Yunapi 12:15 - Godokono Wade Tabo

¹⁵ Ega꞉walo Godokono nilakapo tanalodo demaigana, modoboa꞉ la꞉ magumulo idite ebe igilo mula꞉ tanalone gama꞉. Numa꞉la꞉, kaka inamabunomote lumagino palilo apete, ebene ebete iyatawa꞉no lawete ebeno guda꞉te naoma꞉ iba꞉tamo dikalaemene, diyala, ebeno motolo olalati kawonomote maigate ebeno gudi magumulo epetapi bilibilinomate da꞉ba꞉elaoma꞉na꞉. Eiye, la꞉ nanisiwale! La꞉ magumulo idite ebeno tepo magumuno dowa tanalodo ebako kaka inamabuma꞉ eda꞉ma꞉ modoboa꞉!

Godokono Hido Tabo

¹⁵ Ba꞉gala Godokono malemale komodo duluhukuna, modoboha꞉ la꞉ ipuwalo etate ba꞉be ka꞉ka꞉ mula꞉ komone ga. Numa꞉la꞉, kakanomo ilinate lumagino palilo apete, ba꞉bene ebete iya꞉tawaheno lawete ebeno guguda꞉te nahama꞉ iba꞉tamo dikalamemene, diyala, ebeno genamalo olalati konomote uluhukuti ebeno gugudi ipuwalo komo hiliyonomate da꞉ ha꞉lahamena꞉. A꞉iye, la꞉ hidamo! La꞉ ipuwalo etate ebeno tepo ipuwoeno mauba komodo ba꞉bako kaka ilinama꞉ eda꞉ modoboha꞉!

Yunapi 12:15 Iomraidhean Croise

Luku 22:32

Ebema꞉ Saimono, nale a꞉ma꞉ mabuma꞉ Godoko a꞉toweoma꞉kamo, ebete a꞉ma꞉ eba walubilo a꞉imano nanitabokobi midi tanalote akalatidimene. A꞉ma꞉ natamo walo da꞉kolobigaemene, ebe tetelo a꞉imano ekaki elawokobi na꞉midiliye.”

1 Kolini 10:12

ebema꞉ potele ma kunu demalagidilona, “Na naimano elawamo modobolo utinamo,” ebe nanisiwale! Diyala, tete tatalila ebete kuba osiyodilo magumamo da꞉ba꞉negamene.

1 Kolini 13:8

Iyo, nilakapo kimalagidilo tanalote uwomua꞉ uwomua꞉ tetelo a꞉kolopoligonamene. Wiyasiya numa꞉la꞉, Godokono tepo magumuno woki awokalilame tanalate ebeno wokopiagodolo demaimionaka ebe tanalate kolopoligoma꞉na꞉, ega꞉walo epetapiate Unu Duliyomolono nopopino iyaiya tabamo Godokono Uliyanano elawamo da꞉kiyawaonaka, ebe tanalate uwomua꞉ tetelo a꞉ka꞉pola꞉nama꞉na꞉, ega꞉walo iyatawa tanalo bilibilinomate epagodolo da꞉pola꞉na ebe tanalate atumu kolopoligoma꞉na꞉.

1 Kolini 15:33

Diyala, epetapiate la꞉ a꞉da꞉ da꞉bemasigilitamene, ebema꞉ la꞉ nanisiwale! Nanitabola, ebe a꞉da꞉ elemasigipino tanaloma꞉ mulo wokiagopiate tabo ma kunu gelanaka, “A꞉ma꞉ kuba osiyodilolepiago depata꞉wenaka, iba꞉te a꞉imano tepo magumuno wadewade woki ka꞉kubailaema꞉na꞉.”

1 Kolini 5:6

Nanitabola, la꞉le damamawenama ebe tanalo ebe wade tanaloa꞉. La꞉ iyatawalata, epate ma kunu gelana, “Palowa bae kokalima꞉ kamiyalete gamagamaimino tuwae inamabu kelenomo palowago dekapiyailaemene, baete a꞉ka꞉tuwa꞉ ebo kegamagamamene.” Eba kunu la꞉imano taneba magumulo amama tanalo da꞉pesonomote ditana, ebe kubate a꞉ka꞉tuwa꞉ kawoma꞉ keda꞉mene, a, nanitabola꞉ka꞉?

