၁ ယိၤဟၣ် 4:1 - Sgaw Karen Common Bible

¹ ယတံၤသကိးသးဘိသ့ၣ်ဧၢ, ပှၤလၢအစံးလီၤအသးလၢအအိၣ်ဒီးယွၤအသးခဲလၢာ်န့ၣ်, နာ်အီၤတဂ့ၤ. မ့မ့ၢ်, မၤကွၢ်အီၤဒ်သိးသုကထံၣ်သ့ၣ်ညါသးလၢအအိၣ်ဒီးအဝဲသ့ၣ်, မ့ၢ်အဟဲလၢကစၢ်ယွၤအအိၣ်ကစီဒီဧါအဂီၢ်န့ၣ်တက့ၢ်. အဂ့ၢ်ဒ်လဲၣ်န့ၣ်, ဝံအဘျၣ်အါဂၤအိၣ်ထီၣ်ဝဲလၢဟီၣ်ခိၣ်ချၢလံ.

၁ ယိၤဟၣ် 4:1 Iomraidhean Croise

လံာ်စီၤပၤအခီၣ်ထံးတဘ့ၣ် 13:18

အန့ၣ်ဒီးဝံသးပှၢ်လၢဝ့ၢ်ဘ့ၤသ့လးစံးဘၣ်အီၤ, “ယမ့ၢ်စ့ၢ်ကီးဝံတဂၤဒ်နၤအသိး, ဒီးဒ်ယွၤအတၢ်မၤလိာ်အ သိး, ကလူးတဂၤတဲဘၣ်ယၤလၢယကဘၣ်က့ၤကိးနၤဆူ ဟံၣ်ဒီးတူၢ်လိာ်ခီၣ်ဆၢနၤန့ၣ်လီၤ.” နီၢ်နီၢ်တခီဝံသးပှၢ်န့ၣ်လီတၢ်လီၤ.

တၢ်ကတိၤဒိ. 14:15

ပှၤဟးဂီၤဖိကနာ်တၢ်တမံၤဂ့ၤတမံၤဂ့ၤလီၤ. မ့မ့ၢ်, ပှၤလၢအသူၣ်ဆးသးဆးတဖၣ်ပလီၢ်ပဒီအသးလၢ အခီၣ်ကါန့ၣ်လီၤ.

လံာ်ယံးရမံယၤ 14:14

ဘၣ်ဆၣ်ဒီးယွၤစံးဆၢက့ၤဝဲ, “ဝံတဖၣ်န့ၣ်ကတိၤလီတၢ်လၢယမံၤအပူၤလီၤ. ယတမၢလီၤဘၣ်အဝဲသ့ၣ်မ့ၢ်ဂ့ၤ, ဟ့ၣ်လီၤအဝဲသ့ၣ်လၢယကလုၢ်တမံၤမံၤမ့ၢ်ဂ့ၤ, ကတိၤတၢ်တဘီဒၣ်လဲာ်ဒီးအဝဲသ့ၣ်မ့ၢ်ဂ့ၤန့ၣ်ဘၣ်. တၢ်ထံၣ်လၢညါခီတဖၣ်လၢအဝဲသ့ၣ်စံးကတိၤဝဲလၢ အဂ့ၢ်န့ၣ်တဟဲလၢယအိၣ်ဘၣ်. အဝဲသ့ၣ်အတၢ်ကတိၤဆိ ပာ်တၢ်တဖၣ်န့ၣ်မ့ၢ်တၢ်တဖၣ်လၢအလုၢ်အပှ့ၤတအိၣ် ဘၣ်လၢအဆိကမိၣ်ထီၣ်န့ၢ်ဒၣ်ဝဲန့ၣ်လီၤ.

လံာ်ယံးရမံယၤ 23:16

ယွၤသ့တၢ်လၢာ်စံးဘၣ်ဝ့ၢ်ယရူၤၡလ့ၣ်အပှၤဂီၢ်မုၢ်, “ဒိကနၣ်တၢ်လၢဝံတဖၣ်စံးကတိၤဝဲန့ၣ်တဂ့ၤ. အဝဲသ့ၣ်မၤပှဲၤသုဒီးတၢ်မုၢ်လၢ်လၢအတတီဘၣ်တဖၣ်န့ၣ်လီၤ. အဝဲသ့ၣ်တဲဘၣ်သုတၢ်လၢအဆိကမိၣ်ထီၣ်ဒၣ်ဝဲ, ဒီးတမ့ၢ်ဘၣ်တၢ်လၢယစံးတ့ၢ်တဖၣ်န့ၣ်ဘၣ်.

