

⁶ ကစၢ်ယွၤလၢအစံးဝဲ, “လၢတၢ်ခံးတၢ်နၤအပူၤန့ၣ်, တၢ်ကပီၤ ကကပီၤထီၣ်ဝဲ” န့ၣ်မ့ၢ်ကစၢ်ယွၤတဂၤဃီလၢအဒုးကပီၤလီၤအတၢ်ကပီၤလၢပသူၣ် ပသးတဖၣ်အပူၤ, ဒ်သိးအကဟဲစိာ်န့ၢ်ပှၤတၢ်သ့ၣ်ညါဘၣ်ဃး ဒီးယွၤအလၤကပီၤလၢအကပီၤထီၣ်လၢခရံာ်အမဲာ်အလိၤန့ၣ်လီၤ.

၂ ကရံၣ်သူး 4:6 Iomraidhean Croise

လံာ်တၢ်ကဲထီၣ်အခီၣ်ထံး 1:3

ဒီးကစၢ်ယွၤခါလီၤအကလုၢ်, “မ်တၢ်ကပီၤအိၣ်ထီၣ်တက့ၢ်.” ဒီးတၢ်ကပီၤကဲထီၣ်ဝဲဒၣ်န့ၣ်လီၤ.

စံးထီၣ်ပတြၢၤ 63:2

ပျဲယထံၣ်ဘၣ်နၤလၢတၢ်လီၢ်စီဆှံအပူၤ, ပျဲယထံၣ်ဘၣ်နအိၣ်ဒီးတၢ်စိတၢ်ကမီၤ, ဒီးတၢ်လၤတၢ်ကပီၤထဲလဲၣ်န့ၣ်တက့ၢ်.

စံးထီၣ်ပတြၢၤ 74:16

နတ့လီၤမုၢ်ဆါဒီးမုၢ်နၤ, ဒီးနပာ်လီၤမုၢ်ဒီးလါလၢအလီၢ်ဒၣ်ဝဲန့ၣ်လီၤ.

စံးထီၣ်ပတြၢၤ 90:16

မ်နခ့နပှၤတဖၣ်ထံၣ်ဘၣ်နတၢ်ဖံးတၢ်မၤအဒိၣ်အမုၢ်တဖၣ်, မ်ပစၢၤပသွဲၣ်တဖၣ် ထံၣ်ဘၣ် နတၢ်လၤကပီၤဖးဒိၣ်တက့ၢ်.

လံာ်ယၡါယၤ 35:2

မဲးမုၢ်ခိၣ်ကသူၣ်ဝံၣ်သးဆၢဒီးကိးထီၣ်လၢတၢ်သးခုလီၤ. ကဖျါဃံဖျါလၤဒ်လဘၤနိၣ်အကစၢၢ်ကလိတဖၣ်အသိး, ဒီးဟီၣ်ခိၣ်ညၣ်ထ့ၣ်ကဂ့ၤဝဲဒ်ကၢ်မ့ၤလးဒီးၡၤရိၣ်အပျီတဖၣ် အသိးလီၤ. ပှၤကိးဂၤဒဲးကထံၣ်ဘၣ်ယွၤအတၢ်လီၤဘီလီၤမုၢ်, အတၢ်ဒိၣ်တၢ်မုၢ်ဒီးအစိကမီၤန့ၣ်လီၤ.

လံာ်ယၡါယၤ 40:5

အန့ၣ်ဒီး, ယွၤအလၤကပီၤကဘၣ်တၢ်လီၣ်ဖျါထီၣ်အီၤ, ဒီးကယဲၢ်ပှၤဟီၣ်ခိၣ်ဖိခဲလၢာ်ကထံၣ်ဘၣ်အီၤလီၤ. ယွၤအနီၢ်ကစၢ်ဒၣ်ဝဲအၢၣ်လီၤတ့ၢ်တၢ်အံၤလီၤ.”

