PHRWNGNAINI 9:10 - Kok Borok (Re-edited) Bible (BSI)

¹⁰ Nwng yago mungsa swk phano samung tangna man khe abono nini bebak phan rwui tang di, tamni hwn ba nwng thángwi tong thani a kwthwirokni ha-o mungsa swk samung, uansukmung, simung tei siyanrok hwnwi kwrwi.

PHRWNGNAINI 9:10 Iomraidhean Croise

YAPHANG 37:35

Bini bebak bwslasong bwsajwksong bono bwkha kwchang rwna bagwi phai lai kha, tamo khe bo bwkha kwchangjak li ya wngwi hai hwnwi sa kha, “I’nhi, ang ani sajlani bagwi bwkha kham te kham te hakhoro se tháng sinai.” Omo hai hwnwi saui bupha bwsajlani bagwi bwkha sajagwi kap kha.

1 BOSONG 22:19

Tabuk Subraiyung nini Kaitorno nini bwkha bai khúk bai monnani chong di. Tháng di, Subraiyungni swmai bokhok bai Kaitorni kwthar manwirok Subraiyungni mungwi tongmani nogo tubu-ui manna tẃi khe Subraiyung Kaitorni noktharno tang di.”

1 BOSONG 28:20

Hakhe Daud bini sajla Solomonno hai hwnwi sa kha, “Phankrak khe, kiri ya khe, abono tang di; tabo ta kiri di, bwkhabo ta bái di; tamni hwn ba Subraiyung Kaitor ani Kaitor nini logi-o tongo. Subraiyungni nokni bagwi samung pái súk ya sak bo nono khibo khibi glak, yabo yakar glak.

NEHEMIA 2:12

Hakhe ang horo bachaui ani logi borok kisa tlangwi tháng kha, ani Kaitor Jerusalemni bagwi khlai di hwnwi ani khá-o samano khoroksano phano sa li ya. Ang kasamani koraichirka masano karwi chini logi-o tei mungsa malrok kwrwi.

NEHEMIA 4:2

Bini takhukrok tei Samariani sengkrakrokni bwskango bo hai hwnwi sa kha, “O pot kha ya Judairok tamo khlaima klai? Bórok kamiyung de songchana nai? Bórok chokdeual de tang phina nai? Bórok yapharmung yaphar lainai de? Salsa bai bórok samung pái lainai de? Samung chúk li ya kukhrupjak holong sókjak burungno bórok haino hai snamwi da man phino ba?”

NEHEMIA 4:6

Hakhe chwng chokdeualno tang lai kha tei abo daktino kosa kuchuk jora chokdeualrok kwrwngwi páima klai kha. Tamni hwn ba bororokni bwkha-o samung tangna muchungjakma tongo.

JOBNI BIJAP 10:21

ang dakti’-no thángnai tei kiphil phi glak, ang thángma ha wng kha mwnak tei kosom.

JOBNI BIJAP 10:22

O ha wng kha mwnaksajak tei ubrum-jabrum aro pohor kwrwi mwnakjak.”

JOBNI BIJAP 21:13

Bórok hamchaui sal rohor lai-o, tei kwchang kwchang khe thwi thángo.

LOBMUNG 6:5

Tamoni hwn ba thwi khe nono ringwi man ya; ha bisingo nono sabo hambai rwnai?

PHRWNGMUNG 3:28

Nwng nini nok arini borokno chubaui manẃi tong khe, “Tháng di khwna phai di ang nono khwna rw anw” hwnwi ta sa di.

PHRWNGNAINI 11:3

Chumuirok hiliksajak khe ha saka-o uatwi ua-o; buphang salgra-o da klai tong eba salsi-o de klai tong klai tong thani’-no klaiwi tongnai.

PHRWNGNAINI 11:6

Nwng phung aidrobo bwchlwi sar di, sarigobo abo hai samung tang di, nini yak ta thak di; tamni hwn ba bu jorani samung chano eba a kwnwi jorani-no da baksa khe hamno nwng abono saui man ya.

JISAIA 38:10

Ang sa kha, ani umorni sal kwpacholong tong phuruno ang thángthai; o ang mangkhorni duglamo hapnai, ani umor khakjak jorano ang koró kha.

JIRIMIA 29:13

Norok ano naituk khe norok ano mannai; norok bwkha rw súgwi naituk khe mannai.

LEKHAMUNG 13:30

Hai phano Kaleb khe Musini bwskango bororokno siringcha khlai baiwi hai hwnwi sa kha, “Phai di, chwng achomsa khe tháng laiwi a hano segwi na lainai tamni hwn ba chwng bórokno mechenwi mano.”

MATHAI 20:7

‘Chwngno khoroksa phano tlangnai kwrwi,’ hwnwi bórok sa kha. Hakhe bo bórokno ‘Norokbo thángwi angur bari tangwi di,’ hwnwi sa kha.

MATHAI 6:33

Tamo khe nwng Kaitorni hani bagwi se uansuk gra di, bo naima tẃino tongna bagwi se uansuk gra di; hakhe bo norokno aswk manwirokno rw anw.

JOHON 4:34

Jisu bórokno hai hwnwi sa kha, “Ano rohornai samung tholwi rohormano khlai bainani abo se ani chámung.

JOHON 5:4

tamni hwn khe Subraini suari khoroksa achom-achom a pukhiri-o ongkhorwi phaiwi twi pupak rw-o; aphuru a pukhiri-o puila ongkhornai borok bo bini jesa hamya phano hamnai.]

JOHON 9:4

Ano rohornaini samungno sal tongsani’-no chwng tangwi ma tongnai. Hor wngwi phai rwrwgo, aphuru khe kebo samung tangwi mannai ya.

RUMSONGNO POL SWIHORMANI 12:11

Ta seler di, panjalwi’-no samung khlai di. Bwkha ui-ui khe Subraini samung khlai di.

1 KORINTH 15:10

Hai phano Kaitor khairokma bai ang ba ang’-no tongo, bo ano khairokmani abo samung nang ya wng li ya. Tamo khe ang tei chonghorrokni slái teibo samung khlai kuk kha, abo sói ang khlaima ya, Kaitor khairogwi ani yak tẃi samung khlaiwi tongo.

1 KORINTH 16:10

Timothi norokni thani phai khe bono kaham khe yachak sók di, tamni hwn ba bobo ang hai’-no Subraini samung khlaiwi tongo.

1 KORINTH 9:24

Norok saui man ya da, batai thani borok kwbángma batai lai-o, tamo khe khoroksa simi se sokat mano. Hakhe norok sokat manna tẃi khe batai di.

1 KORINTH 9:26

Aboni bagwi ang ahai’-no batai ya; aboni bagwi ang yamusung thwngnai hai ahai’-no yamusung rw ya.

EPIS 5:16

Lama man kha hwn khe ta yakar di, tamni hwn khe omo wng kha mol hamya.

KOLOSAI 3:23

Norok mungsa swk phano samung tang khe abo borokni samung hwn yaui Subraini samung hwnwi khá rwui tang di.

1 SAMUEL 10:7

Abo hairok wng khe Kaitor khlai rwmani hai’-no khlai di; tamni hwn ba Kaitor nwng bai tongo.