San Juan 12:34 - Kaqchiquel Bible

³⁴ Roma ri' ri winaqi' xkibij: Roj qetaman ri nubij chupan ri ruch'abel ri Dios chi ri Cristo toq xtipe, xtik'oje' richin jantape'. ¿Achike roma rat nabij chi ja rat ri' ri jun ri xaqaqa-pe achi'el wineq chiqakojol?, jak'a wakami xa nabij chi xkaken. Taq'alajirisaj k'a chiqawech achike ri xtipe achi'el wineq chiqakojol, kan jari' ri Cristo o man ja ta, xecha' rije'.

Tuilleadh tionndaidhean

Kaqchikel Santo Domingo (Xenacoj)

³⁴ Y ri wineq xkibꞌij chare: Roj qetaman chi ri qa-ley ndubꞌij chi ri Jun ri nditaq pe roma ri Dios chukolik ri rutinamit kin jumul kꞌo rukꞌaslen. ¿Achike roma ndabꞌij chi ri Jun aj chikaj ri xtuꞌalex chiqakajal ndikꞌatzin ndijotobꞌex chikaj? ¿Achike kꞌa chi achi riꞌ? xechajeꞌ.

Kaqchikel Santa Maria de Jesus

³⁴ Y ri vinak xquiꞌej: Katzꞌatuon chupan ri ruchꞌabꞌal ri Dios, chi ri Cristo man nicon ta, can xticꞌasieꞌ richin nojiel tiempo. ¿Karruma naꞌej chi nicꞌatzin chi ri Xtak-pa chicaj chi xalax chikacajol nijotobꞌax choch ri cruz? Can taꞌej cꞌa chika, ¿chica reꞌ ri Xtak-pa chicaj chi xalax chikacajol? xaꞌchaꞌ.

Kaqchikel Central Guatemala

³⁴ Y ri vinek xquibij c'a: Rat abin chi ja rat ri' ri Jun ri xalex chikacojol, pero xa nabij chuka' chi xcajotobex chuvech ri cruz. Can man nik'ax ta c'a chikavech achique romari'. Roma roj ketaman ri nubij chupan ri ruch'abel ri Dios chi ri Cristo tok xtipe, xtic'oje' richin jantape'. Can tak'alajirisaj c'a chikavech vi ri xalex chikacojol, can jari' ri Cristo o man ja ta, xecha' rije'.

Re C'ac'a Testamento pa Kach'abal

³⁴ Y re vinak xquibij: Rat abin che ja rat re Jun re xalax chakacojol, pero xa nabij chuka' che xcajotobax cho cruz. Can man nak'ax-ta pa kave' anchique roma quire' nabij. Roma yoj kataman re nubij chupan re ruch'abal re Dios che re Cristo tak xtipa, xtic'ue' chin nojel tiempo. Can tabij c'a chaka vo xa re xalax chakacojol, can jare' re Cristo o mana-ta, xe'cha' reje'.

Kaqchikel Western Solola

³⁴ Ri winek xquibij c'a chare: Riyoj ketaman ri nubij chupan ri ruch'abel ri Dios chi tek xtipe ri Cristo, can xtic'oje' riche (rixin) xtibe k'ij xtibe sek. Riyit abin chi yit c'a riyit ri C'ajolaxel ri xatalex chkacojol, ¿achique c'a ruma nabij chi yajotobex chuwech cruz? Can tak'alajsaj c'a chkawech achique c'a chi achi ri' ri C'ajolaxel.

San Juan 12:34 Iomraidhean Croise

2 Sam 7:13

Kan k'a ja rija' ri xtipaban-q'anej jun wachoch. Y pa ruq'a' rija' xtinjikiba-wi kan jumul ri q'atbel-tzij.

Wuj Richin Bix Chire ri Dios 110:4

Ri Jehová xuya' ri rutzij y man xtutzolij ta ri' chirij. Kere' xubij: Ja rat ri at sacerdote richin q'asen achi'el rubanik xinben rik'in ri Melquisedec, xcha' chawe.

Wuj Richin Bix Chire ri Dios 72:7

Chupan ri q'ij toq xtiq'aton-tzij rija', kan xtikotz'ijan k'a ri ruchojmilal. Kan xtik'oje' k'a janila uxlanibel-k'u'x. Kan keri' k'a xtuben tibe-q'ij tibe-seq.

Wuj Richin ri Isaías 53:8

Kan xkichop-el y xuk'uex richin nikamisex, y kan man jun rijatzul ri xk'oje'. Kan xkelesaj-el ruk'aslen chuwech re ruwach'ulew, y xa roma ri qayakatajinenri'il, rija' xsokotej.

