Jeremi 23:17 - Sră Goh 2018

¹⁷ Bol khai kư̆ yal mơ cau sền òsơp di Añ lah: ‘Yàng Jehôwa đơs, bol mê rơp geh lơngap lơngai.’ Kung đơs mơ ală cau cơnđòa jat bơta kơldang nùs he dê lah: ‘Ò gơs bơta rung rài lơi rơp gơtơntus hơđang bol mê.’

Jeremi 23:17 Iomraidhean Croise

II Samuel 12:10

Gen tàng tŭ do, đào rơp ò tŭ lơi lik ngài bơh di hìu mê, tài bơh mê neh sền òsơp di Añ, neh kup bau ùr Uria cau Hetit lơh gơs bau ùr mê dê.’

Esai 30:10

Bol khai đơs mơ ală cau sền bơta gơtơnggŏ lah: “Bañ sền tai!” mơ đơs mơ ală cau gơnoar hwơr lah: “Bañ đơs hwơr bol hi in ală bơta di ngan! Yal tĕ bol hi in ală jơnau bơkah tồr, đơs hwơr tĕ bơh ală bơta ò gơs ngan.

Esai 57:21

Yàng Tom Trồ añ jê đơs lah: “Ală cau iơh bơsak ò gơs bơta lơngap lơngai.”

Jeremi 13:10

Làng bol iơh do ò bài iat jơnau Añ, cơnđòa jat bơta kơldang nùs bol khai dê, jat ală yàng ndai duh broă mơ duh khoai bol gơ, gen rơp gơlik kung be che but do ò gam niam dô êt lơi.”

Jeremi 18:12

Mơya bol khai đơs lah: ‘Hơ̆ la bơta ò kwơ! Bol hi kư̆ jat bơta rơndap bol hi dê; mơ kòp nă tòm bol hi rơp lơh jat bơta kră kơldang nùs iơh bol hi dê.’”

Jeremi 18:18

Gen bol khai đơs lah: “Tus tĕ, bol he bơtào tĕ kai nàng tòmdră mơ Jeremi; bơh cau gơnoar ơn phan duh khoai ò siơ̆u bơta boh lam, cau jak chài ò siơ̆u bơta cri bơyai, cau gơnoar hwơr ò siơ̆u jơnau đơs hwơr. Bol he tus tĕ, ai jơnau đơs bol he tòmdră mơ khai, bañ ơn tồr iat jơnau khai dô êt lơi.”

Jeremi 3:17

Tòm rài hơ̆ cau rơp sơnđan Jerusalem la sơbàn Yàng Jehôwa dê, mơ jơh ală lơgar gen pơjum wơl tòm Jerusalem, bơh sơnđan Yàng Jehôwa; mơ ò cơnđòa jat bơta kră kơldang nùs iơh bơsak he dê tai.

Jeremi 4:10

Gen añ đơs: “Ôih! Khoai Jehôwa Yàng Tom Trồ! Ngan Yàng neh pơrlồm làng bol do mơ Jerusalem, mơ đơs lah: ‘Bol mê rơp geh lơngap lơngai,’ bulah đào neh ơm di ngko bol hi!”

Jeremi 5:12

Bol khai neh pơndang sang Yàng Jehôwa, Mơ đơs lah: “Kơnràñ rơp ò lơh bơta lơi! Bơta rung rài rơp ò tus hơđang bol he; mơ bol he rơp ò sền gŏ đào hala bơta jơgloh rung.”

Jeremi 6:14

Bol khai pồt tiah sồt rmàñ làng bol Añ jê dô bă ơlă ơlai, Mơ đơs lah: ‘Lơngap lơngai! Lơngap lơngai!’ Mơya ò gơs lơngap lơngai dô êt lơi.