လံာ်ယၡါယၤ 45:7

ယတ့လီၤတၢ်ကပီၤဒီးတၢ်ခံးခံမံၤလိာ်လီၤ. ယဟဲစိာ်တၢ်ဆိၣ်ဂ့ၤဒီးတၢ်တတၢးတနါခံမံၤလိာ်လီၤ. ယၤ, ယွၤန့ၣ်, မၤတၢ်သ့ၣ်တဖၣ်အံၤခဲလၢာ်လီၤ.

လံာ်ယၡါယၤ 60:2

ပှၤကလုာ်ဂၤတဖၣ်ကဘၣ်တၢ်ကးဘၢကွံာ်အီၤလၢ တၢ်ခံးတၢ်နၤ, ဘၣ်ဆၣ်ဒီးလၢနဖီခိၣ်န့ၣ်, ယွၤအတၢ်ကပီၤ, ကကပီၤထီၣ်ဝဲလီၤ. အမဲာ်အတၢ်ကပီၤဆှံကအိၣ်ဒီးနၤလီၤ.

လံာ်လူၤကၣ် 10:22

ယပၢ်ဟ့ၣ်လီၤလံယၤလၢတၢ်ကိးမံၤဒဲးလံ. ဖိခွါမ့ၢ်မတၤလဲၣ်န့ၣ်ပှၤတသ့ၣ်ညါနီတဂၤဘၣ်. ပှၤသ့ၣ်ညါမ့ၢ်ထဲပၢ်တဂၤဧိၤလီၤ. ဒီးပၢ်မ့ၢ်မတၤလဲၣ်န့ၣ်ပှၤတသ့ၣ်ညါနီတဂၤဘၣ်. ပှၤသ့ၣ်ညါမ့ၢ်ဝဲထဲဖိခွါဒီးပှၤသ့ၣ်တဖၣ်လၢဖိခွါသးအိၣ် ပာ်ဖျါထီၣ်ပၢ်လၢအီၤန့ၣ်လီၤ.”

လံာ်ယိၤဟၣ် 1:14

တၢ်ကလုၢ်န့ၣ်ကဲထီၣ်ပှၤကညီ, ဒီးလၢပှဲၤဝဲဒီးတၢ်ဘျုးတၢ်ဖှိၣ် ဒီးတၢ်မ့ၢ်တၢ်တီဒီးအိၣ်ဝဲဆိးဝဲလၢပကျါန့ၣ်လီၤ. ဒီးပထံၣ်ဘၣ်အလၤကပီၤလၢအဒိးန့ၢ်ဝဲဒ်ပၢ်အဖိခွါတဂၤဃီ အသိးန့ၣ်လီၤ.

လံာ်ယိၤဟၣ် 11:40

ယ့ၣ်ၡူးစံးဘၣ်အီၤ, “မ့ၢ်ယတတဲဘၣ်လံနၤလၢနမ့ၢ်နာ်တၢ်ဒီး နကထံၣ်ဘၣ်ကစၢ်ယွၤအလၤကပီၤန့ၣ်ဘၣ်ဧါ.”

လံာ်ယိၤဟၣ် 12:41

ဝံယၡါယၤစံးတၢ်အံၤမ့ၢ်လၢအဝဲထံၣ်ဘၣ်ယ့ၣ်ၡူးအလၤကပီၤ အဃိစံးကတိၤဝဲအဂ့ၢ်အကျိၤန့ၣ်လီၤ.

မၤတၢ် 26:18

နကဘၣ်အိးထီၣ်အဝဲသ့ၣ်အမဲာ်ချံဒီးဃၣ်ကွံာ်အဝဲသ့ၣ် လၢတၢ်ခံးတၢ်နၤဆူတၢ်ကပီၤ, ဒီးလၢမုၣ်ကီၤလံၢ်အစိကမီၤ ဆူကစၢ်ယွၤအစိကမီၤ, ဒ်သိးခီဖျိအဝဲသ့ၣ်တဖၣ်အတၢ်စူၢ် တၢ်နာ်လၢယပူၤန့ၣ်, အဝဲသ့ၣ်အတၢ်ကမၣ်ကဘၣ်တၢ်ပျၢ် ကွံာ်အီၤ, ဒီးကဒိးန့ၢ်ဘၣ်အလီၢ်လၢယွၤအပှၤဃုထၢဖိတဖၣ် အကျါန့ၣ်လီၤ.’

