Aposel 20:19 - Nupela Testamen long tokples Kandas

¹⁹ A taro Juda det wasiso tomo sur det in pam a kum sakino petutna un iau, ma a taramo a mamaut uni. Ikut, a papam ut torom a Labino, ma a unatino pas iau, ma a lurlur na matang i puku.

Aposel 20:19 Iomraidhean Croise

Luk 19:41

Ra o Iesu i sa milau o Jerusalem ra i tama i, i tangis suri, ra i watungi lena,

A Wakak na Wasiso un o Iesu Karisito o Jon i tumusi 12:26

Ra taio i nemi sur iau anun a Labino, i wakak sur in mur iau, ma i anung a tultul ra in kis tomo nam iau una dino ra an kis iai. Osi ra i papam torom iau, o Tita in ulabo pasi.

Aposel 17:13

Ikut a taro Juda kurong o Tesalonaika det longoro i lena o Pol i warawai una wasiso anun o God tong o Beria, ra det wan utong ma det usungun balan a taro.

Aposel 17:5

Ikut, a nuknukin a ramano taro Juda i laulau doko un der, uni a susut det mur der. Ra det ben pas a ramano kum tene pet laulau tagun a nubual ra a taro det ser wan tomo iai. Det wan tomo, ra det ukatutur a balan a taro. Det kalabor ruk una rumu anun o Jeson, ma det sisio sur o Pol ma o Sailas sur det in ben pirso pas der torom a taro.

Aposel 20:3

I kis tiro iai a tulin kalang. Numur i waninar sur in kas una sip utong una papor Siria, ikut i tasmani lena a kum te Juda det wasiso tomo pas sur det in um doko i. Ra i pukus a nuknukino ma i nuki lena i wakak sur in nan melet epotor una papor Masedonia.

Aposel 20:31

Mot in tumarong! Mot in nuk pasi lena, a tulu kilalo ka mana gusun mot rop nama wasiso na utumarong, una kum mirum ma a waspi, ma a lurlur na matang i puku uni.

Aposel 21:27

Ra milau a wonom mawit na bung na utalapor in rop, a ramano taro Juda tagitong una papor Asia, det tama pas o Pol ubalan in noworo ina rumu na etabor. Ma det usungun balan a taro sur det in kankan torom o Pol ra det pam ukai pasi.

Aposel 27:23

Iau anun o God, ma a ser muri. Nanganong mirum, ara ensel anunu i wanpat torom iau.

A Pas anun o Pol torom a taro Rom 1:1

Iau o Pol, a tultul anun o Karisito Iesu, a tumus a pas ri torom mot. O God i kabo pas iau, sur an aposel, ma i pilok pas iau sur an warawai nama nun a Wakak na Wasiso torom a taro.

A Pas anun o Pol torom a taro Rom 1:9

A papam torom o God nama nung a nilaun rop, ra a ser warawai nama Wakak na Wasiso un o Nutunu, ma o God ut i tasmani lena, a ser nuk pas mot

A Pas anun o Pol torom a taro Rom 12:11

Mot in papam dekdek, ma gong a pinimot i ngoro. Mot in papam torom a Labino nama labino gasgas una balamot.

2 Korin 2:4

A tumtumus torom mot nama tupunuk, ma in balang i maut doko ma a lurlur na matang i puku. Ka nemi sur an utupunuk mot, a nemi sur mot in tasmani lena, a nem doko mot.

2 Korin 3:5

Met tasmani lena, met ut ka met pet lar pasi sur met in pam a pinapam ri, ikut o God ut i warut met sur met in pami.

2 Korin 7:5

Ra met wanpat tong una papor Masedonia, ka met mana lar pas. Met barato a susut na mamaut sakit una kum papori met. Met barato a wasiso na kankan anun a taro torom met, ma nin ubalamet met taramo a nginara.

Galesia 1:10

Ka nemi sur a taro det in ulabo pas iau, a nemi sur o God ut in gas nam iau. Ka nem na ugasgas a taro kut. Ra an ugasgas a taro kut, awu sur iau a tultul anun o Karisito.

Epeses 6:7

Mot in papam nama gasgas torom anumot a kum mugumugu, elar nami ra mot papam ut torom a Labino, ma awu sur torom a taro kut.

Pilipai 3:18

Uni a susut na dino a sa inanos tar mot lena, a susut, det laun elar nama kum ebar anun in nanai kutus anun o Karisito. Ra uniri a inanos melet mot, ma a lurlur na matang i puku.

Kolosi 3:24

Uni mot tasmani lena, numur a Labino in pitar a ikul torom mot, i a wakak na kinkinis ra numur mot in rakoni. Mot a kum tene ititula anun a Labino o Karisito, ma i ut anumot a mugumugu mulus.

1 Tesalonaika 1:9

Uni det ut det wasiso talapor una numot a wakak na petutna ra mot gas pas metul. Ma det wasiso talapor kai un mot lena, mot sa tupukus torom o God, ma ka mot lotu mo torom a kum torotoro na god. Mot papam mo torom o God, i ra a lingmulusino ma i laun.

2 Timoti 1:4

A nuk melet pasi ra u tangis iau, ma a nem doko i sur an tama ui sur an bukus nama gasgas.

Jems 1:2

A kum tistising, ra lako kum ngas na maut in nanpat torom mot, mot in gas,

1 Pita 1:6

A utna ri in ugasgas doko mot. I lingmulus ut, uniri mot in taramo a wur ngas na mamaut, ikut ken suano i.

2 Pita 1:1

Iau o Saimon Pita, a tultul ma aposel anun o Iesu Karisito. A tumtumus torom mot, ra o God i sa tabor tar mot nama wakak na nurnur, elar nami ra i tabor met kai nami, kibino una tokodos na petutna anun o Iesu Karisito, i ra a God anundat, ma anundat a Tene Ulaun.

Tamtama 7:15

I mo ra, det ser tur sa numugu tan a kiskis na king anun o God, det papam toromi una nun a rumu na etabor una kum mirum ma a waspi. Ma o naro ra i kis una kiskis na king in pulus bat det nam anun a rumu na sel sur det in kis tomo nami.