လံာ်ယံးရမံယၤ 5:31

ဝံတဖၣ်တကတိၤတၢ်အဂၤဘၣ်မ့ၢ်ဒၣ်ထဲတၢ်လီတၢ်ဝ့ၤ, ပှၤလုၢ်တၢ်အခိၣ်တဖၣ်ပၢတၢ်ဒ်ဝံတဖၣ်အံၤဟ့ၣ်လီၤအကလုၢ်အသိး, ဒီးယပှၤဂီၢ်မုၢ်တဒုးနဲၣ်ဘၣ်အတၢ်သးတလီၤပလိာ်လၢတၢ်ဂ့ၢ်တဖၣ် အံၤအဖီခိၣ်နီတမံၤဘၣ်. ဘၣ်ဆၣ်, ဖဲတၢ်အံၤခဲလၢာ်အကတၢၢ် ဟဲတုၤလံန့ၣ်အဝဲသ့ၣ်ကမၤတၢ်မနုၤလဲၣ်.”

လံာ်မၢ်ကူး 13:21

အန့ၣ်ဝံၤပှၤတဂၤဂၤမ့ၢ်စံးဘၣ်နၤ, ‘ကွၢ်တက့ၢ်, ခရံာ်ကစၢ်အိၣ်လၢအံၤ’ မ့တမ့ၢ်ဘၣ်ဒီးမ့ၢ်စံးဘၣ်နၤ, ‘ကွၢ်တက့ၢ်, ခရံာ်ကစၢ်အိၣ်လၢန့ၣ်’ ဒီး, နာ်အီၤတဂ့ၤ.

လံာ်လူၤကၣ် 12:57

တၢ်လၢပှၤကြၢးမၤ, တကြၢးမၤန့ၣ်, ဘၣ်မနုၤအဃိသုတစံၣ်ညီၣ်ပဲာ်ဖးနီၤဖးလၢ သုနီၢ်ကစၢ်ဒၣ်သုဝဲန့ၣ်လဲၣ်.

လံာ်လူၤကၣ် 21:8

ယ့ၣ်ၡူးစံးဝဲ, “အိၣ်ပလီၢ်သူၣ်ပလီၢ်သးတက့ၢ်. တဘၣ်ပျဲပှၤလီန့ၢ်သုတဂ့ၤ. အဂ့ၢ်ဒ်အံၤ, ပှၤအါဒံအါဂၤကဟဲလၢယမံၤဒီးစံးဝဲ, ‘ယမ့ၢ်အဝဲဒၣ်လီၤ.’ ဒီး ‘တၢ်ဆၢကတီၢ်ဟဲတုၤလံ’ န့ၣ်လီၤ. ဘၣ်ဆၣ်ဒီးတဘၣ်ပိာ်အဝဲသ့ၣ်အခံတဂ့ၤ.

မၤတၢ် 17:11

ပှၤဖဲန့ၣ်တဖၣ်ပာ်အသးလဲၢ်ဒိၣ်န့ၢ်ဒံးပှၤဝ့ၢ်သ့းစၤလနံဖိ တဖၣ်လီၤ. အဝဲသ့ၣ်ဒိကနၣ်တၢ်ကစီၣ်လၢတၢ်သူၣ်ဆူၣ်သးဂဲၤ အပူၤ, ဒီးဃုသ့ၣ်ညါနၢ်ပၢၢ်တၢ်ကွဲးအသးစီဆှံကိးနံၤဒဲးဒ်သိး အကသ့ၣ်ညါဘၣ်ဝဲတၢ်လၢစီၤပီလူးစံးကတိၤလၢအဂ့ၢ်တဖၣ်မ့ၢ်, တမ့ၢ်လဲၣ်န့ၣ်လီၤ.

မၤတၢ် 20:29

ယသ့ၣ်ညါယဲဒၣ်လၢယဟးထီၣ်ဝံၤအလီၢ်ခံန့ၣ်, ထွံၣ်မံၤအဒူတဖၣ်ကဟဲနုာ်လီၤဆူသုကျါ, ဒီးတပျဲပူၤသိတဖၣ် န့ၣ်ဘၣ်.