1 ကရံၣ်သူး 12:8

သးစီဆှံဟ့ၣ်ပှၤတဂၤတၢ်ကစီၣ်လၢအလၢပှဲၤဒီးတၢ်ကူၣ်ဘၣ်ကူၣ် သ့, ဖဲပှၤတဂၤဒၣ်ဘၣ်တၢ်ဟ့ၣ်အီၤတၢ်ကစီၣ်လၢပှဲၤဒီး တၢ်သ့ၣ်ညါနၢ်ပၢၢ်, လၢသးစီဆှံတဂၤဃီလီၤ.

၂ ကရံၣ်သူး 2:10

ဖဲသုပျၢ်ကွံာ်ပှၤတဂၤအတၢ်ကမၣ်လၢအမၤဝဲန့ၣ်, ယဲဒၣ်ယပျၢ်ကွံာ်အတၢ်ကမၣ်စ့ၢ်ကီးလီၤ. အဂ့ၢ်ဒ်အံၤ, အလီၢ်မ့ၢ်အိၣ်နီၢ်နီၢ်လၢယကဘၣ်ပျၢ်တၢ်ကမၣ်တမံၤ မံၤန့ၣ်, ယမၤအီၤလၢခရံာ်အမဲာ်ညါလၢသုဃိ,

၂ ကရံၣ်သူး 3:18

လၢတၢ်န့ၣ်အဃိ, ပဝဲကိးဒံကိးနီၢ်ဂၤဒဲးပမၤဖျါထီၣ်က့ၤကစၢ် အလၤကပီၤ, တအိၣ်ဒီးတၢ်မၤဘၢပမဲာ်ဘၣ်. ဒီးတၢ်လၤကပီၤ တမံၤဃီအဝဲန့ၣ်, ပျိာ်လဲလိာ်ကွံာ်ပှၤဆူတၢ်လီၤဂာ်ဒီးအီၤ, လၢအအိၣ်ဒီးတၢ်လၤကပီၤဒိၣ်ဒံးတက့ၢ်န့ၣ်လီၤ.

၂ ကရံၣ်သူး 4:4

အဝဲသ့ၣ်တစူၢ်တနာ်တၢ်ဘၣ်. အဂ့ၢ်မ့ၢ်လၢဟီၣ်ခိၣ်တဘ့ၣ်အံၤအကစၢ်လၢအအၢအသီ တဂၤပာ်အဝဲသ့ၣ်အသူၣ်အသးလၢတၢ်ခံးတၢ်နၤအပူၤ အဃိန့ၣ်လီၤ. အဝဲဒၣ်တြီဃာ်အဝဲသ့ၣ်ဒ်သိးအသုတထံၣ် ဘၣ်တၢ်ကပီၤလၢအကပီၤလီၤလၢအဝဲသ့ၣ်အလိၤ, တၢ်ကပီၤလၢအဟဲလၢတၢ်သးခုကစီၣ်ဘၣ်ဃးခရံာ် လၢအလီၤဂာ်ဒီးယွၤလၢလၢပှဲၤပှဲၤတဂၤအလၤကပီၤတဂ့ၤ န့ၣ်လီၤ.

အ့းဖ့းစူး 1:17

ဒ်သိးပကစၢ်ယ့ၣ်ၡူးခရံာ်အပၢ်, ပၢ်လၢအလၢပှဲၤဒီးတၢ်လၤကပီၤတဂၤကဟ့ၣ်လီၤသု သးစီဆှံလၢအကဒုးကူၣ်ဘၣ်ကူၣ်သ့သုဒီးလီၣ်ဖျါထီၣ် န့ၢ်သုလၢယွၤဒ်သိးသုကသ့ၣ်ညါအီၤအဂီၢ်န့ၣ်လီၤ.

