၂ ကရံၣ်သူး 3:1 - Sgaw Karen Common Bible

¹ ယတၢ်စံးတၢ်ကတိၤအဝဲအံၤမ့ၢ်အမၤဖျါလၢပကတိၤပာ်ကဖၢ လၢလီၤက့ၤကဒီးပသးန့ၣ်ဧါ. မ့ၢ်ကမ့ၢ်လၢဒ်ပှၤအဂၤတနီၤအသိး, ပလိၣ်ဘၣ်လံာ်ပရၢအုၣ်ခီၣ်အသးလၢပဂ့ၢ်ဆူသုအိၣ်, မ့တမ့ၢ် လၢသုအိၣ်န့ၣ်ဧါ.

၂ ကရံၣ်သူး 3:1 Iomraidhean Croise

မၤတၢ် 18:27

ဖဲစီၤအပီးလိၤပာ်လီၤအသးလၢအကလဲၤဆူကီၢ်အဃါယၤန့ၣ်, အပျဲၢ်အဘီၣ်ဖဲဝ့ၢ်အ့းဖ့းစူးတဖၣ်မၤစၢၤအီၤခီဖျိအကွဲး လံာ်ဆူအပျဲၢ်အဘီၣ်အိၣ်လၢကီၢ်အဃါယၤတဖၣ်အအိၣ်, ဒီးသဆၣ်ထီၣ်အဝဲသ့ၣ်အခံဒ်သိးအကတူၢ်လိာ်မုာ်အီၤဖဲန့ၣ်လီၤ. ဖဲအဝဲဒၣ်လဲၤတုၤန့ၣ်, ကဲထီၣ်တၢ်မၤစၢၤအဒိၣ်အမုၢ်လၢပှၤလၢအကဲထီၣ်တ့ၢ်ပှၤလၢ အစူၢ်က့ၤနာ်က့ၤတၢ်ခီဖျိကစၢ်ယွၤအဘျုးအဖှိၣ်တဖၣ်အဂီၢ်လီၤ.

ရိမ့ၤ 16:1

ယအုၣ်ယသးလၢပဒီပုၢ်ဝဲၢ်မုၣ်နီၢ်ဖံဘ့ၤလၢအမ့ၢ်တၢ်အိၣ် ဖှိၣ်သးပှၢ်မုၣ်လၢတၢ်အိၣ်ဖှိၣ်ဖဲဝ့ၢ်က့ၣ်ဃရ့းတဂၤအဂီၢ်န့ၣ်လီၤ.

1 ကရံၣ်သူး 10:33

မ့မ့ၢ်, မၤဒၣ်သုဝဲဒ်ယမၤအသိးတက့ၢ်. လၢတၢ်ဖံးတၢ်မၤတမံၤလၢ်လၢ်လၢယမၤအီၤအပူၤန့ၣ်, ယဂုာ်ကျဲးစၢးမၤဘၣ်ပှၤကိးဂၤဒဲးအသးဒီးယတဃုဒၣ်ယဘျုးဒၣ် ယဲဘၣ်. မ့မ့ၢ်လၢပှၤခဲလၢာ်အဘျုးအဂီၢ်ဒ်သိးအဝဲသ့ၣ်ကတုၤ လၢတၢ်အုၣ်က့ၤခီၣ်က့ၤအဂီၢ်န့ၣ်လီၤ.

1 ကရံၣ်သူး 16:3

ဖဲယဟဲဝံၤအလီၢ်ခံန့ၣ်, ယကဟ့ၣ်လီၤပှၤလၢသုဘၣ်သူၣ်ဘၣ်သးအီၤ တဖၣ်လံာ်ပရၢလၢအတဲဖျါထီၣ်အဝဲသ့ၣ်အဂ့ၢ်, ဒီးဆှၢလီၤအဝဲသ့ၣ် ဒ်သိးအကလဲၤဆှၢသုတၢ်ဟ့ၣ်ဆူဝ့ၢ်ယရူၤၡလ့ၣ်အဂီၢ်န့ၣ်လီၤ.