1 ကရံၣ်သူး 12:10

သးစီဆှံဟ့ၣ်ပှၤတဂၤတၢ်စိတၢ်ကမီၤလၢအကမၤတၢ်လီၤလးတဖၣ်, ပှၤအဂၤတဂၤ, တၢ်ဟ့ၣ်ဘၣ်ဃးတၢ်ကတိၤတၢ်လၢဝံအကျိာ်, ဒီးပှၤတဂၤဒၣ်တၢ်သ့တၢ်ဘၣ်လၢအကပဲာ်ဖးနီၤဖးတၢ်ဟ့ၣ်တဖၣ်လၢ အဟဲလၢသးစီဆှံအအိၣ်ဒီးတၢ်ဟ့ၣ်တဖၣ်လၢအတဟဲလၢသးစီဆှံ အအိၣ်န့ၣ်အတၢ်လီၤဆီလီၤ. ဆူပှၤတဂၤအအိၣ်န့ၣ်, အဝဲဟ့ၣ်တၢ်သ့တၢ်ဘၣ်လၢအကတဲဖျါထီၣ်တၢ်လၢအဘၣ်တၢ်စံး ကတိၤလၢကျိာ်လၢပှၤတနၢ်ပၢၢ်အီၤတဖၣ်, ဒီးဆူပှၤတဂၤဒၣ် အဝဲဟ့ၣ်တၢ်သ့တၢ်ဘၣ်လၢအကတဲဖျါထီၣ်တၢ်လၢအဘၣ် တၢ်စံးကတိၤလၢကျိာ်လၢပှၤတနၢ်ပၢၢ်ဘၣ်တဖၣ်အခီပညီန့ၣ်လီၤ.

1 ကရံၣ်သူး 14:29

ပှၤကတိၤတၢ်လၢဝံအကျိာ်ကဘၣ်အိၣ်ထဲခံဂၤမ့တမ့ၢ်သၢဂၤ, မ့မ့ၢ်ပှၤအဂၤတဖၣ်ကဘၣ်စံၣ်ညီၣ်ကွၢ်ဆိကမိၣ်ဘၣ်ဃးတၢ်လၢ အဝဲသ့ၣ်စံးကတိၤဝဲန့ၣ်လီၤ.

၁ သ့းစၤလနံ 5:21

တၢ်ခဲလၢာ်န့ၣ်, မ့ၢ်အတီတတီထိၣ်တဲာ်မၤကွၢ်အီၤတက့ၢ်. ဟံးဃာ်တၢ်လၢအဂ့ၤတဖၣ်,

၂ သ့းစၤလနံ 2:2

သုတပျဲပှၤမၤသဘံၣ်ဘုၣ်ဒီးမၤတံာ်တာ်သုတၢ်ဆိကမိၣ်ညီ ကဒၣ်ဘၣ်ဃးကစၢ်အမုၢ်နံၤဟဲတုၤအိၣ်လံအဂ့ၢ်, ခီဖျိတၢ်ကတိၤလၢဝံအကျိာ်မ့ၢ်ဂ့ၤ, တၢ်စံၣ်တဲၤတဲလီၤမ့ၢ်ဂ့ၤ, လံာ်ပရၢလၢပှၤစံးလၢအဟဲလၢပအိၣ်မ့ၢ်ဂ့ၤန့ၣ်တဂ့ၤ.

၁ တံၤမသ့း 4:1

ယွၤအသးစံးဝဲလီၤတံၢ်လီၤဆဲးလၢပှၤတနီၤကစူးကွံာ်ညိကွံာ် တၢ်စူၢ်တၢ်နာ်အံၤလၢမုၢ်နံၤခံကတၢၢ်တဖၣ်အပူၤန့ၣ်လီၤ. အဝဲသ့ၣ်ကစူၢ်သးလၢအလီတၢ်တဖၣ်ဒီးကပိာ်ထွဲတၢ်ဝံတၢ်နါ တဖၣ်အတၢ်သိၣ်လိသီလိအခံန့ၣ်လီၤ.

၂ တံၤမသ့း 3:13

မ့မ့ၢ်ပှၤအၢပှၤသီဒီးပှၤလီတၢ်ဝ့ၤတၢ်တဖၣ်န့ၣ်ကလဲၤတၢ် ဒံးယံာ်ဒံးအၢထီၣ်, ကလီပှၤဂၤတဖၣ်ဒီးကဘၣ်တၢ်လီ န့ၢ်အီၤစ့ၢ်ကီးန့ၣ်လီၤ.

၂ ပ့းတရူး 2:1

လၢအပူၤကွံာ်ဝံအဘျၣ်တဖၣ်အိၣ်ထီၣ်လၢပှၤဂီၢ်မုၢ် အကျါ, ဒီးဒ်န့ၣ်အသိးသရၣ်အဘျၣ်တဖၣ်ကအိၣ်ထီၣ် လၢသုကျါန့ၣ်လီၤ. အဝဲသ့ၣ်ကဟဲစိာ်နုာ်တၢ်စူၢ်ကမၣ်နာ်ကမၣ်တဖၣ်လၢ ကမၤဟးဂီၤတၢ်, ဒီးအဝဲသ့ၣ်ကသမၢကစၢ်လၢအပှ့ၤက့ၤ အီၤ, သတးဒီးအဝဲသ့ၣ်ကဟဲစိာ်အတၢ်ဟးဂီၤဒၣ်ဝဲချ့ သဒံးန့ၣ်လီၤ.

