လံာ်စီၤပၤအခီၣ်ထံးတဘ့ၣ် 8:36 - Sgaw Karen Common Bible

³⁶ ဒိကနၣ်လၢ်အဝဲသ့ၣ်လၢမူခိၣ်န့ၣ်တက့ၢ်. ပျၢ်လၢ်စီၤပၤဒီးကီၢ်အံၣ်စရ့လးအပှၤဂီၢ်မုၢ်အတၢ်ဒဲးဘးတဖၣ် ဒီးသိၣ်လိအဝဲသ့ၣ်လၢကမၤတၢ်လၢအဘၣ်န့ၣ်တက့ၢ်. အန့ၣ်ဒီးယွၤဧၢ, ဒုးစူၤလီၤတၢ်လၢနကီၢ်အံၤအဖီခိၣ်, ကီၢ်လၢနဟ့ၣ်တ့ၢ်နပှၤဂီၢ်မုၢ်ဒ်အတၢ်န့ၢ်သါအဂၢၢ်အကျၢၤအသိးန့ၣ် တက့ၢ်.

လံာ်စီၤပၤအခီၣ်ထံးတဘ့ၣ် 8:36 Iomraidhean Croise

လံာ်စီၤပၤအခီၣ်ထံးတဘ့ၣ် 18:1

တယံာ်ဘၣ်ဝံၤအလီၢ်ခံ, လၢတၢ်ယီၤဃ့သၢနံၣ်တနံၣ်အပူၤန့ၣ်ယွၤ စံးဘၣ်စီၤအ့ၤလံယၤ, “လဲၤဒီးဒုးနဲၣ်နသးလၢစီၤပၤအၤဃာ်, ဒီးယကဒုးဟဲစူၤလီၤတၢ်လီၤ.”

လံာ်စီၤပၤအခီၣ်ထံးတဘ့ၣ် 18:41

အန့ၣ်ဒီး, စီၤအ့ၤလံယၤစံးဘၣ်စီၤပၤအၤဃာ်, “ခဲအံၤလဲၤဒီးအီၣ်တၢ်တက့ၢ်. ယနၢ်ဟူဘၣ်တၢ်ဟဲစူၤအသီၣ် သုးဘူးအသးလီၤ.”

လံာ်စီၤပၤအခီၣ်ထံးတဘ့ၣ် 18:45

လၢတစိၢ်ဖိအတီၢ်ပူၤန့ၣ်မူကပိာ်လိၤဘၣ်တၢ်ကးဘၢအီၤလၢတၢ် အၢၣ်ခံးသူတဖၣ်, ကလံၤအူထီၣ်တၢ်ဒီးတၢ်စးထီၣ်ဟဲစူၤလီၤဒိၣ်ဒိၣ်ကလဲာ်လီၤ. စီၤအၤဃာ်ဒိးထီၣ်အလ့ၣ်ကဟၣ်ဒီးစးထီၣ်က့ၤကဒါက့ၤဆူဝ့ၢ်ယံး စရ့လးန့ၣ်လီၤ.

စံးထီၣ်ပတြၢၤ 119:133

ဒုးထွဲယခီၣ်လၢနကလုၢ်ကထါအပူၤဒ်နအၢၣ်လီၤတ့ၢ်အသိး န့ၣ်တက့ၢ်. ဒီးမ်တၢ်အၢတၢ်သီအသုတပၢယၤနီတမံၤတဂ့ၤ.

စံးထီၣ်ပတြၢၤ 119:33

ယွၤဧၢ, သိၣ်လိယၤလၢနတၢ်သိၣ်တၢ်သီ အကျဲန့ၣ်တက့ၢ်. ဒီးယကတိၢ်န့ၢ်ဖံးဃာ်အီၤတုၤအကတၢၢ်လီၤ.