1 ကရံၣ်သူး 3:10

ယသူတၢ်ဟ့ၣ်လၢကစၢ်ယွၤဟ့ၣ်ယၤဒီးမၤပှၤသူၣ်ထီၣ်တၢ်လၢ အသ့အဘၣ်တဂၤအတၢ်မၤဒီးပာ်လီၤတၢ်အခီၣ်ထံး, ဒီးပှၤအဂၤတဂၤသူၣ်ထီၣ်တၢ်လၢအလိၤလီၤ. ဘၣ်ဆၣ်ဒီးပှၤတဂၤဒီးတဂၤကသူၣ်ထီၣ်ဘှီထီၣ်တၢ်ဒ်လဲၣ်ဒ်လဲၣ် န့ၣ်ကဘၣ်ပလီၢ်ပဒီအသးလီၤ.

1 ကရံၣ်သူး 4:15

အဂ့ၢ်ဒ်အံၤ, လၢသုတၢ်အိၣ်မူဒ်ခရံာ်ဖိအသိးအပူၤန့ၣ်, သုမ့ၢ်အိၣ်ဒီးပှၤသိၣ်သီပၢဆှၢသုအဂၤတကလးသနာ်က့သုပၢ် အိၣ်ဒၣ်ထဲတဂၤဧိၤလီၤ. အဂ့ၢ်ဒ်အံၤ, လၢသုတၢ်အိၣ်မူပာ်ဖှိၣ်ဃုာ်သုသးဒီးယ့ၣ်ၡူးခရံာ်အပူၤန့ၣ် ယကဲထီၣ်တ့ၢ်ယဲလၢသုပၢ်, ခီဖျိယဟဲစိာ်တၢ်သးခုကစီၣ်ဆူသုအိၣ် န့ၣ်လီၤ.

၂ ကရံၣ်သူး 10:12

သပှၢ်ကတၢၢ်, တမ့ၢ်ပကအိၣ်ဒီးတၢ်သးဒူလၢပကပာ်လီၤပသး တပူၤဃီမ့တမ့ၢ်, ထိၣ်သတြီၤပသးဒီးပှၤလၢအပာ်ဖျါထီၣ်ထီ အသးဒိၣ်ဒိၣ်ကလဲာ်တဖၣ်န့ၣ်ဘၣ်. အဝဲသ့ၣ်အီပံာ်အီပီမးဆံးဒိၣ်လဲၣ်. အဝဲသ့ၣ်ဒုးအိၣ်ထီၣ်အနီၣ်ထိၣ်ဒၣ်ဝဲလၢအကထိၣ်လီၤဒွးလီၤအသး အဂီၢ်, ဒီးစံၣ်ညီၣ်လီၤက့ၤအသးလၢအနီၢ်ကစၢ်ဒၣ်ဝဲအနီၣ်ထိၣ် တဖၣ်န့ၣ်လီၤ.

၂ ကရံၣ်သူး 10:18

အဂ့ၢ်ဒ်အံၤ, ပှၤတဂၤဘၣ်တၢ်ဘၣ်သူၣ်ဘၣ်သးအီၤဖဲကစၢ်ဆိ ကမိၣ်ဂ့ၤအီၤဒီးတမ့ၢ်ဖဲအဆိကမိၣ်ဂ့ၤလီၤအသးဒၣ်ဝဲအခါ န့ၣ်ဘၣ်လီၤ.

၂ ကရံၣ်သူး 10:8

အဂ့ၢ်ဒ်အံၤ, ယမ့ၢ်ကတိၤပာ်ကဖၢလၢယသးအါကဲၣ်ဆိးတစဲး ဘၣ်ဃးဒီးတၢ်စိတၢ်ကမီၤလၢကစၢ်ဟ့ၣ်လံယၤ (တၢ်စိတၢ်ကမီၤလၢတၢ်ကမၤထီၣ်မၤထီသုအဂီၢ်ဒီးတမ့ၢ်တၢ် ကမၤဟးဂီၤသုအဂီၢ်ဘၣ်) ဒၣ်လဲာ်န့ၣ်, ယတမဲာ်ဆှးယဲဒၣ်ဘၣ်.

