Jems 1:3 - Nupela Testamen long tokples Kandas

³ uni mot tasmani lena, a kum maut, ra di lar anumot a nurnur nami, in ulabo anumot a tuntunur dekdek.

Jems 1:3 Iomraidhean Croise

Luk 21:19

Anumot a tuntunur dekdek in ulaun mot.

A Pas anun o Pol torom a taro Rom 15:4

Uni a kum wasiso rop ra di sa tumus tari numugu utmakai una Buk Tabu, di tumus tari sur in ususer dat, sur dat in tur dekdek una anundat a nurnur, ma in warut dat kai, sur dat in kis langlang nama nurnur sur a kum utna o God in pami numur.

A Pas anun o Pol torom a taro Rom 2:7

Det ra det dekdek una wakak na pinapam sur o God in pitar a minamar torom det, ma in ulabo pas a risandet, ma det nem a nilaun ra ken rop, o God in pitar a nilaun tukum tandet.

A Pas anun o Pol torom a taro Rom 8:25

Ikut dat, dat kis langlang nama nurnur sur a utna ra ke wanpat utmakai. Dat kis langlang, ma a pinindat ke ngoro.

A Pas anun o Pol torom a taro Rom 8:28

Ra dat tasmani lena, a kum utna rop ra i wanpat, o God i papam nami, sur a wakakino in nanpat torom det, ra det nem o God, ma i sa kabo pas det elar nama nuknukino.

2 Korin 4:17

A kum mamaut ra met taramo det, ka det labo ma ka det in kis suano i, ikut det warut met, sur met in rakon pas a wakak na kinkinis una minamar, ra ken rop. A minamar ra, i labo sakit taun a kum mamaut ra met taramo i.

Kolosi 1:11

Ra o God in udekdek mot nama dekdek rop, tagun a wakak na labino dekdekino, sur mot in kis wowowon ma mot in tur dekdek una kum maut rop ra mot taramo i. Ma mot in gas,

2 Tesalonaika 1:4

I mo ra, metul ut metul ser warango pas mot torom a taro na lotu anun o God una kum tamon. Metul ser warango pas mot una numot a tuntunur dekdek ma anumot a nurnur, ubalan a kum mamaut ra mot taramo i ma a kum ngunungut ra a taro det ban laulau mot nami.

2 Tesalonaika 3:5

Metul wararing sur a Labino in mugu a nuknuki mot sur mot in tasman mulus a marmaris anun o God, ma mot in tasmani kai a kisapi sur mot in tur dekdek una kum mamaut ra o Karisito i sa ese tari torom dat.

Ibru 10:36

Gong a pinimot i ngoro, mot in tur dekdek sur mot in mur a nemnem anun o God, ma numur mot in los pas a kum utna ra i sa uliliman taru uni.

Ibru 12:1

A susut na tene nurnur tagun numugu det tur talilis pas dat ma det upuaso a petutna na nurnur. I mo ra, i wakak sur dat in lakro ru a kum sau rop ra i ser turbat dat una nundat a inawan, ma a kum sakino petutna kai ra i ser ker ukai dat. Ma dat in kalabor, ma gong a pinindat i ngoro una kalkalabor una nundat a kinalabor, ra o God i sa waninar tari sur dat.

Ibru 6:12

Ka met nemi sur mot in tabalamat, awu. Met nemi sur mot in mur a magirandet ra det nurnur ma det kis langlang ma pinindet ke ngoro, ra det in utur ukai asau ra o God i sa uliliman taru nami.

1 Pita 1:7

A kum mamaut ri det wanpat sur in talapor lena, anumot a nurnur i lingmulus. Di lar anumot a nurnur nama kum mamaut elar nami ra di tun talapor a gol una sungun. Ikut anumot a nurnur i labo doko taun a gol ra in rop kut. Ra anumot a nurnur i tur dekdek, o Iesu Karisito in rakon lekeleke pas mot, ma in ulabo pas mot, ma in pitar a urur torom mot una bung ra in nanpat puaso.

2 Pita 1:6

Ma mot in palataun a mananos un o God nama petutna ra mot tamtamabat wakak anumot a nilaun. Ma mot in palataun a petutna ra, nama tuntunur dekdek. Ma mot in palataun a tuntunur dekdek nama petutna ra i wakak umatan o God.