စံးထီၣ်ပတြၢၤ 143:8

ဒုးသ့ၣ်နီၣ်ယၤလၢနတၢ်အဲၣ်ဂၢၢ်ကျၢၤကိးဂီၤဒဲးတက့ၢ်. အဂ့ၢ်ဒ်အံၤ, ယသန့ၤယသးလၢနၤလီၤ. သိၣ်လိယၤလၢကျဲလၢယဂ့ၤပိာ်တဘိန့ၣ်တက့ၢ်. အဂ့ၢ်ဒ်အံၤ, ယစိာ်ထီၣ်ယသးဆူနအိၣ်လီၤ.

စံးထီၣ်ပတြၢၤ 25:12

ပှၤလၢအစူၢ်ယွၤန့ၣ်, ကမၤလိန့ၢ်တၢ်လၢအီၤဘၣ်ဃး ကျဲလၢအဝဲသ့ၣ်ကြၢးပိာ်ထွဲဝဲဒၣ်န့ၣ်လီၤ.

စံးထီၣ်ပတြၢၤ 25:8

အဂ့ၢ်ဒ်အံၤ, ယွၤန့ၣ်တီဝဲလိၤဝဲဒီးဂ့ၤဝဲ, ဒုးနဲၣ်ပှၤတၢ်ဒဲးဘးဖိသ့ၣ်တဖၣ်လၢကျဲန့ၣ်လီၤ.

စံးထီၣ်ပတြၢၤ 27:11

ယွၤဧၢ, တၢ်လၢနဆၢလၢယကမၤန့ၣ်, သိၣ်လိယၤတက့ၢ်. ဒီးဆှၢယၤလၢကျဲအမုာ်အပၢၤအပူၤ, အဂ့ၢ်မ့ၢ်လၢယအိၣ်ဒီးဒုၣ်ဒါအါဂၤအဃိန့ၣ်လီၤ.

စံးထီၣ်ပတြၢၤ 32:8

ယွၤစံးဝဲ, “ယကသိၣ်လိနၤကျဲလၢနကြၢးလဲၤ, ယကနဲၣ်လိဒီးဟ့ၣ်ကူၣ်ဟ့ၣ်ဖးနၤလီၤ.

စံးထီၣ်ပတြၢၤ 5:8

ယွၤဧၢ, ဆှၢယၤလၢနကျဲမ့ၢ်ကျဲတီအပူၤ မ့ၢ်လၢယအိၣ်ဒီးယဒုၣ်ယဒါအါမးအဃိန့ၣ်တက့ၢ်. မၤလိၤမၤပျီနကျဲလၢယမဲာ်ညါတက့ၢ်.

စံးထီၣ်ပတြၢၤ 68:10

နပှၤဂီၢ်မုၢ်အိၣ်ဝဲဆိးဝဲလၢအပူၤ, ယွၤဧၢ, နကတဲာ်ကတီၤန့ၢ်တၢ်လၢ ပှၤဖှီၣ်န့ၢ်ယာ်ကဲအဂီၢ် လၢနတၢ်ဂ့ၤတၢ်ဝါအပူၤန့ၣ်လီၤ.

စံးထီၣ်ပတြၢၤ 68:9

ကစၢ်ယွၤဧၢ, နမၢတၢ်ဟဲစူၤအါအါကလဲာ်, နမၤကျၢၤနတၢ်န့ၢ်သါဖဲတၢ်ဘှံးအသးအခါန့ၣ်လီၤ.

စံးထီၣ်ပတြၢၤ 86:11

ယွၤဧၢ, နဲၣ်လိယၤလၢနကျဲဒ်သိး ယကလဲၤတၢ်လၢနတၢ်မ့ၢ်တၢ်တီအပူၤ, ဒီးဟ့ၣ်ယၤတၢ်သးစၢၢ်ဆၢပံၢ်ကလာ် လၢယကပျံၤနမံၤအဂီၢ်တက့ၢ်.

