လံာ်ကွဲးနီၣ်တၢ်အခီၣ်ထံးတဘ့ၣ် 16:36 - Sgaw Karen Common Bible

³⁶ စံးထီၣ်ပတြၢၤယွၤ, အံၣ်စရ့လးအကစၢ်ယွၤန့ၣ်တက့ၢ်. စံးထီၣ်ပတြၢၤအီၤခဲအံၤဒီးလီၤစိၤလီၤထီန့ၣ်တက့ၢ်. ဒီးပှၤဂီၢ်မုၢ်ခဲလၢာ်စံးဝဲ, “အၤမ့ၣ်” ဒီးစံးထီၣ်ပတြၢၤယွၤလီၤ.

လံာ်ကွဲးနီၣ်တၢ်အခီၣ်ထံးတဘ့ၣ် 16:36 Iomraidhean Croise

လံာ်စီၤပၤအခီၣ်ထံးတဘ့ၣ် 8:15

အဝဲစံးဝဲ, “စံးထီၣ်ပတြၢၤယွၤ, အံၣ်စရ့လးအကစၢ်ယွၤန့ၣ်တ က့ၢ်. အဝဲဟံးဃာ်ဂၢၢ်ကျၢၤအတၢ်အၢၣ်လီၤလၢအမၤတ့ၢ်ဒီးယပၢ်စီၤဒၤဝံး, ဖဲအဝဲစံးဘၣ်အီၤ,

လံာ်စီၤပၤအခီၣ်ထံးတဘ့ၣ် 8:56

“စံးထီၣ်ပတြၢၤယွၤ, လၢအဟ့ၣ်တ့ၢ်အပှၤဂီၢ်မုၢ်လၢတၢ်ဃူ တၢ်ဖိးဒ်အအၢၣ်လီၤတ့ၢ်ဝဲအသိးအဃိန့ၣ်တက့ၢ်. အဝဲဟံးဃာ်ဂၢၢ်ကျၢၤတ့ၢ်အတၢ်အဲၣ်, တၢ်သးအိၣ်အတၢ်အၢၣ်လီၤတဖၣ်လၢအမၤတ့ၢ်ဝဲခီဖျိအခ့ အပှၤစီၤမိၤၡ့န့ၣ်လီၤ.

လံာ်စီၤနဃ့မယၤ 8:6

စီၤဧ့စြၤစံးဝဲဒၣ်, “စံးထီၣ်ပတြၢၤယွၤ, ကစၢ်ဖးဒိၣ်န့ၣ်တက့ၢ်.” ဒီးကယဲၢ်ပှၤဂီၢ်မုၢ်ခဲလၢာ်ယူာ်ထီၣ်အစုဆူထးခီဒီးစံးဆၢဝဲ, “အၤမ့ၣ်, အၤမ့ၣ်” န့ၣ်လီၤ. ဒီးအဝဲသ့ၣ်ချံးခီၣ်တီၤလီၤလၢတၢ်ဘူၣ်ထီၣ်ဘါထီၣ်အပူၤအိၣ် ဒီးအမဲာ်သၣ်အိၣ်ကျးလီၤအသးလၢဟီၣ်ခိၣ်လိၤန့ၣ်လီၤ.

လံာ်စီၤနဃ့မယၤ 9:5

ဒီးပှၤလ့ၤဝံဖိ, စီၤယ့ၤၡူ, စီၤကးမံၤအ့လး, စီၤၡကၤနယၤ, စီၤဘၤနံ, စီၤဃၡၤဘံယၤ, စီၤၡ့ရ့ဘယၤ, စီၤဟိၤဒံယၤ, စီၤၡဘၤနယၤ, စီၤပသၤဃယၤတဖၣ်စံးဝဲဒၣ် “ဂဲၤဆၢထၢၣ်ဒီးစံးထီၣ်ပတြၢၤယွၤသုကစၢ်ယွၤတက့ၢ်. စံးထီၣ်ပတြၢၤအီၤလီၤစိၤလီၤထီတက့ၢ်. မ်ပှၤကိးဂၤဒဲးစံးထီၣ်ပတြၢၤအတၢ်လၤကပီၤအမံၤတက့ၢ်. မ်အဘၣ်တၢ်စံးထီၣ်ပတြၢၤအီၤလၢတၢ်ခဲလၢာ်အဖီခိၣ်တက့ၢ်.”

