လံာ်စီၤၡမူၤအ့လးအခီၣ်ထံးတဘ့ၣ် 13:3 - Sgaw Karen Common Bible

³ စီၤယိနၤသၣ်မၤသံကွံာ်ပှၤဖလ့ၡသးဖိအသုးခိၣ်ဖးဒိၣ်လၢဝ့ၢ်က့ဘၤ, ဒီးကယဲၢ်ပှၤဖလ့ၡသးဖိကိးဂၤနၢ်ဟူတၢ်ဂ့ၢ်န့ၣ်လီၤ. အန့ၣ်ဝံၤဒီးစီၤစီလူးဆှၢလီၤပှၤစိာ်တၢ်ကစီၣ်ဒ်သိးကကိး ဖှိၣ်ပှၤဧ့ၤဘြံၤဖိဆူတၢ်ဒုးတၢ်ယၤခီဖျိတၢ်အူထီၣ်ကွဲၤတဖျၢၣ် သကုၤကီၢ်ဒီဘ့ၣ်ညါန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 13:3 Iomraidhean Croise

လံာ်စီၤၡမူၤအ့လးခံဘ့ၣ်တဘ့ၣ် 2:28

အန့ၣ်ဝံၤဒီးစီၤယိၤအာ်အူထီၣ်ကွဲၤဒ်တၢ်ပနီၣ်တမံၤ အသိးလၢအပှၤတဖၣ်ကဆိကတီၢ် တၢ်လူၤထွဲပှၤအံၣ်စရ့လးဖိတဖၣ်အဂီၢ်န့ၣ်လီၤ. မၤသးဒ်န့ၣ်ဒီးတၢ်ဒုးတၢ်ယၤဆိကတီၢ်အသးလီၤ.

လံာ်စီၤၡမူၤအ့လးခံဘ့ၣ်တဘ့ၣ် 20:1

တၢ်မၤအသးလၢဝ့ၢ်ကံးလကၤလးအပူၤန့ၣ်ပှၤတဂိာ်တသီၣ်ဘၣ်တၢ်အိၣ် ဝဲတဂၤလၢပှၤဘံၣ်ယၤမံၣ်အဒူၣ်အကျါ, လၢအမ့ၢ်စီၤကံးဘြံၤအဖိခွါစီၤၡဘၤန့ၣ်လီၤ. အဝဲအူထီၣ်ကွဲၤဒီးကိးပသူထီၣ်ဝဲဒၣ်, “မ်စီၤဒၤဝံးဘၣ်တၢ်ပာ်လီၤကွံာ်အလီၢ်အလၤတက့ၢ်. ပတပိာ်အခံဘၣ်. ပှၤကီၢ်အံၣ်စရ့လးဖိသ့ၣ်ဧၢ, မ်ပက့ၤကဒါက့ၤဆူဟံၣ်တက့ၢ်.”

လံာ်စီၤၡမူၤအ့လးခံဘ့ၣ်တဘ့ၣ် 23:14

အကတီၢ်ဖဲန့ၣ်, စီၤဒၤဝံးအိၣ်ဝဲလၢတိာ်ခၢၣ်သနၢၣ်တဖျၢၣ်အပူၤ ဒီးပှၤဖလ့ၡသးဖိတဖုမၤန့ၢ်ကွံာ်ဝ့ၢ်ဘ့ၤသလ့ဃ့ၣ်န့ၣ်လီၤ.

လံာ်ယၡါယၤ 10:29

အဝဲသ့ၣ်လဲၤခီဖျိတ့ၢ်လံတၢ်ကဆူးဒီးမံဝဲဖဲဝ့ၢ်က့ဘၤလီၤ. ပှၤတဖၣ်လၢဝ့ၢ်ရၤမါအပူၤပျံၤတၢ်ဖုးတၢ်ဒီးပှၤလၢစီၤပၤစီၤ စီလူးအဝ့ၢ်ကံးဘဧၤအပူၤတဖၣ်ထွးထီၣ်ဃ့ၢ်တ့ၢ်လံဝဲလီၤ.