စံးထီၣ်ပတြၢၤ 94:12

ယွၤဧၢ, ပှၤလၢနသိၣ်ဃီၣ်အီၤ, ဒီးလၢနသိၣ်လိအီၤလၢနတၢ်သိၣ်တၢ်သီန့ၣ်ဘၣ်ဆိၣ်ဂ့ၤဝဲလီၤ.

လံာ်ယၡါယၤ 30:21

သုမ့ၢ်ဟးဖျိးကွံာ်လၢကျဲဒီးဟးဆူစုထွဲမ့ၢ်ဂ့ၤ, ဆူစုစ့ၣ်မ့ၢ်ဂ့ၤ ဘၣ်ဆၣ်ဒီး, သုကနၢ်ဟူဘၣ်အကလုၢ်လၢသုလီၢ်ခံလၢအစံးဝဲ, “ကျဲအိၣ်ဖဲအံၤလီၤ. ပိာ်ထွဲအီၤတက့ၢ်,” န့ၣ်လီၤ.

လံာ်ယၡါယၤ 35:8

ကျဲမုၢ်ဖးဒိၣ်တဘိလၢအဘၣ်တၢ်ကိးအီၤလၢ, “တၢ်စီဆှံအကျဲ” ကအိၣ်ထီၣ်ဝဲလီၤ. ပှၤတၢ်ဒဲးဘးဖိတလဲၤတၢ်လၢကျဲအဝဲန့ၣ်နီတဂၤနီတစုဘၣ်. ပှၤဟးဂီၤဖိတဖၣ်လၢအကဆှၢကမၣ်ဘၣ်ပှၤတဖၣ်လၢအပိာ်ကျဲ အဝဲန့ၣ်တအိၣ်နီတဂၤဘၣ်.

လံာ်ယံးရမံယၤ 14:22

ပှၤကလုာ်တဖၣ်အတၢ်ဂီၤတၢ်ဖီၣ်တဖၣ်လၢအဒုးစူၤလီၤတၢ်သ့န့ၣ်, တအိၣ်ဘၣ်. မူကပိာ်လိၤအကစၢ်ဒၣ်ဝဲဒုးလီၤသဖှံၣ်မူခိၣ်ထံ တသ့စ့ၢ်ကီးဘၣ်. အိ, ယွၤပကစၢ်ယွၤဧၢ, ပပာ်ပတၢ်မုၢ်လၢ်လၢနပူၤလီၤ. အဂ့ၢ်ဒ်အံၤ, နမ့ၢ်ပှၤတဂၤလၢအမၤတၢ်သ့ၣ်တဖၣ်အံၤန့ၣ်လီၤ.

လံာ်ယံးရမံယၤ 42:3

ထုကဖၣ်လၢယွၤ, ပကစၢ်ယွၤကဒုးနဲၣ်ပှၤကျဲလၢပဂ့ၤပိာ်အီၤ, ဒီးတၢ်လၢပကြၢးမၤအီၤန့ၣ်ကက့ၢ်.”

လံာ်ယံးရမံယၤ 6:16

ယွၤစံးဘၣ်တ့ၢ်အပှၤဂီၢ်မုၢ်, “ဆၢထၢၣ်ဖဲကျဲဘၣ်သဂၢၢ်လိာ်သးဒီးကွၢ်တၢ်တက့ၢ်. သံကွၢ်က့ၤကျဲဖိလၢပျၢၤတဖၣ်ဒီး, ကျဲမုၢ်အဂ့ၤကတၢၢ်အိၣ်ဝဲဖဲလဲၣ်န့ၣ်တက့ၢ်. လဲၤတၢ်လၢအပူၤဒီး သုကအိၣ်မူဘၣ်လၢတၢ်ဃူတၢ်မုာ်အပူၤန့ၣ်လီၤ.” ဘၣ်ဆၣ်ဒီးအဝဲသ့ၣ်စံးဝဲ, “ပတလဲၤပိာ်ဘၣ်.”

