Ex 32:9 - Kaqchiquel Bible

⁹ Y chuqa' ri Dios xubij chire ri Moisés: Yin kan nutz'eton k'a pe chi re winaqi' re' kan man nikiqasaj ta ki'.

Ex 32:9 Iomraidhean Croise

2 Rey 17:14

Jak'a rije' xa man xkinimaj ta tzij, xa xkikowirisaj-ki', achi'el xkikowirisaj-ki' ri kite-kitata', ri man xkikuquba' ta kik'u'x rik'in ri Jehová ri ki-Dios.

2 Crón 30:8

Man tikowirisaj k'a ri iwánima; man tiben achi'el xkiben ri qati't-qamama'. Xa kan tiqasaj k'a iwi' chuwech ri Jehová y kixanpe wawe' chupan re jay richin ri Jehová, ri kan rucha'on rija' richin niya'ox ruq'ij richin jantape'. Kan tisamajij k'a ri Jehová ri qa-Dios, richin xtik'o-el ri royowal chiqij.

Wuj Richin ri Nehemías 9:16

Jak'a ri qate-qatata' xa xkinimirisaj-ki' y kan xkikowirisaj ri kánima richin man xeniman ta chire ri apixa'.

Wuj Richin ri Nehemías 9:17

Rije' man xkajo' ta xatkak'axaj y man xoqaqa ta chikik'u'x ri meyel taq banobel ri xaben kik'in rije'. Y roma xkikowirisaj ri kánima, xkikanoj jun uk'uey kibey richin yetzolin chik kan pan ilinri'il chiri' pan Egipto. Jak'a rat at Dios ri nakuy ri mak, y man chi'anin ta k'a nipe awoyowal y kan janila najoyowaj kiwech y janila k'a ajowabel k'o awik'in y nim k'a ri awánima y roma ri' man xe'amalij ta kan,

Wuj Richin Bix Chire ri Dios 78:8

Richin keri' man tikiben achi'el ri xkiben ri kite-kitata' rije', ri xa kan xaxe ri yakatajinenri'il ri xkiben y man ja ta ri xubij ri Dios chike. Rije' xa kan man xkijeq ta ri kánima chuwech ri Dios ni man xkiben ta ri xkisuj chire ri Dios.

Ex 33:3

Xkixruyuqej k'a toq xkixapon chupan ri ruwach'ulew ri akuchi niwachin-wi ronojel ruwech tiko'n. Jak'a yin kan man xkibe ta chik iwik'in roma xa kan ix winaqi' ri kan man niqasaj ta iwi'. Man xa roma ri' kixink'is rokik ichapon bey, xcha' ri Jehová.

Ex 33:5

Keri' k'a xkiben ri winaqi', roma ri Jehová kan xunabeyajisaj yan k'a rubixik chike. Xa kan xbix yan k'a chike roma ri Moisés chi rije' xa e jun tinamit ri man nikiqasaj ta ki'. Y wi ri Jehová nik'oje' chikikojol, kan pa jun ti ramaj yeruk'is konojel. Y chuqa' chi tikelesaj ronojel ri jebelej taq tzieq chikij y ri wiqobel ri yekikusala'. Y ri Jehová xtunojij na ri achike xtuben kik'in.

Ex 34:9

Y xeri' ri Moisés xubij chire ri ajaw: Wi qitzij chi wilon utzil chawech, tabana' utzil jo' qik'in, stape' re atinamit kan man nuqasaj ta ri' chawech. Kan takuyu' k'a ri itzel taq qabanobal, takuyu' ri qamak y tabana' chiqe chi kan yojok-wi atinamit, xcha' ri Moisés.

Wuj Richin Etamabel-Tzij 29:1

Ri wineq banoy richin etzelal, ri kan man nuqasaj ta ri', kan pa jun ti ramaj xtiya'ox-pe ri kamik pa ruwi' y man jun chik ri xtikolon richin.

Wuj Richin ri Isaías 48:4

Ronojel re' xbanatej roma kan wetaman chi rix man ninimaj ta nutzij. Rix janila ix tix, y man niwajo' ta richin niqasex iq'ij.

Wuj Richin ri Jeremías 13:27

Kan nutz'eton ri itzel irayibel, achi'el nikiben ri achi'a' y ri ixoqi' ri nikikanola-ki' richin yemakun, kan nutz'eton k'a ri ruk'ixbilal ri ik'aslen, ri itzel taq ibanobal ri niben pa ruwi' ko'ol taq juyu' y pa taq juyu'. Roma ri' toq'ex iwech rix aj-Jerusalem ¿K'a janipe' k'a nich'ajch'ojirisaj-iwi'?, xcha' ri Jehová.

Os 6:10

Chupan ri ruwach'ulew Israel kan janila k'a etzelal nutz'eton. Xa kan janila k'a xutz'ilobisaj-ri'. Ri Israel xa kan xyojtej k'a.

Wuj Richin ri Q'axanri'il 14:11

Ri Jehová xubij chire ri Moisés: ¿K'a jampe' k'a xketane' re winaqi' richin yinketzelaj? ¿K'a jampe' xtapon ri q'ij richin chi rije' nikikuquba' ta kik'u'x wik'in, stape' rije' kan kitz'eton ri meyel taq banobel ri nubanon chikiwech?

Hechos 7:51

Rix kowirineq ri iwánima chupan ri etzelal. Rix ix achi'el ri man e qawinaq ta ri man nikitzeqelibej ta ri qa-Dios, y man jun bey niwajo' chi ja ta ri Loq'olej Espíritu ri nuk'uan iwichin. Kan achi'el xkibanala' ri qati't-qamama', kan keri' k'a chuqa' niben rix re wakami.

Deut 10:16

Kan tiyaka' k'a ronojel ri rujikibel-tzij ri Dios pa taq iwánima y man chaq tikowirisaj-iwi'.

Deut 31:27

Roma yin kan wetaman chi kan ix jun tinamit ri man yixniman ta tzij y kan janila kow ri iwánima. Wakami xiben ronojel re' chuwech ri Jehová y xa k'a in k'es na iwik'in. ¿Achike ta k'a ri man ta xtiben toq in kamineq chik?

Deut 9:13

Y chuqa' xubij chuwe: Yin kan e nutz'eton chi re tinamit re' kan jun tinamit ri yalan kikowirisan-ki'.

Deut 9:6

Roma ri' kan tiwetamaj chi man roma ta yalan utz ri ik'aslen, man roma ta ri' ri Jehová ri qa-Dios xtuya' ri utzilej ruwach'ulew chiwe richin niwichinaj; roma rix xa kan ikowirisan-iwi'.