၁ တံၤမသ့း 6:9 - Sgaw Karen Common Bible

⁹ ဘၣ်ဆၣ်ဒီး, ပှၤလၢအသးအိၣ်ထူးထီၣ်တီၤထီၣ်တဖၣ်န့ၣ်, လီၤတဲာ်နုာ်လံဆူတၢ်လ့ပစီအပူၤဒီးဘၣ်တၢ်ဖီၣ်ဃာ်အီၤလၢ ပျံၤသကွီၤလၢအမ့ၢ်တၢ်သူၣ်လီသးကွံလၢအတဂိာ်တသီၣ် ဒီးမၤဘၣ်ဒိဘၣ်ထံးတၢ်တဖၣ်, လၢအထုးလီၤကွံာ်အဝဲသ့ၣ်ဆူတၢ်ဟးဂူာ်ဟးဂီၤဒီးတၢ်လီၤပှီၢ် န့ၣ်လီၤ.

၁ တံၤမသ့း 6:9 Iomraidhean Croise

လံာ်စီၤပၤအခီၣ်ထံးတဘ့ၣ် 21:6

အဝဲစံးဆၢဝဲ, “မ့ၢ်လၢတၢ်လၢစီၤနၤဘိးစံးဘၣ်တ့ၢ်ယၤအဃိန့ၣ်လီၤ. ယပာ်ဖျါထီၣ်ယတၢ်သးအိၣ်လၢယကပှ့ၤအစပံးအလီၢ်မ့တမ့ၢ်အဝဲမ့ၢ် ဘၣ်အသးဒီးယကဟ့ၣ်အီၤလၢစပံးလီၢ်အဂၤတတီၤလၢအလီၢ်န့ၣ်လီၤ. ဘၣ်ဆၣ်အဝဲတဲဘၣ်ယၤလၢယမၤန့ၢ်အီၤတသ့ဘၣ်န့ၣ်လီၤ.”

စံးထီၣ်ပတြၢၤ 11:6

အဝဲဒုးဟဲစူၤလီၤဝဲမ့ၣ်အူအ့ၣ်ဒီးကးလၢ အကဲၤကပျီၤလၢပှၤအၢပှၤသီအဖီခိၣ် ဒီးသိၣ်ဃီၣ်အဝဲသ့ၣ်လၢ ကလံၤမုၢ်ကိၢ်လၢအအီၣ်တၢ်န့ၣ်လီၤ.

တၢ်ကတိၤဒိ. 15:27

နမ့ၢ်ကျဲးစၢးမၤန့ၢ်တၢ်ဘၣ်ဘျုးလၢတၢ်တတီတလိၤအပူၤန့ၣ် နကဆှၢနဟံၣ်ဖိဃီဖိဆူတၢ်ကီတၢ်ခဲအပူၤလီၤ. ဟံးန့ၢ်ခိၣ်ဖးလာ်ဆှိးတဖၣ်တဂ့ၤ. ဒီးနကအိၣ်မူယံာ်ယံာ်လီၤ.

တၢ်ကတိၤဒိ. 20:21

နမၤန့ၢ်နတၢ်ထူးတၢ်တီၤဒံးညီ, အတၢ်မၤဂ့ၤနၤကဒံးစှၤဝဲလီၤ.

တၢ်ကတိၤဒိ. 21:6

တၢ်ထူးတၢ်တီၤတဖၣ်လၢနမၤန့ၢ်အီၤလၢတၢ်တတီတလိၤအပူၤန့ၣ် ကဆှၢနၤဆူတၢ်သံအကိာ်ပူၤဒီးတစိၢ်ဖိအတီၢ်ပူၤန့ၣ်အဝဲသ့ၣ် ကလီၤပံာ်ကွံာ်ဝဲလီၤ.

တၢ်ကတိၤဒိ. 22:16

နမ့ၢ်ဟ့ၣ်တၢ်ဟ့ၣ်တဖၣ်ဆူပှၤထူးပှၤတီၤတဖၣ်မ့ၢ်ဂ့ၤ, နမ့ၢ်မၤနးမၤဖှီၣ်ပှၤဖှီၣ်ဖိယာ်ဖိလၢနကထူးထီၣ်တီၤထီၣ်ဒၣ် နဲအဂီၢ်မ့ၢ်ဂ့ၤဒီး, နကစၢ်ဒၣ်နဲနကဖှီၣ်လီၤယာ်လီၤန့ၣ်လီၤ.

