Matiu 24:42 - Nupela Testamen long tokples Kandas

⁴² “I mo ra mot in tumarong, uni ka mot tasman a bung ra anumot a Labino in nanpat uni.

Matiu 24:42 Iomraidhean Croise

Matiu 24:36

“Katutaio i tasman a bung o a du bung ra a kum utna ri in nanpat. A kum ensel sapat una langit ka det tasmani, ma o Nutunu kai ke tasmani, o Tamano sot kut i tasmani.

Matiu 24:43

Mot in tasmani: Ra a taman a rumu in tasman a du bung una mirum ra a tene wolong in nanpat uni, in kis ma in tamtamabat anun a rumu. Ken madek ru anun a rumu sur din wolongi.

Matiu 24:44

Mot kai, mot in koikoi taru, uni a Nutun a Musano in nanpat una du bung ra ka mot nuki lena in nanpat uni.

Matiu 25:10

Ikut ra det wan sur det in kukul, a musano ra i nolin matok i wanpat. A limo ra det sa waninar, det wan tomo nami sur a lukaro na unolin, ra di tagar bat a matansako.

Matiu 25:13

“I mo ra mot in tumarong, uni ka mot tasman a bung o a du bung ra a Labino in nanpat uni.

Luk 21:34

“Mot in tumarong mot, sako mot in balon nama pam lukaro ma a ininum, ma a nginara sur a kum utna una nilaun nin upiso, ma a bung ra in nanpat kisin torom mot elar namin nukun.

Luk 21:36

Mot in tumarong mot una kum bung rop, mot in wararing sur mot in dekdek sur mot in walip gusun a kum utna rop ri ra milau det in nanpat. Ma mot in wararing kai sur mot in pet lar pasi sur mot in tur umatan a Nutun a Musano.”

A Pas anun o Pol torom a taro Rom 13:11

Mot in pami lenra, ma mot in tama lele a kum bung ri. A du bung i sa sot sur mot in tuangun gusun a ininep. Uni, ra dat turpas a nurnur un o Karisito, a bung ra o God in ulaun dat, kabaut i milau mulus, ikut uniri i sa milau.

1 Korin 16:13

Mot in tumarong, ma mot in tur dekdek una nurnur. Mot in elar nama kum dekdek na musano, ra ka det ngara.

1 Tesalonaika 5:6

I mo ra gong dat elar nam ara taro ra det inep dumun. Dat in koikoi ma dat in tamtamabat wakak anundat a nilaun.

1 Pita 4:7

A ururop ina kum utna rop i sa milau. I mo ra mot in nuknuk wakak ma mot in tamtamabat wakak anumot a nilaun, sur mot in pet lari sur mot in wararing.

1 Pita 5:8

Mot in tumarong, ma mot in tamtamabat wakak anumot a nilaun, uni anumot a ebar, o Satan, i wan tuptupukus elar nama laion. I kukukuk tuptupukus, ma i sisio sur lako taro sur in nan det.

Tamtama 16:15

“Tama i, an nanpat elar nama tene wolong. Osi ra i kis na tamtamabat ma i waninar anun a kum malu, i dan, sur gong i mengere ma i maimai.”