Wuj Richin ri Isaías 9:7

Ri ruq'atbal-tzij man xtik'is ta, y chuqa' ri uxlanibel-k'u'x ri xtuk'en-pe. Rija' xtibetz'uye' kan pa rutz'uyubal ri David, y xtiberuq'ata-tzij pa ruwi' ri rajawaren rija'. Kan xtiberuq'ata-tzij pa ruchojmilal, y kan nitz'aqet ri xtiberubana' chire. Ri ruq'atbal-tzij, richin tibe-q'ij tibe-seq. Y ri Jehová ri k'o ronojel uchuq'a' pa ruq'a', kan xtutz'et, wi xtibanatej ronojel re'.

Dn 2:44

Chupan k'a ri q'ij toq ri winaqi' richin chijun ruwach'ulew k'o chik ri q'atbel tzij kik'in, jari' k'a toq ri Dios xtoruya-qa jun q'atbel-tzij ri kan richin rija' ri man jun xtiwulan richin. Ri q'atbel-tzij ri' kan man xtiya'ox ta k'a pa kiq'a' ri winaqi'. Kan xkeruk'is k'a ronojel ri q'atbel taq tzij ri ek'o chuwech ri ruwach'ulew, y ja ri q'atbel-tzij richin rija' ri xtik'oje' jantape'.

Dn 7:14

Kan xya'ox k'a uchuq'a', ruwaq'ijaj y ajawaren chire. Konojel k'a ri winaqi', ri e richin chijun ri tinamit, ri ruwach'ulew y ri jalajoj ruwech ri kich'abel kan k'o chi nikisamajij. Ri ruq'atbal-tzij rija' kan richin k'a q'asen, y ri rajawaren kan man jun k'a xtiwulan richin.

Dn 7:27

Ri ajawaren richin chijun ruwach'ulew, ri ruchuq'a' y ri ruwaq'ijaj kan xtijach k'a pa kiq'a' ri e richin ri rutinamit ri nimalej Dios. Re ajawaren re' kan richin k'a tibe-q'ij tibe-seq. Konojel k'a ri tinamit y ri ruwach'ulew kan xtikisamajij y xtikinimaj rutzij, xcha' chuwe.

San Mateo 16:13

Ri Jesús e rachibilan ri rutijoxela' xapon chunaqaj ri tinamit Cesarea richin Filipo. Chiri' rija' xuk'utuj k'a chike: ¿Achike nikich'ob ri winaqi' chirij ri xtiqaqa-pe achi'el wineq chiqakojol?, xcha'.

San Mateo 21:10

Jak'a toq ri Jesús nok-apo ri pa Jerusalem, xepe k'a ri winaqi' y xkimol-ki' chi'anin chutz'etik y nikibila' ri achike rija'.

San Mateo 8:20

Jak'a ri Jesús xubij k'a chire: Ri utiwa' kan k'o-wi kijul akuchi yek'oje-wi; y keri' chuqa' ri aj-xik' taq chikopi', kan k'o chuqa' kisok. Jak'a yin, ri xiqaqa-pe achi'el wineq chi'ikojol, kan man jun k'a akuchi ta yinuxlan-wi juba', xcha' chire.

San Juan 10:34

Jak'a ri Jesús xubij: Chupan ri pixa' ri ya'on kan chiqe, ri Dios nubij: Yin nubin chi chi'iwonojel rix kan ix dios chuqa', nicha'.*f12*

San Juan 12:32

Y toq yin xkijotobex-q'anej, ri winaqi' kan xkenk'en-pe wik'in, xcha' rija'.

San Juan 15:25

Ronojel k'a re', kan najin chik rubanik, roma kan keri' ri tz'ibatel kan chupan ri ruch'abel ri Dios ri ya'on chike y nubij:*f20* Yinketzelaj y xa man jun achike ta roma, nicha'.

San Juan 8:28

Ri Jesús xubij chik: Ri q'ij toq xkinijotoba' chuwa ri cruz, yin ri xiqaqa-pe achi'el wineq chi'ikojol, k'a jari' k'a toq xtiwetamaj chi ja yin ri' ri kan jantape' ink'o. Y xtiwetamaj chuqa' chi ronojel ri ninben yin, xa man pa nuyonil ta. Xa kan achi'el ri rubin-pe ri nata' chuwe, kan keri' k'a chuqa' ninbij yin chiwe rix.

Romanos 3:19

Y qetaman k'a chi ronojel ri tz'ibatel kan, nich'on chiqij roj ri ojk'o chuxe' ri pixa'. Y ri pixa', k'o richin chi man jun tibin chi maneq rumak, y richin nuk'ut chiqawech chi qonojel k'o chi yojapon na chuwech ri ruq'atbel-tzij ri Dios.

Romanos 5:18

Roma k'a jun mak, toq niqa' ruk'ayewal pa qawi' qonojel roj winaqi'. Jak'a roma jun chojmilej banobel, toq qonojel man jun qamak yojk'ulun chuwech ri Dios y niqil ri k'aslen ri man k'isel ta.

Hebreos 7:24

Jak'a ri Jesús kan sacerdote richin jantape' y man jun nijalo-el chupan ri rusamaj, roma kan man niken ta.