အ့းဖ့းစူး 1:18

ယဃ့လၢသုသးအမဲာ်ကအိးထီၣ်အသးဒီးသုကထံၣ်အတၢ် ကပီၤ, ဒ်သိးဒီးသုကနၢ်ပၢၢ်အဝဲအတၢ်ကိးန့ၢ်သုဆူတၢ်မုၢ် လၢ်မနုၤတမံၤအအိၣ်လဲၣ်, ဒီးတၢ်ဆိၣ်ဂ့ၤလၢအဝဲတိာ်ပာ် ဒီးစံးပာ်လၢအကဟ့ၣ်အပှၤဂီၢ်မုၢ်န့ၣ်ထူးတီၤဆံးဒိၣ်လဲၣ်,

အ့းဖ့းစူး 5:8

တဘျီန့ၣ်သုအိၣ်မူတ့ၢ်သုဝဲလၢတၢ်ခံးတၢ်နၤအပူၤဘၣ်ဆၣ် ဒီး, ဒ်သုကဲထီၣ်တ့ၢ်လံယွၤအပှၤတကလုာ်အသိးန့ၣ်, သုတုၤက့ၤလၢတၢ်ကပီၤအပူၤလီၤ. လၢတၢ်န့ၣ်အဃိ, အိၣ်မူဒ်ပှၤတၢ်ကပီၤဖိအသိးန့ၣ်တက့ၢ်.

ဖံလံးပံၤ 2:6

အဝဲဒၣ်အိၣ်ဒီးကစၢ်ယွၤအက့ၢ်အဂီၤထီဘိ, ဘၣ်ဆၣ်ဒီးတဆိကမိၣ်ဝဲလၢအကြၢးဂုာ်ကျဲးစၢး ဟံးဃာ်တၢ်မ့ၢ်တၢ်ထဲသိးဒီးကစၢ်ယွၤန့ၣ်ဘၣ်.

ကလီးစဲ 1:15

ခရံာ်မ့ၢ်ကစၢ်ယွၤလၢပထံၣ်အီၤတသ့ဘၣ်တဂၤအက့ၢ်အဂီၤလီၤ. အဝဲမ့ၢ်ယွၤအဖိဝဲၢ်ကိလၢအအိၣ်ဆိဒီးအတီၤထီန့ၢ်တၢ်ဘၣ်တ့ အဂုၤအဂၤခဲလၢာ်န့ၣ်လီၤ.

၁ သ့းစၤလနံ 2:12

ပဟ့ၣ်ဆူၣ်ဒီးမၤမုာ်ထီၣ်သုသး, ဒီးပသဆၣ်ထီၣ်သုခံတဘိ ယူၢ်ဃီ, ဒ်သိးသုကအိၣ်မူတၢ်အိၣ်မူလၢအဘၣ်ကစၢ်ယွၤအသး, ယွၤလၢအကိးဃီၤသုဒ်သိးသုကဒိးန့ၢ်ဃုာ်သကိးအဝဲအဘီ အမုၢ်ဒီးအလၤကပီၤဒၣ်ဝဲန့ၣ်လီၤ.

ဧ့ၤဘြံၤ 1:3

အဝဲလီၣ်ဖျါထီၣ်န့ၢ်ပှၤလၢကစၢ်ယွၤအလၤကပီၤဒီးစိာ်မူ ဝဲကစၢ်ယွၤအက့ၢ်အဂီၤအန့ဆၢၣ်လီၤတံၢ်လီၤဆဲးဒီးဟံး ဃာ်ပၢၤဃာ်ဟီၣ်ခိၣ်မူခိၣ်လၢအကလုၢ်အစိအကမီၤလီၤ. တုၤအမၤကဆှီထီၣ်ပှၤလၢပတၢ်ဒဲးဘးလၢအကစၢ် ဒၣ်ဝဲဝံၤဒီး, ဆ့ၣ်နီၤဝဲလၢတၢ်စိဒိၣ်ကမီၤထီကစၢ်ယွၤ အစုထွဲတခီလီၤ.

