လံာ်စီၤၡမူၤအ့လးအခီၣ်ထံးတဘ့ၣ် 4:4 - Sgaw Karen Common Bible

⁴ မၤသးဒ်န့ၣ်ဒီးအဝဲသ့ၣ်ဆှၢလီၤပှၤစိာ်တၢ်ကစီၣ်တဖၣ်ဆူဝ့ၢ်ၡံလိၤဒီး ဟဲစိာ်ယွၤသ့တၢ်လၢာ်ကစၢ်အတၢ်အၢၣ်လီၤအီလီၤတလါစီဆှံ, လၢတၢ်ပာ်အီၤလၢလီၢ်ပစိာ်အိၣ်လၢတၢ်ဘၣ်တ့အိၣ်ဒီးအဒံးဆ့ လွံၢ်ဂၤအဖီခိၣ်န့ၣ်လီၤ. ဒီးစီၤဧ့လံၤအဖိခွါခံဂၤ, စီၤဃၤမနံဒီးစီၤဖံနဃၣ်ဟဲဃုာ်ဒီး ယွၤအတၢ်အၢၣ်လီၤအီလီၤအတလါစီဆှံန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 4:4 Iomraidhean Croise

လံာ်စီၤၡမူၤအ့လးခံဘ့ၣ်တဘ့ၣ် 15:24

ပှၤလုၢ်တၢ်အခိၣ်စီၤစၤဒိးအိၣ်ဝဲဖဲန့ၣ်ဒီးပှၤလ့ၤဝံဖိတဖၣ် အိၣ်စ့ၢ်ကီးဒီးအီၤ, စိာ်ဝဲယွၤအတၢ်အၢၣ်လီၤအီလီၤအတလါစီဆှံန့ၣ်လီၤ. အဝဲသ့ၣ်ပာ်လီၤအီၤဒီးတချုးဒံးဘၣ်လၢပှၤဂီၢ်မုၢ်ခဲလၢာ် ဟးထီၣ်ကွံာ်လၢဝ့ၢ်ပူၤဘၣ်န့ၣ်အဝဲသ့ၣ်တစိာ်ထီၣ်ကဒီးအီၤဘၣ်. ပှၤလုၢ်တၢ်အခိၣ်စီၤအ့ဘယၤသၢ်အိၣ်စ့ၢ်ကီးဖဲန့ၣ်လီၤ.

လံာ်စီၤၡမူၤအ့လးခံဘ့ၣ်တဘ့ၣ် 6:2

ဒီးလဲၤကိးအီၤဆူကီၢ်ယူဒၤအဝ့ၢ်ဘၤလ့ၤဒ်သိးကဟဲက့ၤစိာ် ကစၢ်ယွၤအတၢ်အၢၣ်လီၤအီလီၤအတလါစီဆှံ, လၢတၢ်ကိးအီၤလၢယွၤသ့တၢ်လၢာ်အမံၤ ဒီးဘၣ်တၢ်ပာ်ထီၣ်တ့ၢ်အီၤလၢလီၢ်ပစိာ်လၢအအိၣ်ခ့ရူာ်တဖၣ်အလိၤ, လၢအအိၣ်ဖဲန့ၣ်, န့ၣ်လီၤ.

လံာ်စီၤပၤခံဘ့ၣ်တဘ့ၣ် 19:15

ဒီးဃ့ဘါထုကဖၣ်ဝဲဒ်အံၤ, “အိယွၤ, ကီၢ်အံၣ်စရ့လးအကစၢ်ယွၤ, လၢအဆ့ၣ်နီၤဝဲလၢလီၢ်ပစိာ်အိၣ်ဝဲလၢခ့ရူၢ်တဖၣ်အလိၤ တဂၤဧၢ, နမ့ၢ်နဲကစၢ်ယွၤထဲတဂၤဧိၤ, လၢကပၢကယဲၢ်ဘီမုၢ်ခဲလၢာ်လၢဟီၣ်ခိၣ်ချၢန့ၣ်လီၤ. နတ့လီၤပာ်လီၤဟီၣ်ခိၣ်ဒီးမူကပိာ်လိၤန့ၣ်လီၤ.

