Yunapi 12:14 - Godokono Wade Tabo

¹⁴ Ebema꞉ nanitabokobi midipiala꞉, modobola la꞉ la꞉imano ubi tanalo ma kunu niyatiniyala꞉, la꞉ epo bilibilinomago Kawodawa Godokono milo tanalago eba ilukulinalo la꞉imano osiyodilole magumulo ebe kapiya kalakalakobi ka꞉mida꞉wenama꞉. Nanitabola, kebe lumagite aimano Kawodawa eba kunu kalakalakobi midia꞉no, ebete ebeno ololo a꞉ka꞉nuimene.

Godokono Hido Tabo

¹⁴ Ba꞉bema꞉ hibima꞉ midipa꞉la꞉, wadiyala la꞉ la꞉eno ubi komo ba꞉ma ka꞉na nihateniya꞉la꞉, la꞉ hiliyonomo tawakaluba꞉go Kodawa Godokono hete komago ba emedena la꞉eno ododili ipuwalo ebe kapiya kokalakaluiminama꞉. Ba꞉ hibila, kebe lumagiti aeno Kodawa ba꞉ba ka꞉na kalakaluimihino, ebete ebeno holoholo a꞉kanuma꞉mene.

Yunapi 12:14 Iomraidhean Croise

Maka 9:50

“Solu wadenomola, wiyasiya lumagi idino solu golate dalatidimene, a꞉ma꞉le walo solukobi midima꞉ a꞉ka꞉modoboaemene. Ebema꞉ Godokono solute la꞉imano taneba magumulo nitanamene, iyo, modobola idite idi nilakapoimilo eba kunu nilukuliniyala꞉.”

Luku 1:75

Iyo, ale ebeno ololo apulo talena epoma꞉ eba eda꞉onalo, ale uwomua꞉ tetelo ebeno tuputupu gabodo bowapata꞉lamenama꞉.”

Loma 12:18

Ega꞉walo kebe tetelo epate a꞉ma꞉ odiyoboa꞉no iba꞉go milolo kilukula꞉wenama꞉, modobola a꞉ma꞉ ibi bilibilinomago kapimiya eba kunu nilukuliniyala꞉.

Loma 14:19

Me mabuma꞉ modobola ale aimano woki kawonomamo milo gabo kapiya bowaloma꞉tanama꞉, ale eba kunu idite idi kowalubi, idite idi kowalubi, ale nanitabokobi midi magumulo kapepeoma꞉.

Loma 6:22

Wiyasiya kalakala kawonomola, Godote la꞉ kuba osiyodilole tanalono mibomibo magumune wagailitate, ebene me tetelo la꞉ tutu okoli magumulo ebeno wiya꞉ wokopima꞉ eda꞉onamata. Ebe mabuma꞉ la꞉imano oli okoli tanalone wade nolo da꞉ima꞉te eba pemaimionalo, Godote la꞉ ebeno talena wokopima꞉ ebo keka꞉la꞉ima꞉ta, ebene la꞉le ebeno uwomua꞉ igilo nanitabolo kelaemamota.

1 Kolini 1:10

Naimano nanitabokobi midipi ekakiala꞉, nale Kalowikono moto epagodone tabo ma kunu olowimo, iyaiya apaminateui tanalate la꞉godolo ba꞉pola꞉na. Ebema꞉ aimano Kawodawa Ya꞉su Kelisokono mailamo nale la꞉ ma kunu analemata, la꞉ Godokono ubi tanalo kapimiya kosiyodilola꞉wenakoma꞉ woki kapiya nelawenakiyala꞉ ebakobako iyaiya anagiyamida tanalate la꞉ magumulo pola꞉nakapoma꞉, iyo, modobola la꞉ la꞉imano tepo magumulo woki kapiyanomoma꞉ neda꞉onala꞉.

1 Kolini 13:12

Ebema꞉ nanitabola, me tetelo ale Godokono tanalo kelenomamo uminakoma꞉, lumagite molomolo galasilo ebeno ololo keba kunu kuminakole eba kunu, wiyasiya walone tetelo a ebeno ololo apuamo da꞉nemaimioma꞉ ebeno ololo wadenomamo ebo ka꞉nuimalema꞉. Iyo, me tetelo naimano iyatawa tanalate kubakubadopoma꞉ eda꞉ona, wiyasiya walone tetelo nale tanalo bilibilinomo wadenomamo kiyatawaomamo, Godote naimano tanalo bilibilinomo keba kunu kiyatawanale eba kunu.

2 Kolini 6:17

Ebema꞉ Kawodawate walo ma kunu kegiya, “Naimano epala꞉, modobola la꞉le nanitabokobi midia꞉pi magumune nemaimiala꞉, la꞉ ega꞉walo ibi la꞉le netewa iyaiya taneba magumulo kilukuliawenama꞉. Ebene nale kebe iyaiya tanalo kubama꞉ degenakomo, la꞉le ebe kuba daleya tanalo ako-ologilinakala꞉, mabu la꞉le me tabamo da꞉tudila꞉wenakoma, nale la꞉ nanitabolo kalakalago buwatenakomata.