တၢ်ကတိၤဒိ. 23:4

အိၣ်ဒီးတၢ်ကူၣ်သ့အလၢအပှဲၤ, ဒ်သိးနသုတမၤတၢ်တုၤနစုလၢာ် ခီၣ်လၢာ်လၢနကထူးထီၣ်တီၤထီၣ်အဂီၢ်တဂ့ၤန့ၣ်တက့ၢ်.

လံာ်ယၡါယၤ 5:8

သုဘၣ်တၢ်စံၣ်ညီၣ်ဃါမနၤလီၤ. သုပှ့ၤအါထီၣ်ဟံၣ်ဃီဒီးစံာ်လီၢ် တဖၣ်ဒီးပာ်ဖှိၣ်အါထီၣ်အီၤဒီးတၢ်လၢအအိၣ်တ့ၢ်ဒီးသုလီၤ. တယံာ်လၢၤဘၣ်ဒီး, ပှၤအဂၤကအိၣ်ဆိးတၢ်အလီၢ်တအိၣ်လၢၤ ဘၣ်ဒီးပှၤအိၣ်လၢကီၢ်အံၤအပူၤန့ၣ်ကမ့ၢ်ဒၣ်ထဲသုဝဲတဖၣ်ဧိၤလီၤ.

လံာ်စကၤရယၤ 11:5

အဝဲသ့ၣ်အကစၢ်တဖၣ်မၤသံအဝဲသ့ၣ်, ဒီးတဘၣ်တၢ်စံၣ်ညီၣ်အီၤဘၣ်. အဝဲသ့ၣ်ဆါကွံာ်တၢ်ညၣ်ဒီးစံးဝဲ, စံးထီၣ်ပတြၢၤယွၤတက့ၢ်. ပထူးထီၣ်တီၤထီၣ်လံ. အပှၤကွၢ်သိတဖၣ်ဒၣ်လဲာ်တသးကညီၤဘၣ်အဝဲသ့ၣ်ဘၣ်.”

လံာ်တၢ်ဂံၢ် 31:8

ဃုာ်ဒီးကီၢ်မံးဒယၣ်အစီၤပၤယဲၢ်ဂၤလၢအမ့ၢ်, စီၤအဝံၤ, စီၤရ့က့ၣ်, စီၤစူၢ်, စီၤဃူၢ်ဒီးစီၤရ့ဘၤန့ၣ် လီၤ. အဝဲသ့ၣ်မၤသံစ့ၢ်ကီးစီၤဘဧိၢ်အဖိခွါစီၤဘံးလၣ်န့ၣ်လီၤ.

လံာ်မးသဲ 13:22

တၢ်ချံလၢအဘၣ်တၢ်ဖှံလီၤအီၤလၢတၤဆှုၣ်တၤမဲအကျါတဖၣ်, မ့ၢ်ပှၤလၢအနၢ်ဟူတၢ်ကစီၣ်, ဘၣ်ဆၣ်တၢ်ဘၣ်ယိၣ်ဘၣ်ဘီဘၣ်ဃးဒီးဟီၣ်ခိၣ် ဒီးတၢ်အဲၣ်တၢ်ထူးတၢ်တီၤတဖၣ်ခဲဘၢကွံာ်တၢ်ကစီၣ်သတးဒီး တသၣ်ထီၣ်ဘၣ်ဝဲဘၣ်.

လံာ်မးသဲ 19:22

တုၤပှၤဖိၣ်သၣ်ခွါနၢ်ဟူတၢ်ကတိၤအံၤဒီး, ဟးထီၣ်ကွံာ်ဝဲလၢတၢ်သးအုးအပူၤလီၤ. အဂ့ၢ်ဒ်အံၤ, အဝဲအိၣ်ဒီးတၢ်ထူးတၢ်တီၤအါအါကလဲာ်လီၤ.