စံးထီၣ်ပတြၢၤ 106:47

ယွၤပကစၢ်ဧၢယွၤ, အုၣ်က့ၤခီၣ်က့ၤပှၤတက့ၢ်. ကိးက့ၤပှၤလၢ ပှၤကလုာ်တဖၣ်အကျါ ဒ်သိးပကစံးဘျုးစံးဖှိၣ်နၤ ဒီးစံးထီၣ်ပတြၢၤနမံၤစီဆှံန့ၣ်တက့ၢ်.

စံးထီၣ်ပတြၢၤ 106:48

စံးထီၣ်ပတြၢၤယွၤ, အံၣ်စရ့လးအကစၢ်ယွၤတက့ၢ်. စံးထီၣ်ပတြၢၤအီၤခဲအံၤဒီးလီၤထူလီၤယိာ်တက့ၢ်. မ်ပှၤခဲလၢာ်စံးဝဲ, “အၤမ့ၣ်တက့ၢ်.” စံးထီၣ်ပတြၢၤယွၤတက့ၢ်.

လံာ်ယံးရမံယၤ 28:6

“ဂ့ၤဒိၣ်မးလီၤ. ယမုၢ်လၢ်လၢယွၤ ကမၤတၢ်အံၤလီံၤ. ယမုၢ်လၢ်သပှၢ်ကတၢၢ်လၢ အဝဲကမၤလၢထီၣ်ပှဲၤထီၣ် နတၢ်ကတိၤ လၢဝံအကျိာ်ဒီး ကဟဲက့ၤစိာ်ကဒါက့ၤ ယွၤအတၢ်လုၢ်ဟံၣ် အတၢ်ထူးတၢ်တီၤခဲလၢာ်ဒီး ပှၤဂီၢ်မုၢ်ခဲလၢာ်လၢ အဘၣ်တၢ်စိာ်ကွံာ်အီၤဒ်ပှၤဘၣ် တၢ်မၢကဲကုၢ်အီၤ အသိးလၢကီၢ်ဘၤဘူၤလိၣ်တခီန့ၣ်လီၤ.

1 ကရံၣ်သူး 14:16

ဖဲနဟ့ၣ်တၢ်စံးထီၣ်ပတြၢၤဆူကစၢ်ယွၤအအိၣ်ထဲလၢနီၢ်သးန့ၣ်, ပှၤမုၢ်ဆ့ၣ်မုၢ်ဂီၤလၢအဘူၣ်သကိးဘါသကိးတၢ်တဂၤကစံး, “အၤမ့ၣ်” လၢနတၢ်ထုကဖၣ်စံးထီၣ်ပတြၢၤယွၤန့ၣ်ကသ့ဝဲဒ်လဲၣ်. အဝဲနၢ်ပၢၢ်နတၢ်စံးတၢ်ကတိၤတဖၣ်တသ့ဝဲလၢကျဲနီတဘိဘၣ်လီၤ.

အ့းဖ့းစူး 1:3

မ်ပစံးထီၣ်ပတြၢၤကစၢ်ယွၤပကစၢ်ယ့ၣ်ၡူးခရံာ်အပၢ်တက့ၢ်. အဂ့ၢ်ဒ်အံၤ, လၢခရံာ်အပူၤန့ၣ်အဝဲဒၣ်ဟ့ၣ်လီၤပှၤလၢတၢ်ဆိၣ်ဂ့ၤဘၣ်ဃးဒီး သူၣ်ဒီးသးတဖၣ်လၢအအိၣ်ဝဲလၢမူခိၣ်န့ၣ်လီၤ.

၁ ပ့းတရူး 1:3

မ်ပစံးဘျုးကစၢ်ယွၤ, ပကစၢ်ယ့ၣ်ၡူးခရံာ်အပၢ်န့ၣ်တက့ၢ်. မ့ၢ်လၢအတၢ်သးကညီၤဒိၣ်ဝဲအဃိ, အဝဲဟ့ၣ်လီၤပှၤတၢ်မူအသီခီဖျိအဒုးဂဲၤဆၢထၢၣ်က့ၤယ့ၣ်ၡူး ခရံာ်လၢတၢ်သံန့ၣ်လီၤ. တၢ်အံၤမၤပှဲၤပှၤဒီးတၢ်မုၢ်လၢ်အမူ,