PHILIPI 3:12 - Kok Borok (Re-edited) Bible (BSI)

¹² Ang omono man bai khe eba ang sói wng súk kha ang abo tẃi sa ya kho. Khristo Jisu mungsani bagwi ano bini borok khlai kha, abono manẃina hwnwi ang khachigwi tongo.

PHILIPI 3:12 Iomraidhean Croise

JOBNI BIJAP 17:9

Tamo khe borok sóirok le bórok tongma tẃi kheno tongnai, hakhe bórok tongmung srai-srai khe tongmani bagwi rakma saka raksanai.

LOBMUNG 119:5

Ao, nini raidarok rwksaui tongna bagwi, ani bwkha butharjak wngna tẃi wng thung!

LOBMUNG 138:8

Subraiyung ani bagwi khlainani chongmano khlainai, o Subraiyung nini pái phlai ya hamjakma mol brúm brúmno tong phlai-o. Nini yak bai snamjak ano ta khibi ja di. Daudni

LOBMUNG 42:1

Mwswisa twi kangjagwi twi naitukma hai, o Kaitor ani langmabo abo hai kheno nono kangwi khátango.

LOBMUNG 63:8

Ani langma nini utung utung khe tongo; nini yagra yak ano romwi tono.

LOBMUNG 84:2

Ang bwkha bai khe khátang súgo, au ang Subraiyungni nokhla naina muchungwi bwkha dunogo; ani sak-mang tongthokma bai khe Kwthang Kaitorno lobwi rwchabo.

LOBMUNG 94:15

tamni hwn ba bujsói khlaijaknai, tei bwkha kuphurrok abono khnaui tongnai.

PHRWNGMUNG 4:18

Borok sutrangrokni lama khe phung aidropni pohor hai kwchẃng, abo sajra jora wngsok ya sak teibo chẃng rwk-chẃng rwk wngo.

JISAIA 51:1

“Norok mwthangjakna muchungnairok, ani kók khna di, norok Subraiyungno naituknairok; norok ani kók khna di, norokbo holongni tikhlaijak kha tei buroni khurwi tisajaknai nai di.

HOSEA 6:3

Phai di chwng si lai anw, Subraiyungno teibo saui manna bagwi káphra lai anw; bo aiprom-poromni ulo pilala wngwi phai tẃi wngnai; bo chini thani uatwi klai tẃi khe phainai, masing molo pantwi hano misi tẃi khe phainai.

MATHAI 5:48

Chuknohani norokni Pha kaham wng tẃi norokbo katswi bo hai’-no kaham wng di.”

SAMUNG 9:15

Subrai bono hai hwnwi sa kha, “Tháng si di, bo ani borok chongjak, buini bororok, bugrarok tei Israilrokni thani ano sini rwna bagwi ang bono chong kha.

RUMSONGNO POL SWIHORMANI 8:39

nokhani mungsa phano man ya, ha tolanibo mungsa phano man ya chini Subrai Jisu Khristo tẃi Kaitor chwngno hamjakmani yakni chwngno swkagwi mannai bebak sirisiti o mungsa phano kw se kwrwi

1 KORINTH 13:10

hakhe a sói-sói phaiwi sók phai khe a kisicha tongmarok kwmaui thángnai.

1 KORINTH 13:12

Tabuk chwng nukmani abo aina hamya naima hai; aphuru chwng dadak-didik khe nuknai. Ang tabuk simani abo kisicha se, aphuru Kaitor tabuk ano saui manma tẃi’-no angbo bebak’-no saui man anw.

1 KORINTH 9:24

Norok saui man ya da, batai thani borok kwbángma batai lai-o, tamo khe khoroksa simi se sokat mano. Hakhe norok sokat manna tẃi khe batai di.

2 KORINTH 13:9

Chwng bel phano norok rak khe chwng khá srango. Aboni bagwi’-no norok rak súk thung hwnwi chwng suri sano.

2 KORINTH 7:1

Takhukrok, o kókrok bebak’-no chini thani rwjak, hakhe phai di, chwng bwsak bai bwkhani bebak kosomno sú lai anw, hakhe Kaitorno kiriui sói sói kwthar khe tong lai anw.

GALATIA 5:17

Tamni hwn khe chwng sakni muchungmani abo Phola muchungmano kebengo, phiya Phola muchungmani abo chini sakni muchungmano kebengo. O kwnwi wng kha bobo bini kena ari, hakhe norok muchung tẃi khlaiwi man ya.