လံာ်မးသဲ 26:15

ဒီးသံကွၢ်ဝဲ, “ယမ့ၢ်ဟ့ၣ်လီၤကွံာ်ယ့ၣ်ၡူးဆူသုစုပူၤန့ၣ်, သုကဟ့ၣ်ယၤတၢ်မနုၤလဲၣ်.” ဒီးအဝဲသ့ၣ်ဂံၢ်န့ၢ်စ့ညၣ်အဘ့ၣ်သၢဆံဝံၤဟ့ၣ်လီၤအီၤန့ၣ်လီၤ.

လံာ်မးသဲ 6:19

တဘၣ်ပာ်ဖှိၣ်တၢ်ထူးတၢ်တီၤလၢသုဂီၢ်လၢဟီၣ်ခိၣ်ချၢ ဖဲတၢ်ဖိဃၢ်ဒီးထးဃံၣ်မၤဟးဂီၤတၢ်, ဒီးတၢ်ဘျၣ်ဘၢၣ်ဖျိတၢ်, ဒီးဟုၣ်န့ၢ်တၢ်အလီၢ်န့ၣ်တဂ့ၤ.

လံာ်မၢ်ကူး 4:19

ဘၣ်ဆၣ်ဒီးတၢ်ကိၢ်တၢ်ဂီၤဘၣ်ဃးဟီၣ်ခိၣ်တစိၤအံၤ, တၢ်မိၣ်န့ၢ်သးလီတၢ်ထူးတၢ်တီၤဒီးကယဲၢ်တၢ်မိၣ်န့ၢ်သးလီတၢ် အဂုၤအဂၤတဖၣ်ခဲလၢာ်န့ၣ်ခဲဘၢကွံာ်ယွၤ အကလုၢ်ကထါဒီးသူထီၣ်သၣ်ထီၣ်တသ့လၢၤဘၣ်န့ၣ်လီၤ.

လံာ်လူၤကၣ် 12:21

ဒီးယ့ၣ်ၡူးမၤကတၢၢ်အတၢ်ကတိၤဒီးစံးဝဲ, “ပှၤလၢအဂၢ်ဖှိၣ်တၢ်ထူးတၢ်တီၤအါအါဂီၢ်ဂီၢ်လၢ အနီၢ်ကစၢ်ဒၣ်ဝဲအဂီၢ်, ဘၣ်ဆၣ်ဒီးတထူးဝဲတီၤဝဲလၢကစၢ် ယွၤအမဲာ်ညါဘၣ်န့ၣ်, တၢ်ကမၤအသးဒီးအီၤဒ်အံၤလီၤ.”

လံာ်လူၤကၣ် 21:35

အဂ့ၢ်ဒ်အံၤကဟဲတုၤအိၣ်ပှၤခဲလၢာ်လၢဟီၣ်ခိၣ်ဒီဘ့ၣ်ညါဒ်ထုအသိးလီၤ.

မၤတၢ် 8:20

စီၤပ့းတရူးစံးဆၢက့ၤအီၤ, “မ့ၢ်လၢနဆိကမိၣ်နဲလၢကစၢ်ယွၤ အတၢ်ဟ့ၣ်န့ၣ်နပှ့ၤအီၤလၢစ့ကန့ၢ်အဃိ, မ်နၤဒီးနစ့ကလီၤဒၣ်ဝဲဆူလရာ်ပူၤန့ၣ်တက့ၢ်.

အ့းဖ့းစူး 4:22

လၢတၢ်န့ၣ်အဃိ, ဘ့ၣ်လီၤကွံာ်တၢ်အိၣ်မူလီၢ်လံၤလၢအဒုးမူ သုဒ်သုမ့ၢ်တ့ၢ်သုဝဲအသိးန့ၣ်တက့ၢ်. ဒ်ပစံးတၢ်အသိး, တၢ်မူအလီၢ်လံၤလၢအဘၣ်တၢ်မၤဟးဂီၤကွံာ်အီၤလၢတၢ်မိၣ် န့ၢ်သးလီလၢအလီန့ၢ်တၢ်တဖၣ်န့ၣ်လီၤ.

