Ezdra 3:12 - Bibl Koad 21: Ar Bibl e Brezhoneg evit ar Vretoned

¹² Ha kalz eus an aberzhourien, eus al Levited hag eus ar pennoù tadoù a oa oadet, hag o doa gwelet an ti kentañ, pa voe diazezet an ti-mañ dirak o daoulagad, a ouele kreñv. Ha kalz a re all a save o mouezh gant kriadennoù a levenez.

Ezdra 3:12 Iomraidhean Croise

Ezdra 3:13

Ha ne oa ket posupl disheñvelout trouz kriadennoù a levenez diouzh trouz garmoù ar bobl, rak ar bobl a laoske kriadennoù bras, hag an trouz a veze klevet a-bell.

Levr Job 8:7

Da zeroù a vo bet nebeut a dra, met da ziwezh a vo bras-meurbet.

Salmoù 126:6

An hini a zoug an had evit e skuilhañ, a gerzh en ur ouelañ, met dont a raio en-dro o kanañ gant levenez, pa zougo e feskennoù.

Salmoù 147:1

Meulit an AOTROU! Rak mat eo kanañ d'hon Doue, rak dous eo, dereat eo e veuliñ.

Izaia 41:14

Na'z pez ket aon, preñvig Jakob, nemorant eus Israel, da sikour a rin, eme an AOTROU, Sant Israel eo da zasprener.

Izaia 60:22

Ar bihanañ a zeuio da vezañ ur miliad, hag an disterañ ur vroad c'halloudus. Me an AOTROU a hasto kement-mañ en amzer dereat.

Jeremiaz 50:4

En deizioù-se, en amzer-se, eme an AOTROU, mibien Israel a zeuio, int ha mibien Juda a-gevret. Kerzhout a raint en ur ouelañ, hag e klaskint an AOTROU o Doue.

Agge 2:3

Piv a chom en ho touez eus ar re o deus gwelet an ti-mañ en e c'hloar kentañ? Ha penaos e welit anezhañ bremañ? Evel ma'z emañ, ha n'eo ket evel netra dirak ho taoulagad?

Zakaria 4:10

Rak piv eo en deus disprizet amzer an deroù bihan? Laouen e vint o welout ar gordenn-vuzuliañ e dorn Zorobabel. Ar seizh-se a zo lagadoù an AOTROU oc'h ergerzhout an douar holl.