PHILIPI 2:1 - Kok Borok (Re-edited) Bible (BSI)

¹ Khristo bai tongwi norok phan da man? Bo norokno hamjakmani abo norokno khá da kwchang rw? Phola bai norok thansa da wng? Norok kiching norok khá da khairok lai? Khá da khá súk lai?

PHILIPI 2:1 Iomraidhean Croise

LOBMUNG 133:1

Nai di, takhukrok thansa khe kwtha lai tongmani bwswk se kaham, bwswk se naithok!

JISAIA 16:11

Ang Moabni bagwi khá hamya wngwi swlwgwi kabo tei Kir-heresni bagwi khá mogo.

LUK SWIMANI KOTHOMA KAHAM 2:25

Aphuru Jerusalemo Simion hwnwi Kaitorno surinai borok kaham khoroksa tongo; Israilrok yókna hwnmano bo naisingwi tongo tei Phola Kwthar bono kobolwi tongo.

JOHON 14:18

“Ang norokno saichung susuk khe klang glak, ang norokni thani kiphilwi phai phir anw.

JOHON 14:27

“Ang norokno khá kwchang rwui klangnai, ang khá kwchangma hai ang norokno khá kwchang rwnai. O swngchar khá kwchang rwma hai khe ang norokno rw glak. Norok ta uana di, tabo ta kiri di.

JOHON 17:13

Ang tabuk nini aro phaina naiwi tongo, hakhe ang tongthokma hai’-no bórokbo jai kheno tongthokjak thung hwnwi ang o swngcharo tong sak o kókrokno sa-o.

SAMUNG 2:46

Bórok noktharo sal brúm brúm kuthum lai máng tong kha, phiya bórok khá sutrang khe khápang srangwi nok brúm brúm chá lai-o.

SAMUNG 4:32

Poito khlainairok wng kha khá bai khúk bai thansa. Khoroksa phano bini tongmano omorok ani máng se hwnwi sa ya, phiya ba janija tongma jora tẃi abono bebakni hwnwi bwkha romwi tong lai-o.

RUMSONGNO POL SWIHORMANI 5:5

Omo hai khatungwi chwng bwkha bái yaui tongo, tamni hwn khe Kaitor chwngno bwswk se hamjak abono bo chwngno rwmani Phola Kwthar tẃi chini bwkha-o kaham khe saui man rw kha.

RUMSONGNO POL SWIHORMANI 8:26

Abo hai kheno Pholabo chwng tẃi phan kwrwirokno chuba-o, tamni hwn khe bahai khe suri sanna nang abo chwng saui man ya; Phola bo sak se Kaitorni thani chini bagwi kengaiwi kók sa-o, abo búkhúkni kók bai saui man ya.

1 KORINTH 12:13

Abo hai kheno Judairokbo, buini bororokbo, selengrokbo, seleng yarokbo chwng bebak’-no bwsak kaisa wngna bagwi Phola kaisa bai baptisma wng bai kha, phiya chwng bebak’-no Phola kaisa’-no khanjak kha.

1 KORINTH 15:31

Takhukrok, sal brúm brúm ang thwinani yago klai-o! Chini Subrai Jisuni tẃi ang norokni bagwi kung chukma bai o kókno sa-o.

1 KORINTH 3:16

Norok saui man ya da, norok wng kha Kaitorni nokthar, phiya Kaitorni Phola norokni bisingo tongo.

2 KORINTH 13:14

Jisu Khristo norokno bebak’-no khairok thung, Kaitor norokno hamjak thung, Phola Kwthar norok bai baksa tong thung.

2 KORINTH 2:14

Ahai phano Kaitor hambai rwjak thung! Tamni hwn ba chwng Khristo bai thansa wngwi khaui tonjakrok hai khe Kaitor bai sal brúm brúm kwplaisa Khristoni misilo tẃijago. Kaitor báhai motom hai khe Khristoni kók chini yak tẃi ha gwnangwi pírwi tongo.

GALATIA 4:6

Norok Kaitorni bwsarok se abono phunukna bagwi Kaitor bini Sajlani Pholano chini bwkha bisingo rohor kha, a Phola “Apha, ani Apha,” hwnwi hwno.

GALATIA 5:22

Phola khe borokno hamjak rw-o, tongthok rw-o, khá kwchang rw-o, hama lok rw-o, khairok rw-o, Phola bai se borok kaham wngo, kók khnanai wngo,

EPIS 4:4

Norok Kaitor bai ringjagwi khatungmani abo kaisa se, abo haino bwsakbo kaisano tongo, Pholabo kaisano tongo,

PHILIPI 1:8

Norok bebak’-no ang khá sukmani abo Khristo Jisuni aroni ongkhorwi phaima se hwnwi sa khe o kók kubuino abo Kaitor saui mano.

PHILIPI 3:3

Chwng se kubuini sakur rajakrok, a bororok ya, tamni hwn khe chwng Kaitorno bini Phola bai suri-o, phiya Khristo Jisu bai tongwi tongthok lai-o. Saka sakani samungno chwng poito khlai ya.

KOLOSAI 2:2

Bórok khá tor súgwi manna tẃi khe, bórok hamjak laiwi thansa wngwi manna tẃi khe, phiya bórok kaham khe saui manma bai si súgwi manna tẃi khe ang omo hai samungno khlai-o. Hakhe bórok Kaitorni bisingni a kók saui man anw, abo’-no Khristo.

KOLOSAI 3:12

Norok wng kha Kaitorni borok; bo norokno hamjago, hakhe bini borok wngna bagwi noroknobo chong kha. Hakhe tabuk, norok maya chána nangnai, khairokna nangnai; norok borok koinene, borok kwchang tei khá kolok w se wngna nangnai.

HIBRU 6:18

Hakhe oro o kók tháinwi tongo, abo phérwi man ya, phiya a kókno tẃiwi Kaitor tatal saui man ya. Abo bai’-no chwng yókna bagwi bini aro khárnairok chwng manna hwnmani abono manna hwnwi kwrak khe khatungna bagwi chwng kaham khe khápang srangjak.

1 PITOR 1:2

Norok Apha Kaitor khá chapma tẃi chongjak kha, Jisu Khristoni kók khnana bagwi, phiya bini thẃi bai súchajakna bagwi norok Kaitorni Phola bai borok kwthar khlaijak bai kha. Norok belai khe khairokjak thung, belai khe khá kwchang rwjak thung.

1 JOHON 3:24

Bini dagimarokno khnanai borok bo bini bisingo tongo, Kaitorbo bini bisingo tongo. Tei omo tẃi khe bo chwngno rwmani Pholabo chini bisingo tongo hwnwi chwng saui mano.

1 JOHON 4:12

Uáisa phano khoroksa swk Kaitorno nuknai kwrwi kho; chwng kiching chwng hamjak lai khe Kaitor chini bisingo tongo, phiya bo chwngno sói khe hamjak rw-o.

1 JOHON 4:16

Hakhe Kaitor chwngno hamjakmano chwng sauibo mano poitobo khlai-o. Kaitor wng kha hamjakmung, hakhe hamjagwi tongnai borok bo Kaitorni bisingo tongo, Kaitorbo bini bisingo tongo.