လံာ်သိၣ်လီၤသီလီၤတၢ် 7:25

ဒွဲၣ်အူကွံာ်တၢ်ဂီၤတၢ်ဖီၣ်တဖၣ်တက့ၢ်. သးကွံထူမ့ၢ်ဂ့ၤ, စ့မ့ၢ်ဂ့ၤလၢအအိၣ်လၢအဝဲသ့ၣ်အလိၤန့ၣ်တဂ့ၤ, ဒီးဟံးန့ၢ်အီၤလၢသုဂီၢ်တဂ့ၤ. သုမ့ၢ်မၤဒီးတၢ်န့ၣ်မ့ၢ် တၢ်လၢအမၤသံသုသ့န့ၣ်လီၤ. အဂ့ၢ်ဒ်အံၤယွၤသးဟ့တၢ်ဘါထီၣ်တၢ်ဂီၤတၢ်ဖီၣ်န့ၣ်လီၤ.

၁ တံၤမသ့း 1:9

ပကဘၣ်သ့ၣ်နီၣ်ထီၣ်က့ၤလၢတၢ်သိၣ်တၢ်သီတဖၣ်ဘၣ်တၢ် ဒုးအိၣ်ထီၣ်အီၤတမ့ၢ်လၢပှၤအဂ့ၤအဝါတဖၣ်အဂီၢ်ဘၣ်. မ့မ့ၢ်တခီ, မ့ၢ်လၢပှၤမၤကမၣ်တၢ်သိၣ်တၢ်သီတဖၣ်, ပှၤအၢပှၤသီတဖၣ်, ပှၤတယူးတယီၣ်ယွၤဒီးမၤတၢ်ဒဲးဘးတဖၣ်, ပှၤလၢအတၢ် အဲၣ်ထူအဲၣ်ယွၤမ့ၢ်ဂ့ၤ, တၢ်အိၣ်မူလၢသူၣ်လၢသးမ့ၢ်ဂ့ၤ တအိၣ်ဘၣ်တဖၣ်, ပှၤလၢအမၤသံအပၢ်မ့တမ့ၢ်အမိၢ် တဖၣ်, ပှၤလၢအမၤသံပှၤကညီတဖၣ်,

၁ တံၤမသ့း 3:7

အဝဲကဘၣ်မ့ၢ်ပှၤတဂၤလၢအဘၣ်တၢ်ပာ်ကဲအီၤလၢပှၤ လၢအအိၣ်လၢတၢ်အိၣ်ဖှိၣ်အချၢတဖၣ်ဒၣ်လဲာ်, ဒ်သိးအသုတဘၣ်တၢ်မၤမဲာ်ဆှးအီၤဒီးအသုတလီၤတဲာ်ကွံာ် ဆူမုၣ်ကီၤလံၢ်အပျံၤသကွီၤအပူၤတဂ့ၤအဂီၢ် န့ၣ်လီၤ.

၁ တံၤမသ့း 6:10

အဂ့ၢ်ဒ်လဲၣ်န့ၣ်, တၢ်အဲၣ်စ့မ့ၢ်တၢ်အၢတၢ်သီခဲလၢာ်အဂံၢ်ထံးလီၤ. ပှၤတနီၤသူၣ်ဆူၣ်သးဂဲၤလၢအကမၤန့ၢ်ဘၣ်အီၤတုၤဒၣ်လဲာ် အဝဲသ့ၣ်ဟးဖးဒီးတၢ်စူၢ်တၢ်နာ်, ဒီးတၢ်သူၣ်အုးသးအုးအါမံၤမၤသဘှံးအဝဲသ့ၣ်အသးန့ၣ်လီၤ.

၁ တံၤမသ့း 6:17

မၤလိာ်ပှၤအထူးအတီၤတဖၣ်လၢဟီၣ်ခိၣ်ချၢအံၤလၢအသုတပာ် ကဖၢလၢအသးတဂ့ၤ. မ့မ့ၢ်ကပာ်အတၢ်မုၢ်လၢ်, တမ့ၢ်လၢတၢ်ထူးတၢ်တီၤလၢအတဂၢၢ်တကျၢၤတဖၣ်အပူၤ ဘၣ်. မ့မ့ၢ်, ကမ့ၢ်ဒၣ်ဝဲလၢကစၢ်ယွၤလၢအဟ့ၣ်ပှၤတၢ်ခဲလၢာ် ထူးထူးတီၤတီၤလၢပတၢ်မုာ်လၤသးခုအဂီၢ်, တဂၤအပူၤန့ၣ် တက့ၢ်.