၁ ယိၤဟၣ် 2:18

ယဖိယလံၤသ့ၣ်ဧၢ, တၢ်အကတၢၢ်ဘူးထီၣ်လံ. သုဘၣ်တၢ်စံးဘၣ်တဲဘၣ်တ့ၢ်သုလၢခရံာ်အဒုၣ်အဒါ ကဟဲဝဲ, ဒီးခဲအံၤခရံာ်အဒုၣ်အဒါအါဂၤဟဲပၢၢ်ထီၣ်တ့ၢ်လံဝဲ အဃိသတးဒီး, ပသ့ၣ်ညါလၢတၢ်အကတၢၢ်ဘူးထီၣ်လံ န့ၣ်လီၤ.

၁ ယိၤဟၣ် 2:7

ယတံၤသကိးသးဘိသ့ၣ်ဧၢ, တၢ်မၤလိာ်လၢယကွဲးန့ၢ်သုအံၤ တမ့ၢ်တၢ်အသီဘၣ်. မ့ၢ်တၢ်မၤလိာ်အလီၢ်လံၤလၢသုဒိးန့ၢ်ဘၣ်တ့ၢ်လံလၢတၢ် အခီၣ်ထံးလံၤလံၤန့ၣ်လီၤ. တၢ်မၤလိာ်အလီၢ်လံၤအံၤ မ့ၢ်တၢ်ကစီၣ်လၢသုနၢ်ဟူတ့ၢ်လံန့ၣ်လီၤ.

၂ ယိၤဟၣ် 1:7

ပှၤလီတၢ်ဝ့ၤတၢ်အါဂၤအိၣ်ထီၣ်ဝဲလၢဟီၣ်ခိၣ်ချၢလီၤ. အဝဲသ့ၣ်မ့ၢ်ပှၤတဖၣ်လၢအတအၢၣ်လီၤအီလီၤဝဲလၢ ယ့ၣ်ၡူးခရံာ်ဟဲဝဲလၢတၢ်ဖံးတၢ်ညၣ်အပူၤဘၣ်. ပှၤဒ်န့ၣ်သိးတဂၤ, မ့ၢ်ပှၤလီတၢ်ဒီးမ့ၢ်ခရံာ်အဒုၣ်အဒါ န့ၣ်လီၤ.

၃ ယိၤဟၣ် 1:11

ယတံၤသကိးသးဘိဧၢ, တဘၣ်ကွၢ်လိမၤဒိးတၢ်အၢတၢ်သီတဂ့ၤ. မ့မ့ၢ်, ကွၢ်လိမၤဒိးတၢ်ဂ့ၤန့ၣ်တက့ၢ်. ပှၤတဂၤဂ့ၤတဂၤဂ့ၤလၢ အမၤတၢ်ဂ့ၤန့ၣ်ဘၣ်ဃးဒီးကစၢ်ယွၤ, ဒီးပှၤတဂၤဂ့ၤတဂၤဂ့ၤလၢ အမၤတၢ်အၢန့ၣ်တထံၣ်ဘၣ်ဒံးကစၢ်ယွၤဘၣ်.

လံာ်လီၣ်ဖျါ 2:2

ယသ့ၣ်ညါတၢ်လၢနမၤတ့ၢ်နဲတဖၣ်လီၤ. ယသ့ၣ်ညါဘၣ်ဃးနဖံးတၢ်မၤတၢ်ဆူၣ်ဆံးအါ, ဒီးနသူၣ်စူၤသးစူၤတ့ၢ်နဲဆံးအါအဂ့ၢ်လီၤ. ယသ့ၣ်ညါလၢနပျဲပှၤအၢပှၤသီတဖၣ်မၤဖဲအသးဒၣ်ဝဲန့ၣ် တကဲဘၣ်. ဒီးလၢနမၤကွၢ်တ့ၢ်နဲပှၤတဖၣ်လၢအစံးလၢ အမ့ၢ်ပှၤတၢ်မၢဖိတဖၣ်ဘၣ်ဆၣ်တမ့ၢ်ဘၣ်, ဒီးနသ့ၣ်ညါဘၣ်တ့ၢ်နဲလၢအဝဲသ့ၣ်မ့ၢ်ပှၤလီတၢ်ဖိတဖၣ် န့ၣ်လီၤ.