၂ ကရံၣ်သူး 12:11

ယမၤယသးဒ်တၢ်ပျုၢ်တဂၤအသိးလီၤ, ဘၣ်ဆၣ်ဒီးမ့ၢ်ဒၣ်လၢ သုဃိလီၤ. သုမ့ၢ်ပှၤတဖၣ်လၢအကြၢးပာ်ဖျါသုတၢ်ဘၣ်သူၣ်ဘၣ် သးယၤလီၤ. အဂ့ၢ်ဒ်အံၤ, ယမ့တမ့ၢ်တၢ်နီတမံၤသနာ်က့, လၢကျဲတဘိအပူၤဒၣ်လဲာ်ယတဆံးန့ၢ်သု “ပှၤတၢ်မၢဖိ” လီၤတိၢ်လီၤဆီမးတဖၣ်န့ၣ်ဘၣ်.

၂ ကရံၣ်သူး 12:19

ဘၣ်တဘၣ်သုဆိကမိၣ်သုဝဲလၢဒီဆၢဒီကတီၢ်ညါန့ၣ်, ပဂုာ်ကျဲးစၢးကတိၤဒီဒၣ်လီၤက့ၤပသးလၢသုမဲာ်ညါလီၤ. တမ့ၢ်ဘၣ်. ပစံးကတိၤတၢ်ဒ်ခရံာ်အဲၣ်ဒိးပကတိၤပဝဲအသိး, လၢကစၢ်ယွၤ အမဲာ်ညါ, ဒီးတၢ်တမံၤလၢ်လၢ်လၢပမၤအီၤန့ၣ်, တံၤသကိးသးဘိသ့ၣ်ဧၢ, မ့ၢ်ဒ်သိးအကမၤစၢၤသုလီၤ.

၂ ကရံၣ်သူး 2:17

ပတလီၤဂာ်ပဝဲဒီးပှၤအဂၤအါဒံအါဂၤလၢအဟံးဃာ် ကစၢ်ယွၤအတၢ်ကစီၣ်, လီၤဂာ်မးဒ်အမ့ၢ်တၢ်ပနံာ်တၢ်ကၤလၢအပှ့ၤဘၣ်တကလုာ် အသိးန့ၣ်ဘၣ်. မ့မ့ၢ်, ကစၢ်ယွၤဆှၢလီၤပှၤအဃိပစံးကတိၤ တၢ်လၢအဝဲဒၣ်အမဲာ်ညါအိၣ်ဒီးတၢ်ပာ်ပသးသပှၢ်ပှၢ်ဒ်ခရံာ် အခ့အပှၤတဖၣ်အသိးန့ၣ်လီၤ.

၂ ကရံၣ်သူး 5:12

တမ့ၢ်ပဂုာ်ကျဲးစၢးကဒီးဒ်သိးပကစံးပတြၢၤလီၤက့ၤပသး လၢသုမဲာ်ညါန့ၣ်ဘၣ်. မ့မ့ၢ်ပဂုာ်ကျဲးစၢးဟ့ၣ်သုတၢ်ဂ့ၢ်အကြၢးအဘၣ်ဒီးသုကပာ်ထီၣ် ထီသုသးလၢပဃိ, ဒ်သိးသုစံးဆၢက့ၤပှၤလၢအပာ်ကဖၢလၢအသးဘၣ်ဃး ပှၤကညီတဂၤအတၢ်အိၣ်ဖျါလၢခိဒီးတမ့ၢ်အသကဲာ်ပဝးဘၣ် တဖၣ်န့ၣ်ကသ့ဝဲအဂီၢ်လီၤ.