၂ တံၤမသ့း 2:26

ဒီးအဝဲသ့ၣ်ကသ့ၣ်ညါလီၤက့ၤအသးဒီးမၤထူၣ်ဖျဲးကွံာ်အသး လၢမုၣ်ကီၤလံၢ်အပျံၤသကွီၤလၢအဖီၣ်န့ၢ်အဝဲသ့ၣ်ဒ်သိးအဝဲသ့ၣ် ကစူၢ်အဝဲအတၢ်ဘၣ်အသးအဂီၢ်န့ၣ်လီၤ.

တံတူး 2:12

တၢ်ဘျုးတၢ်ဖှိၣ်အဝဲန့ၣ်, သိၣ်လိပှၤလၢပကညိကွံာ်တၢ်တယူးတယီၣ်ယွၤ အတၢ်အိၣ်မူဒီးဟီၣ်ခိၣ်အတၢ်သူၣ်လီသးကွံတဖၣ်, ဒီးအိၣ်မူလၢတၢ်ပၢၤသူၣ်ပၢၤသး, အိၣ်မူတီတီလိၤလိၤ, ဒီးအိၣ်မူယူးယီၣ်ယွၤလၢဟီၣ်ခိၣ်အံၤအပူၤ,

လံာ်စီၤယိၤၡူ 7:11

အံၣ်စရ့လးမၤတၢ်ဒဲးဘးလံ. အဝဲသ့ၣ်လုၢ်သ့ၣ်ခါပတာ်တၢ်အၢၣ်လီၤအီလီၤဒီးယၤလၢယမၤလိာ် တ့ၢ်အီၤလံ. အဝဲသ့ၣ်ဟံးန့ၢ်တၢ်လၢအဘၣ်တၢ်လုၢ်ထီၣ်ပာ်ထီၣ်တ့ၢ်အီၤလၢတၢ်ကမၤဟးဂီၤအီၤတဖၣ်, အဝဲသ့ၣ်ဟုၣ်တၢ်, ဒီးလီတၢ်ဒီးပာ်ဝဲလၢအတၢ်ဖိတၢ်လံၤအကျါလီၤ.

၂ ပ့းတရူး 2:3

ဒီးလၢအတၢ်သူၣ်လီသးကွံဒိၣ်အပူၤ, သရၣ်အဘျၣ် တဖၣ်အံၤကဃုအဘျုးလၢသုဖီခိၣ်ခီဖျိအစံးဘၣ်တဲဘၣ် သုပူလၢပှၤကညီဒုးကဲထီၣ်အီၤတဖၣ်လီၤ. အဝဲသ့ၣ်အပှၤစံၣ်ညီၣ်ကွီၢ်အိၣ်ကတဲာ်ကတီၤအသးယံာ် တ့ၢ်လံ, ဒီးပှၤလၢအကမၤဟးဂီၤအီၤတဂၤန့ၣ်တမံသပ့ၤ ဝဲဘၣ်.

ယူဒၤ 1:11

မ့ၢ်တၢ်လီၤပျံၤလီၤဖုးလၢအဝဲသ့ၣ်အဂီၢ်ဆံးဒိၣ်လဲၣ်. အဝဲသ့ၣ်ပိာ်ကျဲလၢစီၤကၤယံၣ်ပိာ်ဝဲန့ၣ်လီၤ. လၢကျိၣ်စ့အဃိအဝဲသ့ၣ်ဟ့ၣ်လီၤကွံာ်အသး ဆူတၢ်ကမၣ်လၢစီၤဘံးလၣ်မၤတ့ၢ်ဝဲအပူၤန့ၣ်လီၤ. အဝဲသ့ၣ်ပူထီၣ်တၢ်ဒ်စီၤကိၤရးပူထီၣ်တ့ၢ်တၢ် အသိး, ဒီးအဝဲသ့ၣ်ဘၣ်တၢ်မၤဟးဂီၤအီၤဒ်အဝဲအသိးလီၤ.