Wuj Richin ri K'uxla'anik 2:11 - Kaqchiquel Bible

¹¹ Ri woq'ej kan nuk'is k'a ruchuq'a' ri runaq'-nuwech. Ri nupan kan achike na k'a nuben roma ri q'axo'n. Kan niq'axon ri wánima roma nintz'et ri tijoj-poqonal ri nikik'owisaj ri nuwinaq; roma ri ak'uala' y ri neneya' e punupuxineq pa taq bey richin ri tinamit.

Wuj Richin ri K'uxla'anik 2:11 Iomraidhean Croise

Wuj Richin ri Achin Job 16:13

Ri ruch'ab rija', kan man jun k'a ti nuq'ij chuwech. Kan xiruq'ijuj y xuteq'uj nupan; y ri nuk'ay kan xbiyin pan ulew.

Wuj Richin ri Achin Job 30:27

Yin kan jantape' k'a nupiskolila-ri' ronojel ri nupan, roma ri ninch'ob, kan q'ij-q'ij k'a nink'ul xabachike ruwech tijoj-poqonal.

Wuj Richin Bix Chire ri Dios 119:82

Ri runaq' taq nuwech xa kan xk'is-qa kuchuq'a' richin koyoben ri asujun. Yin kan nink'utuj k'a qa chi janipe' yape richin nakuquba' nuk'u'x.

Wuj Richin Bix Chire ri Dios 22:14

Ri wuchuq'a' kan xk'is yan k'a qa, achi'el nik'is ri ya' toq nitix pan ulew. Ronojel k'a ri nubaqil kan xe'el yan pa kik'ojelibal. Kan maneq chik oyobenri'il chuwe yin. Xa xk'is yan qa achi'el nik'is ri cera toq nimeq'e'.

Wuj Richin Bix Chire ri Dios 31:9

Jehová, tabana' utzil tajoyowaj nuwech, roma kan ink'o pa nimalej bis. Man yitikir ta chik yitzu'un roma oq'ej; ri wánima y ri nuch'akul kan maneq chik kuchuq'a' roma ri q'axo'n.

Wuj Richin Bix Chire ri Dios 38:8

Kan xk'is yan k'a ri wuchuq'a', y ri yabil kan yiruke'ej nina' yin. Kan yijilo k'a roma ri rukiy ri q'axo'n.

Wuj Richin Bix Chire ri Dios 6:7

Kan man yitikir ta chik yitzu'un, roma ri e etzelanel wichin kan nikiben chuwe richin janila yinoq'.

Wuj Richin Bix Chire ri Dios 69:3

Xikos yan janila, roma yisik'in chuk'utuxik to'onik, ri nuqul kan niq'axon chik, y xjasjo' yan. Ri runaq'-nuwech chuqa' nik'is yan qa ruchuq'a', roma yatinkanoj rat nu-Dios.

Wuj Richin ri Isaías 22:4

Roma ri' xinbij: Tijech'ej-el-iwi' wik'in, roma ninwajo' yinoq' rik'in janila bis. Man ninwajo' ta richin nikuqubala' nuk'u'x roma re jun ruk'ayewal ri xtuq'axaj ri nutinamit, xkicha'.

Wuj Richin ri Isaías 38:14

Xinben achi'el yech'ipch'ot ri taq tz'unun, xijilon achi'el yejilon ri taq paloma. Ri runaq' taq nuwech kan janila xekos rokik xaxe xitzu'un-el chila' chikaj. Yin kan xink'utuj utzil chawe rat Jehová chi xinato' ta, roma xik'oje' pa q'axo'n.

Wuj Richin ri Isaías 51:20

Ri Jehová ri qa-Dios kan janila royowal chiwe, y roma ri' ri iwal kan xepunupuxin kan pa taq krusin-bey, roma maneq chik kuchuq'a', achi'el ri masat ri e ya'on pa jun ya'l.

Wuj Richin ri Jeremías 14:17

Y ri Jehová xubij chuwe chi tinq'alajirisaj ri k'o wik'in. Y kere' xinbij: Kan nibiyin k'a ri ruya'al ri runaq' taq nuwech chi paq'ij chi chaq'a'. Kan man nitane' ta k'a, roma ri ruk'ayewal ri qajineq pa kiwi' ri nuwinaq.

Wuj Richin ri Jeremías 4:19

Y yin Jeremías xinbij: Ri wánima janila nitino y niq'axon. Nuyitz'itz'ej-ri' nupan y man yitikir ta ninq'et rik'in ri jiloj roma xinwak'axaj jun raqoj-chi'ij richin labal y nixupux ri trompeta.

Wuj Richin ri Jeremías 44:7

Wakami kere' k'a ninbij yin Jehová k'iytisanel richin ronojel: ¿Achike k'a roma rix xik'en-pe re nimalej ruk'ayewal pan iwi' rix, richin chi niben chike chi yeken ri winaqi' aj-Judá: Ri ixoqi', ri achi'a', ri ak'uala' y ja jujun ri k'a juba' ke'alex, xaxe richin chi man jun nik'oje' kan chiri' pa Judá?

Wuj Richin ri Jeremías 8:19

Ri raqoj-chi'ij kichin ri nuwinaq nak'axatej chupan chijun ri ruwach'ulew y nikibij: Ri Jehová maneq chik wawe' pa qatinamit Sión. ¿Man qa-rey ta kami chik rija'?, xkecha'. Jak'a ri Jehová nubij: ¿Achike roma xiya' q'axo'n chuwe toq niya' kiq'ij ri wachibel, toq niya' kiq'ij dios ri xa man jun yek'atzin-wi y man iwetaman ta kiwech?, xcha'.

Wuj Richin ri K'uxla'anik 1:11

Konojel ri winaqi' ye'oq' rokik nikikanoj ri k'atzinel richin nikitej. Rije' nikijel ri kibeyomel chuwech juba' kiway. Kere' xkiben xaxe richin man yeken ta. Tabana' utzil, Jehová, qojatzu' chi kan ojk'o pa jun k'ixbilal.

Wuj Richin ri K'uxla'anik 1:16

Roma ri' kan janila yojoq'; kan nibiyin k'a ri ruya'al runaq' taq qawech. Roma xa maneq chik ri nikuquban qak'u'x, ri niya'on uxlanen pa qánima. Ri qalk'ual kan xek'is k'a konojel, roma ri e etzelanel kan xech'akon chiqij.

Wuj Richin ri K'uxla'anik 1:20

Nimalej Jehová, tabana' utzil qojatzu-pe chi janila oj k'ayewatajineq; kan janila k'a rukiy ri qaq'axo'n. Kan nich'ujer ri qánima, roma kan janila xojmakun chawech. Ri qawinaq ri e eleneq-el chuchi' re tinamit kan xekamisex, y ri ek'o kan chupan, chuqa' kan xoqaqa k'a ri kamik kik'in.

Wuj Richin ri K'uxla'anik 5:17

Roma ronojel re' kan nimayamo-qa ri qánima. Xq'equmatej yan qawech,

San Lucas 23:29

Roma kan ek'o k'a q'ij xke'oqaqa toq k'ayew ri xtibanatej. Roma ri' xtibitej chi jebel ruwa-ruq'ij ri ixoq ri man xalan ta, ni man jun bey xroyobej ta jun ak'ual, y man xuya' ta chuqa' rutz'um jun ak'ual.

1 Sam 30:4

Ri David y konojel ri achi'a' ri e beneq rik'in, kan janila xesik'in y xe'oq' y kan xk'is k'a kuchuq'a' roma oq'ej.