2 Kolini 7:1

Naimano wadewade namutupiala꞉, numa꞉la꞉, Godote ebe wade tabo a nanitabokobi midipi mabuma꞉ nanitabonomolo a꞉kiyawaiya, ebema꞉ ale aimano apa꞉mo dosiyodilolenakoma꞉ ega꞉walo aimano tepo magumulo demalagidilolenakoma꞉, ebe tanalo bilibilinomo magumulo daleya tanalo idite itanama꞉ modoboa꞉. Iyo, kebe kuba daleya tanalate agodolo da꞉pola꞉na, modobola ale ebe tanalo bilibilinomo ukulaolete, Godoko toleme magumulo eba ilukulinalo aimano igilo kawonomo ebe kapiyatamo bikameonakoma꞉.

Galesiya 3:21

Ebema꞉ la꞉imano woki keba kunula꞉ka꞉? Godokono Totomu Tabono nopote Mosesedo da꞉pemaigiya ega꞉walo Godokono nani Tabonomo Ge Tanalono nopote Kelisogodone da꞉pemaigiya, ebe netewa nopo magumulo gowela tanalo ba꞉kitanale? Ao, kitana꞉! Gabote nitaniyataleka꞉ ale totomu tabo ida꞉mo tudila꞉o tanalodo nanitabo igilo kelaema꞉, Godote a ebe gabodo tuputupupima꞉ eba midinalo ebeno nopo idi atamo a꞉kikaeamiyana꞉.

Epesese 5:5

Ebema꞉ modobola la꞉ me tanalo wadenomamo nemalagidilala꞉. Piyate kamiyalela buwelemelela iba꞉tamo pilo tanalo dosiyodilolenaka, ega꞉walo piyate ibino apa꞉mo iyaiya ilipo tanalo dosiyodilolenaka, ega꞉walo piyate mani kawonomamo demalagidilona, ibi bilibilinomo magumulo idite Kelisoko ega꞉walo Godoko ibi netewapino Kawo Elawodawano tanalodo wade walubi tanalo idi a꞉kuminakomene. Numa꞉la꞉, potele mani kawonomamo demalagidilona, ebeno tanalo ebe ida꞉da꞉li amamalateledawano tanalo keba kunula꞉ka꞉ eba kunula.

Pilipai 3:12

Numa꞉la꞉, nale tabo ma kunu kegita꞉, nale Godogodone wade wiya laema꞉ naimano okoli magumulo tuputupunomoma꞉ iyalo ediyamo. Ao, eba kunua꞉, nale wiyasiya elawonomamo woko osiyodilo magumudo ebe wiya walone tetelo laema꞉ wagelenamo, mabu Ya꞉su Kelisote ebe wiya natamo nanitabonomolo ikanaema꞉ na ebema꞉ laweniya.

1 Tesalonaika 3:13

Ega꞉walo modobola aimano Kawodawa Ya꞉sute me gabodo la꞉imano tepo magumu na꞉kodakodailaemene, ebene ebete ebeno talena waloma꞉tapi bilibilinomago walo da꞉ka꞉pemene, ebe tetelo la꞉le aimano Nabiwi Godokono ololo apulo tuputupupinomoma꞉ eba eda꞉olo ebo ka꞉nelamota꞉onamamota, mabu la꞉ magumulo kapiya kuba idite a꞉kitanamene.

1 Tesalonaika 4:7

Numa꞉la꞉, Godote a nanitabokobi midipiate ebeno talena okoli tanalo magumulo ka꞉pola꞉nama꞉ a iyalo eka꞉miya, iyo, ebe ubia꞉nola ale kateneno kubakuba ubi tanalono osiyodilole magumulo kilukulinama꞉.

1 Tesalonaika 5:15

Ega꞉walo me tanalo idila. La꞉imano ilukuli magumulo idite iditamo kuba dosiyodilomene, ebe tetelo temeteme lawedawate kuba osiyodilodawatamo wiya akoikama꞉la꞉, wiyasiya modobola la꞉le tete bilibilinomolo la꞉imano ubi kawonomamo niyatinakiyala꞉, la꞉ magumulo idite iditamo nilakapo eba awokalimilo iyaiya epo epetapi bilibilinomatamo atumu wadewade tanalo kapiya ka꞉kosiyodilola꞉wenama꞉.