ဧ့ၤဘြံၤ 6:4

အဂ့ၢ်ဒ်အံၤ, ပှၤလၢအသးဘၣ်တၢ်ဒုးကပီၤထီၣ်တ့ၢ်လံအီၤတဘျီ, ပှၤလၢအကလၢၢ်ဘၣ်တ့ၢ်လံမူခိၣ်အတၢ်ဟ့ၣ်, ဒီးကဲထီၣ်ဘၣ်ပှၤဒိးန့ၢ်ဃုာ်သးစီဆှံ, ဒီးလ့ၣ်ကွၢ်တ့ၢ်လံလၢယွၤအကလုၢ်ကထါမ့ၢ်တၢ်ဂ့ၤဒီးကလၢၢ် ဘၣ်တ့ၢ်လံခဲကိာ်တဃၣ်အစိအကမီၤတဖၣ်န့ၣ်, ပကဆှၢကဒါက့ၤအီၤဆူတၢ်ပီၢ်ယၢ်လီၤက့ၤအသးန့ၣ်ကသ့လၢကျဲဒ် လဲၣ်.

၁ ပ့းတရူး 1:12

ကစၢ်ယွၤလီၣ်ဖျါထီၣ်တ့ၢ်တၢ်ဆူဝံတဖၣ်အံၤလၢအဝဲသ့ၣ် အတၢ်မၤအံၤတမ့ၢ်လၢအဘျုးဒၣ်ဝဲအဂီၢ်ဘၣ်, မ့မ့ၢ်, မ့ၢ်လၢသုဂီၢ်တခီန့ၣ်လီၤ. ဒီးခဲအံၤအဝဲသ့ၣ်ကတိၤတၢ်ဘၣ်ဃးဒီးတၢ်သ့ၣ်တဖၣ်လၢ သုနၢ်ဟူခဲအံၤလၢပှၤစိာ်တၢ်ကစီၣ်တဖၣ်အအိၣ်, လၢအစံၣ်တဲၤတဲလီၤတၢ်သးခုကစီၣ်ခီဖျိသးစီဆှံ အစိကမီၤလၢအဟဲလီၤလၢမူခိၣ်န့ၣ်လီၤ. တၢ်သ့ၣ်တဖၣ်အံၤ, မ့ၢ်တၢ်လၢကလူးသ့ၣ်တဖၣ်ဒၣ်လဲာ်အဲၣ်ဒိးသ့ၣ်ညါနၢ်ပၢၢ် ဝဲန့ၣ်လီၤ.

၁ ပ့းတရူး 2:9

ဘၣ်ဆၣ်ဒီး, သုမ့ၢ်ပှၤတကလုာ်လၢအဘၣ်တၢ်ဃုထၢ ထီၣ်အီၤ, စီၤပၤအပှၤလုၢ်တၢ်အခိၣ်တဖၣ်, ပှၤစီဆှံတကလုာ် (ဟးထီၣ် ၁၉:၆), ယွၤအပှၤဂီၢ်မုၢ်ဒၣ်ဝဲလၢအဘၣ်တၢ်ဃုထၢထီၣ်အီၤလၢ အကတဲဖျါယွၤအတၢ်မၤလီၤလးတဖၣ်, ယွၤလၢအကိးထီၣ်သုလၢတၢ်ခံးတၢ်နၤဆူအကစၢ်ဒၣ်ဝဲ အတၢ်ကပီၤလီၤလးအပူၤန့ၣ်လီၤ.

၂ ပ့းတရူး 1:19

လၢတၢ်န့ၣ်အဃိ, တၢ်ကစီၣ်လၢဝံတဖၣ်တဲဖျါထီၣ်ဝဲဒၣ်န့ၣ်, လီၤတံၢ်လၢပဂီၢ်ဒိၣ်န့ၢ်အလီၢ်တက့ၢ်လီၤ. သုဂ့ၤပာ်သူၣ်ပာ်သး လၢတၢ်ကစီၣ်အံၤလၢအလီၤဂာ်ဒီးမ့ၣ်အူဒၢကပီၤထီၣ်လၢတၢ် ခံးကျါတုၤလီၤလၢမုၢ်ဆ့ၣ်ထီၣ်ဒီးဆၣ်တူၢ်ဂီၤအတၢ်ကပီၤ ကပီၤထီၣ်လၢသုသးကံၢ်ပူၤတစုန့ၣ်လီၤ.