လံာ်ယိၤအ့လး 2:23

စံယိၣ်အပှၤဂီၢ်မုၢ်ဧၢ, သူၣ်ခုသးခုတက့ၢ်. သူၣ်ဖှံသးညီလၢယွၤ, သုကစၢ်ယွၤမၤတ့ၢ်တၢ်လၢသုဂီၢ်အဃိန့ၣ်တက့ၢ်. အဂ့ၢ်ဒ်အံၤ, အဝဲဒၣ်ဟ့ၣ်လီၤသုလၢတၢ်စူၤအထံလၢအကြၢးဝဲဘၣ်ဝဲ ဒီးဒုးစူၤလီၤန့ၢ်သုတၢ်စူၤထံအါအါကလဲာ်, တၢ်စူၤထံလၢအဆိဒီးလၢခံ, ဒ်လၢညါအသိးန့ၣ်လီၤ.

လံာ်မံကၤ 4:2

ဒီးအပှၤဂီၢ်မုၢ်ကစံးဝဲ, “မ်ပလဲၤထီၣ်သကိးဆူယွၤအကစၢၢ်အဒီခိၣ်, ဆူအံၣ်စရ့လးအကစၢ်ယွၤအတၢ်လုၢ်လီၢ်တက့ၢ်. အဂ့ၢ်ဒ်အံၤ, ကသိၣ်လိပှၤလၢတၢ်လၢအအဲၣ်ဒိး ပကမၤအီၤတဖၣ်, ပကလဲၤတၢ်လၢကျဲတဖၣ်လၢအဃုထၢန့ၢ်ပှၤလီၤ. အဂ့ၢ်ဒ်အံၤ, ယွၤအတၢ်သိၣ်လိဟဲလၢဝ့ၢ်ယရူၤၡလ့ၣ်, ဒီးကတိၤတၢ်လၢစံယိၣ်ဆူအပှၤဂီၢ်မုၢ်အအိၣ်လီၤ”.

လံာ်မးသဲ 22:16

တၢ်န့ၣ်ဝံၤအလီၢ်ခံ, အဝဲသ့ၣ်ဆှၢလီၤအပျဲၢ်အဘီၣ်တနီၤ, ဃုာ်ဒီးပှၤအိၣ်လၢဟ့ၤရိာ်အကရၢပူၤတနီၤ, ဆူယ့ၣ်ၡူးအအိၣ်လီၤ. အဝဲသ့ၣ်စံးဘၣ်အီၤ, “သရၣ်ဧၢ, ပသ့ၣ်ညါလၢနမ့ၢ်ပှၤလၢအတဲတၢ်တီတီတဂၤဒီးသိၣ် လီၤသီလီၤတၢ်မ့ၢ်တၢ်တီဘၣ်ဃးကစၢ်ယွၤအတၢ်ဘၣ်အသး လၢပှၤကညီအဂီၢ်, ဒီးနတပျံၤဒီးကွၢ်မဲာ်ပှၤနီတဂၤဘၣ်. အဂ့ၢ်ဒ်အံၤ ပှၤကညီအလီၢ်အလၤန့ၣ်, နတပာ်ဒိၣ်လီၤဆီအီၤဘၣ်.

လံာ်စီၤၡမူၤအ့လးအခီၣ်ထံးတဘ့ၣ် 12:23

မ့မ့ၢ်ယၤန့ၣ်, ယွၤတြီတၢ်လၢယကမၤတၢ်ဒဲးဘးထီဒါအီၤခီဖျိ ယတဘၣ်ဘါထုကဖၣ်လၢၤလၢသုဂီၢ်နီတစုဘၣ်န့ၣ်လီၤ. အခိၣ်တလိာ်, ယကသိၣ်လိသုလၢတၢ်မနုၤဂ့ၤဝဲဒီးဘၣ်ဝဲ လၢသုဂီၢ်လၢသုကမၤအီၤအဂီၢ်န့ၣ်လီၤ.