Jeremi 7:24

Mơya bol khai ò dòn bơr, mơ ò ai tồr iat, kư̆ kơldang nùs tòm bơta iơh bơsak nùs kòñ bol khai dê, bol khai cơnđòa lòt tòm bơta kơlôi bơyai is bol khai dê, mơ tơnggòr hơ ngkòi, ò cơnđòa lòt hơđap.

Jeremi 8:11

Bol khai pùt tềl sồt làng bol Añ jê dô bă ơlă ơlai, Đơs lah: “Lơngap lơngai, lơngap lơngai!” Mơya ò gơs bơta lơngap lơngai dô êt lơi.

Jeremi 9:14

Mơya bol khai kơldang bồ lòt jat nùs is bol khai dê, jat ală yàng Baal mơ ồng pàng bol khai neh bơto bol khai.”

Ñìm Rac 2:14

Ală cau gơnoar hwơr ai yal ai in ală bơta ma blac mơ gơtơnggŏ blac pơrlồm. Bol khai ò yal tơlik tồi glài ai, nàng tơm wơl bơta lơngai lơngò bol ai dê, Mơya mìng yal ai in git ală jơnau đơs hwơr ma blac mơ tìs nrah.

Ejekiel 13:10

Tài bơh, ngan bol khai neh lam làng bol Añ jê lòt tìs nrah tòm tŭ đơs lah: ‘Ring lơngai,’ mơya ò gơs bơta ring lơngai dô êt lơi; mơ tòm tŭ làng bol bơt dô nơm dơrñang, bol khai pih cùr bò hơđang gơ.

Ejekiel 13:19

Bol ai neh sền òsơp di Añ digùl ală làng bol bơh dô sơmbat kòi brà mơ dô êt piang lă. Bơh jơnau đơs blac mơ làng bol Añ jê la cau iat ală jơnau đơs blac, bol ai tơnchơt ală cau ò di pal chơt mơ lòi kis ală cau ò di pal kis.’

Ejekiel 13:22

Tài bơh bol ai neh ai bơta đơs blac lơh gơplơ̆ nùs cau song ring tòm tŭ Añ ò lơh bol khai in moat jrùng, mơ tài bơh bol ai chồl nùs cau iơh bơsak nàng bol khai ò rê wơl bơh di ală gùng iơh bol khai dê tồ dong klàs bơta kis bol khai dê,

Amôs 9:10

Jơh ală cau tồi glài tòm làng bol Añ jê rơp chơt bơh đào, hơ̆ la jơh ală cau đơs lah: ‘Rung rài rơp ò dùh hơđang bol he, hala tus rềp di bol he.’”

Mice 2:11

Dilah gơs dô nă cau đơs blac pơrlồm tus đơs lah: “Añ rơp bơto bol mê in bơh tơrnòm mơ phan ñô lơh bơñul,” gen cau hơ̆ rơp lơh gơs cau bơto làng bol do in!

Mice 3:11

Ală cau kwang lam bồ gơ dê cahrña bơh sa loă, ală cau gơnoar ơn phan duh khoai gơ dê bơto sồr bơh jền priă, mơ ală cau gơnoar hwơr gơ dê đơs hwơr bơh priă; bulah behơ̆ bol khai kơnòm di sơnđan Yàng Jehôwa mơ đơs lah: “Ngan gơs Yàng Jehôwa ơm digùl bol he, bơta rung rài rơp ò tus hơđang bol he!”

Mice 3:5

Do la jơnau Yàng Jehôwa đơs bơh ală cau gơnoar hwơr neh lam làng bol Añ jê tìs nrah, la cau hòi driau lah: “Ring lơngai!” Tòm tŭ bol khai ò gơs phan lơi nàng sa, gen bol khai yal tơnggit bơta kơlìn tòmdră mơ cau lơi ò cèng phan lơi bol khai in sa.