စံးထီၣ်ပတြၢၤ 80:1

အံၣ်စရ့လးအပှၤကွၢ်သိဧၢ, ဒိကနၣ်ပှၤတက့ၢ်. နဲဒၣ်ပှၤလၢအဆှၢယိၤသးဒ်သိတဖုအသိး, လၢအဆ့ၣ်နီၤကဲစီၤပၤလၢ ခ့ရူာ်တဖၣ်အဘၢၣ်စၢၤတဂၤဧၢ,

စံးထီၣ်ပတြၢၤ 80:2

လီၣ်ဖျါထီၣ်နသးလၢအ့ဖရဲၣ်, ဘံၣ်ယၤမံၣ်ဒီးမနၤၡ့ၤအဒူၣ်တဖၣ် အမဲာ်ညါဧၢ, န့ၣ်တက့ၢ်. ထိၣ်ဂဲၤထီၣ်နဂံၢ်နဘါဒီး ဟဲအုၣ်က့ၤခီၣ်က့ၤပှၤတက့ၢ်.

စံးထီၣ်ပတြၢၤ 99:1

ယွၤပၢတၢ်, မ်ပှၤကလုာ်တဖၣ်ကနိးကစုာ်တက့ၢ်. အဝဲဆ့ၣ်နီၤပၢတၢ်လၢခ့ရူာ်တဖၣ်အဖီခိၣ်, မ်ဟီၣ်ခိၣ်ဟူးဝးတက့ၢ်.

လံာ်ယၡါယၤ 37:16

“ယွၤစိဒိၣ်ကမီၤဒိၣ်, အံၣ်စရ့လးအကစၢ်ယွၤ, လၢအအိၣ်လၢလီၢ်ပစိာ်ထီၣ်ထီလၢခ့ရူာ်တဖၣ်အဖီခိၣ်တဂၤဧၢ, နမ့ၢ်ကစၢ်ယွၤထဲတဂၤဧိၤလၢအပၢဟီၣ်ခိၣ်ဘီမုၢ်တဖၣ်လီၤ. နတ့လီၤတ့ၢ်ဟီၣ်ခိၣ်ဒီးမူကပိာ်လိၤလီၤ.

လံာ်မၤလကံ 1:9

ခဲကနံၣ်အံၤပှၤလုၢ်တၢ်အခိၣ်သ့ၣ်ဧၢ, ဃ့ကညးယွၤဒ်သိးအကသးကညီၤသုတက့ၢ်. အဝဲတစံးဆၢဘၣ်သုတၢ်ထုကဖၣ်ဘၣ်, ဒီးတၢ်န့ၣ်ကမ့ၢ်သုတၢ်ကမၣ်လီၤ.

လံာ်တၢ်ဂံၢ် 4:15

တုၤတၢ်အဆၢကတီၢ်ဘၣ်လၢတၢ်ရူၢ်လီၤပှီၢ်သူၣ်ဒဲတဖၣ်ဒီးစီၤကဃး အဒူၣ်ထၢကစိာ်ထီၣ်တၢ်စီဆှံအပီးအလီတဖၣ်ဖဲဒၣ်စီၤအၤဟရိၣ် ဒီးအဖိခွါတဖၣ်ကျၢၢ်ဘၢတၢ်ခဲလၢာ်ဒီးအတၢ်ပီးတၢ်လီတဖၣ်ဝံၤ ဝဲအခါန့ၣ်လီၤ. စီၤကဃးအဒူၣ်ထၢတဘၣ်ထိးဘၣ်တၢ်စီဆှံအပီးအလီတဖၣ်အံၤဘၣ်. မ့ၢ်ထိးဘၣ်ဒီးအဝဲသ့ၣ်ကသံဝဲလီၤ. တၢ်တဖၣ်အံၤမ့ၢ်စီၤကဃးအဒူၣ်ထၢအမူအဒါတဖၣ်တဘျီ လၢ်လၢ်ဖဲဒဲစီဆှံဘၣ်တၢ်သုးအီၤန့ၣ်လီၤ.