လံာ်စကၤရယၤ 14:10

လီၢ်ကဝီၤဒီတကဝီၤညါ, စးထီၣ်လၢဝ့ၢ်က့ဘၢ်လၢကလံၤစိး, ပၢၢ်လၢဝ့ၢ်ရံးမိၣ်လၢကလံၤထံးန့ၣ်ကဘၣ်တၢ်မၤပၢၤအီၤလီၤ. ဝ့ၢ်ယရူၤၡလ့ၣ်ကအိၣ်ထီၣ်ထီလၢတၢ်လီၢ်လၢအအိၣ်ဝးတရံးအီၤ တဖၣ်အဖီခိၣ်န့ၣ်လီၤ. ဝ့ၢ်န့ၣ်အိၣ်သူၣ်လီၤဒၣ်အသးဖဲအလီၢ်လီၢ်စးထီၣ်လၢဘံၣ် ယၤမံၣ်အတြဲၤဒီးတုၤဆူဝ့ၢ်သနၢၣ်အတြဲၤ, လၢအမ့ၢ်တြဲၤလၢအအိၣ်ပာ်တ့ၢ်လၢပျၢၤ, ဒီးစးထီၣ်လၢတၢးထီဃနၤန့လးဒီးတုၤဆူစီၤပၤအနီၣ်စံၣ် စပံးထံတဖၣ်အလီၢ်န့ၣ်လီၤ.

လံာ်စီၤယိၤၡူ 18:24

ကဖၢ်ဧမိနဲ, ဧိးဖနံၤ, ဒီးက့ဘၤလီၤ. မ့ၢ်ဝ့ၢ်တဆံခံဝ့ၢ်ဃုာ်ဒီးဝ့ၢ်ဖိလၢအအိၣ်ဝးတရံးအီၤတဖၣ် န့ၣ်လီၤ.

လံာ်စီၤယိၤၡူ 21:17

ဒီးလၢဘံၣ်ယၤမံၣ်အဒူၣ်အကျါ, အဝဲသ့ၣ်ဘၣ်တၢ်ဟ့ၣ်လီၤအီၤဝ့ၢ်လွံၢ်ဖျၢၣ်လၢအမ့ၢ်ဝဲကံးဘိၣ်, က့ဘၤ,

လံာ်ပှၤစံၣ်ညီၣ်ကွီၢ် 3:27

ဖဲအဝဲတုၤဆူကီၢ်အ့ဖရဲၣ်ကစၢၢ်ကလိဒီး, အဝဲအူထီၣ်ကွဲၤဒ်သိးကကိးဃီၤကီၢ်အံၣ်စရ့လးအပှၤပိာ်ခွါတဖၣ်လၢကလဲၤထီၣ်ဒုးတၢ်အဂီၢ်လီၤ. ဒီးအဝဲဆှၢပှၤတဖၣ်န့ၣ်ဆူတၢ်ပၢၤခိၣ်န့ၣ်လီၤ.

လံာ်ပှၤစံၣ်ညီၣ်ကွီၢ် 6:34

ယွၤအသးလီၤဘၣ်လၢစီၤကံးဒဧိၣ်အလိၤ, ဒီးအဝဲအူထီၣ်ကွဲၤ ဒ်သိးကကိးဖှိၣ်ပှၤအဘံၤဧ့စ့ၢ်အဒူၣ်ဖိထၢဖိလၢအကပိာ်အခံန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 10:5

အန့ၣ်ဝံၤဒီးနကလဲၤဆူကစၢ်ယွၤအကစၢၢ်အအိၣ်လၢဝ့ၢ်ကံးဘဧးအပူၤ ဖဲပှၤဖလ့ၡသးဖိတဖၣ်သူၣ်ဒဲအလီၢ်အိၣ်ဝဲတတီၤန့ၣ်လီၤ. ဖဲတၢ်လဲၤနုာ်လီၤဆူဝ့ၢ်အကျဲစၢၤန့ၣ်နကထံၣ်လိာ်ဒီးဝံတဖု ဟဲလီၤလၢတၢ်လုၢ်လီၢ်အိၣ်လၢကစၢၢ်လိၤန့ၣ်ဒ့ဒီးသီတူၢ်တဖၣ်, ပှီၢ်ဒၢတဖၣ်, အူပံတဖၣ်ဒီးမၤသီၣ်စှၢၢ်စှံးတဖၣ်န့ၣ်လီၤ. အဝဲသ့ၣ်ကဂဲၤကလံာ်ဒီးကိးပသူဝဲလီၤ.

လံာ်စီၤၡမူၤအ့လးအခီၣ်ထံးတဘ့ၣ် 13:16

စီၤစီလူး, အဖိခွါစီၤယိနၤသၣ်ဒီးအပှၤတဖၣ်သူၣ်ထီၣ်အဒဲ ဖဲဝ့ၢ်ကံဘၤလၢပှၤဘံၣ်ယၤမံၣ်ဖိအကီၢ်ပူၤန့ၣ်လီၤ. ပှၤဖလ့ၡသးဖိတဖၣ်အသူၣ်ဒဲအလီၢ်အိၣ်ဖဲဝ့ၢ်မံးကမၣ်လီၤ.