EPIS 1:4

Kaitorni bwskango chwng kwthar khe majra kwrwi wngna tẃi khe o swngchar snamjak ya sini’-no Kaitor chwngno Khristo tẃi bini borok wngna hwnwi chong kha. Kaitor chwngno hamjakma bai

EPIS 4:12

Kaitorni samung khlaina hwnwi Kaitorni bebak bororokno tiyar khlaina bagwi, phiya Khristoni bwsakno rak rwna bagwi se bo omono khlai-o.

PHILIPI 1:1

Khristo Jisuni seleng Pol bai Timothi omono swihoro. Khristo Jisu bai thansa wngnairok Philipi-o tongnai Kaitorni bebak bororokno tei mothani bokhorokrok bai samung khlainairokno omono swihoro.

PHILIPI 3:16

Hai phano tabuk phano chwng rákhogwi tongmani abono rwksaui phai di, chwng him lai anw.

PHILIPI 3:3

Chwng se kubuini sakur rajakrok, a bororok ya, tamni hwn khe chwng Kaitorno bini Phola bai suri-o, phiya Khristo Jisu bai tongwi tongthok lai-o. Saka sakani samungno chwng poito khlai ya.

PHILIPI 3:8

Abórok simi ya, bebakni slái teibo belai kaham ani Subrai Khristo Jisuno saui manna bagwi ang joto manwi’-no kwma súk kha hwnwi tong kha. Bini bagwi ang joto manwino khibi kha; ang Khristono manna tẃi khe, phiya bo bai thansa wng súgwi manna tẃi khe abórok bebakno laisrwi bosrwi hwnwi khá romwi tong kha. Kerong rákhokma bai kaham wng kha ang abo tẃi buya. Khristono poito khlaima bising tẃi ang tabuk kaham hwnjak kha, omo Kaitorni aroni phaima se, phiya omoni yaphango hwn khe poito se.

1 THESALONIKI 5:15

Nai di, khoroksa swk phano hamya khlaijak khe bo samung hamya bai yagul ta su di, tamo khe norok kiching norok kaham máng se khlaina nai di, bebak bororoknibo kaham khlaina nai di.

2 THESALONIKI 2:13

Takhukrok, norok Subrai bai hamjaknairokni bagwi chwng Kaitorno hambai rwui máng ma tongo. Tamni hwn ba Pholani phan bai phiya norok kubuino poito khlaima bai Kaitorni borok kwthar khlaina bagwi norok’-no puila mwthangjak granai hwnwi Kaitor norokno chong kha.

1 TIMOTHI 5:10

bo samung kaham khlainai hwnjakthai; bo bwsa-bẃtẃirokno kaham khe tor rwnai wngthai, nogo borok phai khe kasa rwnai wngthai, Kaitorni bororokni yakung súnai wngthai, tekto mannairokno chubanai wngthai, phiya podrepot samung kaham khlaiwi tongnai wngthai.

1 TIMOTHI 6:19

Omo tẃi khe’-no bórok ulni bagwi khatima klai-o, a khatimani abo nokthai kwrak hai wngnai. Hakhe bórok sói kubui khe thangwi man anw.

HIBRU 12:14

Bebak borok bai’-no kwchang kwchang khe tongna nai di, phiya kwthar khe tongna nai di, tamni hwn khe abo hai khe tong ya khe kebo phano Subraino nuk glak.

HIBRU 12:23

Chuknoha-o bumung tisajaknai Kaitorni bwsla okrarok kuthumma kotoro norok bacha phai kha. Bebak bororokni buj thumnai Kaitorni thani, phiya kaham khlaijaknai borok sutrangrokni pholani thani norok bacha phai kha.

HIBRU 13:21

Khá kwchang rwnai Kaitor bini muchung tẃi tongna tẃi khe norokni nangmani joto manwi kahamno rw thung, hakhe Jisu Khristoni bising tẃi bo bini hamjakma hai’-no chini bisingo samung khlai thung. Hakhe mol brúm brúm Khristo chẃngsacha wng thung. Amen.

JAKOB 3:2

Chwng joto’-no cha ya khlai khlai-o. Kók sa thani uáisa phano kók cha ya sa ya borok bo wng kha kaham, bo bini bebak saknobo kók khna rwui mano.

1 PITOR 5:10

Norok srapsa sátokjak bai khe bebak khairokmani yaphang Kaitor, Khristo bai thansa wngma tẃi bo bai baksa chẃngsacha wng phlaina hwnwi norokno ringnai a Kaitor, bo sakphang’-no norokno kaham khlainai, rak rwnai, phan rwnai, songcha suknai.

2 PITOR 3:18

Norok chwngno Mwthangnai Subrai Jisu Khristoni khairokmano teibo si rwrwk di, bono teibo saui man rwrwk di. Tabukni simi mol brúm brúmno bo chẃngsacha wng thung. Amen.