လံာ်တၢ်ဂံၢ် 4:5

ယွၤဟ့ၣ်လီၤစီၤမိၤၡ့လၢတၢ်သိၣ်လိနဲၣ်ယုၤတဖၣ်ဒ်အဖီလာ်အံၤ အသိးန့ၣ်လီၤ. ဖဲအကတီၢ်လၢတၢ်ကရူၢ်လီၤတၢ်သူၣ်ဒဲအလီၢ်န့ၣ်, စီၤအၤဟရိၣ်ဒီးအဖိခွါတဖၣ်ကလဲၤနုာ်လီၤဆူဒဲစီဆှံအပူၤ, ဘ့ၣ်လီၤယၣ်ဘျးသဒၢလၢအအိၣ်လၢတၢ်အၢၣ်လီၤအီလီၤ အတလါစီဆှံအမဲာ်ညါဒီးကးဘၢတလါစီဆှံလၢယၣ်န့ၣ်လီၤ.

လံာ်တၢ်ဂံၢ် 7:89

ဖဲစီၤမိၤၡ့လဲၤနုာ်လီၤဆူဒဲစီၤဆှံအပူၤဒ်သိးက, ကတိၤတၢ်ဒီးယွၤအကတီၢ်န့ၣ်အဝဲနၢ်ဟူယွၤကတိၤတၢ်ဒီးအီၤလၢ တလါစီဆှံအခိၣ်ကၢၢ်အဖီခိၣ်ဖဲတၢ်ဘၣ်တ့အိၣ်ဒီးအဒံးဆ့အိၣ်ဝဲခံခီ တဖၣ်အကဆူးန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 1:24

ဖဲအဝဲထုးဖှၣ်အနုၢ်လၢအီၤဝံၤန့ၣ်, ပိာ်မုၣ်အံၤလဲၤစိာ်အီၤ ဆူဝ့ၢ်ၡံလိၤ, ဃုာ်ဒီးကျီၢ်ဖါအသးအိၣ်သၢနံၣ်တဒု, ကိၣ်ကမူၣ်သၢသလိးဒီးထၢၣ်တၢ်ဖံးပှဲၤဒီးစပံးထံတဖျၢၣ်န့ၣ်လီၤ. ပိာ်မုၣ်န့ၣ်လဲၤစိာ်စီၤၡမူၤအ့လးဖဲအမ့ၢ်ဒံးဖိသၣ်ဆံးအခါ န့ၣ်ဆူယွၤအဟံၣ်လၢဝ့ၢ်ၡံလိၤန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 14:3

(ပှၤလုၢ်တၢ်အခိၣ်လၢသိးဝဲဒီးအ့ဖိးန့ၣ်မ့ၢ်ဝဲယွၤအပှၤလုၢ် တၢ်အခိၣ်လၢဝ့ၢ်ၡံလိၤအပူၤ, စီၤဧ့လံၤအလံၤခွါဒီးစီၤအဃံးတူာ်အဒီပုၢ်ဝဲၢ်စီၤအံကဘိး အဖိခွါစီၤအဃံယၤန့ၣ်လီၤ.) စီၤယိနၤသၣ်ဟးထီၣ်န့ၣ်ပှၤတဖၣ်တသ့ၣ်ညါဘၣ်ဝဲဘၣ်.

လံာ်စီၤၡမူၤအ့လးအခီၣ်ထံးတဘ့ၣ် 2:22

ခဲအံၤစီၤဧ့လံၤအသးပှၢ်လံ. အဝဲနၢ်ဟူဘၣ်တၢ်ဂ့ၢ်ကိးမံၤဒဲး ဘၣ်ဃးအဖိခွါတဖၣ်မၤပှၤအံၣ်စရ့လးဖိတဖၣ်ဒီးအဝဲသ့ၣ်မံ ဃုာ်ဂဲၤဃုာ်ဒၣ်လဲာ်ဒီးပှၤပိာ်မုၣ်တဖၣ်လၢအမၤတၢ်လၢ တၢ်ဘူၣ်ထီၣ်ဘါထီၣ်ယွၤအဒဲအကျဲစၢၤန့ၣ်လီၤ.