2 Kolini 13:5

Ebema꞉ modobola la꞉ a꞉ka꞉tuwa꞉ la꞉imano iyaiya tanalo wadenomamo nulamenala꞉, mabu diyala, la꞉ nanitabokobi midi magumulo da꞉bilukula꞉wenama o da꞉ kilukula꞉wena꞉. La꞉ iyatawalata, la꞉ piyate nanitabokobi midi magumulo dilukula꞉wenama, Ya꞉su Kelisote la꞉ magumulo nanitabolo bokolina, a, nanitabola꞉ka꞉? Wiyasiya numa꞉la꞉, la꞉ piyate nanitabokobi midi magumulo ilukulina꞉no, la꞉ niyaniyalata!

2 Kolini 6:1

Ebema꞉ la꞉ niyaniyata, a Godokono nani wokopiate eba꞉go woko eba osiyodilonalo, ale la꞉ ma kunu toweolama꞉ta, Godote me opo epatamo dawokalimiya la꞉ piyate ebe nilakapo tanalo delawa꞉ima, la꞉ nanisiwale! Modoboa꞉ ebe nilakapo tanalote la꞉ magumulo nanitabo woko osiyodiloa꞉no la꞉ magumune wadewade da꞉ima꞉te ebema꞉ a꞉kemaimioma꞉na꞉.

Galesiya 2:13

Ebene A꞉ntiyoka duliyomololo dilukuliona, ebe Yu ekaki epetapi Banabasiko ebana, iba꞉te Pitakono osiyodilo tanalo umite tola꞉go atu kuba tanalo ebo kosiyodiliya, iyo, iba꞉te Yelusalema duliyomolo dubuno ubia꞉ tabo gela tanaloma꞉ toletoleote bae nao magumulo ibino Yua꞉pi nanitabokobi midipi ekaki gito miyapiya.

Galesiya 5:4

Eiye! La꞉ piyate Godokono Totomu Tabamo tudila꞉o tanalodo ebeno tuputupupima꞉ eda꞉oma꞉ dowagela꞉wenama, la꞉ a꞉ka꞉tuwa꞉ la꞉ Kelisogodone iyalo iyailimata, iyo, la꞉ Godokono nilakapolo gito ikaeame tanalone olobila꞉iyamata.

Epesese 5:3

Numa꞉la꞉, la꞉ Godokono tuputupu epolata, ebema꞉ me iyaiya kuba tanalo la꞉godolo akopola꞉nala꞉ — kamiyale ega꞉walo buwelemele pilo tanalo, apa꞉mo iyaiya ilipo osiyodilole tanalo, ega꞉walo mani kawonomamo malagidilo tanalo. Iyo, ebakobako kuba osiyodilole magumulo kuba da꞉peso idinomote la꞉godolo akoitanala꞉, nanitabokobi midia꞉piate la꞉imano ilukuli tanaloma꞉ kuba tabo gelakapoma꞉.

Kolosi 3:5

Ebema꞉ la꞉imano tepo magumulo kebe kuba ubi tanalate ka꞉pola꞉nale, modobola la꞉ ebe tanalo nanakapulama꞉la꞉. Iyo, kamiyale ega꞉walo buwelemele pilo tanalo, mako kuba osiyodiloma꞉ ubi iyati tanalo, kateneno ubi tanalamo tuduwata tanalo, apa꞉mo iyaiya ilipo osiyodilole tanalo, ega꞉walo mani kawonomamo malagidilo tanalo, modobola la꞉ ebe kuba tanalo bilibilinomo alukolenomo nalukola꞉la꞉. Numa꞉la꞉, potele mani kawonomamo demalagidilona, ebeno tanalo ebe ida꞉da꞉li amamalateledawano tanalo keba kunula꞉ka꞉ eba kunula.

Taitasi 1:15

A꞉ma꞉ numa꞉, kebe lumagino tepo magumulo kuba daleya woki kapiyate itamena꞉no, ebe mabuma꞉ ebete Godoko amamatema꞉ dosiyodilolenako ebe tanalo bilibilinomate atumu daleya꞉noma꞉ eda꞉onaka. Wiyasiya piyate Godokono tabo nanitabokobi midia꞉no, ega꞉walo piyate ibino tepo magumulo kuba daleya woki demalagidilolena, iba꞉te Godoko amamatema꞉ wade tanalo idi osiyodiloma꞉ modoboa꞉, mabu ebete iba꞉tamo dopamo dikalamiya ebe wade mulo tepo magumu ega꞉walo kimalagidilo tanalo iba꞉te iyalo a꞉kubailamiya.