Sôphôni 1:12

Tòm tŭ hơ̆ Añ rơp ngui ală ồs đèng nàng jòi tòm Jerusalem, mơ lơh glài ală làng bol la cau jòng să pơnhừ să hơđang iah tơrnòm mơ ală cau kơlôi òm tòm nùs lah: ‘Yàng Jehôwa rơp ò lơh bơta lơi niam hala bơta lơi iơh.’

Sacari 10:2

Tài bơh ală rùp ràk đơs bơta blac pơrlồm. Ală cau sền dà gŏ bơta gơtơnggŏ ma blac; bol khai yal bơta mpau ò song, mơ ai bơta pơndòm pơniang ò kwơ. Behơ̆ tàng làng bol nrah nring kung be belàt, kong rồn bơklơn tài bơh ò gơs cau ê.

Malaci 1:6

“Kòn klau ki ngàm di bèp khai dê, dĭ gơna ki ngàm di cau tòm khai dê. Dilah Añ la bèp gen ntềng đah bơta ki ngàm mơ Añ geh gơnoar dòp taih? Dilah Añ la cau tòm gen ntềng đah bơta duh rngòt mơ Añ gơs gơnoar dòp taih? Yàng Jehôwa Gơnap Gơnoar Dờng Làm Jơh đơs behơ̆. Ơ bol mê la ală cau gơnoar ơn phan duh khoai, bol mê la ală cau sền òsơp di sơnđan Añ. Mơya bol mê lùp lah: ‘Mbe bol hi sền òsơp di sơnđan Kơnràñ taih?’

Khà Làng Bol 11:20

mơya tơl jơh tòm dô kơnhai, jơl tus di tŭ poac gơ rơp lik bơh di trồm muh bol mê dê, mơ bol mê làp dil gơ, tài bơh bol mê neh sang lòi Yàng Jehôwa la Bơtau ơm digùl bol mê, mơ bol mê neh rac ròc di đap Kơnràñ mơ đơs lah: “Ñchi bơh tài bol hi neh sang lòi Ejiptơ taih?”’”

Luka 10:16

Cau lơi iat bol mê, hơ̆ la iat Añ; cau lơi sang bol mê, hơ̆ la sang Añ; ai cau lơi sang Añ, hơ̆ la sang Bơtau neh sồr Añ lòt tus.”

Yal Wơl 29:18

Lơh nền tĕ tòm ngai do lah ò gơs cau klau hala cau ùr, hìu nhă hala jơi bơtiàn lơi digùl bol mê tòmgơl nùs, sang lòi Jehôwa Yàng Tom Trồ bol mê dê mơ lòt duh khoai ală yàng làng bol hơ̆ dê. Lơh nền tĕ nàng digùl bol mê ò gơs ryas gơtơnggơs phan bih khih mơ plai bơtang.

Yal Wơl 29:19

Jơh ală cau kơno ală jơnau srat să ho nền do, hừh nùs mơ kơlôi sơnơng is tòm nùs lah: ‘Añ rơp geh lơngap lơngai bulah añ kư̆ kơldang nùs lòt jat gùng is añ jê.’ Bơta hơ̆ rơp cèng tus bơta rung rài hơđang ù tiah sùh kung be hơđang ù tiah ro rañ.

I Tesalônika 4:8

Gen tàng cau lơi sang lòi bơta do gen ò di sang lòi cau ò, mơya hơ̆ la sang lòi Yàng Tom Trồ la Bơtau ai Yàng Hwềng Goh Kơnràñ dê oh mi in.

I Samuel 2:30

Gen tàng Jehôwa Yàng Tom Trồ Israel dê đơs be do: ‘Añ neh ho lah hìu mê mơ hìu ồng pàng mê rơp duh broă di đap Añ sùm sùm.’ Mơya tŭ do Yàng Jehôwa đơs lah: ‘Bơta hơ̆ ngài ngan bơh di Añ! Bơh cau lơi ki ngàm di Añ gen Añ rơp ki ngàm di bol khai, ai ală cau lơi sền òsơp di Añ gen bol khai rơp kong sền òsơp.