Dn 2:9 - Kaqchiquel Bible

⁹ Wi rix man xtibij ta chuwe ri wachik', kan junan k'a xtik'uluwachij chi'iwonojel. Yin kan wetaman k'a chi rix xa niya' chiwech jun tz'ukuj-tzij, richin nik'is-qa ronojel re'. Kan tibij k'a pe chuwe ri wachik' richin chi niq'alajin chinuwech yin chi rix kan yixtikir-wi niq'alajirisaj achik', xcha' ri rey.

Dn 2:9 Iomraidhean Croise

1 Rey 22:22

Y ri espíritu ri' xubij: Yin xkibe y xkinok jun espíritu richin tz'ukuj-tzij, y xtinben chike ri achi'a' ri e q'alajirisanela' richin xtikitz'uk-tzij. Y ri Jehová xubij chire chi tibe y tiberubana' roma kan nitikir nuben chire ri Acab chi nibe y niken kan.

1 Rey 22:6

Y k'ari' ri Acab xerumol konojel ri e q'alajirisey ruch'abel ri ki-dios, y xkimol k'a ki' e 400 achi'a', y xuk'utuj chike: ¿Utz kami chi yibe richin ninbenbana' oyowal pa ruwi' ri Ramot ri k'o pa Galaad, o xa ninmalij-qa?, xcha'. Y rije' xkibij chire chi utz nibe roma ri kajaw kan xtujech pa ruq'a'.

Ester 4:11

K'o jun pixa' ri nubij chi xabachike wineq ri nijel-apo chuwa-jay richin niberutz'eta' ri rey, wi man oyon ta, kan k'o chi niken. Konojel ri yesamej rik'in ri rey y konojel ri winaqi' ri ek'o pa ruq'a' rija' ketaman re pixa' re'. Jak'a wi ta ri rey nutzeqej ri ru-cetro*f4* ri banon rik'in q'anapueq chuwech ri wineq ri', man niken ta. Pa ruwi' ri', yin xa kan xik'o yan jun ik' ri man iroyon ta chik richin ninbentz'eta', xcha'.

Wuj Richin Etamabel-Tzij 12:19

Ri ch'abel ri yerubij jun wineq ri xaxe ri qitzij ri nubij, kan yeyaloj k'a; jak'a ri ch'abel ri yerubij jun wineq ri xa tz'ukuy-tzij, xaxe ok richin jun ti ramaj.

Wuj Richin ri Isaías 41:23

Tikibij k'a chiqe ri achike xtipe chiqawech, richin chi niqetamaj chi rije' kan e qitzij dios. Kan tikik'utu' chiqawech, ri utz y ri man utz ta, richin roj kan niqaxibij-qi', y kan xtik'oje' kikiy chiqawech.

Wuj Richin ri Isaías 44:25

Ja yin ri yiyojon ri retal chuwech ri nubananej chi retaman ri peteneq chuwech-apo, y kan yench'ujirisaj ri e etamanel. Ja yin ri ninben chike ri aj-na'oj taq achi'a' richin nikitzolij-ki' chikij, y ronojel ketamabal man jun achoq chuwech niq'ax-wi.

Ez 13:17

Rat Ezequiel, kach'on k'a kik'in ri ixoqi' ri ek'o pan atinamit ri yekitz'uk banobel richin nikiq'alajirisaj.

Ez 13:19

Ri ixoqi' ri' xkiben kere' xaxe richin xkich'ek jun moq' cebada o xa jun k'ap kaxlan-wey. Rik'in ri kitz'ukun taq tzij kan xekikamisaj ri winaqi' ri xa man ruk'amon ta richin xeken y xekik'asba' kan winaqi' ri xa man ruk'amon ta richin yek'ase'.

Ez 13:6

Nikibij chi k'o ri nik'utumej chikiwech, jak'a xa yesach. Nikibij ri peteneq chikiwech-apo, jak'a xa man qitzij ta ri nikibij. Kan pa nubi' yin yech'on-wi, jak'a xa man ja ta yin ri in taqayon-el kichin. Y pa ruwi' ri', kan nikoyobej chi nibanatej ri nikibij.

Dn 2:16

K'ari' ri Daniel xbe rik'in ri rey richin xberuk'utuj utzil chire chi tuya' ka'i-oxi' q'ij chire, richin rija' xtuq'alajirisaj ri achik' y ri nel chi tzij.

Dn 2:21

Ja rat yabanon richin yeq'ax ri ik' y ri juna'. Ja rat yaya'on ri q'atbel-tzij, y rat yatelesan kichin. Ja rat yaya'on na'oj chike ri e aj-na'oj, ri etamabel kan rat k'a yaya'on chike ri etamanela'.

Dn 2:8

Jak'a ri rey xubij: Kan wetaman chik chi rix, niwajo' chi yin ninya' ta k'iy q'ij chiwe, roma xiwetamaj ri nuch'obonik.

Dn 3:15

Y xubij chik k'a jun bey chike, chi toq xtikak'axaj ri ruch'abel ri q'ojom kan k'o chi yexuke' chuwech ri wachibel, roma wi man xkexuke' ta, kan ja yan ri' xkek'aq pa q'aq' richin yek'at. Y kan man jun k'a dios ri xkekolon pa ruq'a' ri rey.

Dn 5:28

Ri PARSÍN nel chi tzij chi ri ajawaren xelesex yan k'a pan aq'a' rat y xch'ar chikiwech ri aj-Media y ri aj-Persia, xcha' ri Daniel.

Dn 5:31

Chirij rija', ja ri Darío, ri aj-Media ri xok kan chupan ri ajawaren; y ri Darío k'o chik k'a oxk'al ka'i' rujuna' toq xapon chupan ri ajawaren.

Dn 7:25

Ri q'atoy-tzij ri k'o pa ruwi' re jun ajawaren re' kan xtuyoq' k'a ri nimalej Dios y kan xtuben chike richin nikitej poqon richin yek'is ri rutinamit ri Dios. Kan xtrajo' k'a xtujel ri rubanik ri pixa' y ri nimaq'ij ri e tz'ibatel kan chupan. Ri rutinamit ri Dios kan xkejach k'a pa ruq'a' rija' y kan xkek'oje' k'a pa ruq'a' k'a toq xtitz'aqet na ri oxi' juna' rik'in nik'aj.

2 Corintios 2:17

Roj man yojq'olon ta, ni man niqaben ta achi'el nikiben ri ch'aqa' chik, ri xa nikik'ayij ri ruch'abel ri Dios. Roj kan oj rusamajela-wi ri Dios ri yojruteq chubanik ri rusamaj, roma jun qabanon rik'in ri Cristo, y kan chuwech ri Dios niqaben ri samaj ri'.