1 Timoti 6:11

O naimano gudu, a꞉ma꞉ wiyasiya Godokono wade wokodawalata, ebema꞉ modobola a꞉ma꞉ me kubakuba ubi tanalo bilibilinomo kuba nibote maigama꞉ gelo Godokono wade okoli tanalono iyaiya tanalo wadenomamo nowaloma꞉taliye. Ma kunu Godoko nanitabokobi midilo ebe kapiyatamo tuduwata tanalo, ega꞉walo ebeno tuputupu osiyodilole tanalo, ega꞉walo ebeno nilakapo kimalagidilo tanalo, ega꞉walo ebeno milo okoli tanalo, ega꞉walo temeteme magumulo kodakodalo uti tanalo, me tanalo bilibilinomate a꞉ma꞉godolo na꞉pola꞉nama꞉na꞉.

2 Timoti 2:22

Ebema꞉ naimano gudu, oli ape epate ibino kateneno kuba ubi gabodo kebe iyaiya tanalo kosiyodilolenake, a꞉ma꞉ ebe tanalo kuba nibote maigama꞉ gelo ebe osiyodilole magumune nalaula꞉nakiye. Modobola a꞉ma꞉ wiyasiya tuputupu okoli tanalo ega꞉walo nanitabokobi midi tanalo, nilakapo kimalagidilo tanalo ega꞉walo milo tanalo, ebe tanalo uwatema꞉ ubi kawonomamo niyatinakiye. Nanitabola, piyate ibino tepo magumulo daleya woki malagidiloa꞉no Kawodawa Godote ibi kowalubilima꞉ ebe da꞉toweomenaka, iba꞉te ibino ubi tanalo a꞉ma꞉go kapimiya eba kunu alomonaka.

Yunapi 12:10

Ega꞉walo me tanalo idila. Me opono nabiate ibi a꞉ka꞉tuwa꞉ ibino ubilo kebe tanalo wadewadenoma꞉ degelanaka, ale ebe tanalo kosiyodilolema꞉ iba꞉te iyaiya temeteme tanalamo tete da꞉pesolo a iyatuamenaka. Wiyasiya Godote ebeno wade igilo atamo ikaeaema꞉ ubi niyatina, ebema꞉ ebete a kebe tanalo osiyodilolema꞉ diyatuamenako a ebe tanalo nanitabolo dosiyodilolenakoma꞉, ebe tetelo ebete Wade-talenadawama꞉ keba kunu keda꞉nale, a atumu talenapima꞉ ka꞉keda꞉omalema꞉.

Yunapi 9:28

Ebema꞉ numa꞉la꞉, Kelisoko ebe atumu, kapiya tetenomolo ebe a꞉ka꞉tuwa꞉ ebeno ape kalimagono nilakapo inamabuma꞉ da꞉midiya, epo epetapi bilibilinomono kuba osiyodilole tanalo iyabaiamo alomonomo ebo alomolamiya. Ebe mabuma꞉ ebete walo da꞉ka꞉pemene, ebe tetelo ebete epetapino kuba osiyodilole tanalo egebolelaema꞉ walo a꞉ka꞉pa꞉emene, ao, ebe tetelo piyate ebeno pe tanaloma꞉ olowiolo demakopelena, ebete ebe epono igilo nanitabolo mula꞉lelamete uwomua꞉ uwomua꞉ tetelo iba꞉go bokolinamene.

1 Pita 3:11

Ega꞉walo modobola ebete kuba osiyodilole magumune olobigate wadewade tanalo nosiyodilolenakomene, iyo, ebete ebeno ubi kawonomamo niyatinakomene epetapi bilibilinomago milolo kilukulinama꞉.

1 Pita 3:13

Ebema꞉ a꞉ma꞉le wadewade tanalo osiyodilolema꞉ elawonomoma꞉ deda꞉emene, ebe tetelo lumagi idite ubi a꞉kiyatimene a꞉ma꞉ kubaima꞉.

2 Pita 3:11

Iyo, Godote me inamabu bilibilinomo me gabodo kopoliyadigalemene, ebema꞉ modobola la꞉ nanitabokobi midipiate la꞉imano ilukuli magumulo talenapima꞉ eda꞉olo ebe kapiyatamo na꞉tudila꞉onakiyala꞉,

2 Pita 3:18

Ebema꞉ la꞉ aimano Kawodawa ega꞉walo Igilo Mula꞉leamedawa Ya꞉su Kelisokono tanalo eba iyatawaonalo ebeno nilakapo magumulo napepeonala꞉. Modobola amama tanalote me tetelo ega꞉walo uwomua꞉ uwomua꞉ tetelo ebegodolo nitanamene! Me ebe naimano tabo uwomula. Taula.

3 Yone 1:11

Ebema꞉ naimano wade namutudawa, a꞉ma꞉ lumagi idino kuba osiyodilo tanalo duma꞉emene, ebe akoibamita꞉la꞉. Modobola a꞉ma꞉ wade tanalote nowaloma꞉tiye, mabu piyate wadewade tanalo dosiyodilolena ibi Godokono gudila, wiyasiya piyate kubakuba tanalo dosiyodilolena iba꞉te dopamo Godokono nanitabo tanalo kumiya꞉.