Yunapi 3:12

Ebema꞉ naimano nanitabokobi midipi ekaki, la꞉ nanisiwale! Modoboa꞉ la꞉ magumulo idite ebeno tepo magumulo kuba kimalagidilo eba wagilimilo Nani Igilodawa Godokono ubi tanalamo tuduwata꞉noma꞉ eda꞉te ebegodone da꞉bolobigamene.

Yunapi 4:1

Ebema꞉ numa꞉la꞉, Godote dopamo aimano ewoniatamo kebe tabo nanitabolo kegiyale, ebe tabo ka꞉lo aimano tanaloma꞉ bitana, iyo, ale ebeno Wade Ela Ami opamo ka꞉nopila꞉oma꞉ ebete modobo gabo atamo ikaeamiya. Ebe mabuma꞉ modobola aimano ewonino tanalo eba malagidilolo ale tole tanalo lawete wadenomamo kilukulinamalema꞉, la꞉ magumulo idite ebe Wade Ela Ami Opamo nopegama꞉ ele gabo odidikapoma꞉.

Yunapi 4:11

Ebema꞉ modobola a nanitabokobi midipiate woko osiyodilo magumulo elawonomoma꞉ keda꞉omalema꞉, ale ebe Ela Ami Opamo nanitabolo ka꞉nopila꞉oma꞉, mabu piyate Godokono tabo dopamo dolowiya, iba꞉te ibino nanitabokobi midia꞉ tanalodo ele gabo keba kunu ka꞉nodidiye, a bilibilinomo magumulo kapiya idite eba kunu negama꞉ modoboa꞉.

Yunapi 6:11

ebema꞉ la꞉ mabuma꞉ naimano ubi kawonomote ma kunu itana, la꞉ bilibilinomate nanitabokobi midi tanalodo uwomu teta꞉mo atu woko elawonomamo na꞉kosiyodiloniyala꞉. Me gabodo la꞉ wade wiya laema꞉ demakopela꞉wenama, ebe tanalote la꞉tamo nanitabolo ka꞉pemene.

2 Pita 1:10

Ebema꞉ naimano ekakiala꞉, Godote la꞉ dopamo deka꞉la꞉mioletiyala ebe tanalo nanitabolo kawokalima꞉ema꞉, modobola la꞉ la꞉imano nanitabokobi midi magumulo elawoelawonomoma꞉ neda꞉iyala꞉, mabu nanitabola, la꞉ eba kunu dowagela꞉ema la꞉ agowa ukamidaola꞉wete a꞉ka꞉guda꞉ema.

2 Pita 2:18

Eiye! Iba꞉te iyaiya amama tabono tanalo ega꞉walo daedale wokino tanalo gelanaka, ega꞉walo piyate Godotamo olobila꞉ma꞉ kuba osiyodilole magumune ka꞉ma꞉nomo da꞉pemaimia, iba꞉te ebe epo ibino kateneno ubi tanalamo walo kuwatete Saitanakono kuba gabamo ebo magatalenaka.

2 Pita 3:11

Iyo, Godote me inamabu bilibilinomo me gabodo kopoliyadigalemene, ebema꞉ modobola la꞉ nanitabokobi midipiate la꞉imano ilukuli magumulo talenapima꞉ eda꞉olo ebe kapiyatamo na꞉tudila꞉onakiyala꞉,

2 Pita 3:14

Ebema꞉ naimano wadewade namutupiala꞉, la꞉ ebe Kawo Egela eba makopelenalo, modobola la꞉imano woki kawonomamo ma kunu niyatinakiyala꞉, la꞉le Godokono ololo apulo eba lamota꞉onalo la꞉imano osiyodilole tanalo bilibilinomo magumulo kapiya kuba da꞉pesonomo idite a꞉kitanamene. Iyo, la꞉le ebeno milo magumulo eba ilukulionalo, modoboa꞉ epetapiate la꞉imano osiyodilo tanalo kapiya idi kubama꞉ gelama꞉.

2 Yone 1:8

Wiyasiya la꞉imano tanalo iyanomola, mabu la꞉le kebe wade woko kowagilima꞉wiyama ebe wokote la꞉godolo olopoligoa꞉no, walone la꞉le la꞉imano wiya kawokawonomo nanitabolo ka꞉nuwatemamota. Ebe mabuma꞉ la꞉ a꞉ka꞉tuwa꞉ la꞉ wadenomamo nulamenala꞉, la꞉le ebe woko wiya anaetoamidakapoma꞉.